10. දසමවග්ගො

(102) 8. සීලං න චිත්තානුපරිවත්තීතිකථා

595. සීලං න චිත්තානුපරිවත්තීති? ආමන්තා. රූපං… නිබ්බානං… චක්ඛායතනං…පෙ… ඵොට්ඨබ්බායතනන්ති? න හෙවං වත්තබ්බෙ…පෙ… සීලං න චිත්තානුපරිවත්තීති? ආමන්තා. ඵස්සො න චිත්තානුපරිවත්තීති? න හෙවං වත්තබ්බෙ…පෙ… සීලං න චිත්තානුපරිවත්තීති? ආමන්තා. වෙදනා…පෙ… සඤ්ඤා… චෙතනා… සද්ධා… වීරියං… සති… සමාධි…පෙ… පඤ්ඤා න චිත්තානුපරිවත්තීති? න හෙවං වත්තබ්බෙ…පෙ….

ඵස්සො චිත්තානුපරිවත්තීති? ආමන්තා. සීලං චිත්තානුපරිවත්තීති? න හෙවං වත්තබ්බෙ…පෙ… වෙදනා…පෙ… සඤ්ඤා… චෙතනා … සද්ධා… වීරියං… සති… සමාධි…පෙ… පඤ්ඤා චිත්තානුපරිවත්තීති? ආමන්තා. සීලං චිත්තානුපරිවත්තීති? න හෙවං වත්තබ්බෙ…පෙ….

596. සම්මාවාචා න චිත්තානුපරිවත්තීති? ආමන්තා. සම්මාදිට්ඨි න චිත්තානුපරිවත්තීති? න හෙවං වත්තබ්බෙ…පෙ… සම්මාවාචා න චිත්තානුපරිවත්තීති? ආමන්තා. සම්මාසඞ්කප්පො… සම්මාවායාමො… සම්මාසති…පෙ… සම්මාසමාධි න චිත්තානුපරිවත්තීති? න හෙවං වත්තබ්බෙ…පෙ….

සම්මාකම්මන්තො…පෙ… සම්මාආජීවො න චිත්තානුපරිවත්තීති? ආමන්තා. සම්මාදිට්ඨි න චිත්තානුපරිවත්තීති? න හෙවං වත්තබ්බෙ…පෙ… සම්මාආජීවො න චිත්තානුපරිවත්තීති? ආමන්තා. සම්මාසඞ්කප්පො… සම්මාවායාමො… සම්මාසති…පෙ… සම්මාසමාධි න චිත්තානුපරිවත්තීති? න හෙවං වත්තබ්බෙ…පෙ….

සම්මාදිට්ඨි චිත්තානුපරිවත්තීති? ආමන්තා. සම්මාවාචා චිත්තානුපරිවත්තීති? න හෙවං වත්තබ්බෙ…පෙ… සම්මාදිට්ඨි චිත්තානුපරිවත්තීති? ආමන්තා. සම්මාකම්මන්තො…පෙ… සම්මාආජීවො චිත්තානුපරිවත්තීති? න හෙවං වත්තබ්බෙ…පෙ….

සම්මාසඞ්කප්පො … සම්මාවායාමො… සම්මාසති…පෙ… සම්මාසමාධි චිත්තානුපරිවත්තීති? ආමන්තා. සම්මාවාචා චිත්තානුපරිවත්තීති? න හෙවං වත්තබ්බෙ…පෙ… සම්මාසමාධි චිත්තානුපරිවත්තීති? ආමන්තා. සම්මාකම්මන්තො…පෙ… සම්මාආජීවො චිත්තානුපරිවත්තීති? න හෙවං වත්තබ්බෙ…පෙ….

597. න වත්තබ්බං – ‘‘සීලං න චිත්තානුපරිවත්තී’’ති? ආමන්තා. සීලෙ උප්පජ්ජිත්වා නිරුද්ධෙ දුස්සීලො හොතීති? න හෙවං වත්තබ්බෙ. තෙන හි සීලං න චිත්තානුපරිවත්තීති.

සීලං න චිත්තානුපරිවත්තීතිකථා නිට්ඨිතා.