10. දසමවග්ගො

(96) 2. රූපං මග්ගොතිකථා

573. මග්ගසමඞ්ගිස්ස රූපං මග්ගොති? ආමන්තා. සාරම්මණං, අත්ථි තස්ස ආවට්ටනා ආභොගො සමන්නාහාරො මනසිකාරො චෙතනා පත්ථනා පණිධීති? න හෙවං වත්තබ්බෙ…පෙ… නනු අනාරම්මණං, නත්ථි තස්ස ආවට්ටනා…පෙ… පණිධීති? ආමන්තා. හඤ්චි අනාරම්මණං, නත්ථි තස්ස ආවට්ටනා…පෙ… පණිධි; නො ච වත රෙ වත්තබ්බෙ – ‘‘මග්ගසමඞ්ගිස්ස රූපං මග්ගො’’ති.

සම්මාවාචා මග්ගොති? ආමන්තා. සාරම්මණා, අත්ථි තාය ආවට්ටනා…පෙ… පණිධීති? න හෙවං වත්තබ්බෙ…පෙ… නනු අනාරම්මණා, නත්ථි තාය ආවට්ටනා…පෙ… පණිධීති? ආමන්තා. හඤ්චි අනාරම්මණා, නත්ථි තාය ආවට්ටනා…පෙ… පණිධි; නො ච වත රෙ වත්තබ්බෙ – ‘‘සම්මාවාචා මග්ගො’’ති.

සම්මාකම්මන්තො …පෙ… සම්මාආජීවො මග්ගොති? ආමන්තා. සාරම්මණො, අත්ථි තස්ස ආවට්ටනා…පෙ… පණිධීති? න හෙවං වත්තබ්බෙ…පෙ… නනු අනාරම්මණො, නත්ථි තස්ස ආවට්ටනා…පෙ… පණිධීති? ආමන්තා. හඤ්චි අනාරම්මණො, නත්ථි තස්ස ආවට්ටනා…පෙ… පණිධි; නො ච වත රෙ වත්තබ්බෙ – ‘‘සම්මාආජීවො මග්ගො’’ති.

574. සම්මාදිට්ඨි මග්ගො, සා ච සාරම්මණා, අත්ථි තාය ආවට්ටනා…පෙ… පණිධීති? ආමන්තා. සම්මාවාචා මග්ගො, සා ච සාරම්මණා, අත්ථි තාය ආවට්ටනා…පෙ… පණිධීති? න හෙවං වත්තබ්බෙ …පෙ… සම්මාදිට්ඨි මග්ගො, සා ච සාරම්මණා, අත්ථි තාය ආවට්ටනා…පෙ… පණිධීති? ආමන්තා. සම්මාකම්මන්තො…පෙ… සම්මාආජීවො මග්ගො, සො ච සාරම්මණො, අත්ථි තස්ස ආවට්ටනා…පෙ… පණිධීති? න හෙවං වත්තබ්බෙ…පෙ… සම්මාසඞ්කප්පො…පෙ… සම්මාවායාමො…පෙ… සම්මාසති…පෙ….

සම්මාසමාධි මග්ගො, සො ච සාරම්මණො, අත්ථි තස්ස ආවට්ටනා…පෙ… පණිධීති? ආමන්තා. සම්මාවාචා මග්ගො, සා ච සාරම්මණා, අත්ථි තාය ආවට්ටනා…පෙ… පණිධීති? න හෙවං වත්තබ්බෙ…පෙ… සම්මාසමාධි මග්ගො, සො ච සාරම්මණො, අත්ථි තස්ස ආවට්ටනා…පෙ… පණිධීති? ආමන්තා. සම්මාකම්මන්තො…පෙ… සම්මාආජීවො මග්ගො, සො ච සාරම්මණො, අත්ථි තස්ස ආවට්ටනා…පෙ… පණිධීති? න හෙවං වත්තබ්බෙ…පෙ….

සම්මාවාචා මග්ගො, සා ච අනාරම්මණා, නත්ථි තාය ආවට්ටනා…පෙ… පණිධීති? ආමන්තා. සම්මාදිට්ඨි මග්ගො, සා ච අනාරම්මණා, නත්ථි තාය ආවට්ටනා…පෙ… පණිධීති? න හෙවං වත්තබ්බෙ…පෙ… සම්මාවාචා මග්ගො, සා ච අනාරම්මණා, නත්ථි තාය ආවට්ටනා…පෙ… පණිධීති? ආමන්තා. සම්මාසඞ්කප්පො…පෙ… සම්මාවායාමො… සම්මාසති … සම්මාසමාධි මග්ගො, සො ච අනාරම්මණො, නත්ථි තස්ස ආවට්ටනා…පෙ… පණිධීති? න හෙවං වත්තබ්බෙ…පෙ….

සම්මාකම්මන්තො …පෙ… සම්මාආජීවො මග්ගො, සො ච අනාරම්මණො, නත්ථි තස්ස ආවට්ටනා…පෙ… පණිධීති? ආමන්තා. සම්මාදිට්ඨි… සම්මාසඞ්කප්පො… සම්මාවායාමො… සම්මාසති…පෙ… සම්මාසමාධි මග්ගො, සො ච අනාරම්මණො, නත්ථි තස්ස ආවට්ටනා…පෙ… පණිධීති? න හෙවං වත්තබ්බෙ…පෙ….

575. න වත්තබ්බං – ‘‘මග්ගසමඞ්ගිස්ස රූපං මග්ගො’’ති? ආමන්තා. නනු සම්මාවාචා සම්මාකම්මන්තො සම්මාආජීවො මග්ගොති? ආමන්තා. හඤ්චි සම්මාවාචා සම්මාකම්මන්තො සම්මාආජීවො මග්ගො, තෙන වත රෙ වත්තබ්බෙ – ‘‘මග්ගසමඞ්ගිස්ස රූපං මග්ගො’’ති.

රූපං මග්ගොතිකථා නිට්ඨිතා.