(92) 9. න යථාචිත්තස්ස වාචාතිකථා

564. න යථාචිත්තස්ස වාචාති? ආමන්තා. අඵස්සකස්ස වාචා අවෙදනකස්ස වාචා අසඤ්ඤකස්ස වාචා අචෙතනකස්ස වාචා අචිත්තකස්ස වාචාති? න හෙවං වත්තබ්බෙ…පෙ… නනු සඵස්සකස්ස වාචා සවෙදනකස්ස වාචා සසඤ්ඤකස්ස වාචා සචෙතනකස්ස වාචා සචිත්තකස්ස වාචාති? ආමන්තා. හඤ්චි සඵස්සකස්ස වාචා…පෙ… සචිත්තකස්ස වාචා, නො ච වත රෙ වත්තබ්බෙ – ‘‘න යථාචිත්තස්ස වාචා’’ති.

න යථාචිත්තස්ස වාචාති? ආමන්තා. අනාවට්ටෙන්තස්ස [අනාවට්ටන්තස්ස (පී.), අනාවජ්ජන්තස්ස (සී. ස්‍යා. ක.) කථා. 484 පස්සිතබ්බං] වාචා…පෙ… අනාභොගස්ස වාචා…පෙ… අප්පණිදහන්තස්ස වාචාති? න හෙවං වත්තබ්බෙ…පෙ… නනු ආවට්ටෙන්තස්ස වාචා ආභොගස්ස වාචා…පෙ… පණිදහන්තස්ස වාචාති? ආමන්තා. හඤ්චි ආවට්ටෙන්තස්ස වාචා ආභොගස්ස වාචා පණිදහන්තස්ස වාචා, නො ච වත රෙ වත්තබ්බෙ – ‘‘න යථාචිත්තස්ස වාචා’’ති.

න යථාචිත්තස්ස වාචාති? ආමන්තා. නනු වාචා චිත්තසමුට්ඨානා චිත්තෙන සහජාතා චිත්තෙන සහ එකුප්පාදාති? ආමන්තා. හඤ්චි වාචා චිත්තසමුට්ඨානා චිත්තෙන සහජාතා චිත්තෙන සහ එකුප්පාදා, නො ච වත රෙ වත්තබ්බෙ – ‘‘න යථාචිත්තස්ස වාචා’’ති.

න යථාචිත්තස්ස වාචාති? ආමන්තා. න භණිතුකාමො භණති, න කථෙතුකාමො කථෙති, න ආලපිතුකාමො ආලපති, න වොහරිතුකාමො වොහරතීති? න හෙවං වත්තබ්බෙ…පෙ… නනු භණිතුකාමො භණති, කථෙතුකාමො කථෙති, ආලපිතුකාමො ආලපති, වොහරිතුකාමො වොහරතීති? ආමන්තා. හඤ්චි භණිතුකාමො භණති, කථෙතුකාමො කථෙති, ආලපිතුකාමො ආලපති, වොහරිතුකාමො වොහරති, නො ච වත රෙ වත්තබ්බෙ – ‘‘න යථාචිත්තස්ස වාචා’’ති.

565. න වත්තබ්බං – ‘‘න යථාචිත්තස්ස වාචා’’ති? ආමන්තා. නනු අත්ථි කොචි ‘‘අඤ්ඤං භණිස්සාමී’’ති අඤ්ඤං භණති, ‘‘අඤ්ඤං කථෙස්සාමී’’ති අඤ්ඤං කථෙති, ‘‘අඤ්ඤං ආලපිස්සාමී’’ති අඤ්ඤං ආලපති, ‘‘අඤ්ඤං වොහරිස්සාමී’’ති අඤ්ඤං වොහරතීති? ආමන්තා. හඤ්චි අත්ථි කොචි ‘‘අඤ්ඤං භණිස්සාමී’’ති අඤ්ඤං භණති,…පෙ… ‘‘අඤ්ඤං වොහරිස්සාමී’’ති අඤ්ඤං වොහරති, තෙන වත රෙ වත්තබ්බෙ – ‘‘න යථාචිත්තස්ස වාචා’’ති.

න යථාචිත්තස්ස වාචාතිකථා නිට්ඨිතා.