(93) 10. න යථාචිත්තස්ස කායකම්මන්තිකථා

566. න යථාචිත්තස්ස කායකම්මන්ති? ආමන්තා. අඵස්සකස්ස කායකම්මං…පෙ… අචිත්තකස්ස කායකම්මන්ති? න හෙවං වත්තබ්බෙ…පෙ… නනු සඵස්සකස්ස කායකම්මං…පෙ… සචිත්තකස්ස කායකම්මන්ති? ආමන්තා. හඤ්චි සඵස්සකස්ස කායකම්මං…පෙ… සචිත්තකස්ස කායකම්මං, නො ච වත රෙ වත්තබ්බෙ – ‘‘න යථාචිත්තස්ස කායකම්ම’’න්ති.

න යථාචිත්තස්ස කායකම්මන්ති? ආමන්තා. අනාවට්ටෙන්තස්ස කායකම්මං…පෙ… අප්පණිදහන්තස්ස කායකම්මන්ති? න හෙවං වත්තබ්බෙ…පෙ… නනු ආවට්ටෙන්තස්ස කායකම්මං…පෙ… පණිදහන්තස්ස කායකම්මන්ති? ආමන්තා. හඤ්චි ආවට්ටෙන්තස්ස කායකම්මං…පෙ… පණිදහන්තස්ස කායකම්මං, නො ච වත රෙ වත්තබ්බෙ – ‘‘න යථාචිත්තස්ස කායකම්ම’’න්ති.

න යථාචිත්තස්ස කායකම්මන්ති? ආමන්තා. නනු කායකම්මං චිත්තසමුට්ඨානං චිත්තෙන සහජාතං චිත්තෙන සහ එකුප්පාදන්ති? ආමන්තා. හඤ්චි කායකම්මං චිත්තසමුට්ඨානං චිත්තෙන සහජාතං චිත්තෙන සහ එකුප්පාදං, නො ච වත රෙ වත්තබ්බෙ – ‘‘න යථාචිත්තස්ස කායකම්ම’’න්ති.

න යථාචිත්තස්ස කායකම්මන්ති? ආමන්තා. න අභික්කමිතුකාමො අභික්කමති, න පටික්කමිතුකාමො පටික්කමති, න ආලොකෙතුකාමො ආලොකෙති, න විලොකෙතුකාමො විලොකෙති, න සමිඤ්ජිතුකාමො සමිඤ්ජෙති, න පසාරෙතුකාමො පසාරෙතීති? න හෙවං වත්තබ්බෙ…පෙ…. නනු අභික්කමිතුකාමො අභික්කමති, පටික්කමිතුකාමො පටික්කමති, ආලොකෙතුකාමො ආලොකෙති, විලොකෙතුකාමො විලොකෙති, සමිඤ්ජිතුකාමො සමිඤ්ජෙති, පසාරෙතුකාමො පසාරෙතීති? ආමන්තා. හඤ්චි අභික්කමිතුකාමො අභික්කමති…පෙ… පසාරෙතුකාමො පසාරෙති, නො ච වත රෙ වත්තබ්බෙ – ‘‘න යථාචිත්තස්ස කායකම්ම’’න්ති.

567. න වත්තබ්බං – ‘‘න යථාචිත්තස්ස කායකම්ම’’න්ති? ආමන්තා. නනු අත්ථි කොචි ‘‘අඤ්ඤත්‍ර ගච්ඡිස්සාමී’’ති අඤ්ඤත්‍ර ගච්ඡති…පෙ… ‘‘අඤ්ඤං පසාරෙස්සාමී’’ති අඤ්ඤං පසාරෙතීති? ආමන්තා. හඤ්චි අත්ථි කොචි ‘‘අඤ්ඤත්‍ර ගච්ඡිස්සාමී’’ති අඤ්ඤත්‍ර ගච්ඡති…පෙ… ‘‘අඤ්ඤං පසාරෙස්සාමී’’ති අඤ්ඤං පසාරෙති, තෙන වත රෙ වත්තබ්බෙ – ‘‘න යථාචිත්තස්ස කායකම්ම’’න්ති.

න යථාචිත්තස්ස කායකම්මන්තිකථා නිට්ඨිතා.