(77) 5. රූපධාතුකථා

515. රූපිනො ධම්මා රූපධාතූති? ආමන්තා. රූපං භවො ගති සත්තාවාසො සංසාරො යොනි විඤ්ඤාණට්ඨිති අත්තභාවපටිලාභොති? න හෙවං වත්තබ්බෙ…පෙ… අත්ථි රූපූපගං කම්මන්ති? න හෙවං වත්තබ්බෙ…පෙ… අත්ථි රූපූපගා සත්තාති? න හෙවං වත්තබ්බෙ…පෙ… රූපෙ සත්තා ජායන්ති ජීයන්ති මීයන්ති චවන්ති උපපජ්ජන්තීති? න හෙවං වත්තබ්බෙ…පෙ… රූපෙ අත්ථි රූපං වෙදනා සඤ්ඤා සඞ්ඛාරා විඤ්ඤාණන්ති? න හෙවං වත්තබ්බෙ…පෙ… රූපං පඤ්චවොකාරභවොති? න හෙවං වත්තබ්බෙ…පෙ….

රූපධාතු භවො ගති…පෙ… අත්තභාවපටිලාභොති? ආමන්තා. රූපං භවො ගති…පෙ… අත්තභාවපටිලාභොති? න හෙවං වත්තබ්බෙ…පෙ… අත්ථි රූපධාතූපගං කම්මන්ති? ආමන්තා. අත්ථි රූපූපගං කම්මන්ති? න හෙවං වත්තබ්බෙ…පෙ… අත්ථි රූපධාතූපගා සත්තාති? ආමන්තා. අත්ථි රූපූපගා සත්තාති? න හෙවං වත්තබ්බෙ…පෙ….

රූපධාතුයා සත්තා ජායන්ති ජීයන්ති මීයන්ති චවන්ති උපපජ්ජන්තීති? ආමන්තා. රූපෙ සත්තා ජායන්ති ජීයන්ති මීයන්ති චවන්ති උපපජ්ජන්තීති? න හෙවං වත්තබ්බෙ…පෙ… රූපධාතුයා අත්ථි රූපං වෙදනා සඤ්ඤා සඞ්ඛාරා විඤ්ඤාණන්ති? ආමන්තා. රූපෙ අත්ථි රූපං වෙදනා සඤ්ඤා සඞ්ඛාරා විඤ්ඤාණන්ති? න හෙවං වත්තබ්බෙ…පෙ… රූපධාතු පඤ්චවොකාරභවොති? ආමන්තා. රූපං පඤ්චවොකාරභවොති? න හෙවං වත්තබ්බෙ…පෙ….

516. රූපිනො ධම්මා රූපධාතු, කාමධාතුයා අත්ථි රූපන්ති? ආමන්තා. සාව කාමධාතු, සා රූපධාතූති? න හෙවං වත්තබ්බෙ…පෙ… සාව කාමධාතු, සා රූපධාතූති? ආමන්තා. කාමභවෙන සමන්නාගතො පුග්ගලො ද්වීහි භවෙහි සමන්නාගතො හොති – කාමභවෙන ච රූපභවෙන චාති? න හෙවං වත්තබ්බෙ.

රූපධාතුකථා නිට්ඨිතා.