(70) 8. ජරාමරණං විපාකොතිකථා

495. ජරාමරණං විපාකොති? ආමන්තා. සුඛවෙදනියං දුක්ඛවෙදනියං අදුක්ඛමසුඛවෙදනියං, සුඛාය වෙදනාය සම්පයුත්තං, දුක්ඛාය වෙදනාය සම්පයුත්තං, අදුක්ඛමසුඛාය වෙදනාය සම්පයුත්තං, ඵස්සෙන සම්පයුත්තං, වෙදනාය සම්පයුත්තං, සඤ්ඤාය සම්පයුත්තං, චෙතනාය සම්පයුත්තං, චිත්තෙන සම්පයුත්තං, සාරම්මණං; අත්ථි තස්ස ආවට්ටනා ආභොගො සමන්නාහාරො මනසිකාරො චෙතනා පත්ථනා පණිධීති? න හෙවං වත්තබ්බෙ…පෙ… නනු න සුඛවෙදනියං න දුක්ඛවෙදනියං…පෙ… අනාරම්මණං; නත්ථි තස්ස ආවට්ටනා…පෙ… පණිධීති? ආමන්තා. හඤ්චි න සුඛවෙදනියං න දුක්ඛවෙදනියං…පෙ… අනාරම්මණං; නත්ථි තස්ස ආවට්ටනා …පෙ… පණිධි, නො ච වත රෙ වත්තබ්බෙ – ‘‘ජරාමරණං විපාකො’’ති.

ඵස්සො විපාකො, ඵස්සො සුඛවෙදනියො දුක්ඛවෙදනියො…පෙ… සාරම්මණො; අත්ථි තස්ස ආවට්ටනා…පෙ… පණිධීති? ආමන්තා. ජරාමරණං විපාකො, ජරාමරණං සුඛවෙදනියං දුක්ඛවෙදනියං…පෙ… සාරම්මණං; අත්ථි තස්ස ආවට්ටනා…පෙ… පණිධීති? න හෙවං වත්තබ්බෙ…පෙ….

ජරාමරණං විපාකො, ජරාමරණං න සුඛවෙදනියං න දුක්ඛවෙදනියං…පෙ… අනාරම්මණං; නත්ථි තස්ස ආවට්ටනා…පෙ… පණිධීති? ආමන්තා. ඵස්සො විපාකො, ඵස්සො න සුඛවෙදනියො න දුක්ඛවෙදනියො…පෙ… අනාරම්මණො; නත්ථි තස්ස ආවට්ටනා…පෙ… පණිධීති? න හෙවං වත්තබ්බෙ…පෙ….

496. අකුසලානං ධම්මානං ජරාමරණං, අකුසලානං ධම්මානං විපාකොති? ආමන්තා. කුසලානං ධම්මානං ජරාමරණං, කුසලානං ධම්මානං විපාකොති? න හෙවං වත්තබ්බෙ…පෙ….

කුසලානං ධම්මානං ජරාමරණං, න වත්තබ්බං – ‘‘කුසලානං ධම්මානං විපාකො’’ති? ආමන්තා. අකුසලානං ධම්මානං ජරාමරණං, න වත්තබ්බං – ‘‘අකුසලානං ධම්මානං විපාකො’’ති? න හෙවං වත්තබ්බෙ…පෙ….

කුසලානං ධම්මානං ජරාමරණං, අකුසලානං ධම්මානං විපාකොති? ආමන්තා. අකුසලානං ධම්මානං ජරාමරණං, කුසලානං ධම්මානං විපාකොති? න හෙවං වත්තබ්බෙ…පෙ….

අකුසලානං ධම්මානං ජරාමරණං, න වත්තබ්බං – ‘‘කුසලානං ධම්මානං විපාකො’’ති? ආමන්තා. කුසලානං ධම්මානං ජරාමරණං, න වත්තබ්බං – ‘‘අකුසලානං ධම්මානං විපාකො’’ති? න හෙවං වත්තබ්බෙ…පෙ….

කුසලානඤ්ච අකුසලානඤ්ච ධම්මානං ජරාමරණං, අකුසලානං ධම්මානං විපාකොති? ආමන්තා. කුසලානඤ්ච අකුසලානඤ්ච ධම්මානං ජරාමරණං, කුසලානං ධම්මානං විපාකොති? න හෙවං වත්තබ්බෙ…පෙ….

කුසලානඤ්ච අකුසලානඤ්ච ධම්මානං ජරාමරණං, න වත්තබ්බං – ‘‘කුසලානං ධම්මානං විපාකො’’ති? ආමන්තා. කුසලානඤ්ච අකුසලානඤ්ච ධම්මානං ජරාමරණං, න වත්තබ්බං – ‘‘අකුසලානං ධම්මානං විපාකො’’ති? න හෙවං වත්තබ්බෙ…පෙ….

497. න වත්තබ්බං – ‘‘ජරාමරණං විපාකො’’ති? ආමන්තා. නනු අත්ථි දුබ්බණ්ණසංවත්තනියං කම්මං අප්පායුකසංවත්තනියං කම්මන්ති? ආමන්තා. හඤ්චි අත්ථි දුබ්බණ්ණසංවත්තනියං කම්මං අප්පායුකසංවත්තනියං කම්මං, තෙන වත රෙ වත්තබ්බෙ – ‘‘ජරාමරණං විපාකො’’ති.

ජරාමරණං විපාකොතිකථා නිට්ඨිතා.