(57) 5. නිරොධසමාපත්තිකථා

457. නිරොධසමාපත්ති අසඞ්ඛතාති? ආමන්තා. නිබ්බානං තාණං ලෙණං සරණං පරායනං අච්චුතං අමතන්ති? න හෙවං වත්තබ්බෙ…පෙ… නිරොධසමාපත්ති අසඞ්ඛතා, නිබ්බානං අසඞ්ඛතන්ති? ආමන්තා. ද්වෙ අසඞ්ඛතානීති? න හෙවං වත්තබ්බෙ…පෙ… ද්වෙ අසඞ්ඛතානීති? ආමන්තා. ද්වෙ තාණානි…පෙ… අන්තරිකා වාති? න හෙවං වත්තබ්බෙ…පෙ….

නිරොධසමාපත්ති අසඞ්ඛතාති? ආමන්තා. අත්ථි කෙචි නිරොධං සමාපජ්ජන්ති පටිලභන්ති උප්පාදෙන්ති සමුප්පාදෙන්ති උට්ඨපෙන්ති සමුට්ඨපෙන්ති නිබ්බත්තෙන්ති අභිනිබ්බත්තෙන්ති ජනෙන්ති සඤ්ජනෙන්තීති? ආමන්තා. අත්ථි කෙචි අසඞ්ඛතං සමාපජ්ජන්ති පටිලභන්ති උප්පාදෙන්ති සමුප්පාදෙන්ති උට්ඨපෙන්ති සමුට්ඨපෙන්ති නිබ්බත්තෙන්ති අභිනිබ්බත්තෙන්ති ජනෙන්ති සඤ්ජනෙන්තීති? න හෙවං වත්තබ්බෙ…පෙ….

458. නිරොධා වොදානං වුට්ඨානං පඤ්ඤායතීති? ආමන්තා. අසඞ්ඛතා වොදානං වුට්ඨානං පඤ්ඤායතීති? න හෙවං වත්තබ්බෙ…පෙ… නිරොධං සමාපජ්ජන්තස්ස පඨමං නිරුජ්ඣති වචීසඞ්ඛාරො, තතො කායසඞ්ඛාරො, තතො චිත්තසඞ්ඛාරොති? ආමන්තා. අසඞ්ඛතං සමාපජ්ජන්තස්ස පඨමං නිරුජ්ඣති වචීසඞ්ඛාරො, තතො කායසඞ්ඛාරො, තතො චිත්තසඞ්ඛාරොති? න හෙවං වත්තබ්බෙ…පෙ… නිරොධා වුට්ඨහන්තස්ස පඨමං උප්පජ්ජති චිත්තසඞ්ඛාරො, තතො කායසඞ්ඛාරො, තතො වචීසඞ්ඛාරොති? ආමන්තා. අසඞ්ඛතා වුට්ඨහන්තස්ස පඨමං උප්පජ්ජති චිත්තසඞ්ඛාරො, තතො කායසඞ්ඛාරො, තතො වචීසඞ්ඛාරොති? න හෙවං වත්තබ්බෙ…පෙ….

නිරොධා වුට්ඨිතං තයො ඵස්සා ඵුසන්ති – සුඤ්ඤතො ඵස්සො, අනිමිත්තො ඵස්සො, අප්පණිහිතො ඵස්සොති? ආමන්තා. අසඞ්ඛතා වුට්ඨිතං තයො ඵස්සා ඵුසන්ති – සුඤ්ඤතො ඵස්සො, අනිමිත්තො ඵස්සො, අප්පණිහිතො ඵස්සොති? න හෙවං වත්තබ්බෙ…පෙ….

නිරොධා වුට්ඨිතස්ස විවෙකනින්නං චිත්තං හොති විවෙකපොණං විවෙකපබ්භාරන්ති? ආමන්තා. අසඞ්ඛතා වුට්ඨිතස්ස විවෙකනින්නං චිත්තං හොති විවෙකපොණං විවෙකපබ්භාරන්ති? න හෙවං වත්තබ්බෙ…පෙ….

459. න වත්තබ්බං – ‘‘නිරොධසමාපත්ති අසඞ්ඛතා’’ති? ආමන්තා. සඞ්ඛතාති? න හෙවං වත්තබ්බෙ…පෙ… තෙන හි නිරොධසමාපත්ති අසඞ්ඛතාති.

නිරොධසමාපත්තිකථා නිට්ඨිතා.