(46) 4. නියාමකථා

428. අනියතස්ස නියාමගමනාය අත්ථි ඤාණන්ති? ආමන්තා. නියතස්ස අනියාමගමනාය අත්ථි ඤාණන්ති? න හෙවං වත්තබ්බෙ…පෙ….

නියතස්ස අනියාමගමනාය නත්ථි ඤාණන්ති? ආමන්තා. අනියතස්ස නියාමගමනාය නත්ථි ඤාණන්ති? න හෙවං වත්තබ්බෙ…පෙ….

අනියතස්ස නියාමගමනාය අත්ථි ඤාණන්ති? ආමන්තා. නියතස්ස නියාමගමනාය අත්ථි ඤාණන්ති? න හෙවං වත්තබ්බෙ…පෙ….

නියතස්ස නියාමගමනාය නත්ථි ඤාණන්ති? ආමන්තා. අනියතස්ස නියාමගමනාය නත්ථි ඤාණන්ති? න හෙවං වත්තබ්බෙ…පෙ….

අනියතස්ස නියාමගමනාය අත්ථි ඤාණන්ති? ආමන්තා. අනියතස්ස අනියාමගමනාය අත්ථි ඤාණන්ති? න හෙවං වත්තබ්බෙ…පෙ….

අනියතස්ස අනියාමගමනාය නත්ථි ඤාණන්ති? ආමන්තා. අනියතස්ස නියාමගමනාය නත්ථි ඤාණන්ති? න හෙවං වත්තබ්බෙ…පෙ….

429. අනියතස්ස නියාමගමනාය අත්ථි ඤාණන්ති? ආමන්තා. අනියතස්ස නියාමගමනාය අත්ථි නියාමොති? න හෙවං වත්තබ්බෙ…පෙ….

අනියතස්ස නියාමගමනාය අත්ථි ඤාණන්ති? ආමන්තා. අනියතස්ස නියාමගමනාය අත්ථි සතිපට්ඨානා… සම්මප්පධානා… ඉද්ධිපාදා… ඉන්ද්‍රියා… බලා… බොජ්ඣඞ්ගාති? න හෙවං වත්තබ්බෙ…පෙ….

අනියතස්ස නියාමගමනාය නත්ථි නියාමොති? ආමන්තා. හඤ්චි අනියතස්ස නියාමගමනාය නත්ථි නියාමො, නො වත රෙ වත්තබ්බෙ – ‘‘අනියතස්ස නියාමගමනාය අත්ථි ඤාණ’’න්ති.

අනියතස්ස නියාමගමනාය නත්ථි සතිපට්ඨානා…පෙ… බොජ්ඣඞ්ගාති? ආමන්තා. හඤ්චි අනියතස්ස නියාමගමනාය නත්ථි බොජ්ඣඞ්ගා, නො වත රෙ වත්තබ්බෙ – ‘‘අනියතස්ස නියාමගමනාය අත්ථි ඤාණ’’න්ති.

430. අනියතස්ස නියාමගමනාය අත්ථි ඤාණන්ති? ආමන්තා. ගොත්‍රභුනො පුග්ගලස්ස සොතාපත්තිමග්ගෙ ඤාණං අත්ථීති? න හෙවං වත්තබ්බෙ…පෙ… සොතාපත්තිඵලසච්ඡිකිරියාය පටිපන්නස්ස පුග්ගලස්ස සොතාපත්තිඵලෙ ඤාණං අත්ථීති? න හෙවං වත්තබ්බෙ …පෙ… අරහත්තසච්ඡිකිරියාය පටිපන්නස්ස පුග්ගලස්ස අරහත්තෙ ඤාණං අත්ථීති? න හෙවං වත්තබ්බෙ…පෙ….

431. න වත්තබ්බං – ‘‘අනියතස්ස නියාමගමනාය අත්ථි ඤාණ’’න්ති? ආමන්තා. නනු භගවා ජානාති – ‘‘අයං පුග්ගලො සම්මත්තනියාමං ඔක්කමිස්සති, භබ්බො අයං පුග්ගලො ධම්මං අභිසමෙතු’’න්ති? ආමන්තා. හඤ්චි භගවා ජානාති – ‘‘අයං පුග්ගලො සම්මත්තනියාමං ඔක්කමිස්සති, භබ්බො අයං පුග්ගලො ධම්මං අභිසමෙතුං,’’ තෙන වත රෙ වත්තබ්බෙ – ‘‘අනියතස්ස නියාමගමනාය අත්ථි ඤාණ’’න්ති.

නියාමකථා නිට්ඨිතා.