(43) 1. විමුත්තිකථා

418. විමුත්තිඤාණං විමුත්තන්ති? ආමන්තා. යං කිඤ්චි විමුත්තිඤාණං සබ්බං තං විමුත්තන්ති? න හෙවං වත්තබ්බෙ…පෙ…. විමුත්තිඤාණං විමුත්තන්ති? ආමන්තා. පච්චවෙක්ඛණඤාණං විමුත්තන්ති? න හෙවං වත්තබ්බෙ…පෙ….

විමුත්තිඤාණං විමුත්තන්ති? ආමන්තා. ගොත්‍රභුනො පුග්ගලස්ස විමුත්තිඤාණං විමුත්තන්ති? න හෙවං වත්තබ්බෙ…පෙ… සොතාපත්තිඵලසච්ඡිකිරියාය පටිපන්නස්ස පුග්ගලස්ස විමුත්තිඤාණං විමුත්තන්ති? ආමන්තා. සොතාපන්නස්ස ඤාණං, සොතාපත්තිඵලං පත්තස්ස පටිලද්ධස්ස අධිගතස්ස සච්ඡිකතස්ස ඤාණන්ති? න හෙවං වත්තබ්බෙ…පෙ… සකදාගාමිඵලසච්ඡිකිරියාය පටිපන්නස්ස පුග්ගලස්ස විමුත්තිඤාණං විමුත්තන්ති? ආමන්තා. සකදාගාමිස්ස ඤාණං, සකදාගාමිඵලං පත්තස්ස පටිලද්ධස්ස අධිගතස්ස සච්ඡිකතස්ස ඤාණන්ති? න හෙවං වත්තබ්බෙ…පෙ… අනාගාමිඵලසච්ඡිකිරියාය පටිපන්නස්ස පුග්ගලස්ස විමුත්තිඤාණං විමුත්තන්ති? ආමන්තා. අනාගාමිස්ස ඤාණං, අනාගාමිඵලං පත්තස්ස පටිලද්ධස්ස අධිගතස්ස සච්ඡිකතස්ස ඤාණන්ති? න හෙවං වත්තබ්බෙ…පෙ… අරහත්තසච්ඡිකිරියාය පටිපන්නස්ස පුග්ගලස්ස විමුත්තිඤාණං විමුත්තන්ති? ආමන්තා. අරහතො ඤාණං, අරහත්තං පත්තස්ස පටිලද්ධස්ස අධිගතස්ස සච්ඡිකතස්ස ඤාණන්ති? න හෙවං වත්තබ්බෙ…පෙ….

419. සොතාපත්තිඵලසමඞ්ගිස්ස පුග්ගලස්ස විමුත්තිඤාණං විමුත්තන්ති? ආමන්තා. සොතාපත්තිඵලසච්ඡිකිරියාය පටිපන්නස්ස පුග්ගලස්ස විමුත්තිඤාණං විමුත්තන්ති? න හෙවං වත්තබ්බෙ…පෙ… සකදාගාමිඵලසමඞ්ගිස්ස පුග්ගලස්ස විමුත්තිඤාණං විමුත්තන්ති? ආමන්තා. සකදාගාමිඵලසච්ඡිකිරියාය පටිපන්නස්ස පුග්ගලස්ස විමුත්තිඤාණං විමුත්තන්ති? න හෙවං වත්තබ්බෙ…පෙ… අනාගාමිඵලසමඞ්ගිස්ස පුග්ගලස්ස විමුත්තිඤාණං විමුත්තන්ති? ආමන්තා. අනාගාමිඵලසච්ඡිකිරියාය පටිපන්නස්ස පුග්ගලස්ස විමුත්තිඤාණං විමුත්තන්ති? න හෙවං වත්තබ්බෙ…පෙ… අරහත්තඵලසමඞ්ගිස්ස පුග්ගලස්ස විමුත්තිඤාණං විමුත්තන්ති? ආමන්තා. අරහත්තසච්ඡිකිරියාය පටිපන්නස්ස පුග්ගලස්ස විමුත්තිඤාණං විමුත්තන්ති? න හෙවං වත්තබ්බෙ…පෙ….

420. සොතාපත්තිඵලසමඞ්ගිස්ස පුග්ගලස්ස විමුත්තිඤාණං විමුත්තං තඤ්ච ඵලං පත්තස්ස ඤාණන්ති? ආමන්තා. සොතාපත්තිඵලසච්ඡිකිරියාය පටිපන්නස්ස පුග්ගලස්ස විමුත්තිඤාණං විමුත්තං තඤ්ච ඵලං පත්තස්ස ඤාණන්ති? න හෙවං වත්තබ්බෙ…පෙ… සකදාගාමිඵලසමඞ්ගිස්ස පුග්ගලස්ස විමුත්තිඤාණං විමුත්තං තඤ්ච ඵලං පත්තස්ස ඤාණන්ති? ආමන්තා. සකදාගාමිඵලසච්ඡිකිරියාය පටිපන්නස්ස පුග්ගලස්ස විමුත්තිඤාණං විමුත්තං තඤ්ච ඵලං පත්තස්ස ඤාණන්ති? න හෙවං වත්තබ්බෙ…පෙ… අනාගාමිඵලසමඞ්ගිස්ස පුග්ගලස්ස විමුත්තිඤාණං විමුත්තං තඤ්ච ඵලං පත්තස්ස ඤාණන්ති? ආමන්තා. අනාගාමිඵලසච්ඡිකිරියාය පටිපන්නස්ස පුග්ගලස්ස විමුත්තිඤාණං විමුත්තං තඤ්ච ඵලං පත්තස්ස ඤාණන්ති? න හෙවං වත්තබ්බෙ…පෙ… අරහත්තඵලසමඞ්ගිස්ස පුග්ගලස්ස විමුත්තිඤාණං විමුත්තං තඤ්ච ඵලං පත්තස්ස ඤාණන්ති? ආමන්තා. අරහත්තසච්ඡිකිරියාය පටිපන්නස්ස පුග්ගලස්ස විමුත්තිඤාණං විමුත්තං තඤ්ච ඵලං පත්තස්ස ඤාණන්ති? න හෙවං වත්තබ්බෙ…පෙ….

විමුත්තිකථා නිට්ඨිතා.