(34) 2. උපපත්තිකථා

388. සහ උපපත්තියා අරහාති? ආමන්තා. සහ උපපත්තියා සොතාපන්නො හොතීති? න හෙවං වත්තබ්බෙ…පෙ….

සහ උපපත්තියා අරහාති? ආමන්තා. සහ උපපත්තියා සකදාගාමී හොතීති? න හෙවං වත්තබ්බෙ…පෙ….

සහ උපපත්තියා අරහාති? ආමන්තා. සහ උපපත්තියා අනාගාමී හොතීති? න හෙවං වත්තබ්බෙ…පෙ….

සහ උපපත්තියා සොතාපන්නො න හොතීති? ආමන්තා. හඤ්චි සහ උපපත්තියා සොතාපන්නො න හොති, නො ච වත රෙ වත්තබ්බෙ – ‘‘සහ උපපත්තියා අරහා’’ති.

සහ උපපත්තියා සකදාගාමී න හොතීති? ආමන්තා. හඤ්චි සහ උපපත්තියා සකදාගාමී න හොති, නො ච වත රෙ වත්තබ්බෙ – ‘‘සහ උපපත්තියා අරහා’’ති.

සහ උපපත්තියා අනාගාමී න හොතීති? ආමන්තා. හඤ්චි සහ උපපත්තියා අනාගාමී න හොති, නො ච වත රෙ වත්තබ්බෙ – ‘‘සහ උපපත්තියා අරහා’’ති.

389. සහ උපපත්තියා අරහාති? ආමන්තා. සාරිපුත්තො ථෙරො සහ උපපත්තියා අරහාති? න හෙවං වත්තබ්බෙ. මහාමොග්ගල්ලානො ථෙරො …පෙ… මහාකස්සපො ථෙරො…පෙ… මහාකච්චානො ථෙරො…පෙ… මහාකොට්ඨිකො ථෙරො…පෙ… මහාපන්ථකො ථෙරො සහ උපපත්තියා අරහාති? න හෙවං වත්තබ්බෙ…පෙ….

සාරිපුත්තො ථෙරො න සහ උපපත්තියා අරහාති? ආමන්තා. හඤ්චි සාරිපුත්තො ථෙරො න සහ උපපත්තියා අරහා, නො ච වත රෙ වත්තබ්බෙ – ‘‘සහ උපපත්තියා අරහා’’ති.

මහාමොග්ගල්ලානො ථෙරො…පෙ… මහාකස්සපො ථෙරො…පෙ… මහාකච්චානො ථෙරො…පෙ… මහාකොට්ඨිකො ථෙරො…පෙ… මහාපන්ථකො ථෙරො න සහ උපපත්තියා අරහාති? ආමන්තා. හඤ්චි මහාපන්ථකො ථෙරො න සහ උපපත්තියා අරහා, නො ච වත රෙ වත්තබ්බෙ – ‘‘සහ උපපත්තියා අරහා’’ති.

390. සහ උපපත්තියා අරහාති? ආමන්තා. උපපත්තෙසියෙන චිත්තෙන අරහත්තං සච්ඡිකරොති ලොකියෙන සාසවෙන…පෙ… සංකිලෙසියෙනාති? න හෙවං වත්තබ්බෙ…පෙ….

සහ උපපත්තියා අරහාති? ආමන්තා. උපපත්තෙසියං චිත්තං නිය්‍යානිකං ඛයගාමී බොධගාමී අපචයගාමී අනාසවං…පෙ… අසංකිලෙසියන්ති? න හෙවං වත්තබ්බෙ…පෙ….

නනු උපපත්තෙසියං චිත්තං අනිය්‍යානිකං න ඛයගාමි න බොධගාමි න අපචයගාමි සාසවං…පෙ… සංකිලෙසියන්ති? ආමන්තා. හඤ්චි උපපත්තෙසියං චිත්තං අනිය්‍යානිකං න ඛයගාමි න බොධගාමි න අපචයගාමි සාසවං…පෙ… සංකිලෙසියං, නො ච වත රෙ වත්තබ්බෙ – ‘‘සහ උපපත්තියා අරහා’’ති.

සහ උපපත්තියා අරහාති? ආමන්තා. උපපත්තෙසියෙන චිත්තෙන රාගං පජහති, දොසං පජහති, මොහං පජහති, අනොත්තප්පං පජහතීති? න හෙවං වත්තබ්බෙ…පෙ….

සහ උපපත්තියා අරහාති? ආමන්තා. උපපත්තෙසියං චිත්තං මග්ගො… සතිපට්ඨානං…පෙ… සම්මප්පධානං… ඉද්ධිපාදො… ඉන්ද්‍රියං… බලං… බොජ්ඣඞ්ගොති? න හෙවං වත්තබ්බෙ…පෙ….

සහ උපපත්තියා අරහාති? ආමන්තා. උපපත්තෙසියෙන චිත්තෙන දුක්ඛං පරිජානාති, සමුදයං පජහති, නිරොධං සච්ඡිකරොති, මග්ගං භාවෙතීති? න හෙවං වත්තබ්බෙ …පෙ… සහ උපපත්තියා අරහාති? ආමන්තා. චුතිචිත්තං මග්ගචිත්තං උපපත්තෙසියං චිත්තං ඵලචිත්තන්ති? න හෙවං වත්තබ්බෙ…පෙ….

උපපත්තිකථා නිට්ඨිතා.