4. චතුත්ථවග්ගො
(42) 10. සබ්බසංයොජනප්පහානකථා
413. සබ්බසංයොජනානං පහානං අරහත්තන්ති? ආමන්තා. අරහත්තමග්ගෙන සබ්බෙ සංයොජනා පහීයන්තීති? න හෙවං වත්තබ්බෙ…පෙ….
අරහත්තමග්ගෙන සබ්බෙ සංයොජනා පහීයන්තීති? ආමන්තා. අරහත්තමග්ගෙන සක්කායදිට්ඨිං විචිකිච්ඡං සීලබ්බතපරාමාසං පජහතීති? න හෙවං වත්තබ්බෙ…පෙ….
අරහත්තමග්ගෙන සක්කායදිට්ඨිං විචිකිච්ඡං සීලබ්බතපරාමාසං පජහතීති? ආමන්තා. නනු තිණ්ණං සංයොජනානං පහානං සොතාපත්තිඵලං වුත්තං භගවතාති? ආමන්තා. හඤ්චි තිණ්ණං සංයොජනානං පහානං සොතාපත්තිඵලං වුත්තං භගවතා, නො ච වත රෙ වත්තබ්බෙ – ‘‘අරහත්තමග්ගෙන සබ්බෙ සංයොජනා පහීයන්තී’’ති.
414. අරහත්තමග්ගෙන සබ්බෙ සංයොජනා පහීයන්තීති? ආමන්තා. අරහත්තමග්ගෙන ඔළාරිකං කාමරාගං ඔළාරිකං බ්‍යාපාදං පජහතීති? න හෙවං වත්තබ්බෙ…පෙ….
415. අරහත්තමග්ගෙන ඔළාරිකං කාමරාගං ඔළාරිකං බ්‍යාපාදං පජහතීති? ආමන්තා. නනු කාමරාගබ්‍යාපාදානං තනුභාවං සකදාගාමිඵලං වුත්තං භගවතාති? ආමන්තා. හඤ්චි කාමරාගබ්‍යාපාදානං තනුභාවං සකදාගාමිඵලං වුත්තං භගවතා, නො ච වත රෙ වත්තබ්බෙ – ‘‘අරහත්තමග්ගෙන සබ්බෙ සංයොජනා පහීයන්තී’’ති.
අරහත්තමග්ගෙන සබ්බෙ සංයොජනා පහීයන්තීති? ආමන්තා. අරහත්තමග්ගෙන අණුසහගතං කාමරාගං අණුසහගතං බ්‍යාපාදං පජහතීති? න හෙවං වත්තබ්බෙ…පෙ….
416. අරහත්තමග්ගෙන අණුසහගතං කාමරාගං අණුසහගතං බ්‍යාපාදං පජහතීති? ආමන්තා. නනු කාමරාගබ්‍යාපාදානං අනවසෙසප්පහානං අනාගාමිඵලං වුත්තං භගවතාති? ආමන්තා. හඤ්චි කාමරාගබ්‍යාපාදානං අනවසෙසප්පහානං අනාගාමිඵලං වුත්තං භගවතා, නො ච වත රෙ වත්තබ්බෙ – ‘‘අරහත්තමග්ගෙන සබ්බෙ සංයොජනා පහීයන්තී’’ති.
අරහත්තමග්ගෙන සබ්බෙ සංයොජනා පහීයන්තීති? ආමන්තා. නනු රූපරාගඅරූපරාගමානඋද්ධච්චඅවිජ්ජාය අනවසෙසප්පහානං අරහත්තං වුත්තං භගවතාති? ආමන්තා. හඤ්චි රූපරාගඅරූපරාගමානඋද්ධච්චඅවිජ්ජාය අනවසෙසප්පහානං අරහත්තං වුත්තං භගවතා, නො ච වත රෙ වත්තබ්බෙ – ‘‘අරහත්තමග්ගෙන සබ්බෙ සංයොජනා පහීයන්තී’’ති.
417. න වත්තබ්බං – ‘‘සබ්බසංයොජනානං පහානං අරහත්ත’’න්ති? ආමන්තා. නනු අරහතො සබ්බෙ සංයොජනා පහීනාති? ආමන්තා. හඤ්චි අරහතො සබ්බෙ සංයොජනා පහීනා, තෙන වත රෙ වත්තබ්බෙ – ‘‘සබ්බසංයොජනානං පහානං අරහත්ත’’න්ති.
සබ්බසංයොජනප්පහානකථා නිට්ඨිතා.
චතුත්ථවග්ගො.
තස්සුද්දානං –
ගිහිස්ස අරහා, සහ උපපත්තියා අරහා, අරහතො සබ්බෙ ධම්මා අනාසවා, අරහා චතූහි ඵලෙහි සමන්නාගතො, එවමෙවං ඡහි උපෙක්ඛාහි, බොධියා බුද්ධො, සලක්ඛණසමන්නාගතො, බොධිසත්තො ඔක්කන්තනියාමො චරිතබ්‍රහ්මචරියො, පටිපන්නකො ඵලෙන සමන්නාගතො, සබ්බසංයොජනානං පහානං අරහත්තන්ති.