(33) 1. ගිහිස්ස අරහාතිකථා

387. ගිහිස්ස අරහාති? ආමන්තා. අත්ථි අරහතො ගිහිසංයොජනන්ති? න හෙවං වත්තබ්බෙ…පෙ… නත්ථි අරහතො ගිහිසංයොජනන්ති? ආමන්තා. හඤ්චි නත්ථි අරහතො ගිහිසංයොජනං, නො ච වත රෙ වත්තබ්බෙ – ‘‘ගිහිස්ස අරහා’’ති.

ගිහිස්ස අරහාති? ආමන්තා. නනු අරහතො ගිහිසංයොජනං පහීනං උච්ඡින්නමූලං තාලාවත්ථුකතං අනභාවඞ්කතං ආයතිං අනුප්පාදධම්මන්ති? ආමන්තා. හඤ්චි අරහතො ගිහිසංයොජනං පහීනං උච්ඡින්නමූලං තාලාවත්ථුකතං අනභාවඞ්කතං ආයතිං අනුප්පාදධම්මං, නො ච වත රෙ වත්තබ්බෙ – ‘‘ගිහිස්ස අරහා’’ති.

ගිහිස්ස අරහාති? ආමන්තා. අත්ථි කොචි ගිහී ගිහිසංයොජනං අප්පහාය දිට්ඨෙව ධම්මෙ දුක්ඛස්සන්තකරොති [ම. නි. 2.186]? නත්ථි. හඤ්චි නත්ථි කොචි ගිහී ගිහිසංයොජනං අප්පහාය දිට්ඨෙව ධම්මෙ දුක්ඛස්සන්තකරො, නො ච වත රෙ වත්තබ්බෙ – ‘‘ගිහිස්ස අරහා’’ති.

ගිහිස්ස අරහාති? ආමන්තා. නනු වච්ඡගොත්තො පරිබ්බාජකො භගවන්තං එතදවොච – ‘‘අත්ථි නු ඛො, භො ගොතම, කොචි ගිහී ගිහිසංයොජනං අප්පහාය කායස්ස භෙදා දුක්ඛස්සන්තකරො’’ති? ‘‘නත්ථි ඛො, වච්ඡ, කොචි ගිහී ගිහිසංයොජනං අප්පහාය කායස්ස භෙදා දුක්ඛස්සන්තකරො’’ති. අත්ථෙව සුත්තන්තොති? ආමන්තා. තෙන හි න වත්තබ්බං – ‘‘ගිහිස්ස අරහා’’ති.

ගිහිස්ස අරහාති? ආමන්තා. අරහා මෙථුනං ධම්මං පටිසෙවෙය්‍ය, මෙථුනං උප්පාදෙය්‍ය, පුත්තසම්බාධසයනං අජ්ඣාවසෙය්‍ය, කාසිකචන්දනං පච්චනුභවෙය්‍ය, මාලාගන්ධවිලෙපනං ධාරෙය්‍ය, ජාතරූපරජතං සාදියෙය්‍ය, අජෙළකං පටිග්ගණ්හෙය්‍ය, කුක්කුටසූකරං පටිග්ගණ්හෙය්‍ය, හත්ථිගවස්සවළවං පටිග්ගණ්හෙය්‍ය, තිත්තිරවට්ටකමොරකපිඤ්ජරං [… කපිඤ්ජලං (ස්‍යා. කං. පී.)] පටිග්ගණ්හෙය්‍ය, චිත්තවණ්ඩවාලමොළිං [පීතවණ්ටවාලමොළිකං (ස්‍යා. කං. පී.)] ධාරෙය්‍ය, ඔදාතානි වත්ථානි දීඝදසානි ධාරෙය්‍ය, යාවජීවං අගාරියභූතො අස්සාති? න හෙවං වත්තබ්බෙ…පෙ….

න වත්තබ්බං – ‘‘ගිහිස්ස අරහා’’ති? ආමන්තා. නනු යසො කුලපුත්තො, උත්තියො ගහපති, සෙතු මාණවො, ගිහිබ්‍යඤ්ජනෙන අරහත්තං පත්තොති? ආමන්තා. හඤ්චි යසො කුලපුත්තො, උත්තියො ගහපති, සෙතු මාණවො, ගිහිබ්‍යඤ්ජනෙන අරහත්තං පත්තො, තෙන වත රෙ වත්තබ්බෙ – ‘‘ගිහිස්ස අරහා’’ති.

ගිහිස්ස අරහාතිකථා නිට්ඨිතා.