නමො තස්ස භගවතො අරහතො සම්මාසම්බුද්ධස්ස

අභිධම්මපිටකෙ

ධම්මසඞ්ගණීපාළි

මාතිකා

1. තිකමාතිකා

1. (ක) කුසලා ධම්මා.

(ඛ) අකුසලා ධම්මා.

(ග) අබ්‍යාකතා ධම්මා.

2. (ක) සුඛාය වෙදනාය සම්පයුත්තා ධම්මා.

(ඛ) දුක්ඛාය වෙදනාය සම්පයුත්තා ධම්මා.

(ග) අදුක්ඛමසුඛාය වෙදනාය සම්පයුත්තා ධම්මා.

3. (ක) විපාකා ධම්මා.

(ඛ) විපාකධම්මධම්මා.

(ග) නෙවවිපාකනවිපාකධම්මධම්මා.

4. (ක) උපාදිණ්ණුපාදානියා [උපාදින්නුපාදානියා (ස්‍යා.)] ධම්මා.

(ඛ) අනුපාදිණ්ණුපාදානියා ධම්මා.

(ග) අනුපාදිණ්ණඅනුපාදානියා [අනුපාදින්නානුපාදානියා (ස්‍යා.)] ධම්මා.

5. (ක) සංකිලිට්ඨසංකිලෙසිකා ධම්මා.

(ඛ) අසංකිලිට්ඨසංකිලෙසිකා ධම්මා.

(ග) අසංකිලිට්ඨඅසංකිලෙසිකා [අසංකිලිට්ඨාසංකිලෙසිකා (ස්‍යා.)] ධම්මා.

6. (ක) සවිතක්කසවිචාරා ධම්මා.

(ඛ) අවිතක්කවිචාරමත්තා ධම්මා.

(ග) අවිතක්කඅවිචාරා [අවිතක්කාවිචාරා (ස්‍යා.)] ධම්මා.

7. (ක) පීතිසහගතා ධම්මා.

(ඛ) සුඛසහගතා ධම්මා.

(ග) උපෙක්ඛාසහගතා ධම්මා.

8. (ක) දස්සනෙන පහාතබ්බා ධම්මා.

(ඛ) භාවනාය පහාතබ්බා ධම්මා.

(ග) නෙව දස්සනෙන න භාවනාය පහාතබ්බා ධම්මා.

9. (ක) දස්සනෙන පහාතබ්බහෙතුකා ධම්මා.

(ඛ) භාවනාය පහාතබ්බහෙතුකා ධම්මා.

(ග) නෙව දස්සනෙන න භාවනාය පහාතබ්බහෙතුකා ධම්මා.

10. (ක) ආචයගාමිනො ධම්මා.

(ඛ) අපචයගාමිනො ධම්මා.

(ග) නෙවාචයගාමිනාපචයගාමිනො [නෙවාචයගාමිනො නාපචයගාමිනො (ස්‍යා.)] ධම්මා.

11. (ක) සෙක්ඛා ධම්මා.

(ඛ) අසෙක්ඛා ධම්මා.

(ග) නෙවසෙක්ඛනාසෙක්ඛා [නෙවසෙක්ඛානාසෙක්ඛා (සී. ස්‍යා.)] ධම්මා.

12. (ක) පරිත්තා ධම්මා.

(ඛ) මහග්ගතා ධම්මා.

(ග) අප්පමාණා ධම්මා.

13. (ක) පරිත්තාරම්මණා ධම්මා.

(ඛ) මහග්ගතාරම්මණා ධම්මා.

(ග) අප්පමාණාරම්මණා ධම්මා.

14. (ක) හීනා ධම්මා.

(ඛ) මජ්ඣිමා ධම්මා.

(ග) පණීතා ධම්මා.

15. (ක) මිච්ඡත්තනියතා ධම්මා.

(ඛ) සම්මත්තනියතා ධම්මා.

(ග) අනියතා ධම්මා.

16. (ක) මග්ගාරම්මණා ධම්මා.

(ඛ) මග්ගහෙතුකා ධම්මා.

(ග) මග්ගාධිපතිනො ධම්මා.

17. (ක) උප්පන්නා ධම්මා.

(ඛ) අනුප්පන්නා ධම්මා.

(ග) උප්පාදිනො ධම්මා.

18. (ක) අතීතා ධම්මා.

(ඛ) අනාගතා ධම්මා.

(ග) පච්චුප්පන්නා ධම්මා.

19. (ක) අතීතාරම්මණා ධම්මා.

(ඛ) අනාගතාරම්මණා ධම්මා.

(ග) පච්චුප්පන්නාරම්මණා ධම්මා.

20. (ක) අජ්ඣත්තා ධම්මා.

(ඛ) බහිද්ධා ධම්මා.

(ග) අජ්ඣත්තබහිද්ධා ධම්මා.

21. (ක) අජ්ඣත්තාරම්මණා ධම්මා.

(ඛ) බහිද්ධාරම්මණා ධම්මා.

(ග) අජ්ඣත්තබහිද්ධාරම්මණා ධම්මා.

22. (ක) සනිදස්සනසප්පටිඝා ධම්මා.

(ඛ) අනිදස්සනසප්පටිඝා ධම්මා.

(ග) අනිදස්සනඅප්පටිඝා [අනිදස්සනාප්පටිඝා (ස්‍යා.)] ධම්මා.

තිකමාතිකා.

2. දුකමාතිකා

හෙතුගොච්ඡකං

1. (ක) හෙතූ ධම්මා.

(ඛ) න හෙතූ ධම්මා.

2. (ක) සහෙතුකා ධම්මා.

(ඛ) අහෙතුකා ධම්මා.

3. (ක) හෙතුසම්පයුත්තා ධම්මා.

(ඛ) හෙතුවිප්පයුත්තා ධම්මා.

4. (ක) හෙතූ චෙව ධම්මා සහෙතුකා ච.

(ඛ) සහෙතුකා චෙව ධම්මා න ච හෙතූ.

5. (ක) හෙතූ චෙව ධම්මා හෙතුසම්පයුත්තා ච.

(ඛ) හෙතුසම්පයුත්තා චෙව ධම්මා න ච හෙතූ.

6. (ක) න හෙතූ ඛො පන ධම්මා සහෙතුකාපි.

(ඛ) අහෙතුකාපි.

හෙතුගොච්ඡකං.

චූළන්තරදුකං

7. (ක) සප්පච්චයා ධම්මා.

(ඛ) අප්පච්චයා ධම්මා.

8. (ක) සඞ්ඛතා ධම්මා.

(ඛ) අසඞ්ඛතා ධම්මා.

9. (ක) සනිදස්සනා ධම්මා.

(ඛ) අනිදස්සනා ධම්මා.

10. (ක) සප්පටිඝා ධම්මා.

(ඛ) අප්පටිඝා ධම්මා.

11. (ක) රූපිනො ධම්මා.

(ඛ) අරූපිනො ධම්මා.

12. (ක) ලොකියා ධම්මා.

(ඛ) ලොකුත්තරා ධම්මා.

13. (ක) කෙනචි විඤ්ඤෙය්‍යා ධම්මා.

(ඛ) කෙනචි න විඤ්ඤෙය්‍යා ධම්මා.

චූළන්තරදුකං.

ආසවගොච්ඡකං

14. (ක) ආසවා ධම්මා.

(ඛ) නො ආසවා ධම්මා.

15. (ක) සාසවා ධම්මා.

(ඛ) අනාසවා ධම්මා.

16. (ක) ආසවසම්පයුත්තා ධම්මා.

(ඛ) ආසවවිප්පයුත්තා ධම්මා.

17. (ක) ආසවා චෙව ධම්මා සාසවා ච.

(ඛ) සාසවා චෙව ධම්මා නො ච ආසවා.

18. (ක) ආසවා චෙව ධම්මා ආසවසම්පයුත්තා ච.

(ඛ) ආසවසම්පයුත්තා චෙව ධම්මා නො ච ආසවා.

19. (ක) ආසවවිප්පයුත්තා ඛො පන ධම්මා සාසවාපි.

(ඛ) අනාසවාපි.

ආසවගොච්ඡකං.

සංයොජනගොච්ඡකං

20. (ක) සංයොජනා ධම්මා.

(ඛ) නො සංයොජනා ධම්මා.

21. (ක) සංයොජනියා ධම්මා.

(ඛ) අසංයොජනියා ධම්මා.

22. (ක) සංයොජනසම්පයුත්තා ධම්මා.

(ඛ) සංයොජනවිප්පයුත්තා ධම්මා.

23. (ක) සංයොජනා චෙව ධම්මා සංයොජනියා ච.

(ඛ) සංයොජනියා චෙව ධම්මා නො ච සංයොජනා.

24. (ක) සංයොජනා චෙව ධම්මා සංයොජනසම්පයුත්තා ච.

(ඛ) සංයොජනසම්පයුත්තා චෙව ධම්මා නො ච සංයොජනා.

25. (ක) සංයොජනවිප්පයුත්තා ඛො පන ධම්මා සංයොජනියාපි.

(ඛ) අසංයොජනියාපි.

සංයොජනගොච්ඡකං.

ගන්ථගොච්ඡකං

26. (ක) ගන්ථා ධම්මා.

(ඛ) නො ගන්ථා ධම්මා.

27. (ක) ගන්ථනියා ධම්මා.

(ඛ) අගන්ථනියා ධම්මා.

28. (ක) ගන්ථසම්පයුත්තා ධම්මා.

(ඛ) ගන්ථවිප්පයුත්තා ධම්මා.

29. (ක) ගන්ථා චෙව ධම්මා ගන්ථනියා ච.

(ඛ) ගන්ථනියා චෙව ධම්මා නො ච ගන්ථා.

30. (ක) ගන්ථා චෙව ධම්මා ගන්ථසම්පයුත්තා ච.

(ඛ) ගන්ථසම්පයුත්තා චෙව ධම්මා නො ච ගන්ථා.

31. (ක) ගන්ථවිප්පයුත්තා ඛො පන ධම්මා ගන්ථනියාපි.

(ඛ) අගන්ථනියාපි.

ගන්ථගොච්ඡකං.

ඔඝගොච්ඡකං

32. (ක) ඔඝා ධම්මා.

(ඛ) නො ඔඝා ධම්මා.

33. (ක) ඔඝනියා ධම්මා.

(ඛ) අනොඝනියා ධම්මා.