චතුත්ථමග්ගඤාණකථාවණ්ණනා
815. ඔපපාතිකොති උපපාතයොනිකො. ඉමිනාස්ස ගබ්භසෙය්‍යා පටික්ඛිත්තා. තත්ථ පරිනිබ්බායීති තත්ථ සුද්ධාවාසෙ පරිනිබ්බායිතා. අනාවත්තිධම්මො තස්මා ලොකාති පටිසන්ධිග්ගහණවසෙන තස්මා ලොකා ඉධ අනාවත්තනසභාවො, බුද්ධදස්සනධම්මස්සවනානං පනත්ථාය ආගමනං හොතියෙව.
රූපරාගඅරූපරාගමානඋද්ධච්චඅවිජ්ජානං අනවසෙසප්පහානායාති එතෙසං පඤ්චන්නං උද්ධම්භාගියසංයොජනානං නිස්සෙසප්පජහනත්ථාය. තත්ථ රූපභවෙ ඡන්දරාගො රූපරාගො. අරූපභවෙ ඡන්දරාගො අරූපරාගො. මානො අරහත්තමග්ගවජ්ඣමානො. තථා උද්ධච්චාවිජ්ජා.
චතුත්ථඤාණං නිට්ඨිතං.