39. බොධිරාජධීතුයා [බොධිරාජධීතාය ඉතිසබ්බත්ථ] වත්ථුම්හි අයමානුපුබ්බීකථා

භගවති පරිනිබ්බුතෙ ලඞ්කායං සාසනෙ සුප්පතිට්ඨිතෙ තත්ථ හකුරෙළීති එකො ගාමො අහොසි, තත්ථෙකා දාරිකා ගාමාදාරිකාහි සද්ධිං තත්ථ තත්ථ කීළන්තී විහරති, තදා ගාමසමීපෙ මහාසොබ්භං හොති. තත්ථෙකො මරුත්ථරුක්ඛො සබ්බදා පාළිඵුල්ලොව තිට්ඨති. මනුස්සා බුද්ධපූජනත්ථං පුප්ඵානි විචිණන්තා උදකං ඔගහෙත්වා රුක්ඛමභිරුය්හ පුප්ඵානි ඔචිණන්ති, කුමාරිකා තෙ දිස්වා මනුස්සා සුඛෙන ගන්ත්වා පුප්ඵානි ඔචිණන්තූති එකං සුක්ඛපාලිභද්දදණ්ඩකං ආහරිත්වා සෙතුං කත්වා ඨපෙසි, තතො පට්ඨාය මනුස්සා තෙනගන්ත්වා පුප්ඵානි ඔචිණන්ති. අථ සා තතො චුතා තෙනෙව කුසලකම්මෙන ජම්බුදීපෙ පාටලිපුත්තනගරෙ සොමදත්තරඤ්ඤො ධීතා හුත්වා නිබ්බත්ති, උත්තමරූපධරා දෙවච්ඡරපටිභාගා අහොසි. මාතාපිතරො පනස්සා බොධිරාජකුමාරිකාති වොහරිංසු. පුබ්බෙ කතසෙතුආනුභාවෙන තස්සා සුවීරකො නාමෙකො ආකාසගාමී සින්ධවපොතකො නිබ්බත්ති. රාජධීතුයා පන පිතා බුද්ධමාමකො ධම්මමාමකො සඞ්ඝමාමකො හුත්වා මහන්තං පුඤ්ඤං පසවන්තො සින්ධවපොතකං දිස්වා පුඤ්ඤකරණස්ස මෙ සහායො ලද්ධොති තුට්ඨමානසො අස්සං අභිරුහිත්වා දිවසස්ස තික්ඛත්තුං ගන්ත්වා මහාබොධිං වන්දති. රාජධීතා නං දිස්වා පිතුසන්තිකං ගන්ත්වා අභිණ්හං තාත කුහිං ගච්ඡසීති පුච්ඡි. රාජා න කිඤ්චි කථෙසි, අථ සා පුනප්පුනං පිතරං නිබන්ධන්තී පුච්ඡි. තතො රාජා තස්සාවි කරොන්තො එවමාහ.

1. අම්හාකං භගවා පුබ්බෙ, පූරෙන්තො දසපාරමී;

අදාසි සීසරත්තක්ඛි, මංසං ජීවිතමෙව ච.

2. පුත්තදාරෙ ච රජ්ජෙ ච, පත්වා [දත්වා ඉතිපිකත්ථචි] පාරමිමත්ථකං;

අනප්පකප්පකොටීනං, ඛෙපෙත්වා කපිලවුයෙ.

3. සක්කරාජකුලෙ ජාතො, ලොකෙ අප්පටිපුග්ගලො;

සම්පත්තචක්කවත්තිත්තං, පහන්ත්වාන නරාධිපො.

4. දිස්වා නිමිත්තෙ චතුරො, නික්ඛම්ම අභිනික්ඛමං;

බොධිමූලමුපාගම්ම, නිසින්නො වජිරාසනෙ.

5. සහස්සබාහුං මාපෙත්වා, නානායුධසමාකුලං [නානාවුධසමාකුලං-ඉතිසබ්බත්ථ];

මහාභීතිකරං වෙසං, කාළපබ්බතසාදිසං.

6. මාපෙත්වාන සමාරුය්හ, ගිරිමෙඛලවාරණං;

මාරසෙනං සමානෙත්වා, ආගතං මකරද්ධජං.

7. පාරමිතාබලෙන තං, මාරසෙනං පලාපිය;

යත්ථාසීනො කිලෙසාරි, සහස්සං ඝාතයී ජිනො.

8. නයනං සුජලසෙකෙහි, සත්තාහං ජිනසෙවිතං;

පූජිතං දෙවබ්‍රහ්මෙහි, සිද්ධොරගනරාදිහි;

වන්දිතුං ජයබොධිංතං, ගච්ඡාමි සතතං අහං.

9. උපාසති සදා ගන්ත්වා, යො නරො බොධිපාදපං;

ගන්ධොදදීපධූපාදි, නානාපූජාහි සාධුකං.

10. ස නරො නිරාමයො හොති, පච්චත්තෙ ච පරත්ථ ච;

පූජිතො මානිතො හොති, දීඝායු බලවා සුඛී.

11. තදත්ථං පත්ථයන්තෙන, අත්ථකාමෙන ජන්තුනා;

උපාසනීයං සද්ධාය, නිච්චං තං බොධිපාදපංති.

තං සුත්වා කුමාරිකා පීතියා ඵුටසරීරා පිතරං වන්දිත්වා අහම්පි තාත ගච්ඡාමීති ආහ. රාජා පනස්සා උපද්දවභයෙන ගමනං න ඉච්ඡි. තතො සා යාවතතියං පිතරං යාචිත්වා රඤ්ඤා අනුඤ්ඤාතා. තතො පට්ඨාය පිතරා සද්ධිං සින්ධවමාරුය්හ බොධිං වන්දිතුං සතතං ගච්ඡති. අථාපරභාගෙ රාජා මරණමඤ්චෙ නිපන්නො චින්තෙසි. ධීතා මෙ නිරන්තරං බොධිඋපට්ඨානංගච්ඡති, එතිස්සා අනාගතෙ යංකිඤ්චි භයං උප්පජ්ජමානං තතො උප්පජ්ජති. තත්ථ මෙ කිං කාතබ්බන්ති. තතො සින්ධවං පක්කොසාපෙත්වා තස්ස කණ්ණමූලෙ මන්තෙන්තො එවමාහ, තාත මම ධීතා අභිණ්හං තව සහායං කත්වා බොධිං වන්දිතුං ගච්ඡති. තත්ථස්සා යංකිඤ්චි භයං භවෙය්‍ය. තං නප්පතිරූපං. තත්ථ ගමනාගමනෙ මම ධීතරං රක්ඛෙය්‍යාසීති තස්ස ධීතරං පටිපාදෙත්වා කාලමකාසි. තතො රාජධීතා පිතුසරීරකිච්චං කාරෙත්වා දිවසස්ස තික්ඛත්තුං අස්සමභිරුය්හ බොධිඋපට්ඨානං ගච්ඡති. මනුස්සා පනස්සා රූපසම්පත්තිං දිස්වා විම්හිතමානසා රාජාරහං වත නො ඉදං පණ්ණාකාරං දිට්ඨං. ගන්ත්වා රඤ්ඤො ආචික්ඛිස්සාම. අප්පෙව නාම රාජා සො කිඤ්චි නො දදෙය්‍යාති චින්තෙත්වා රඤ්ඤො සන්තිකං ගන්ත්වා වන්දිත්වා ඨිතා එවමාහංසු.

12. බොධිමණ්ඩං සමාගම්ම, අභිණ්හං තුට්ඨමානසා;

වන්දන්තී යාති කඤ්ඤෙකා, විජ්ජූව සිරියා ජලං.

13. නීලධම්පිල්ලභාරා සා, විසාලායතලොචනා;

සොණ්ණදොලාභසවණා, සාමා සුභපයොධරා.

14. සතරංසීහි සම්මිස්ස, සඤ්ච්‍යාම්බුදසමාධරා;

තුඞ්ගනාසා නීලභමු, හාසභාසා මනොරමා.

15. ඊදිසං නො මහාරාජා [මහාරාජදිට්ඨපුබ්බ ඉතිපිකත්ථචි], දිට්ඨපුබ්බං කුදාචනං;

එහි තස්සා සිරිංදෙව, බොධිමණ්ඩම්හි දක්ඛසීති.

තං සුත්වා රාජා සවණසංසග්ගෙනෙව තාය පටිබද්ධචිත්තො චතුරඞ්ගිනිංසෙනං ගහෙත්වා රාජධීතරං බොධිවන්දනත්ථාය ආගතකාලෙ බහිපාකාරෙ සෙනං පරික්ඛිපාපෙත්වා ගණ්හථෙතන්ති මනුස්සෙ නියොජෙසි. තතො සෙනාපි තං ගහණසජ්ජා අට්ඨාසි. රාජධීතා තෙ දිස්වා සීඝං සින්ධවං උපසඞ්කමිත්වා තස්ස පිට්ඨියං නිසින්නා පණ්හියා සඤ්ඤං අදාසි. සො තං ගහෙත්වා වෙගෙන ආකාසං පක්ඛන්දි. සා පන දුන්නිසින්නභාවෙන අස්සස්ස වෙගං සන්ධාරෙතුමසක්කොන්තී අස්සපිට්ඨිතො පරිගලි. සින්ධවො රාජධීතරං පතමානං දිස්වා රාජොවාදං සරමානො වෙගෙනාගන්ත්වා තස්සා කෙසෙ ඩංසිත්වා උක්ඛිපිත්වා පතමානාය තස්සා පිට්ඨිංදත්වා නිසීදාපෙත්වා ආකාසෙන තං නෙත්වා පාටලිපුත්තනගරෙයෙව පතිට්ඨාපෙසි [පාතලිපුත්තනගරෙයෙවතං පවිඨාපෙසිඉතිපිකත්ථචි].

16. තිරච්ඡානගතාපෙවං, සරන්තා උපකාරකං;

න ජහන්තීති මන්ත්වාන, කතඤ්ඤූ හොන්තු [හොන්තිපාණිනො-ඉතිපිකත්ථචි] පාණිනොති.

තතො පට්ඨාය සා පුඤ්ඤකම්මං කත්වා සග්ගපරායනා අහොසීති.

17. යො යං දුමින්දංයතිනන්දනෙන;

සම්පූජිතං පූජයතෙ ස පඤ්ඤො;

ස භොගවා හොති අනීතිකො ච,

සබ්බත්ථ සො හොති පසත්ථරූපො.

බොධිරාජධීතුයා වත්ථුං නවමං.