අට්ඨම පරිච්ඡෙද

පණ්ඩුවාසුදෙවාභිසෙකො

1. විජයො සො මහාරාජා, වස්සෙ අන්තිමකෙ ඨිතො;

ඉති චින්තයි ‘‘වුද්ධො’හං, න ච විජ්ජති මෙ සුතො.

2. කිච්ඡෙන වාසිතං රට්ඨං, නස්සෙය්‍ය මම අච්චයෙ;

ආණාපෙය්‍යං රජ්ජහෙතු-සුමිත්තං භාතරං මම.

3. අථා’මච්චෙහි මන්තෙත්වා, ලෙඛං තත්ථ විසජ්ජයි;

ලෙඛං දත්වාන විජයො, න චිරෙන දිවඞ්ගතො.

4. තස්මිං මතෙ අමච්චා තෙ, පෙක්ඛන්තා ඛත්තියාගමං;

උපතිස්සගාමෙ ඨත්වාන, රට්ඨං සමුනුසාසිසුං.

5. මතෙ විජයරාජම්හි, ඛත්තියාගමනා පුරා;

එකං වස්සං අයං ලංකා-දීපො ආසි අරාජකො.

6. තස්මිං සීහපුරෙ තස්ස, සීහබාහුස්ස රාජිනො;

අච්චයෙන සුමිත්තො සො, රාජා තස්ස සුතො අහු.

7. තස්ස පුත්තා තයො ආසුං, මද්දරාජස්ස ධීතුයා;

දූතා සීහපුරං ගන්ත්වා, රඤ්ඤො ලෙඛං අදංසු තෙ.

8. ලෙඛං සුත්වාන සො රාජා, පුත්තෙ ආමන්තයී තයො;

අහං මහල්ලකො තාතා, එකො තුම්හෙසු ගච්ඡතු.

9. ලංකං නෙකගුණං කන්තං, මම භාතුස්ස සන්තකං;

තස්ස’ච්ච යෙන තත්ථෙව, රජ්ජං කාරෙතු සොභනං.

10. කණිට්ඨකො පණ්ඩුවාසු-දෙවො රාජකුමාරකො;

‘‘ගමිස්සාමීති චින්තෙත්වා, ඤත්වා සොත්ථි ගතම්පි ච.

11. පිතරා සමනුඤ්ඤාතො, ද්වත්තිංසාමච්ච දාරකෙ;

ආදාය ආරුහී නාවං, පරිබ්බාජකලිඞ්ගවා.

12. මහාකන්දරනජ්ජා තෙ, මුඛද්වාරම්හි ඔතරං;

තෙ පරිබ්බාජකෙ දිස්වා, ජනො සක්කරි සාධුකං.

13. පුච්ඡිත්වා නගරං එත්ථ, උපයන්තං කමෙන තෙ;

උපතිස්ස ගාමං සම්පත්තා, දෙවතා පරිපාලිතා.

14. අමච්චා’නුමතො’මච්චො, පුච්ඡි නෙමිත්තකා තහිං;

ඛත්තියා’ගමනං තස්ස, සො බ්‍යාකාසි පරංපි ච.

15. සත්තමෙ දීවසෙයෙව, ආගමිස්සති ඛත්තියො;

බුද්ධසාසන මෙතස්ස, වංසජො’ව ඨපෙස්සති.

16. සත්තමෙ දිවසෙයෙව, තෙ පරිබ්බාජකෙ තහිං;

පත්තෙ දිස්වාන පුච්ඡිත්වා, අමච්චා තෙ විජානිය.

17. තං පණ්ණුවාසුදෙවං තෙ, ලංකාරජ්ජෙන අප්පයුං;

මහෙසියා අභාවාසො, න තාව අභිසෙචයි.

18. අමිතොදනසක්කස්ස, පණ්ඩුසක්කො සුතො අහු;

ඤත්වා විනාසං සක්‍යානං, සො ආදාය සකං ජනං.

19. ගන්ත්වා අඤ්ඤාපදෙසෙන, ගඞ්ගාපාරං තහිං පුරං;

මාපෙත්වා තත්ථ කාරෙසි, රජ්ජං තස්ස සුතෙ ලභි.

20. ධීතා කණිට්ඨිතා ආසි, භද්දකච්චාන නාමිකා;

සබ්බලක්ඛණසම්පන්නා, සුරූපා අභිපත්ථිතා.

21. තදත්ථං සත්තරාජානො, පණ්ණාකාරෙ මහාරහෙ;

පෙසෙසුං රාජිනො තස්ස, භීතො රාජූහි සො පන.

22. ඤත්වාන සොත්ථිගමනං, අභිසෙකඵලම්පි ච;

සහද්වත්තිංස ඉත්ථීහි, නාවං ආරොපියා’සුතං.

23. ගඞ්ගාය ඛිපි ගණ්හාතු, පහු මෙ ධීතරං ඉති;

ගහෙතුං තෙ න සක්ඛිංසු, නාවාසාපන සීඝගා.

24. දුතියෙ දිවසෙයෙව, ගොණාගාමක පට්ටනං;

පත්තාපබ්බජිතා කාරා, සබ්බා තා තත්ථ ඔතරුං.

25. පුච්ඡිත්වා නගරං එත්ථ, තා කමෙනොපයන්තියො;

උපතිස්සගාමං සම්පත්තා, දෙවතා පරිපාලිතා.

26. නෙමිත්තකස්ස වචනං, සුත්වා තත්ථා’ගතා තු තා;

දිස්වා අමච්චො පුච්ඡිත්වා, ඤත්වා රඤ්ඤො සමප්පයි.

27. තං පණ්ඩුවාසුදෙවං තෙ, අමච්චා සුද්ධබුද්ධිනො;

රජ්ජෙ සමභිසිඤ්චිංසු, පුණ්ණසබ්බමනොරථං.

28. සුභද්දකච්චාන මනොමරූපිනිං;

මහෙසීභාවෙ අභිසිඤ්චිය’ත්තනො;

සහගතා තාය පදාසි අත්තනා;

සහාගතානං වසි භූමිපො සුඛන්තී.

සුජනප්පසාද සංවෙගත්ථාය කතෙ මහාවංසෙ

පණ්ඩුවාසුදෙවාභිසෙකො නාම

අට්ඨමො පරිච්ඡෙදො.