සට්ඨිම පරිච්ඡෙද

කුමාරොදයො

1. රොහණෙ නිවසිත්ථා’ව, ජයබාහුමහීපති;

මිත්තාව්හා රාජිනී චෙව, තදා කාලමකංසු තෙ.

2. සිරීවල්ලභජායා’ථ, ජනෙසි සුගලා දුවෙ;

මාණභරණකං පුත්තං, පුත්තිං ලීලාවතිම්පි ච.

3. මාණාභරණභූපාල-දෙවී’පි රතනාවලී;

මිත්තං පභාවතිඤ්චාපි, අලභී ධීතරො දුවෙ.

4. පස්සන්තස්ස උභො තායො, ධීතරො වීරබාහුනො;

තදා මහාදිපාදස්ස, එවං ආසි විතක්කිතං.

5. ලොකාභිසම්මතෙ සබ්බ-භූපාලන්වයමුද්ධනි;

විසුද්ධෙ සොමවංසම්හි, අභිජාතා මයං පන.

6. පිහනීයතරාකාරා, සබ්බසත්තිසමුන්නතා;

නානාවිජ්ජාසු නිපුණා, හත්ථිඅස්සාදිසුක්ඛමා.

7. තථා පෙකාකිනා වෙ’තෙ, තයො වික්කමබාහුනා;

පරාජයං පරිභවං, පාපිතා බහුසො රණෙ.

8. සූනුනො සුසමත්ථස්ස, විසොධෙතු මිමං මලං;

න දිස්සතෙ පාතුභාවො, අහො නො අප්පපුඤ්ඤතා.

9. ජනවාදකිලිට්ඨෙන, රාජත්තෙනාපි කිං මම;

ඉදානි විසයාසඞ්ගං, හිත්වා කල්‍යාණකම්මසු.

10. අප්පමත්තස්ස සතතං, නෙතබ්බා වාසරා’ඉති;

නිය්‍යාතෙත්වා අමච්චානං, සබ්බං රජ්ජවිචාරණං.

11. තහිං සත්ත’ට්ඨමාසඤ්හි, වසං රත්තියමෙකදා;

දෙවරාජඝරෙසෙය්‍යං, කප්පෙසි සීලසංයතො.

12. තතො පච්චූසකාලම්හි, දෙවපුත්තං මහිද්ධිකං;

විචිත්තවත්ථාභරණං, ගන්ධමාලාවිභූසිතං.

13. උළාරතරරූපෙන, දෙහොභාසෙන අත්තනො;

ඔභාසෙන්තං අසෙසා’සා, සූරියඤ්ච න භුග්ගතං.

14. වදන්තං සුපිනෙ එවං, අදක්ඛි දරණීපති;

පසීදස්සු මහාභාග, පිතොභව මහිපති.

15. ධඤ්ඤලක්ඛණසම්පන්නො, ඉච්ඡිතත්ථස්සසාධකො;

විනීතො ලොකකුහර-බ්‍යාපිතෙජො පරක්කමො.

16. ආණබලයසොකිත්ති-භාසුරො සග්ගුණාකරො;

ලොකසාසනසංවුද්ධි-කරො පුත්තවරො තව.

17. ලබ්භීස්සතෙ මහාරාජ, න චිරස්සෙව සම්පති;

පුත්තදාරාධිවුත්ථං තං, පුරං ඛිප්පං පයාහීති.

18. පබුජ්ඣිත්වාන සඤ්ජාත-පීතිවෙගොථ රත්තියා;

විභාතාය තතොපොඞ්ඛ-ගාමං ගඤ්ඡිනරුත්තමො.

19. යථා දිට්ඨප්පකාරන්තං, කථෙසි සුපිනං සුභං;

මහෙසී පමුඛානං සො, අමච්චානං මහීපති.

20. සද්ධිං මහෙසියා තත්ථ, පත්ථෙන්තො පුත්තමුත්තමං;

චින්තොන්තො දානසීලාදිං, සුභං නානප්පකාරකං.

21. අථෙකදිවසංකාලෙ, පච්චූසෙ සුපිනෙ පන;

සබ්බලක්ඛණසම්පන්නං, සබ්බසෙතං මනොහරං.

22. දන්තීපොතවරං දන්තං, කණ්ණෙ ගණියපෙමතො;

පවිසන්තමිවත්තානං, සෙය්‍යාගබ්භං මහෙසියා.

23. සම්පස්සිය පබුජ්ඣිත්වා, උට්ඨාය සයනාවරා;

සඤ්ජාතපීතිපාමොජ්ජ-වෙගපීණිතමානසො.

24. තායං වෙලායමෙදාසු-සෙය්‍යාගබ්භං මහෙසියා;

පවිස්සසුපිනං තස්සා, යථාදිට්ඨං පකාසයී.

25. අහම්පි තාදිසං හත්ථි-පොතකං සයනං මම;

පදක්ඛිණං කරිත්වාන, ඨිතං සොණ්ඩෙ සමාදිය.

26. ආකඩ්ඪිත්වාන සයනං, සමාරොපිය පෙමතො;

ආලිඞ්ගිං සුපිනම්හීති, දෙවී චාපි තමබ්‍රවී.

27. උභො තෙ අඤ්ඤමඤ්ඤස්ස, දිට්ඨමෙවං පකාසිය;

උට්ඨාපෙසුං පහට්ඨාව, වීතනිද්දාරුණං තදා.

28. තතො පාතො උපට්ඨාතු, මුපයාතං පුරොහිතං;

නෙමිත්තකෙ ච පුච්ඡිංසු, සුනිත්වා තෙ පමොදිතා.

29. න චිරස්සෙව පුත්තස්ස, ධඤ්ඤලක්ඛණසාලිනො;

උප්පත්තියා අවස්සං’ව, භවංතබ්බන්ති කිත්තයුං.

30. තං සුණිත්වා අමච්චා ච, තථා නගරවාසිනො;

අවින්දිංසු ජනින්දො ච, සබ්බෙපීති මහුස්සවං.

31. තතො පට්ඨාය සොත්ථානං, පත්ථයං පත්ථිවොභුසං;

භික්ඛුසඞ්ඝෙන බහුසො, භණාපෙසි පරිත්තකං.

32. මණිමුත්තාදිකං චිත්තං, මහග්ඝමනුවාසරං;

පරිච්චජි දානමුඛෙ, යාචකානමනෙකසො.

33. පුරොහිතාදිවිප්පෙහි, වෙදවෙදඞ්ගවිඤ්ඤූහි;

වත්තාපෙසි ච හොමාදි-විධානං සොත්ථි සම්මතං.

34. සුවිනට්ඨෙ විහාරෙ ච, ධාතුගබ්භෙ ච වාපියො;

ජිණ්ණා ච පටිසඞ්ඛත්තුං, යොජයී රාජකප්පිකෙ.

35. දිනං නයන්තෙ කල්‍යාණ-කම්මෙනෙ’වං නරිස්සරෙ;

න චිරං සණ්ඨහි ගබ්භ-වරො කුච්ඡිම්හි දෙවියා.

36. තතොවගම්ම තං හට්ඨ-පහට්ඨො සො නරිස්සරො;

මහන්තං දෙවියා ගබ්භ-පරිහාරමදාපයි.

37. පරිපක්කගබ්භා දෙවී, කමෙන ජනයීසුකං;

සමයෙ භද්දනක්ඛත්ත-මුහුත්තෙනභිලක්ඛිතෙ.

38. සුප්පසන්නා අසෙසා ච, දිසායො තංඛණෙ අහු;

සමීරණෙ ච වාසිංසු, සුගන්ධිමුදුසීතලා.

39. දන්තීනං කොඤ්චනාදෙන, හයානං හෙසිතෙන ච;

රාජඞ්ගණං තදාජාතං, මහාකොලාහලා කූලං.

40. අච්ඡෙරාතිසයෙ එවං, පාතුභූතෙ අනෙකධා;

දිස්වා තං විම්හයප්පත්තො, මාණභරණභූපති.

41. සුත්වා නිජස්ස පුත්තස්ස, තදා සඤ්ජාතසාසනං;

අමතෙනාභිසිත්තොව, පීතිපුණ්ණමනොරථො.

42. මොචාපෙත්වා තදා කාරා-ඝරෙ බද්ධෙ බහූජනෙ;

දානං උළාරං සමණ-බ්‍රාහ්මණානං පදාපයි.

43. අමච්චපමුඛා චාපි, ජනාපුරනිවාසිනො;

කදලීතොරණාදීහි, රාජධානී මනෙකධා.

44. අලඞ්කරිත්වා සකලං, සුමණ්ඩිතපසාධිතා;

ඡණං මහන්තං වත්තෙසුං, කතිපාහං මනොරමං.

45. වෙදෙ වුත්තවිධානෙන, ජාතකම්මාදිකං විධිං;

සබ්බං සමාපයිත්වාන, කුමාරස්සා’වනීපති.

46. පුරොහිතාදයො විප්පෙ, තතො ලක්ඛණපාඨකෙ;

ආණාපෙත්වාන සක්කාර-සම්මානවිධිපුබ්බකං.

47. නියොජෙසි කුමාරස්ස, ලක්ඛණානං පටිග්ගහෙ;

සාධකං සකලං තස්ස, යත්ථපාදාදිලක්ඛණං.

48. උපධාරිය මහාමච්ච-ගණමජ්ඣගතස්ස තෙ;

රාජිනො දෙවියා චාපි, පකාසෙසුං පමොදිතා.

49. ලඞ්කාදීපං ඨපෙත්වාන, ජම්බුදීපතලම්පි ච;

එකච්ඡත්තඞ්කිතං කත්වා-නුභොත්තුං නිපුණො ඉති.

50. තෙ සන්තප්පිය භොගෙහි, භිය්‍යො පුච්ඡිත්ථ සාදරං;

සන්දිස්සමානං යංකිඤ්චි, අරිට්ඨං අත්ථි නත්ථී’ති.

51. දීඝායුකො කුමාරො’යං, කිඤ්චි පඤ්ඤායතෙ වත;

ජනකාරිට්ඨයොගො’ති, තෙ මහීපතිනො’බ්‍රවුං.

52. තස්සාරිජනසම්මද්දි-පතාපභුජයො ගතො;

සො පරක්කමබාහූ’ති, අන්වත්ථනාමමග්ගහී.

53. කණ්ණවෙ ධමහඤ්චෙව, අන්නුපාසනමඞ්ගලං;

කාරාපිය විධානඤ්ඤූ, යථාවිධිමසෙසතො.

54. රඤ්ඤො වික්කමබාහුස්ස, සපුත්තුප්පත්තිසාසනං;

වත්තුං සදූතෙ පෙසෙසි, පුලත්ථිනගරං තදා.

55. තෙහිසො භාගිනෙය්‍යස්ස, මහාභාගත්තනම්පි ච;

ජනකාරිට්ඨයොගඤ්ච, සුත්වා වික්කමබාහුසො.

56. ධඤ්ඤං විජයරාජාදි-රාජමාලාය නායකං;

මණිංව භාසුරං මය්හං, භාගිනෙය්‍යං ජනෙසිසො.

57. හානි යාකාචිසතතං, යථා තස්ස න හෙස්සති;

තථා මමන්තිකෙයෙව, කුමාරො එත්ථ වඩ්ඪතං.

58. අලද්ධං ලභිතුං ලාභං, ලද්ධඤ්ච පරිරක්ඛිතුං;

සබ්බථා න සමත්ථොයං, පුත්තො ගජබාහු මම.

59. සූරභාවාදියුත්තො’පි, මහින්දව්හපරොසුතො;

නිහීනො මාතුගොත්තෙන, න රජ්ජස්ස රහො මම.

60. ඨිතස්ස වික්කජාතෙන, නෙකසො සඤ්චිතෙන මෙ;

රජ්ජස්ස භාගිනෙය්‍යො’ව, කාමං භාගී භවිස්සති.

61. ඉතිපෙසෙසි දූතෙ සො, ආනෙතුං තං කුමාරකං;

කුමාරා භරණං දත්වා, සෙසං සාරඤ්චුපායනං.

62. සබ්බං දූතමුඛා සුත්වා, වීරබාහු මහීපති;

තස්සෙතං වචනං යුත්තං, වුත්තං මෙහිත බුද්ධියා.

63. තථාපි ච නිජාරිට්ඨ-පටිකාරත්ථමීදිසං;

ඔරසං පුත්තරතනං, පෙසෙතුං නා’නුරූපකං.

64. කිඤ්ච තත්ථ කුමාරම්හි, නීතෙ වික්කම බාහුනො;

පක්ඛො ලද්ධමහාවාහ-බලො විය හුතාසනො.

65. අච්චුන්නතෙන මහතා, තෙජසා සඤ්ජලිස්සති;

හානිරෙව වතම්හාකං, මහතී හෙස්සතෙ භුසං.

66. ඉති හත්ථෙ ගතානං සො, දූතානං ථනයං සකං;

අපෙසෙත්වා විසජ්ජෙසි, පසාදිය මනෙන සො.

67. සපුත්තදාරෙහි සමග්ගවාසං,

නරාදිනාථො නිවසං තහිංසො;

තිබ්බෙන ඵුට්ඨො මහතාගදෙන,

රජ්ජෙන සද්ධිං විජහිත්ථ දෙසං.

සුජනප්පසාදසංවෙ ගත්ථාය කතෙ මහාවංසෙ

කුමාරොදයො නාම

සට්ඨිමො පරිච්ඡෙදො.