ඡට්ඨපරිච්ඡෙද

විජයාගමනං

1. වඞ්ගෙසු වඞ්ගනගරෙ, වඞ්ගරාජා අහු පුරෙ;

කාලිඞ්ගරඤ්ඤො ධීතා’සි, මහෙසී තස්ස රාජිනො.

2. සො රාජා දෙවියා තස්සා, එකං අලභි ධීතරං;

නෙමිත්තාබ්‍යාකරුං තස්සා, සංවාසං මගරාජිනා.

3. අතීව රූපිනිං ආසි, අතීව කාමගිද්ධිනී;

දෙවෙන දෙවියා’චාපි, ලජ්ජායා’සි ජගුච්ඡිතා.

4. එකාකිනී සා නික්ඛම්ම, සෙරීචාරසුඛත්ථිනී;

සත්ථෙන සහ අඤ්ඤාතා, අගා මගධගාමිනා.

5. ලාළරට්ඨෙ අටවියා, සීහො සත්ථමභිද්ධවි;

අඤ්ඤත්ථ සෙසා ධාවිංසු, සීහගතදිසන්තුසා.

6. ගණ්හිත්වා ගොචරං සීහො, ගච්ඡං දිස්වා තමා’රතො;

රත්තො උපාගලාලෙන්තො, ලඞ්ගුලං පත්තකණ්ණකො.

7. සා තං දිස්වා සරිත්වාන, නෙමිත්තවචනං සුතං;

අභීතා තස්ස අඞ්ගානි, රඤ්ජයන්ති පරාමසි.

8. තස්සා ඵස්සෙනා’ති රත්තො, පිට්ඨිං ආරොපියා’සුතං;

සීහො සකං ගුහං නෙත්වා, තාය සංවාසමාචරි.

9. තෙන සංවාසමන්වාය, කාලෙන යමකෙ දුවෙ;

පුත්තඤ්ච ධීතරඤ්චාති, රාජධීතා ජනෙසි සා.

10. පුත්තස්ස හත්ථපාදා’සුං, සීහාකාරා තතො අකා;

නාමෙන සීහබාහුං තං, ධීතරං සීහසීවලිං.

11. පුත්තො සොළසවස්සො සො, මාතරං පුච්ඡි සංසයං;

තුවං පිතා ච නො අම්ම, කස්මා විසදිසා ඉති.

12. සා සබ්බමබ්‍රවී තස්ස, කිංනයාමා’ති සො’බ්‍රවි;

ගුහං ථකෙතිතාතො තෙ, පාසාණෙනාති සා’බ්‍රවි.

13. මහාගුහාය ථකනං, ඛන්ධෙනා’දාය සො අකා;

එකාහෙනෙ’ව පඤ්ඤාස-යොජනානි ගතාගතං.

14. ගොචරාය ගහෙ සීහෙ, දක්ඛිණස්මිඤ්හි මාතරං;

වාමෙ කණිට්ඨිං කත්වාන, තයො සීඝං අපක්කමී.

15. නිවාසෙත්වාන සාඛං තෙ, පච්චන්තං ගාමමාගමුං;

තත්ථාසි රාජිධීතාය, මාතුලස්ස සුතො තදා.

16. සෙනාපති වඞ්ගරඤ්ඤො, ඨිතො පච්චන්ත ගාමකො;

නිසින්නොවටමූලලෙසො, කම්මන්තං සංවිධායකං.

17. දිස්වා තෙ පුච්ඡිතෙ’වොචුං, අටවී වාසිනො මයං;

ඉති සො දාපයී තෙසං, වත්ථානි ධජිනී පති.

18. තානා’හෙසුං උළාරානි, භත්තං පණ්ණෙසු දාපයි;

සොවණ්ණභාජනනා’සුං, තෙසං පුඤ්ඤෙන තානි ච.

19. තෙන සො විම්හිතො පුච්ඡි, කෙ තුම්හෙති චමූපති;

තස්ස සා ජාතිගොත්තානි, රාජධීතා නිවෙදයි.

20. පිතුච්ඡා ධීතරං තං සො, ආදාය ධජිනී පති;

ගන්ත්වාන වඞ්ගනගරං, සංවාසං තාය කප්පයි.

21. සීහො සීඝං ගුහං ගන්ත්වා, තෙ අදිස්වා තයො ජනෙ;

අට්ටිතො පුත්තසොකෙන, න ච ඛාදි න චා’පිවි.

22. දාරකෙ තෙ ගවෙසන්තො, අගා පච්චන්තගාමකෙ;

උබ්බාසීයති සො සො’ව, යංයං ගාමමුපෙති සො.

23. පච්චන්තවාසිනො ගන්ත්වා, රඤ්ඤො තං පටිවෙදයුං;

සීහො පිළෙති තෙ රට්ඨං, තං දෙව පටිසෙධය.

24. අලකං නිසෙධකං තස්ස, හත්ථික්ඛන්ධගතං පුරෙ;

ආදෙතු සීහදායීති, සහස්සං සො පචාරයි.

25. තථෙව ද්වෙසහස්සානි, තීණිචා’පි නරිස්සරො;

ද්වීසු වාරෙසු වාරෙසි, මාතා සීහභුජං හිතං.

26. අග්ගහි තතියෙ වාරෙ, සීහබාහු අපුච්ඡිය;

මාතරං තිසහස්සං තං, ඝාතෙතුං පිතරං සකං.

27. රඤ්ඤො කුමාරං දස්සෙසුං, තං රාජා ඉධ මබ්‍රවි;

ගහිතො යදි සීහො තෙ, දම්මි රට්ඨං තදෙව තෙ.

28. සො තං ගන්ත්වා ගුහාද්වාරං, සීහං දිස්වාව ආරකා;

එන්තං පුත්තසිනෙහෙන, විජ්ඣිතුං තං සරං ඛිපි.

29. සරො නළාතමාහච්ච, මෙත්තචිත්තෙන ථස්ස තු;

කුමාරපාදමූලෙ’ව, නිවත්තො පති භූමියං.

30. තථා’සි යාව තතියං, තතො කුජ්ඣිමිගාමිපො;

තතො ඛිත්තො සරොතස්ස, කායං නිබ්බිජ්ජ නික්ඛමි.

31. සකෙසරං සීහසීසං, ආදාය සපුරං අගා;

මතස්ස වඞ්ගරාජස්ස, සත්තාහානි තදා අහු.

32. රඤ්ඤො අපුත්තකත්තා ච, පතීතා චස්ස කම්මුනා;

සුත්වා ච රඤ්ඤො නත්තුත්තං, සඤ්ජානිත්වා ච මාතරං.

33. අමච්චා සන්නිපතිතා, අඛිලා එකමානසා;

සීහබාහු කුමාරස්ස, රාජා හොහීති අබ්‍රවුං.

34. සො රජ්ජං සම්පටිච්ඡිත්වා, දත්වා මාතු පතිස්ස තං;

සීහසීවලිමාදාය, ජාතභූමිං ගතො සයං.

35. නගරං තත්ථ මාපෙසි, අහු සීහපුරන්ති තං;

අරඤ්ඤෙ යොජනසතෙ, ගාමෙ චාපි නිවෙසයි.

36. ලාළරට්ඨෙ පුරෙ තස්මිං, සීහබාහුනරාධිපො;

රජ්ජං කාරෙසි කත්වාන, මහෙසිං සීහසීවලිං.

37. මහෙසී සොළසක්ඛත්තුං, යමකෙ ච දුවෙ දුවෙ;

පුත්තෙ ජනයි කාලෙසා, විජයො නාම ජෙට්ඨකො.

38. සුමිත්තො නාම දුතියො, සබ්බෙ ද්වත්තිංස පුත්තකා;

කාලෙන විජයං රාජා, උපරජ්ජෙ’භි සෙචයි.

39. විජයො විසමාචාරො, ආසි තම්පරිසාපි ච;

සාහසානි අනෙකානි, දුස්සහානි කරිංසුතෙ.

40. කුද්ධො මහාජනො රඤ්ඤො, තමත්ථං පටිවෙදයි;

රාජා තෙ සඤ්ඤපෙත්වාන, පුත්තං ඔවදි සාධුකං.

41. සබ්බං තථෙව දුතියං, අහොසි තතියං පන;

කුද්ධො මහාජනො ආහ, පුත්තං ඝාතෙහි තෙ ඉති.

42. රාජා’ථවිජයං තඤ්ච, පරිවාරඤ්ච තස්ස තං;

සත්තසතානි පුරිසෙ, කාරෙත්වා අද්ධමුණ්ණකෙ.

43. නාවාය පක්ඛිපාපෙත්වා, විස්සජ්ජාපෙසි සාගරෙ;

තථා තෙසං භරියායො, තථෙව ච කුමාරකෙ.

44. විසුං විසුං තෙ විස්සට්ඨා, පුරිසිත්ථිකුමාරකා;

විසුං විසුං දීපකස්මිං, ඔක්කමිංසු වසිංසු ච.

45. නග්ගදීපොති ඤායිත්ථ, කුමාරොක්කන්තදීපකො;

භරියොක්කන්තදීපො තු, මහින්දදීපකො ඉති.

46. සුප්පාරකෙ පට්ටනම්හි, විජයො පන ඔක්කමි;

පරිසා සාහසෙනෙ’ත්ථ, භීතො නාවං පුනා’රුහි.

47. ලංකායං විජයසනාමකො කුමාරො;

ඔතිණ්ණො ථිරමති තම්බපණ්ණිදීපෙ;

සාලානං යමකගුණානමන්තරස්මිං;

නිබ්බාතුං සයිතදිනෙ තථාගතස්ස.

සුජනපසාදසංවෙ ගත්ථායකතෙ මහාවංසෙ

විජයාගමනංනාම

ඡට්ඨාපරිච්ඡෙදො.