චතුපඤ්ඤාසතිම පරිච්ඡෙද

ඡ රාජකොනාම

1. කත්වා වික්කම්ම බාහූ’ති, නාම භූපාලසූනුතො;

තස්සාණාය පවත්තිංසු, සාදරං සීහළා ඛිලා.

2. සො රාජා දමිළෙ හන්තුං, ධනං සඤ්චිය’නෙකාධා;

සඞ්ගහං සෙවකානඤ්ච, කුරුමානො යථොචිතං.

3. අලඞ්කාරකිරීටානි, ඡත්තසීහාසනානි ච;

කාරයිත්වා’භිසෙකත්ථං, සචිවෙහා’භියාචිතො.

4. න යාව රාජරට්ඨස්ස, ගහණං හොති තාව මෙ;

ඡත්තුස්සාපනකම්මෙන, කිං තෙනා’ති විවාරිය.

5. සතං නරසහස්සානං, සඞ්කලෙත්වා මහබ්බලො;

සඞ්ගාමාරබ්භ කාලම්හි, වාතරොගාභිපීළිතො.

6. යුජ්ඣිතුං සමයො නෙති, ද්වාදසෙ වච්ඡරෙ ලහුං;

උපෙච්ච දෙවනගරං, ගඤ්ඡිදෙවසහබ්‍යතං.

7. කිත්තිනාමො ච සචිවො, සෙනාපච්චමධිට්ඨිතො;

රජ්ජත්ථිකො දිනානට්ඨ, නිජාණං සම්පවත්තයි.

8. ඝාතෙත්වා තං මහාලාන-කිත්තිනාමො මහබ්බලො;

පත්වා’භිසෙකං භුඤ්ජන්තො, දෙසං තං රොහණව්හයං.

9. සංවච්ඡරම්හි තතියෙ, චොළයුද්ධෙ පරාජිතො;

සහත්ථෙන සකං සීසං, ඡින්දිත්වා සහසා මරි.

10. තදාපිතෙ කිරීටාදි-ධනසාරං සමාදිය;

පෙසෙසුං දමිළා චොළ-මහීපාලස්ස සන්තිකං.

11. භයා සරට්ඨං හිත්වා’ථ, දුට්ඨදෙසෙ වසං තදා;

එකො වික්කමපණ්ඩූති, විස්සුතො පත්ථිවත්තජො.

12. විඤ්ඤාතලඞ්කාවුත්තන්තො, දෙසමාගම්ම රොහණං;

කාළතිත්ථෙ වසං වස්ස-මෙකං රජ්ජමකාරයි.

13. රාමන්වයසමුබ්භූතො, තදායුජ්ඣ පුරාගතො;

ජගතී පාලනාමෙන, විස්සුතො භූභුජත්තජො.

14. රණෙ වික්කමපණ්ඩුතං, ඝාතාපෙත්වා මහබ්බලො;

තතො චත්තාරි වස්සානි, රජ්ජං කාරෙසි රොහණෙ.

15. තම්පි චොළාරණෙ හන්ත්වා, මහෙසිං ධීතරා සහ;

විත්තසාරඤ්ච සාකලං, චොළරට්ඨමපෙසයුං.

16. රාජා පරක්කමො නාම, පණ්ඩුරාජසුතො තතො;

අකා වස්සද්වයං චොළා, ඝාතෙසුං තම්පි යුජ්ඣිය.

17. ඉමෙ භුසං ලොභබලාභිභූතා,

ගතා අසෙසා විවසා විනාසං;

ඉච්චෙවමඤ්ඤාය සදා සපඤ්ඤො,

තණ්හක්ඛයෙයෙව රතිං කරෙය්‍ය.

සුජනප්පසාදසංවෙගත්ථාය කතෙ මහාවංසෙ

ඡ රාජකො නාම

චතුපඤ්ඤාසතිමො පරිච්ඡෙදො.