එකපඤ්ඤාසතිම පරිච්ඡෙද

පඤ්චරාජකො නාම

1. යුවරාජා තදා හුත්වා, රාජා දප්පුළනාමකො;

ඨපෙසි ඔපරජ්ජම්හි, ආදිපදං සනාමකං.

2. මරිචවට්ටිවිහාරස්ස, ගාමං දත්වා තතො පුරෙ;

චාරිත්තං පුබ්බරාජූනං, රක්ඛිත්වාන මහිං ඉමං.

3. අභුත්වා දීඝකාලඤ්හි, පුබ්බකම්මෙන අත්තනො;

රාජා සො සත්තමෙ මාසෙ, පවිට්ඨො පච්චුනො මුඛං.

4. උපරාජා අහුරාජා, දප්පුළො තදනන්තරං;

උදයස්සාදිපාදස්ස, යුවරාජපදං අදා.

5. තදා චොළභයා පණ්ඩු-රාජං ජනපදං සකං;

චජිත්වා නාවමාරුය්හ, මහාතිත්ථමුපාගමි.

6. ආණාපෙත්වාන තං රාජා, දිස්වා සන්තුට්ඨමානසො;

මහාභොගං අදා තස්ස, නිවාසෙසි පුරා බහි.

7. චොළරාජෙන යුජ්ඣිත්වා, ගහෙත්වා පට්ටනද්වයං;

පණ්ඩුරාජස්ස දම්මීති, සන්නද්ධෙ ලඞ්කරාජිනි.

8. කෙනා’පි කරණීයෙන, ඛත්තියා දීපවාසිනො;

අකංසු විග්ගහං ඝොරං, පාපකම්මෙන පණ්ඩුනො.

9. පණ්ඩුරාජෙ’ත්ථ වාසෙන, කම්මං නත්ථීති චින්තිය;

ඨපෙත්වා මකුටාදීනි, ගතො කෙරළසන්තිකං.

10. විග්ගහෙ නිට්ඨිතෙ රාජා, මහාමෙඝවනෙ තදා;

මහාබොධිඝරස්සා’දා, ගාමං නගරසන්තිකෙ.

11. ආවාසං රක්ඛකො නාම, තස්ස සෙනාපතී අකා;

ථූපාරාමසමීපම්හි, ඉළඞ්ගො රාජනාමකං.

12. කතං තං පුබ්බරාජෙහි, රාජා සො පරිපාලිය;

පත්තො ද්වාදසමං වස්සං, යථාකම්මමුපාගමි.

13. උදයො යුවරාජා’සි, ලංකාවාසීනමිස්සරො;

සෙනනාමාදිපාදං සො, ඔපරජ්ජෙ’භිසෙචයි.

14. රඤ්ඤො භීතා තදාමච්චා, පවිසිංසු තපොවනං;

රාජොපරාජා ගන්ත්වාන, තෙසං සීසානි ඡෙදයුං.

15. තෙන කම්මෙන නිබ්බින්නා, යතයො තන්නිවාසිනො;

හිත්වා ජනපදං රඤ්ඤො, තදාගච්ඡිංසු රොහණං.

16. තදා ජානපදා චෙව, නාගරා ච බලානි ච;

කුපිතා චණ්ඩුවාතෙන, සාගරො විය කම්පිතො.

17. රතනපාසාදමාරුය්හ, විහාරෙ අභයුත්තරෙ;

සන්තාසෙත්වාන රාජානං, දස්සෙත්වාන විභීසිකං.

18. උපත්ථම්භකමච්චානං, විග්ගහස්ස තපොවනෙ;

තදා සීසානි ඡින්දිත්වා, කවාතෙන නිපාතයුං.

19. තං සුත්වා යුවරාජා ච, ආදිපාදො ච තං සඛා;

උල්ලඞ්ඝිත්වාන පාකාරං, සීඝං ගච්ඡිංසු රොහණං.

20. බලකායොනුබන්ධිත්වා, යාව කණ්හනදීතටා;

අලාභෙන ච නාවානං, තිණ්ණත්තා තෙසමාගමි.

21. රාජපුත්තාගතා තත්ථ, වනෙ අභයභෙදිනො;

යතීනං පුරතො තෙසං, නිපජ්ජිත්වා උරෙන තෙ.

22. අල්ලවත්ථා’ල්ලකෙසා ච, පරිදෙවිත්ථ’නෙකධා;

කන්දීත්වා රොදනං කත්වා, ඛමාපෙසුං තපස්සිනො.

23. ඛන්තිමෙත්තානුභාවෙන, තෙසං සාසනසාමිනං;

පුඤ්ඤොදයො අහු තෙසං, උභින්නං දීපසාමිනං.

24. යුවරාජබලඤ්චෙව, නිකායත්තයවාසිනො;

ගමිංසු තෙසමානෙතුං, සන්තිභූතෙ මහාබලෙ.

25. රාජපුත්තා උභො බ්‍යත්තා, පණ්ඩිතා පංසුකූලිනො;

යාචිත්වා තෙසමාදාය, අගමංසු සකං පුරං.

26. භික්ඛූනං පුරතො මග්ගං, රාජාගන්තා ඛමාපයි;

ආදාය තෙ වනං තෙසං, නෙත්වා රාජඝරං ගතො.

27. තතො පට්ඨාය චාරිත්ථං, පාලෙත්වා පුබ්බරාජුනං;

රාජා සො තතියෙ වස්සෙ, යථාකම්මමුපාගමි.

28. ලංකාභිසෙකං පත්වාන, සෙනො සො මතිමා තතො;

උදයං ආදිපාදං තං, යුවරාජං අකා සඛං.

29. කහාපණසහස්සං සො, දුග්ගතානං උපොසථෙ;

හොතු’පොසථිකො දත්වා, යාවජීවං නරාධිපො.

30. පටිමා භත්තවත්ථානි, භික්ඛූනං ධරණී පති;

අදා දණ්ඩිස්සරං දානං, යාචකානඤ්ච සිප්පීනං.

31. ඨානෙ කත්ථචි සිප්පීනං, පාසාදෙසු මනොහරෙ;

කාරෙත්වා භොගගාමෙ ච, අදාපෙසි මහාමති.

32. කහාපණසහස්සං වා, දත්වා පඤ්චසතානි වා;

ලඞ්කායං ජිණ්ණකාවාසෙ, නවකම්මමකාරයී.

33. චත්තාලීසසහස්සානි, අභයුත්තරචෙතියෙ;

සිලාපත්ථරණත්ථාය, දාපෙසි ච මහීපති.

34. මහාවාපීසු ලංකායං, ජිණ්ණනිද්ධමනෙ අකා;

නවකම්මඤ්ච මරියාදං, ථියං පාසාණපංසුනා.

35. අකා රාජඝරෙ රම්මං, මාලාගෙහං මහාරහං;

ඨපිතං පුනරාජූහි, දානං සම්මාපවත්තයි.

36. කතං මලයරාජෙන, අමච්චෙන’ග්ග බොධිනා;

පරිවෙණං නාගසාලං, දිස්වා ගාම මදා තදා.

37. කත්වා චතුවිහාරෙසු, රූපකම්මානි සාධුකං;

මණ්ඩපානි ච රම්මානි, ධාතුපූජං අකා සදා.

38. එවමාදීනි පුඤ්ඤානි, අනෙකානි අනෙකධා;

කත්වා සො නවමෙ වස්සෙ, යථාකම්මමුපාගමි.

39. ලංකාභිසෙකං පත්වාන, යුවරාජොදයො තතො;

සෙනනාමාදිපාදං සො, ඔපරජ්ජෙ’භි සෙචයි.

40. නිද්දාලු මජ්ජපො ආසි, රාජා පාපෙන ජන්තුනං;

චොළො පමත්තතං තස්ස, සුත්වා සන්තුට්ඨමානසො.

41. පණ්ඩුදෙසාතිසෙකං සො, පත්තුකා මෙත්ථ පෙසයි;

මකුටාදීනමත්ථාය, ඨපිතානංව පණ්ඩුනා.

42. තානි නාදාසි සො රාජා, තෙන චොළො මහබ්බලො;

බලං සන්නය්හ පෙසෙසි, බලක්කාරෙන ගණ්හිතුං.

43. තදා සෙනාපති එත්ථ, පච්චන්තෙ කුපිතෙ ගතො;

ආණාපෙත්වාන තං රාජා, යුජ්ඣනත්ථාය පෙසයි.

44. හතො සෙනාපති තත්ථ, යුජ්ඣි න රණෙ මතො;

කකූටාදීනි ආදාය, රාජා සො රොහණං අගා.

45. ගන්ත්වා චොළබලං තත්ථ, අලභිත්වා පවෙසනං;

නිවත්තිත්වා සකං රට්ඨං, අගමාසි ඉධතා භයා.

46. තතො සෙනාපතිට්ඨානෙ, විදුරග්ගං තු නායකං;

ඨපෙසි රාජා ලංකින්දො, තෙජවන්තං මහාමතිං.

47. පච්චන්තං චොළරාජස්ස, ඝාතෙත්වා සො චමූපති;

ආණාපෙසි ඉතො නීතං, දස්සෙත්වාන විභීසිතං.

48. තතො දාපෙසි සො සබ්බ-පරික්ඛාරං මහාරහං;

පංසුකූලිකභික්ඛූනං, සබ්බෙසං දීපවාසිනං.

49. මහාවිහාරෙ ලංකින්දො, පටිබිම්බස්ස සත්ථුනො;

ජලන්තං මණිරංසීහි, අකා චූළාමණිං තදා.

50. ඔරොධා විදුරා තස්ස, පාදජාලෙන පූජයි;

මණීහි පජ්ජලන්තෙහි, පටිමං තං සිලාමයං.

51. ඣාපිතං චොළරාජස්ස, බලෙන මණිනාමකං;

පාසාදං කාතුමාරද්ධො, චුතො වස්සම්හි අට්ඨමෙ.

52. පඤ්චෙතෙ වසුධාධිපා වසුමහිං එකාතපත්තඞ්කිතං;

භුත්වා නිග්ගහසඞ්ගහෙහි සකලං ලොකං වසෙ වත්තිය;

යා තා මච්චුවසං සපුත්තවණිතා සාමච්චමිත්තානුගා;

ඉච්චෙවං සතතං සරන්තු සුජනා හාතුං පමාදං මදං.

සුජනප්පසාදසංවෙගත්ථාය කතෙ මහාවංසෙ

පඤ්චරාජකො නාම

එකපඤ්ඤාසතිමො පරිච්ඡෙදො.