පඤ්චචත්තාලීසතිම පරිච්ඡෙද

1. රඤ්ඤො තස්සච්චයෙ රාජා, මාණවම්මො අහොසි සො;

කිං ගොත්තො කස්ස පුත්තො ච, කථං රජ්ජමපාපුණි.

2. මහාසම්මතවංසම්හි, ජාතො ජාතිගුණාවහො;

පුත්තො කස්සපනාමස්ස, ථූපාරාමස්ස භෙදිනො.

3. ධීතා මලයරාජස්ස, සඞ්ඝනාමස්ස රාජිනො;

තං ලභිත්වා වසං දෙසෙ, උත්තරෙ ලීනවුත්තිකො.

4. හත්ථදාඨනරින්දෙන, තස්මිං අත්ථෙව ධාරිතෙ;

ජම්බුදීපමුපාගම්ම, නරසීහං මහීපති.

5. ගන්ත්වා වත්වා සකං නාමං, සෙවිතුං තමුපක්කමි;

ආරාධෙසි ච සබ්බෙහි, පයොගෙහි නරාධීපං.

6. විදිත්වා තස්ස සොහජ්ජං, නෙත්වා භරියමත්තනො;

වාසං තත්ථෙව කප්පෙසි, සෙවමානො දිවානිසං.

7. සොපි ආරාධිතො තෙන, කණ්ඩුවෙට්ඨි නරුත්තමො;

සබ්බං නෙන්තොව තං රජ්ජං, මහාභොගමදාපයි.

8. තෙන සංවාසමන්වාය, භරියා සඞ්ඝනාමිකා;

චතස්සො ධීතරො පුත්තෙ, චත්තාරොපි විජායථ.

9. අථෙකදිවසං රාජා, හත්ථික්ඛන්ධවරං ගතො;

සඤ්චරන්තො යථාකාමං, මාණවම්මෙන එකතො.

10. නාළිකෙරං පිවිත්වාන, තත්‍රට්ඨොව පිපාසිතො;

මාණවම්මස්ස පාදාසි, මඤ්ඤන්තො අඤ්ඤමෙව තං.

11. සො තං ගහෙත්වා චින්තෙසි, සඛං පෙස නරාධිපො;

උච්ඡිට්ඨං නාම කිං හොති, සත්තානං පරමත්ථතො.

12. තස්මා යුත්තං මයාපාතු-මීති චින්තිය තං පිවි;

එවං හොන්ති මහුස්සාහා, දෙතුකාමාහි බුද්ධිනො.

13. රාජාපි දිස්වා තං භීතො, තස්සපී තාව සෙසකං;

සයං පිවි තථාහොති, කම්මං පුඤ්ඤවතං සදා.

14. ඨපෙසි සකවෙසෙව, තතො පට්ඨාය අත්තනො;

භොජනෙ සයනෙ චෙව, පරිහාරෙ ච වාහනෙ.

15. එවං තෙසු වසන්තෙසු, යුද්ධත්ථායමුපක්කමි;

වල්ලභො නරසීහෙන, නරසීහො විචින්තයි.

16. අයං ඛො මම සෙවාය, රජ්ජං වංස ගතං සකං;

ලභිස්සාමීති සෙවෙති, රත්තිං දිව මතන්දිතො.

17. සචෙ සොපි මයා ගන්ත්වා, යුජ්ඣන්තො මරණං ගතො;

තක්කිතං තස්ස මය්හඤ්ච, සබ්බං තමඵලං භවෙ.

18. එවං චින්තියතං රාජා, නිවත්තෙත්වා සකෙ පුරෙ;

සයං වල්ලභරාජෙන, කාතුං සඞ්ගාමමාරසි.

19. මාණවම්මොපි චින්තෙසි, සචෙ’යං මයි ජීවිති;

රාජා මීයති යුද්ධම්හි, කිං ඵලං මම ජීවිතෙ.

20. විස්සාසො දුක්කතො තෙන, භවිස්සති තථාසති;

සඞ්ගහෙසි කිමත්ථං මං, සමානත්තෙන අත්තනො.

21. තස්මා යුත්තං මයා ගන්තුං, සහසඞ්ගාම මණ්ඩලං;

සුඛඤ්හි සද්ධිං තෙනෙත්ථ, ජීවිතං මරණංපි වා.

22. එවං චින්තිය සන්නද්ධ-බලො හත්ථිවරං ගතො;

ගන්ත්වා දස්සෙසි අත්තානං, සො තං සඞ්ගාම මණ්ඩලෙ.

23. නරසීහොව තං දිස්වා, හට්ඨතුට්ඨො සමුග්ගිරි;

සහො සන්ථවමෙතස්මිං, කත්තබ්බං මෙ කතං ඉති.

24. තතො මානස්ස සෙනා ච, සෙනා චෙවස්සරාජිනො;

සෙනං වල්ලභරාජස්ස, විද්ධංසෙසි සමාගතා.

25. මාණවම්මොපි දස්සෙසි, තහිං සුරත්තමත්තනො;

පරක්කමන්තො දෙවානං, රණෙ නාරායණො විය.

26. නරසීතොපි සන්තුට්ඨො, මාණවම්මස්ස වික්කමෙ;

ආලිඞ්ගත්වා සිනෙහෙන, ත්වං ඛො මෙ ජයදො ඉති.

27. අත්තනො පුරමාගම්ම, කත්වා විජයමඞ්ගලං;

මාණවම්මස්ස සෙනාය, කත්තබ්බං සබ්බමාචරි.

28. අථෙවං චින්තයි රාජා, කත්තබ්බං මෙ සහායකො;

අත්තනා’කාසි සබ්බඤ්ච, අනණො සො මමජ්ජතො.

29. ඉණං මමාපි සොධෙමි, කත්වා කත්තබ්බමත්තනා;

කත්තඤ්ඤූ කතවෙදීහි, පුරිසා’තීවදුල්ලභා.

30. අමච්චෙ සන්නිපාතෙත්වා, ඉදං වචනමබ්‍රවි;

සහායස්ස මමෙතස්ස, කම්මෙ තුම්හෙපි සක්ඛිනො.

31. මයාපි තස්ස කත්තබ්බං, කම්මං සාධු සුඛාවහං;

උපකාරො හි සාධූනං, ධම්මො පුබ්බොපකාරිනො.

32. එවං වුත්තෙ අමච්චා තෙ, පච්චාහංසු මහීපති;

යං යමිච්ඡති දෙවොහි, තං තං රුච්චති නො ඉති.

33. අථ සො මාණවම්මස්ස, සෙනං දත්වා සවාහනං;

සබ්බොපකරණඤ්චෙව, සබ්බකම්මකරෙපි ච.

34. ගච්ඡාති වත්වා තං යන්තං, සහසෙනායපෙක්ඛිය;

පරිදෙවිත්ථ භූමින්දො, විප්පවුත්ථං’ව පුත්තකං.

35. මාණවම්මොපි ආරුය්හ, නාවායො ජලධීතටෙ;

න චිරෙනෙව ආගම්ම, සමත්තික්කම්ම වෙගසා.

36. සහ සෙනාය මද්දන්ථො, ලඞ්කාදීපමුපවිසී;

තං සුත්වාන පලායිත්ථ, රාජා දාඨොපතිස්සකො.

37. මාණවම්මො පුරං ගන්ත්වා, අහුත්වාව නරාධිපො;

පලාතමනුබන්ධිත්ථ, පදානුපදමුගතො.

38. තදා සා දමිළි සෙනා, අස්සොසි කිර සාමිකො;

මහාරොගා’භිභූතොති, සුත්වා තං සා අපක්කමි.

39. සුත්වා දාඨොපතිස්සො තං, සමාදාය මහාබලං;

මාණවම්මං උපාගම්ම, කාතුමාරභි සංයුධං.

40. මාණවම්මො ච චින්තෙසි, සබ්බා සෙනා ගතා මම;

මතෙ මයි සමිජ්ඣෙය්‍ය, වෙරිනො මෙ මනොරථං.

41. ජම්බුදීපංව තස්මා’හං, ගන්ත්වා’දාස බලං තතො;

පුන රජ්ජං ගහෙස්සංති, තස්මා එවමකාසි සො.

42. ගන්ත්වා පුන’පි දිස්වාන, සහායං නරසීහකං;

ආරාධහන්තො නිපුණං, සක්කච්චං තමුපට්ඨහි.

43. යාව රාජචතුක්කංසො, මාණාම්මො තහිං වසි;

නරසීහො’ථ චින්තෙසි, මානත්ථද්ධො යසොධනො.

44. රජ්ජත්ථං මෙ සහා යො මං, සෙවන්තොයෙව අද්ධගො;

වුද්ධො හෙස්සති තං පස්සං, කථං රජ්ජං කරොමහං.

45. ඉමස්මිං පන වාරස්මිං, පෙසයිත්වා බලං මම;

රජ්ජං තං න ගහෙස්සාමි, කො අත්ථො ජීවිතෙන මෙ.

46. එවං චින්තිය සො සෙනං, සන්නිපාතිය අත්තනො;

සන්නාහෙත්වා යථා යොගං, දාපෙත්වාන යථාරුචිං.

47. සයමෙව තමාදාය, සමුද්දතටමාගතො;

නාවායො චිත්තරූපායො, කාරයිත්වා ථිරා බහූ.

48. අමච්චෙ ආහ ‘‘එතෙන, සද්ධිං ගච්ඡථ භො’’ඉති;

නාවං ආරොහිතුං සබ්බෙ, න ඉච්ඡිංසු තදා ජනා.

49. තදා සීහො විචින්තෙත්වා, සයං හුත්වා තිරොහිතො;

අත්තනො පරිහාරං සො, රාජලක්ඛණසම්මතං.

50. සබ්බං තස්සෙව දත්වාන, අලඞ්කාරම්පි අත්තනො;

ආරොපෙත්වාන තං නාවං, ගච්ඡ ඨත්වාන සාගරෙ.

51. ඉමං භෙරිංච වාදෙහි, කොට්ඨනාමන්ති යොජයී;

සො’පි සබ්බං තථාකාසි, රාජානො අගමා ඉති.

52. ආරුහිංසු ජනා නාවං, එකං කත්වා නරාධිපං;

සො තං සෙනඞ්ගමාදාය, මාණො ගන්තුං සමාරභි.

53. කෙවලො’පි සමුද්දො සො, අහොභි නගරූපමො;

අථ සො පට්ටනං පත්වා, ඔතරිත්වා සවාහනො.

54. විස්සාමෙත්වා බලං තත්ථ, වසං කතිපයෙ දිනෙ;

උත්තරං දෙසමාදාය, කත්වා හත්ථගතං ජනං.

55. අක්ඛොබ්භිය මහාසෙනො, නගරං ගන්තුමාරභි;

පොත්ථකුට්ඨොපි තං සුත්වා, පච්චුග්ගඤ්ඡි මහාබලො.

56. සංගච්ඡිංසු උභො සෙනා, භින්නවෙලා’ව සාගරා;

මාණවම්මො තතො හත්ථි-මාරුය්හ ගහිතායුධො.

57. පොත්ථකුට්ඨඤ්ච රාජානං, ද්වෙධා කත්වා පලාපයි;

හත්ථදාඨං පලායන්තං, දිස්වා ජනපදා නරා.

58. සීසමස්ස ගහෙත්වාන, මාණවම්මස්ස දස්සයුං;

පොත්ථකුට්ඨොපලායිත්වා, මෙරුකන්දරමාගමි.

59. තතො තං සාමිකො දිස්වා, සහායො මෙ අයංචිරං;

තස්මා න සක්කා චඩ්ඩෙතුං, ආපදෙ සරණාගතං.

60. සාමිනො ච සහායස්ස, නිද්දොසොහං කථං භවෙ;

ඉති චින්තිය පූවං සො, සවිසං ඛාදියා’මරි.

61. කුට්ඨකොපි ච තෙනෙව, ඛාදිත්වා පූවකං මතො;

මාණවම්මස්ස තස්සෙවං, දීපො ආසි අකණ්ටකො.

62. මාණවම්මො තතො දීපෙ, ඡත්තං උස්සාපයි තදා;

වාරෙන්තො විය තෙනෙව, දුක්ඛං දීපෙ ජනස්ස සො.

63. පුඤ්ඤකම්මානි සො’කාසි, අනග්ඝානි බහූනි ච;

සමත්ථො කොහි තං සබ්බං, වත්තුං පටිපදං නරො.

64. කප්පගාමව්හයඤ්චෙව, තථා සෙපණ්ණිනාමකං;

පධානරක්ඛෙ ච සිරිං, සිරීසඞ්ඝාදි බොධිකෙ.

65. පාසාදං සොව කාරෙසි, පසාදාවහමුත්තමො;

ඡාදෙසි ලොහපාසාදං, ථූපාරාමඝරං තථා.

66. ථූපාරාමෙ ච පාසාදං කත්වා’දා පංසුකූලිනං;

ජිණ්ණකං පටිසඞ්ඛාසි ඡත්තං චෙතියමුද්ධනි;

බහවො ජිණ්ණකාවාසෙ තත්ථෙව පටිසඞ්ඛරි.

[එත්ථ මාණවම්මස්ස රජ්ජකථාය ඌනතා දිස්සති. ඉතො පට්ඨාය අග්ගබොධිස්ස රජ්ජපටිබද්ධා කථා විර ඛායති.]