ද්වත්තිංසතිම පරිච්ඡෙද

තුසිතපුරගමනං

1. අනිට්ඨිතෙ ඡත්තකම්මෙ, සුධාකම්මෙ ච චෙතියෙ;

මාරණන්තිකරොගෙන, රාජා ආසි ගිලානකො.

2. තිස්සං පක්කොසයිත්වා සො, කනිට්ඨං දීඝවාපිතො;

‘‘ථූපෙ අනිට්ඨිතං කම්මං, නිට්ඨාපෙහීති අබ්‍රවි.

3. භාතුනො දුබ්බලත්තාසො, තුන්නවායෙහි කාරිය;

කඤ්චුකං සුද්ධවත්ථෙහි, තෙන ඡාදිය චෙතියං.

4. චිත්තකාරෙහි කාරෙසි, වෙදිකං තත්ථ සාධුකං;

පන්තිපුණ්ණඝටානඤ්ච, පඤ්චඞ්ගුලකපන්තිකං.

5. ඡත්තාකාරෙහි කාරෙසි, ඡත්තං වෙළුමයං තථා;

ඛරපත්තමයෙ චන්ද-සූරියෙ මුද්ධවෙදියං.

6. ලාඛාකුඞ්කුමකෙහෙ’තං, චිත්තයිත්වා සුචිත්තිතං;

රඤ්ඤො නිවෙදයි’’ථූපෙ, කත්තබ්බං නිට්ඨිතං’’ඉති.

7. සිවිකාය නිපජ්ජිත්වා, ඉධාගන්ත්වා මහීපති;

පදක්ඛිණං කරිත්වාන, සිවිකායෙ’ව චෙතියං.

8. වන්දිත්වා දක්ඛිණද්වාරෙ, සයනෙ භූමිසන්ථතෙ;

සයිත්වා දක්ඛිණපස්සෙන, සො මහාථූප මුත්තමං.

9. සයිත්වා වාමපස්සෙස, ලොහපාසාද මුත්තමං;

පස්සන්තො සුමනො ආසි, භික්ඛුසඞ්ඝපුරෙක්ඛතො.

10. ගිලානපුච්ඡනත්ථාය, ආගතාහි තතො තතො;

ඡන්නවුතිකොටියො භික්ඛූ, තස්මිං ආසුං සමාගමෙ.

11. ගණසජ්ඣායමකරුං, වග්ගබන්ධෙන භික්ඛවො;

ථෙරපුත්තාභයං ථෙරං, තත්ථා’දිස්වා මහීපති.

12. අට්ඨවීස මහායුද්ධං, යුජ්ඣන්තො අපරාජයං;

යො සො න පච්චුදාවත්තො, මහායොධො වසී මම.

13. මච්චුයුද්ධම්හි සම්පත්තෙ, දිස්වා මඤ්ඤෙ පරාජයං;

ඉදානි සො මං නො පෙති, ථෙරො ථෙරපුත්තභයො.

14. ඉති චින්තයි සොථෙරො, ජානිත්වා තස්ස චින්තිතං;

කරින්දනදියා සිසෙ, වසං පඤ්ජලිපබ්බතෙ.

15. පඤ්චඛීණාසවසත-පරිවාරෙන ඉද්ධියා;

නභසාගම්ම රාජානං, අට්ඨාසි පරිවාරිය.

16. රාජා දිස්වා පසන්නො තං, පුරතො ච නිසීදිය;

තුම්හෙ දසමහායොධෙ, ගණ්හිත්වාන පුරෙ අහං.

17. යුජ්ඣිං ඉදානි එකො’ව, මච්චුනා යුද්ධමාරභිං;

මච්චුසත්තුං පරාජෙතුං, න සක්කොමී’’ති ආහ ච.

18. ආහ ථෙරො ‘‘මහාරාජ-මා භායි මනුජාධිප;

කිලෙසසත්තුං අජිත්වා, අජෙය්‍යො මච්චුසත්තුකො.

19. සබ්බම්පි සඞ්ඛාරගතං, අවස්සංයෙව භිජ්ජති;

‘‘අනිච්චා සබ්බසඞ්ඛාරා’’, ඉති වුත්තංහි සත්ථුනා.

20. ලජ්ජා සාරජ්ජරහිතා, බුද්ධෙපෙ’ති අනිච්චතා;

තස්මා අනිච්චා සඞ්ඛාරා, දුක්ඛා’නත්තාති චින්තය.

21. දුතියෙ අත්තාභාවෙපි, ධම්මච්ඡන්දො මහාහිතෙ;

උපට්ඨිතෙ දෙවලොකෙ, හිත්වා දිබ්බං සුඛං තුවං.

22. ඉධාගම්ම බහුං පුඤ්ඤං, අකාසි ච අනෙකධා;

කරණම්පෙකරජ්ජස්ස, සාසනුජ්ජොතනායතෙ.

23. මහාපුඤ්ඤකතං පුඤ්ඤං, යාවජ්ජදිවසා තයා;

සබ්බංනුස්සරමෙවං තෙ, සුඛං සජ්ජු භවිස්සති.

24. ථෙරස්සවචනං සුත්වා, රාජා අත්තමනො අහු;

‘‘අවස්සයො මච්චුයුද්ධෙපි, ත්වං මෙ සී’’ති අභාසිතං.

25. තදා ච ආහරාපෙත්වා, පහට්ඨො පුඤ්ඤ පොත්ථකං;

වාචෙතුං ලෙඛකං ආහ, සො තං වාචෙසි පොත්ථකං.

26. එකූනසතවිහාරා, මහාරාජෙන කාරිතා;

එකූනවීසකොටීහි, විහාරො මරිච වට්ටි ච.

27. උත්තමො ලොහපාසාදො,

තිංසකොටීහි කාරිතො;

මහාථූපෙ අනග්ඝානි,

කාරිතා චතුවීසති.

28. මහාථූපම්හි සෙසානි, කාරිතානි සුබුද්ධිනා;

කොටිසහස්සං අග්ඝන්ති, මහාරාජා’’ති වාචයි.

29. ‘‘කොට්ඨනාමම්හි මලයෙ, අක්ඛක්ඛායික ඡාතකෙ;

කුණ්ඩලානි මහග්ඝානි, දුවෙ දත්වාන ගණ්හිය.

30. ඛීණාසවානං පඤ්චන්නං, මහාථෙරාන මුත්තමො;

දින්නො පසන්නචිත්තෙන, කඞ්ගුඅම්බිලපිණ්ඩකො.

31. චූළඞ්ගනිය යුද්ධම්හි, පරාජිත්වා පලායතා;

කාලං ඝොසාපයිත්වාන, ආගතස්ස විහායසා.

32. ඛීණාසවස්ස යතිනො, අත්තානමනපෙක්ඛිය;

දින්නං සරකභත්ත’න්ති, වුත්තෙ ආහ මහීපති.

33. විහාරමහසත්තාහෙ, පාසාදස්ස මහෙතථා;

ථූපාරම්භෙ තු සත්තාහෙ, තථා ධාතුනිධානකෙ.

34. චාතුද්දිසස්ස උභතො, සඞ්ඝස්ස උභතො මයා;

මහාරහං මහාදානං, අවිසෙසං පවත්තිතං.

35. මහාවෙසාඛපූජා ච, චතුවීසති කාරයි;

දීපෙ සඞ්ඝස්ස තික්ඛත්තුං, තිචීවරමදාපයි.

36. සත්තසත්ත දිනානෙව, දීපෙ රජ්ජමහං ඉමං;

පඤ්චක්ඛත්තුං සාසනම්හි, අදාසිං හට්ඨමානසො.

37. සතතං ද්වාදසඨානෙ, සප්පිනා සුද්ධවට්ටියා;

දීපසහස්සං ජාලෙසිං, පූජෙන්තො සුගතං අහං.

38. නිච්චං අට්ඨාරසඨානෙ, වජ්ජෙහි විහිතං අහං;

ගිලාන භත්තභෙසජ්ජං, ගිලානානමදාපයිං.

39. චතුත්තාලීසඨානම්හි, සඞ්ඛතං මධුපායසං;

තත්තකෙස්වෙව ඨානෙසු, තෙලුල්ලොපකමෙව ච.

40. ඝතෙ පක්කෙ මහාජාල, පූවෙ ඨානම්හි තත්තකෙ;

තථෙව සහ භත්තෙහි, නිච්ච එමව අදාපයිං.

41. උපොසථෙසු දිවසෙසු, මාසෙ මාසෙ ච අට්ඨසු;

ලංකාදීපෙ විහාරෙසු, දීප තෙලමදාපයිං.

42. ධම්මදානං මහන්තන්ති, සුත්වා අමිසදානතො;

ලොහ පාසාදතො හෙට්ඨා, සඞ්ඝමජ්ඣම්හි ආසනෙ.

43. ‘‘ඔසාරෙස්සාමි සඞ්ඝස්ස, මඞ්ගලසුත්ත’’මිච්චහං;

නිසින්නො ඔසාරයිතුං, නාසක්ඛිං සඞ්ඝගාරවා.

44. තතොප්පභුති ලංකාය, විහාරෙසු තහිං තහිං;

ධම්මකථං කථාපෙසිං, සක්කරිත්වාන දෙසකෙ.

45. ධම්මකථික ස්සෙකස්ස, සප්පිඵාණිතසක්ඛරං;

නාළිං නාළිමදාපෙසිං, දාපෙසිං චතුරඞ්ගුලං.

46. මුට්ඨිකං යට්ඨිමධුකං, දාපෙසිං සාටකද්වයං;

සබ්බංපිස්සරියෙ දානං, නමෙ හාසෙසි මානසං.

47. ජීවිතං අනපෙක්ඛිත්වා, දුග්ගතෙන සතා මයා;

දින්න දාන ද්වයංයෙව, තං මෙ හාසෙසි මානසං.

48. තං සුත්වා අභයො ථෙරො, තං දානද්වයමෙව සො;

රඤ්ඤො චිත්තප්පසාදත්ථං, සං වණ්ණෙසි අනෙකධා.

49. තෙසු පඤ්චසු ථෙරෙසු, කඞ්ගුඅම්බිලගාහකො;

මලිය දෙව මහාථෙරො, සුමනකූටම්හි පබ්බතෙ.

50. නවන්නං භික්ඛුසතානං, දත්වා තං පරිභුඤ්ජි සො;

පථවීචාලකො ධම්ම, සුත්තථෙරො තු තං පන.

51. කල්‍යාණිකවිහාරම්හි, භික්ඛූනං සංවිභාජිය;

දසද්ධස තසඞ්ඛානං, පරිභොග මකාසයං.

52. තලඞ්ගර වාසිකො ධම්ම, දින්නත්ථෙරො පියඞ්ගුකෙ;

දීපෙ දසසහස්සානං, දත්වාන පරිභුඤ්ජිතං.

53. මඞ්ගණවාසිකො ඛුද්ද, තිස්සත්ථෙරො මහිද්ධිකො;

කෙලාසෙ සට්ඨිසහස්සානං, දත්වාන පරිභුඤ්ජි තං.

54. මහාබ්‍යග්ඝො ච ථෙරො තං, උක්කනගරවිහාරකෙ;

දත්වා සතානං සත්තානං, පරිභොගමකාසයං.

55. සරකභත්තගාහී තු, ථෙරො පියඞ්ගුදීපකෙ;

ද්වාදස භික්ඛුසහස්සානං, දත්වාන පරිභුඤ්ජිතං.

56. ඉති වත්වා’භයත්ථෙරො, රඤ්ඤො හාසෙසි මානසං;

රාජා චිත්තං පසාදෙත්වා, තං ථෙරං ඉධ මබ්‍රුවි.

57. ‘‘චතුවීසතිවස්සානි, සඞ්ඝස්ස උපකාරකො;

අහ මෙවං හොතු කායො’පි, සඞ්ඝස්ස උපකාරකො.

58. මහාථූප දස්සනඨානෙ, සඞ්ඝස්ස කම්මමාළකෙ;

සරීරං සඞ්ඝදාසස්ස, තුම්හෙ ඣාපෙථ මෙ’’ඉති.

59. කනිට්ඨං ආහ ‘‘භො තිස්ස, මහාථූපෙ අනිට්ඨිතං;

නිට්ඨාපෙහි තුවං සබ්බං, කම්මං සක්කච්ච සාධුකං.

60. සායං පාතො ච පුප්ඵානි, මහාථූපම්හි පූජය;

තික්ඛත්තුං උපහාරඤ්ච, මහාථූපස්ස කාරය.

61. පටියාදිතඤ්ච යං වත්තං, මයා සුගත සාසනෙ;

සබ්බං අපරිහාපෙත්වා, තාත වත්තය තං තුවං.

62. සඞ්ඝස්ස තාත කිච්චෙසු, මා පමජ්ජිත්ථ සබ්බදා’’;

ඉතං තං අනුසාසිත්වා, තුණ්හී ආසි මහීපති.

63. තඞ්ඛණං ගණසජ්ඣායං, භික්ඛුසඞ්ඝො අකාසි ච;

දෙවතා ඡ රථෙ චෙව, ඡහි දෙවෙහි ආනයුං.

64. යාචුං විසුං විසුං දෙවා, රාජානං තෙ රථෙ ඨිතා;

‘‘අම්හාකං දෙවලොකං ත්වං, එහි රාජමනොරමං’’.

65. රාජා තෙසං වචො සුත්වා, ‘‘යාව ධම්මං සුණොමහං;

අධිවාසෙථ තාවා’’ති, හත්ථාකාරෙන වාරයි.

66. වාරෙති ගණසජ්ඣාය, මීභි මන්ත්වාන භික්ඛවො;

සජ්ඣායං ඨපයුං රාජා, පුච්ඡිතං ඨානකාරණං.

67. ‘‘ආගමෙථා’’ති සඤ්ඤාය, දින්නත්තා’ති වදිංසු තෙ;

රාජා ‘‘නෙතං තථා භන්තෙ’’, ඉති වත්වාන තං වදි.

68. තං සුත්වාන ජනා කෙචි, ‘‘භීතො මච්චුභයා අයං;

ලාලප්පතී’’ති මඤ්ඤිංසු, තෙසං කඞ්ඛාවිනොදනං.

69. කාරෙතුං අභයත්ථෙරො, රාජානං එවමාහ සො;

‘‘ජානාපෙතුං කථං සක්කා, ආනීතා තෙ රථා’’ඉති.

70. පුප්ඵදානං ඛිපාපෙසි, රාජ නභසි පණ්ඩිතො;

තානි ලග්ගානි ලම්බිංසු, රථීසාසු විසුං විසුං.

71. ආකාසෙ ලම්බමානානි, තානි දිස්වා මහාජනො;

කඞ්ඛං පටිවිනොදෙසි, රාජා ථෙරමභාසිතං.

72. ‘‘කතමො දෙවලොකො හි,

රම්මො භන්තෙ’’ති සො බ්‍රුවි;

‘‘තුසිනානං පුරං රාජ,

රම්මං’’ඉති සතං මතං.