එකවීසතිම පරිච්ඡෙද

වඤ්ච රාජකො

1. උත්තියස්ස කනිට්ඨො තු, මහාසිවො තදච්චයෙ;

දස වස්සානි කාරෙසි, රජ්ජං සුජන සෙවකො.

2. භද්දසාලම්හි සො ථෙරෙ, පසීදිත්වා මනොරමං;

කාරෙසි පුරිමායන්තු, විහාරං නගරඞ්ගණං.

3. මහාසිවකනිට්ඨො තු, සුරතිස්සො තදච්චයෙ;

දසවස්සානි කාරෙසි, රජ්ජං පුඤ්ඤෙසු සාදරො.

4. දක්ඛිණාය දිසායං සො, විහාරං නගරං ගණං;

පුරිමාය හත්ථික්ඛන්ධඤ්ච, ගොකණ්ණගිරිමෙව ච.

5. වඞ්ගුත්තරෙ පබ්බතම්හි, පාචින පබ්බතව්හයං;

රහෙණකසමීපම්හි, තථා කොළම්බකාළකං.

6. අරිට්ඨපාදෙ මං ගුලකං, පුරිමාය’ච්ඡ ගල්ලකං;

ගිරිනෙලපනායකණ්ඩං, නගරස්සුත්ථරාය තු.

7. පඤ්චසතා නෙව මාදි-විහාරෙ පුථවී පති;

ගඞ්ගාය ඔරපාරඤ්හි, ලංකාදීපෙ තහිං තහිං.

8. පුරෙ රජ්ජා ච රජ්ජෙ ච, සට්ඨීවස්සානි සාධුකං;

කාරෙසි රම්මෙ ධම්මෙන, රතනත්තය ගාරවො.

9. සුවණ්ණපිණ්ඩතිස්සොති, නාමං රජ්ජා තස්සා අහු;

සුරතිස්සොති නාමන්තු, තස්සා’පුරජ්ජපත්තියා.

10. අස්සනාවිකපුත්තා ද්වෙ, දමිළා සෙනගුත්තිකා;

සුරතිස්සමහීපාලං, තං ගහෙත්වා මහබ්බලා.

11. දුවෙ වීසතිවස්සානි, රජ්ජං ධම්මෙන කාරයුං;

තෙ ගහෙත්වා අසෙලො තු, මුටසිවස්ස අත්‍රජො.

12. සොදරියානං භාතූනං, නවමො භතුකො තතො;

අනුරාධපුරෙ රජ්ජං, දසවස්සානි කාරයි.

13. චොළරට්ඨා ඉධ ගම්ම, රජ්ජත්ථං උජුජාතිකො;

එළාරො නාම දමිළො, ගහෙත්වා’සෙලභූපතිං.

14. වස්සානි චත්තාරීසඤ්ච, චත්තාරි ච අකාරයි;

රජ්ජං වොහාරසමයෙ, මජ්ඣත්තො මිත්තසත්තුසු.

15. සයනස්ස සිරොපස්සෙ, ඝණ්ටං සුදීඝයොත්තකං;

ලම්බාපෙසි වීරාවෙතුං, ඉච්ඡන්තෙහි විනිච්ඡයං.

16. එකො පුත්තො ච ධීතා ච, අහෙසුං තස්ස රාජිනො;

රථෙන තිස්සවාපිං සො, ගච්ඡන්තො භූමිපාලජො.

17. තරුණං වච්ඡකං මග්ගෙ, නිපන්නං සහධෙනුකං;

ගීවං අක්කම්මචක්කෙන, අසඤ්චිච්ච අඝාතයි.

18. ගන්ත්වාන ධෙනුඝණ්ටං තං, ඝට්ටෙසි ඝට්ටිතාසයා;

රාජා තෙනෙව චක්කෙන, සීසං පුත්තස්ස ඡෙදයි.

19. දිජපොතං තාලරුක්ඛෙ, එකො සප්පො අභක්ඛයි;

තම්පොතමාතා සකුණී, ගන්ත්වා ඝණ්ටමඝට්ටයි.

20. ආණාපෙත්වාන තං රාජා, කුච්ඡිං තස්ස විදාළිය;

පොතං තං නීහරාපෙත්වා, තාලෙ සප්පමසප්පයි.

21. රතනග්ගස්ස රතන-ත්තයස්ස ගුණසාරතං;

අජානන්තොපි සො රාජා, චාරිත්තමනුපාලයං.

22. චෙතියදබ්බතං ගන්ත්වා, භික්ඛුසඞ්ඝං පවාරිය;

ආගච්ඡන්තො රථගතො, රථස්ස යුගකොටියා.

23. අකාසි ජිනථූපස්ස,

එකදෙසස්ස භඤ්ජනං;

අමච්චා ‘‘දෙව ථූපොනො,

තයා භින්නො’ති ආහු තං.

24. අසඤ්චිච්ච කතෙ‘පෙ’ස, රාජා ඔරුය්හ සන්දනා;

‘‘චක්කෙන මම සීසම්පි, ඡින්දථා’ති පථෙසයි.

25. ‘‘පරහිංසං මහාරාජ, සත්ථා නො නෙව ඉච්ඡති;

ථූපං පාකතිකං කත්වා, ඛමාපෙහී’’ති ආහු තං.

26. තෙ ඨපෙතුං පඤ්චදස, පාසාණෙ පතිතෙ තහිං;

කහාපණ සහස්සානි, අදා පඤ්චදසෙ වසො.

27. අකා මහල්ලිකා වීහිං, සො සෙතුං ආතපෙ ඛිපි;

දෙවො අකාලෙ වස්සිත්වා, තස්සා විහිං අතෙමයි.

28. වීහිං ගහෙත්වා ගන්ත්වා සා, ඝණ්ටං තං සමඝට්ටයි;

අකාලවස්සං සුත්වා තං, විස්සජ්ජෙත්වා තමත්තිකං.

29. රාජා ධම්මම්හි වත්තන්තො, ‘‘කාලෙ වස්සං ලභෙ’’ඉති;

තස්සා විනිච්ඡයත්ථාය, උපවාසං නිපජ්ජි සො.

30. බලිග්ගාහී දෙවපුත්තො, රඤ්ඤො තෙජෙන ඔත්ථටො;

ගන්ත්වා චාතුමහාරාජ-සන්තිකං තං නිවෙදයි.

31. තෙ තමාදාය ගන්ත්වාන, සක්කස්ස පටිවෙදයුං;

සක්කො පජ්ජුන්නමාහුය, කාලෙ වස්සං උපාදියි.

32. බලිග්ගාහී දෙවපුත්තො, රාජිනො තං නිවෙදයි;

තතොප්පභුති තං රජ්ජෙ, දිවා දෙවො න වස්සථ.

33. රත්තිං දෙවො’නු සත්තාහං, වස්සියාමම්හි මජ්ඣිමෙ;

පුණ්ණාන’හෙසුං සබ්බත්ථ, ඛුද්දකා වාටකානිපි.

34. අගතිගමනදොසො මුත්තමත්තෙන එසො,

අනුපහත කුදිට්ඨිපීදිසිං පාපුණී’ද්ධිං;

අගතිගමනදොසං සුද්ධදිට්ඨිසමානො,

කථමිධහි මනුස්සො බුද්ධිමා නො ජහෙය්‍යාති.

සුජනප්පසාදසංවෙගත්ථාය කතෙ මහාවංසෙ

පඤ්චරාජකො නාම

එකවීසතිමො පරිච්ඡෙදො.