සොළසම පරිච්ඡෙද

චෙතියපබ්බතවිහාර පටිග්ගහකො

1. පුරෙ චරිත්වා පිණ්ඩාය, කරිත්වා ජනසඞ්ගහං;

රාජගෙහම්හි භුඤ්ජන්තො, කාරෙන්තො රාජසඞ්ගහං.

2. ඡබ්බසදිවසෙ ථෙරො, මහාමෙඝවනෙ වසී;

ආසළ්හසුක්කපක්ඛස්ස, තෙරසෙ දිවසෙ පන.

3. රාජගෙහම්හි භුඤ්ජිත්වා, මහාරඤ්ඤො මහාමති;

මහා’ප්පමාදසුත්තන්තං, දෙසයිත්වා තතො ච සො.

4. විහාරකරණං ඉච්ඡං, තත්ථ චෙතියපබ්බතෙ;

නික්ඛම්ම පුරිමද්වාරා, අගා චෙතියපබ්බතං.

5. ථෙරං තත්ථ ගතං සුත්වා, රථං ආරුය්හ භූපති;

දෙවියො ද්වෙ ච ආදාය, ථෙරස්සානුපදං අකා.

6. ථෙරා නාගචතුක්කම්හි, නහාත්වා රහදෙ තහිං;

පබ්බතාරොහණත්ථාය, අට්ඨංසු පටිපාටියා.

7. රාජා රථා තදො’රුය්හ, සබ්බෙ ථෙරෙ’භිවාදයි;

උණ්හෙ කිලන්තෙ කිංරාජ, ආගතොසී’ති අහුතෙ.

8. තුම්හාකං ගමනාසඞ්කී, ආගතොම්හී’ති භාසිතෙ;

ඉධෙව වස්සං වසිතුං, ආගතම්හා’ති භාසිය.

9. තස්සූපනායිකං ථෙරො, ඛන්ධකං ඛන්ධකොවිදො;

කථෙසි රඤ්ඤො තං සුත්වා, භාගිනෙය්‍යො ච රාජිනො.

10. මහාරිට්ඨො මහාමච්චො, පඤ්චපඤ්ඤාසභාතුහි;

සද්ධිං ජෙට්ඨකනිට්ඨෙහි, රාජානමභිතො ඨිතො.

11. යාචිත්වා තදහු චෙව, පබ්බජුං ථෙරසන්තිකෙ;

පත්තාරහත්තං සබ්බෙපි, තෙ ඛුරග්ගෙ මහාමතී.

12. කන්තකචෙතියඨානෙ, පරිතො තදහෙව සො;

කම්මානි ආරභාපෙත්වා, ලෙණානි අට්ඨසට්ඨියො.

13. අගමාසි පුරං රාජා, ථෙරා තත්ථෙව තෙ වසුං;

කාලෙ පිණ්ඩාය නගරං, පවිසන්තා’නුකම්පකා.

14. නිට්ඨිතෙ ලෙණකම්මම්හි, ආසළ්හිපුණ්ණමාසියං;

ගන්ත්වා අදාසි ථෙරානං, රාජා විහාරදක්ඛිණං.

15. ද්වත්තිංසමාළකානඤ්ච, විහාරස්ස ච තස්ස ඛො;

සීමං සීමාතිගො ථෙරො, බන්ධිත්වා තදහෙව සො.

16. තෙසං පබ්බජ්ජාපෙක්ඛානං, අකාසි උපසම්පදං;

සබ්බෙසං සබ්බපඨමං, බද්ධෙ තුම්බරුමාළකෙ.

17. එතෙ ද්වාසට්ඨි අරහන්තො, සබ්බෙ චෙතියපබ්බතෙ;

තත්ථ වස්සං උපගන්ත්වා, අකංසු රාජසඞ්ගහං.

18. දෙවමනුස්සගණගණිතං තං,

තඤ්ච ගණං ගුණවිත්ථතකිත්තිං;

යානමුපච්ච ච මානයමානා,

පුඤ්ඤචයං විපුලං අකරිංසූති.

සුජනපසාදසංවෙගත්ථාය කතෙ මහාවංසෙ

චෙතියපබ්බතවිහාරපටිග්ගහකො නාම

සොළසමො පරිච්ඡෙදො.