දාඨාවංසො |ඔ0.0001|

නමො තස්ස භගවතො අරහතො සම්මාසම්බුද්ධස්ස

1. විසාරදං වාදපථාති වත්තිනං,

තිලොකපජ්ජොතමසය්හසාහිනං;

අසෙස ඤෙය්‍යාවරණප්පහායිනං,

නමාමි සත්ථාරමනන්තගොචරං.

2. |ඔ0.0002|

තිලොක නාථප්පභවං භයාපහං,

විසුද්ධවිජ්ජාචරණෙහි සෙවිතං;

පපඤ්ච සංයොජනබන්ධනච්ඡිදං,

නමාමි ධම්මං නිපුණං සුදුද්දසං.

3. පසාදමත්තෙන’පි යත්ථ පාණිනො,

ඵූසන්ති දුක්ඛක්ඛයමච්චුතං පදං;

තමාහුණෙය්‍යං සුසමාහිතින්ද්‍රියං,

නමාමි සඞ්ඝං මුනිරාජසාවකං.

4. විභුසයං කාළකනාගරන්ව යං,

පරක්කමො කාරුණිකො චමූපති;

ගවෙසමානො ජිනසාසනස්ස යො,

විරූළ්හිමත්ථඤ්ච ජනස්ස පත්ථයං.

5. |ඔ0.0003|

සුධාමයූඛාමල පණ්ඩුවංසජං,

විරූළ්හසද්ධං මුනිරාජසාසනෙ;

පියං වදං නීතිපථානුවත්තිනිං,

සදා පජානං ජනිකං’ව මාතරං.

6. පියං පරක්කන්තිභුජස්ස රාජිනො,

මහෙසි මච්චුන්නතඛුද්ධිසම්පදං;

විධාය ලීලාවතිමිච්ඡිතත්ථදං,

අසෙස ලඞ්කාතලරජ්ජලක්ඛියං.

7. කුමාරමාරාධිතසාධුමන්තිනං,

මහාදයං පණ්ඩුනරින්ද වංසජං;

විධාය සද්ධං මධුරින්දනාමකං,

සුසික්ඛීතං පාවචනෙ කලාසු ච.

8. |ඔ0.0004|

නරින්දසුඤ්ඤං සුචිරං තිසීහළං,

ඉතිප්පතීතං අයසං අපානුදි;

චිරං පණීතෙන ච චිවරාදිනා,

සුසඤ්ඤතෙ සංයමිනො අතප්පයි.

9. චිරට්ඨිතිං පාවචනස්ස ඉච්ඡතා,

කතඤ්ඤුනා වික්කම බුද්දිසාලිනා;

සතීමතා චන්දිම බන්ධුකිත්තිනා,

සගාරවං තෙන’භීයාචිතො අහං.

10. සදෙස භාසාය කවීහි සීහළෙ,

කතම්පි වංසං ජිනදන්තධාතුයා;

නිරුත්තියා මාගධිකාය වුද්ධියා,

කරොමි දීපන්තරවාසිනං අපි.

11. |ඔ0.0005|

ජීනො’යමිද්ධෙ අමරව්හයෙ පුරෙ,

කදාචි හුත්වාන සුමෙධනාමකො;

සවෙදවෙදඞ්ගවිභාගකොවිදො,

මහද්ධනෙ විප්පකුලම්හි මාණවො.

12. අහඤ්හි ජාතිබ්‍යසනෙන පීළිතො,

ජරාභිභුතො මරණෙන ඔත්ථටො;

සිවං පදං ජාතිජරාදිනිස්සටං,

ගවෙසයිස්සං’ති රහො විචින්තිය.

13. අනෙකසඞ්ඛං ධනධඤ්ඤසම්පදං,

පතිට්ඨපෙත්වා කපණෙසි දුච්චජං;

අනප්පකෙ පෙමභරානුබන්ධිනො,

විහාය මිත්තෙ ච සුතෙච බන්ධවෙ.

14. |ඔ0.0006|

පහාය කාමෙ නිඛිලෙ මනොරමෙ,

ඝරාභිනික්ඛම්ම හිමාචලන්තිකෙ;

මහීධරං ධම්මිකනාම විස්සුතං,

උපෙච්ච නානාතරුරාජිභුසිතං.

15. මනොනුකූලෙ සුරරාජනිම්මීතෙ,

අසම්මිගානං අගතිම්හි අස්සමෙ;

නිවත්තචීරො අජිනක්ඛිපං වහං,

ජටාධරො තාපස වෙසමග්ගහී.

16. සුසඤ්ඤතත්තොපරිවාරි තින්ද්‍රියො,

ඵලාඵලාදීහි පවත්තයං තනුං;

ගතො අභිඤ්ග්ඤාසු ච පාරමිං වසී,

තහිං සමාපත්ති සුඛං අවින්දි සො.

17. |ඔ0.0007|

සුසජ්ජිතෙ රම්මපුරාධිවාසිනා,

මහාජනෙන’ත්තමනෙන අඤ්ජසෙ;

පථප්පදෙසෙ අභියන්තමත්තනො,

අනිට්ඨිතෙයෙව සුමෙධ තාපසො.

18. අගාධඤෙය්‍යොදධීපාරදස්සිනං,

භවන්තගුං නිබ්බනථං විනායකං;

අනෙකඛීණාසවලක්ඛසෙවිතං,

කදා චි දීපඞ්කරබුද්ධමද්දස.

19. තතො සසඞ්ඝස්ස තිලොකභත්තුනො,

පරිච්චජිත්වාන තනුම්පි ජීවිතං;

පසාරයිත්වාන ජටාජිනාදිකං,

විධාය සෙතුං තනුමෙව පල්ලලෙ.

20. |ඔ0.0008|

අනක්කමිත්වා කලලං මහාදයෙ,

සභික්ඛුකො ගච්චතු පිට්ඨියා ඉති;

අධිට්ඨහිත්වාන නිපන්නකො තහිං,

අනාථ මෙතං තිභවං සමෙක්ඛිය.

21. දයාය සඤ්චොදිතමානසො ජනෙ,

භවණ්ණවා උද්ධරිතුං දුඛද්දිතෙ;

අකාසි සම්බොධිපදස්ස පත්තියා,

මහාභිනීහාරමුදග්ගවික්කමො.

22. |ඔ0.0009|

අථො විදිත්වා වසිනො තමාසයං,

අදාසි සො ව්‍යාකරණං මහාමුනි;

තතො පුරං තම්හි තථාගතෙ ගතෙ,

සයංවසී සම්මසි පාරමිගුණෙ.

23. තතො ච කප්පානමලීනවික්කමො,

අසංඛියෙ සො චතුරො සලක්ඛකෙ;

තහිං තහිං ජාතිසු බොධිපාචනෙ,

විසුද්ධසම්භාරගුණෙ අපූරයි;

අථාභිජාතො තුසිතෙ මහායසො,

විසුද්ධසම්බොධිපදොපලද්ධියා;

උදික්ඛමානො සමයං දයාධනො,

චිරං විභුතිං අනුභොසි සබ්බසො.

25. |ඔ0.0010|

සහස්සසඞ්ඛා දසචක්කවාලතො,

සමාගතානෙකසුරාධිපාදිහි;

උදග්ගුදග්ගෙහි ජිනත්තපත්තියා,

සගාරවං සො අභිගම්ම යාචිතො.

26. තතො චවිත්වා කපිළව්හයෙ පුරෙ,

සදා සතො සක්‍යකුලෙකකෙතුනො;

අහොසි සුද්ධොදනභුමිභත්තුනො,

මහාදිමායාය මහෙසියා සුතො.

27. |ඔ0.0011|

විජාතමත්තො’ව වසුන්ධරාය සො,

පතිට්ඨහිත්වාන දිසා විලොකයී;

තදා අහෙසුං විවටඞ්ගනා දිසා,

අපූජයුං තත්ථ ච දෙවමානුසා.

28. ආධාරයුං ආතපවාරණාදිකං,

අදිස්සමානාව නභම්භි දෙවතා;

පදානි සො සත්ත ච උත්තරාමුඛො,

උපෙච්ච නිච්ඡාරයි වාචමාසභිං.

29. යථත්ථසිද්ධත්තකුමාරනාමකො,

මහබ්බලො යොබ්බනහාරිවිග්ගහො;

උතුත්තයානුච්ඡවිකෙසු තීසු සො,

නුභොසි පාසාදවරෙසු සම්පදං.

30. |ඔ0.0012|

කදාචි උය්‍යානපථෙ ජරාහතං,

තථාතුරං කාලකතඤ්ච සංයමිං;

කමෙන දිස්වාන විරත්තමානසො,

භවෙසු සො පබ්බජිතුං අකාමයි.

31. සපුප්ඵදීපාදීකරෙහි රත්තියං,

පුරක්ඛතො සො තිදිවාධිවාසිහි;

සඡන්නකො කන්තකවාජියානතො,

තතො මහාකාරුණිකො’භිනික්ඛමි.

32. කමෙන පත්වාන අනොමමාපගං,

සුධොතමුත්තාඵලහාරිසෙකතෙ;

පතිට්ඨහිත්වා වරමොළිබන්ධනං,

සිතාසිලූනං ගගනෙ සමුක්ඛිපී.

33. |ඔ0.0013|

පටිග්ගහෙත්වා තිදසානමිස්සරො,

සුවණ්නචඞ්ගොටවරෙන තං තදා;

තියොජනං නීලමණීහි චෙතියං,

අකාසි චූළාමණිමත්තනො පුරෙ.

34. තතො ඝටීකාරසරොජයොනිනා,

සමාහටං ධාරයී චීවරාදිකං;

අථො සකං වත්ථයුගං නභත්ථලෙ,

පසත්ථවෙසග්ගහණො සමුක්ඛිපී.