7. සප්පුරිසදානසුත්තං

37. ‘‘අට්ඨිමානි, භික්ඛවෙ, සප්පුරිසදානානි. කතමානි අට්ඨ? සුචිං දෙති, පණීතං දෙති, කාලෙන දෙති, කප්පියං දෙති, විචෙය්‍ය දෙති, අභිණ්හං දෙති, දදං චිත්තං පසාදෙති, දත්වා අත්තමනො හොති. ඉමානි ඛො, භික්ඛවෙ, අට්ඨ සප්පුරිසදානානී’’ති.

‘‘සුචිං පණීතං කාලෙන, කප්පියං පානභොජනං;

අභිණ්හං දදාති දානං, සුඛෙත්තෙසු [සුඛෙත්තෙ (සී. පී.)] බ්‍රහ්මචාරිසු.

‘‘නෙව [න ච (සී. පී.)] විප්පටිසාරිස්ස, චජිත්වා ආමිසං බහුං;

එවං දින්නානි දානානි, වණ්ණයන්ති විපස්සිනො.

‘‘එවං යජිත්වා මෙධාවී, සද්ධො මුත්තෙන චෙතසා;

අබ්‍යාබජ්ඣං [අබ්‍යාපජ්ඣං (ක.) අ. නි. 4.40; 6.37] සුඛං ලොකං, පණ්ඩිතො උපපජ්ජතී’’ති. සත්තමං;