5. පඨමමිත්තසුත්තං

36. ‘‘සත්තහි, භික්ඛවෙ, අඞ්ගෙහි සමන්නාගතො මිත්තො සෙවිතබ්බො. කතමෙහි සත්තහි? දුද්දදං දදාති, දුක්කරං කරොති, දුක්ඛමං ඛමති, ගුය්හමස්ස [ගුය්හස්ස (ක.)] ආවි කරොති, ගුය්හමස්ස [ගුය්හං අස්ස (සී.), ගුය්හස්ස (ක.)] පරිගුහති [පරිගූහති (සී. ස්‍යා.), පරිගුය්හති (ක.)], ආපදාසු න ජහති, ඛීණෙන [ඛීණෙ (ක.)] නාතිමඤ්ඤති. ඉමෙහි ඛො, භික්ඛවෙ, සත්තහි අඞ්ගෙහි සමන්නාගතො මිත්තො සෙවිතබ්බො’’ති.

‘‘දුද්දදං දදාති මිත්තො, දුක්කරඤ්චාපි කුබ්බති;

අථොපිස්ස දුරුත්තානි, ඛමති දුක්ඛමානි ච [දුක්ඛමානිපි (සී. ස්‍යා.)].

‘‘ගුය්හඤ්ච තස්ස [ගුය්හමස්ස ච (ස්‍යා.)] අක්ඛාති, ගුය්හස්ස පරිගූහති;

ආපදාසු න ජහාති, ඛීණෙන නාතිමඤ්ඤති.

‘‘යම්හි එතානි ඨානානි, සංවිජ්ජන්තීධ [සංවිජ්ජන්ති ච (ක.)] පුග්ගලෙ;

සො මිත්තො මිත්තකාමෙන, භජිතබ්බො තථාවිධො’’ති. පඤ්චමං;