9. දුතියපරිහානිසුත්තං

29. ‘‘සත්තිමෙ, භික්ඛවෙ, ධම්මා උපාසකස්ස පරිහානාය සංවත්තන්ති. කතමෙ සත්ත? භික්ඛුදස්සනං හාපෙති, සද්ධම්මස්සවනං පමජ්ජති, අධිසීලෙ න සික්ඛති, අප්පසාදබහුලො හොති, භික්ඛූසු ථෙරෙසු චෙව නවෙසු ච මජ්ඣිමෙසු ච උපාරම්භචිත්තො ධම්මං සුණාති රන්ධගවෙසී, ඉතො බහිද්ධා දක්ඛිණෙය්‍යං ගවෙසති, තත්ථ ච පුබ්බකාරං කරොති. ඉමෙ ඛො, භික්ඛවෙ, සත්ත ධම්මා උපාසකස්ස පරිහානාය සංවත්තන්ති.

‘‘සත්තිමෙ, භික්ඛවෙ, ධම්මා උපාසකස්ස අපරිහානාය සංවත්තන්ති. කතමෙ සත්ත? භික්ඛුදස්සනං න හාපෙති, සද්ධම්මස්සවනං නප්පමජ්ජති, අධිසීලෙ සික්ඛති, පසාදබහුලො හොති, භික්ඛූසු ථෙරෙසු චෙව නවෙසු ච මජ්ඣිමෙසු ච අනුපාරම්භචිත්තො ධම්මං සුණාති න රන්ධගවෙසී, න ඉතො බහිද්ධා දක්ඛිණෙය්‍යං ගවෙසති, ඉධ ච පුබ්බකාරං කරොති. ඉමෙ ඛො, භික්ඛවෙ, සත්ත ධම්මා උපාසකස්ස අපරිහානාය සංවත්තන්තී’’ති. ඉදමවොච භගවා. ඉදං වත්වාන සුගතො අථාපරං එතදවොච සත්ථා –

‘‘දස්සනං භාවිතත්තානං, යො හාපෙති උපාසකො;

සවනඤ්ච අරියධම්මානං, අධිසීලෙ න සික්ඛති.

‘‘අප්පසාදො ච භික්ඛූසු, භිය්‍යො භිය්‍යො පවඩ්ඪති;

උපාරම්භකචිත්තො ච, සද්ධම්මං සොතුමිච්ඡති.

‘‘ඉතො ච බහිද්ධා අඤ්ඤං, දක්ඛිණෙය්‍යං ගවෙසති;

තත්ථෙව ච පුබ්බකාරං, යො කරොති උපාසකො.

‘‘එතෙ ඛො පරිහානියෙ, සත්ත ධම්මෙ සුදෙසිතෙ;

උපාසකො සෙවමානො, සද්ධම්මා පරිහායති.

‘‘දස්සනං භාවිතත්තානං, යො න හාපෙති උපාසකො;

සවනඤ්ච අරියධම්මානං, අධිසීලෙ ච සික්ඛති.

‘‘පසාදො චස්ස භික්ඛූසු, භිය්‍යො භිය්‍යො පවඩ්ඪති;

අනුපාරම්භචිත්තො ච, සද්ධම්මං සොතුමිච්ඡති.

‘‘න ඉතො බහිද්ධා අඤ්ඤං, දක්ඛිණෙය්‍යං ගවෙසති;

ඉධෙව ච පුබ්බකාරං, යො කරොති උපාසකො.

‘‘එතෙ ඛො අපරිහානියෙ, සත්ත ධම්මෙ සුදෙසිතෙ;

උපාසකො සෙවමානො, සද්ධම්මා න පරිහායතී’’ති. නවමං;