7. අසප්පුරිසදානසුත්තං

147. ‘‘පඤ්චිමානි, භික්ඛවෙ, අසප්පුරිසදානානි. කතමානි පඤ්ච? අසක්කච්චං දෙති, අචිත්තීකත්වා [අචිත්තිකත්වා (පී.), අචිතිං කත්වා (ස්‍යා.), අචිත්තිං කත්වා (ක.)] දෙති, අසහත්ථා දෙති, අපවිද්ධං [අපවිට්ටං (ස්‍යා. කං.)] දෙති, අනාගමනදිට්ඨිකො දෙති. ඉමානි ඛො, භික්ඛවෙ, පඤ්ච අසප්පුරිසදානානි.

‘‘පඤ්චිමානි, භික්ඛවෙ, සප්පුරිසදානානි. කතමානි පඤ්ච? සක්කච්චං දෙති, චිත්තීකත්වා දෙති, සහත්ථා දෙති, අනපවිද්ධං දෙති, ආගමනදිට්ඨිකො දෙති. ඉමානි ඛො, භික්ඛවෙ, පඤ්ච සප්පුරිසදානානී’’ති. සත්තමං.