10. වාදීසුත්තං
140. ‘‘චත්තාරොමෙ, භික්ඛවෙ, වාදී. කතමෙ චත්තාරො? අත්ථි, භික්ඛවෙ, වාදී අත්ථතො පරියාදානං ගච්ඡති, නො බ්‍යඤ්ජනතො; අත්ථි, භික්ඛවෙ, වාදී බ්‍යඤ්ජනතො පරියාදානං ගච්ඡති, නො අත්ථතො; අත්ථි, භික්ඛවෙ, වාදී අත්ථතො ච බ්‍යඤ්ජනතො ච පරියාදානං ගච්ඡති; අත්ථි, භික්ඛවෙ, වාදී නෙවත්ථතො නො බ්‍යඤ්ජනතො පරියාදානං ගච්ඡති. ඉමෙ ඛො, භික්ඛවෙ, චත්තාරො වාදී. අට්ඨානමෙතං, භික්ඛවෙ, අනවකාසො යං චතූහි පටිසම්භිදාහි සමන්නාගතො [සමන්නාගතො භික්ඛු (සී. ස්‍යා. කං.)] අත්ථතො වා බ්‍යඤ්ජනතො වා පරියාදානං ගච්ඡෙය්‍යා’’ති. දසමං.
පුග්ගලවග්ගො චතුත්ථො.