10. භත්තුද්දෙසකසුත්තං

20. ‘‘චතූහි, භික්ඛවෙ, ධම්මෙහි සමන්නාගතො භත්තුද්දෙසකො යථාභතං නික්ඛිත්තො එවං නිරයෙ. කතමෙහි චතූහි? ඡන්දාගතිං ගච්ඡති, දොසාගතිං ගච්ඡති, මොහාගතිං ගච්ඡති, භයාගතිං ගච්ඡති – ඉමෙහි ඛො, භික්ඛවෙ, චතූහි ධම්මෙහි සමන්නාගතො භත්තුද්දෙසකො යථාභතං නික්ඛිත්තො එවං නිරයෙ.

‘‘චතූහි, භික්ඛවෙ, ධම්මෙහි සමන්නාගතො භත්තුද්දෙසකො යථාභතං නික්ඛිත්තො එවං සග්ගෙ. කතමෙහි චතූහි? න ඡන්දාගතිං ගච්ඡති, න දොසාගතිං ගච්ඡති, න මොහාගතිං ගච්ඡති, න භයාගතිං ගච්ඡති – ඉමෙහි ඛො, භික්ඛවෙ, චතූහි ධම්මෙහි සමන්නාගතො භත්තුද්දෙසකො යථාභතං නික්ඛිත්තො එවං සග්ගෙ’’ති.

‘‘යෙ කෙචි කාමෙසු අසඤ්ඤතා ජනා,

අධම්මිකා හොන්ති අධම්මගාරවා;

ඡන්දා දොසා මොහා ච භයා ගාමිනො [ඡන්දා ච දොසා ච භයා ච ගාමිනො (සී. ස්‍යා. කං. පී)],

පරිසාකසටො [පරිසක්කසාවො (සී. ස්‍යා. කං. පී.)] ච පනෙස වුච්චති.

‘‘එවඤ්හි වුත්තං සමණෙන ජානතා,

තස්මා හි තෙ සප්පුරිසා පසංසියා;

ධම්මෙ ඨිතා යෙ න කරොන්ති පාපකං,

න ඡන්දා න දොසා න මොහා න භයා ච ගාමිනො [න ඡන්දදොසා න භයා ච ගාමිනො (සී. ස්‍යා. කං. පී.)];

‘‘පරිසාය මණ්ඩො ච පනෙස වුච්චති,

එවඤ්හි වුත්තං සමණෙන ජානතා’’ති. දසමං;

චරවග්ගො දුතියො.