၉. ဒုတိယဒုဋ္ဌဒေါသသိက္ခာပဒံ

၃၉၁. တေန သမယေန ဗုဒ္ဓေါ ဘဂဝါ ရာဇဂဟေ ဝိဟရတိ ဝေဠုဝနေ ကလန္ဒကနိဝါပေ. တေန ခေါ ပန သမယေန မေတ္တိယဘူမဇကာ ဘိက္ခူ ဂိဇ္ဈကူဋာ ပဗ္ဗတာ ဩရောဟန္တာ အဒ္ဒသံသု ဆဂလကံ [ဆကလကံ (သျာ.)] အဇိကာယ ဝိပ္ပဋိပဇ္ဇန္တံ. ဒိသွာန ဧဝမာဟံသု – ‘‘ဟန္ဒ မယံ၊ အာဝုသော၊ ဣမံ ဆဂလကံ ဒဗ္ဗံ မလ္လပုတ္တံ နာမ ကရောမ. ဣမံ အဇိကံ မေတ္တိယံ နာမ ဘိက္ခုနိံ ကရောမ. ဧဝံ မယံ ဝေါဟရိဿာမ. ပုဗ္ဗေ မယံ၊ အာဝုသော၊ ဒဗ္ဗံ မလ္လပုတ္တံ သုတေန အဝေါစုမှာ. ဣဒါနိ ပန အမှေဟိ သာမံ ဒိဋ္ဌော မေတ္တိယာယ ဘိက္ခုနိယာ ဝိပ္ပဋိပဇ္ဇန္တော’’တိ. တေ တံ ဆဂလကံ ဒဗ္ဗံ မလ္လပုတ္တံ နာမ အကံသု. တံ အဇိကံ မေတ္တိယံ နာမ ဘိက္ခုနိံ အကံသု. တေ ဘိက္ခူနံ အာရောစေသုံ – ‘‘ပုဗ္ဗေ မယံ၊ အာဝုသော၊ ဒဗ္ဗံ မလ္လပုတ္တံ သုတေန အဝေါစုမှာ. ဣဒါနိ ပန အမှေဟိ သာမံ ဒိဋ္ဌော မေတ္တိယာယ ဘိက္ခုနိယာ ဝိပ္ပဋိပဇ္ဇန္တော’’တိ. ဘိက္ခူ ဧဝမာဟံသု – ‘‘မာဝုသော၊ ဧဝံ အဝစုတ္ထ. နာယသ္မာ ဒဗ္ဗော မလ္လပုတ္တော ဧဝံ ကရိဿတီ’’တိ.

အထ ခေါ တေ ဘိက္ခူ ဘဂဝတော ဧတမတ္ထံ အာရောစေသုံ. အထ ခေါ ဘဂဝါ ဧတသ္မိံ နိဒါနေ ဧတသ္မိံ ပကရဏေ ဘိက္ခုသံဃံ သန္နိပါတာပေတွာ အာယသ္မန္တံ ဒဗ္ဗံ မလ္လပုတ္တံ ပဋိပုစ္ဆိ – ‘‘သရသိ တွံ၊ ဒဗ္ဗ၊ ဧဝရူပံ ကတ္တာ ယထယိမေ ဘိက္ခူ အာဟံသူ’’တိ? ‘‘ယထာ မံ၊ ဘန္တေ၊ ဘဂဝါ ဇာနာတီ’’တိ. ဒုတိယမ္ပိ ခေါ ဘဂဝါ။ပေ။ တတိယမ္ပိ ခေါ ဘဂဝါ အာယသ္မန္တံ ဒဗ္ဗံ မလ္လပုတ္တံ ဧတဒဝေါစ – ‘‘သရသိ တွံ၊ ဒဗ္ဗ၊ ဧဝရူပံ ကတ္တာ ယထယိမေ ဘိက္ခူ အာဟံသူ’’တိ? ‘‘ယထာ မံ၊ ဘန္တေ၊ ဘဂဝါ ဇာနာတီ’’တိ. ‘‘န ခေါ၊ ဒဗ္ဗ၊ ဒဗ္ဗာ ဧဝံ နိဗ္ဗေဌေန္တိ. သစေ တယာ ကတံ ကတန္တိ ဝဒေဟိ၊ သစေ တယာ အကတံ အကတန္တိ ဝဒေဟီ’’တိ. ‘‘ယတော အဟံ၊ ဘန္တေ၊ ဇာတော နာဘိဇာနာမိ သုပိနန္တေနပိ မေထုနဓမ္မံ ပဋိသေဝိတာ၊ ပဂေဝ ဇာဂရော’’တိ! အထ ခေါ ဘဂဝါ ဘိက္ခူ အာမန္တေသိ – ‘‘တေန ဟိ၊ ဘိက္ခုဝေ၊ ဣမေ ဘိက္ခူ အနုယုဉ္ဇထာ’’တိ. ဣဒံ ဝတွာ ဘဂဝါ ဥဋ္ဌာယာသနာ ဝိဟာရံ ပါဝိသိ.

အထ ခေါ တေ ဘိက္ခူ မေတ္တိယဘူမဇကေ ဘိက္ခူ အနုယုဉ္ဇိံသု. တေ ဘိက္ခူဟိ အနုယုဉ္ဇီယမာနာ ဘိက္ခူနံ ဧတမတ္ထံ အာရောစေသုံ – ‘‘ကိံ ပန တုမှေ၊ အာဝုသော၊ အာယသ္မန္တံ ဒဗ္ဗံ မလ္လပုတ္တံ အညဘာဂိယဿ အဓိကရဏဿ ကိဉ္စိဒေသံ လေသမတ္တံ ဥပါဒါယ ပါရာဇိကေန ဓမ္မေန အနုဒ္ဓံသေထာ’’တိ? ‘‘ဧဝမာဝုသော’’တိ. ယေ တေ ဘိက္ခူ အပ္ပိစ္ဆာ။ပေ။ တေ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ မေတ္တိယဘူမဇကာ ဘိက္ခူ အာယသ္မန္တံ ဒဗ္ဗံ မလ္လပုတ္တံ အညဘာဂိယဿ အဓိကရဏဿ ကိဉ္စိ ဒေသံ လေသမတ္တံ ဥပါဒါယ ပါရာဇိကေန ဓမ္မေန အနုဒ္ဓံသေဿန္တီ’’တိ! အထ ခေါ တေ ဘိက္ခူ မေတ္တိယဘူမဇကေ ဘိက္ခူ အနေကပရိယာယေန ဝိဂရဟိတွာ ဘဂဝတော ဧတမတ္ထံ အာရောစေသုံ။ပေ။ ‘‘သစ္စံ ကိရ တုမှေ၊ ဘိက္ခဝေ၊ ဒဗ္ဗံ မလ္လပုတ္တံ အညဘာဂိယဿ အဓိကရဏဿ ကိဉ္စိ ဒေသံ လေသမတ္တံ ဥပါဒါယ ပါရာဇိကေန ဓမ္မေန အနုဒ္ဓံသေထာ’’တိ? ‘‘သစ္စံ၊ ဘဂဝါ’’တိ. ဝိဂရဟိ ဗုဒ္ဓေါ ဘဂဝါ။ပေ။ ‘‘ကထဉှိ နာမ တုမှေ၊ မောဃပုရိသာ၊ ဒဗ္ဗံ မလ္လပုတ္တံ အညဘာဂိယဿ အဓိကရဏဿ ကိဉ္စိ ဒေသံ လေသမတ္တံ ဥပါဒါယ ပါရာဇိကေန ဓမ္မေန အနုဒ္ဓံသေဿထ! နေတံ၊ မောဃပုရိသာ၊ အပ္ပသန္နာနံ ဝါ ပသာဒါယ။ပေ။ ဧဝဉ္စ ပန၊ ဘိက္ခဝေ၊ ဣမံ သိက္ခာပဒံ ဥဒ္ဒိသေယျာထ –

၃၉၂. ‘‘ယော ပန ဘိက္ခု ဘိက္ခုံ ဒုဋ္ဌော ဒေါသော အပ္ပတီတော အညဘာဂိယဿ အဓိကရဏဿ ကိဉ္စိဒေသံ လေသမတ္တံ ဥပါဒါယ ပါရာဇိကေန ဓမ္မေန အနုဒ္ဓံသေယျ – ‘အပ္ပေဝ နာမ နံ ဣမမှာ ဗြဟ္မစရိယာ စာဝေယျ’န္တိ. တတော အပရေန သမယေန သမနုဂ္ဂါဟီယမာနော ဝါ အသမနုဂ္ဂါဟီယမာနော ဝါ အညဘာဂိယဉ္စေဝ တံ အဓိကရဏံ ဟောတိ ကောစိဒေသော လေသမတ္တော ဥပါဒိန္နော၊ ဘိက္ခု စ ဒေါသံ ပတိဋ္ဌာတိ၊ သံဃာဒိသေသော’’တိ.

၃၉၃. ယော ပနာတိ ယော ယာဒိသော။ပေ။ ဘိက္ခူတိ။ပေ။ အယံ ဣမသ္မိံ အတ္ထေ အဓိပ္ပေတော ဘိက္ခူတိ.

ဘိက္ခုန္တိ အညံ ဘိက္ခုံ.

ဒုဋ္ဌော ဒေါသောတိ ကုပိတော အနတ္တမနော အနဘိရဒ္ဓေါ အာဟတစိတ္တော ခိလဇာတော.

အပ္ပတီတောတိ တေန စ ကောပေန၊ တေန စ ဒေါသေန၊ တာယ စ အနတ္တမနတာယ၊ တာယ စ အနဘိရဒ္ဓိယာ အပ္ပတီတော ဟောတိ.

အညဘာဂိယဿ အဓိကရဏဿာတိ အာပတ္တညဘာဂိယံ ဝါ ဟောတိ အဓိကရဏညဘာဂိယံ ဝါ. ကထံ အဓိကရဏံ အဓိကရဏဿ အညဘာဂိယံ? ဝိဝါဒါဓိကရဏံ အနုဝါဒါဓိကရဏဿ အာပတ္တာဓိကရဏဿ ကိစ္စာဓိကရဏဿ အညဘာဂိယံ. အနုဝါဒါဓိကရဏံ အာပတ္တာဓိကရဏဿ ကိစ္စာဓိကရဏဿ ဝိဝါဒါဓိကရဏဿ အညဘာဂိယံ. အာပတ္တာဓိကရဏံ ကိစ္စာဓိကရဏဿ ဝိဝါဒါဓိကရဏဿ အနုဝါဒါဓိကရဏဿ အညဘာဂိယံ. ကိစ္စာဓိကရဏံ ဝိဝါဒါဓိကရဏဿ အနုဝါဒါဓိကရဏဿ အာပတ္တာဓိကရဏဿ အညဘာဂိယံ. ဧဝံ အဓိကရဏံ အဓိကရဏဿ အညဘာဂိယံ.

ကထံ အဓိကရဏံ အဓိကရဏဿ တဗ္ဘာဂိယံ? ဝိဝါဒါဓိကရဏံ ဝိဝါဒါဓိကရဏဿ တဗ္ဘာဂိယံ. အနုဝါဒါဓိကရဏံ အနုဝါဒါဓိကရဏဿ တဗ္ဘာဂိယံ. အာပတ္တာဓိကရဏံ အာပတ္တာဓိကရဏဿ သိယာ တဗ္ဘာဂိယံ သိယာ အညဘာဂိယံ.

ကထံ အာပတ္တာဓိကရဏံ အာပတ္တာဓိကရဏဿ အညဘာဂိယံ? မေထုနဓမ္မပါရာဇိကာပတ္တိ အဒိန္နာဒါနပါရာဇိကာပတ္တိယာ မနုဿဝိဂ္ဂဟပါရာဇိကာပတ္တိယာ ဥတ္တရိမနုဿဓမ္မပါရာဇိကာပတ္တိယာ အညဘာဂိယာ. အဒိန္နာဒါနပါရာဇိကာပတ္တိ မနုဿဝိဂ္ဂဟပါရာဇိကာပတ္တိယာ ဥတ္တရိမနုဿဓမ္မပါရာဇိကာပတ္တိယာ မေထုနဓမ္မပါရာဇိကာပတ္တိယာ အညဘာဂိယာ. မနုဿဝိဂ္ဂဟပါရာဇိကာပတ္တိ ဥတ္တရိမနုဿဓမ္မပါရာဇိကာပတ္တိယာ မေထုနဓမ္မပါရာဇိကာပတ္တိယာ အဒိန္နာဒါနပါရာဇိကာပတ္တိယာ အညဘာဂိယာ. ဥတ္တရိမနုဿဓမ္မပါရာဇိကာပတ္တိ မေထုနဓမ္မပါရာဇိကာပတ္တိယာ အဒိန္နာဒါနပါရာဇိကာပတ္တိယာ မနုဿဝိဂ္ဂဟပါရာဇိကာပတ္တိယာ အညဘာဂိယာ. ဧဝံ အာပတ္တာဓိကရဏံ အာပတ္တာဓိကရဏဿ အညဘာဂိယံ.

ကထံ အာပတ္တာဓိကရဏံ အာပတ္တာဓိကရဏဿ တဗ္ဘာဂိယံ? မေထုနဓမ္မပါရာဇိကာပတ္တိ မေထုနဓမ္မပါရာဇိကာပတ္တိယာ တဗ္ဘာဂိယာ. အဒိန္နာဒါနပါရာဇိကာပတ္တိ အဒိန္နာဒါနပါရာဇိကာပတ္တိယာ တဗ္ဘာဂိယာ. မနုဿဝိဂ္ဂဟပါရာဇိကာပတ္တိ မနုဿဝိဂ္ဂဟပါရာဇိကာပတ္တိယာ တဗ္ဘာဂိယာ. ဥတ္တရိမနုဿဓမ္မပါရာဇိကာပတ္တိ ဥတ္တရိမနုဿဓမ္မပါရာဇိကာပတ္တိယာ တဗ္ဘာဂိယာ. ဧဝံ အာပတ္တာဓိကရဏံ အာပတ္တာဓိကရဏဿ တဗ္ဘာဂိယံ.

ကိစ္စာဓိကရဏံ ကိစ္စာဓိကရဏဿ တဗ္ဘာဂိယံ. ဧဝံ အဓိကရဏံ အဓိကရဏဿ တဗ္ဘာဂိယံ.

၃၉၄. ကိဉ္စိ ဒေသံ လေသမတ္တံ ဥပါဒါယာတိ လေသော နာမ ဒသ လေသာ – ဇာတိလေသော၊ နာမလေသော၊ ဂေါတ္တလေသော၊ လိင်္ဂလေသော၊ အာပတ္တိလေသော၊ ပတ္တလေသော၊ စီဝရလေသော၊ ဥပဇ္ဈာယလေသော၊ အာစရိယလေသော၊ သေနာသနလေသော.

၃၉၅. ဇာတိလေသော နာမ ခတ္တိယော ဒိဋ္ဌော ဟောတိ ပါရာဇိကံ ဓမ္မံ အဇ္ဈာပဇ္ဇန္တော. အညံ ခတ္တိယံ ပဿိတွာ စောဒေတိ – ‘‘ခတ္တိယော မယာ ဒိဋ္ဌော [ဧတ္ထ ‘‘ပါရာဇိကံ ဓမ္မံ အဇ္ဈာပဇ္ဇန္တော’’တိ ပါဌော ဦနော မညေ၊ အဋ္ဌကထာယံ ဟိ ‘‘ခတ္တိယော မယာ ဒိဋ္ဌော ပါရာဇိကံ ဓမ္မံ အဇ္ဈာပဇ္ဇန္တော’’တိ ဒိဿတိ]. ပါရာဇိကံ ဓမ္မံ အဇ္ဈာပန္နောသိ၊ အဿမဏောသိ၊ အသကျပုတ္တိယောသိ၊ နတ္ထိ တယာ သဒ္ဓိံ ဥပေါသထော ဝါ ပဝါရဏာ ဝါ သံဃကမ္မံ ဝါ’’တိ၊ အာပတ္တိ ဝါစာယ၊ ဝါစာယ သံဃာဒိသေသဿ.

ဗြာဟ္မဏော ဒိဋ္ဌော ဟောတိ။ပေ။ ဝေဿော ဒိဋ္ဌော ဟောတိ။ပေ။ သုဒ္ဒေါ ဒိဋ္ဌော ဟောတိ ပါရာဇိကံ ဓမ္မံ အဇ္ဈာပဇ္ဇန္တော. အညံ သုဒ္ဒံ ပဿိတွာ စောဒေတိ – ‘‘သုဒ္ဒေါ မယာ ဒိဋ္ဌော. ပါရာဇိကံ ဓမ္မံ အဇ္ဈာပန္နောသိ၊ အဿမဏောသိ၊ အသကျပုတ္တိယောသိ’’။ပေ။ အာပတ္တိ ဝါစာယ၊ ဝါစာယ သံဃာဒိသေသဿ.

၃၉၆. နာမလေသော နာမ ဗုဒ္ဓရက္ခိတော ဒိဋ္ဌော ဟောတိ။ပေ။ ဓမ္မရက္ခိတော ဒိဋ္ဌော ဟောတိ။ပေ။ သင်္ဃရက္ခိတော ဒိဋ္ဌော ဟောတိ ပါရာဇိကံ ဓမ္မံ အဇ္ဈာပဇ္ဇန္တော. အညံ သင်္ဃရက္ခိတံ ပဿိတွာ စောဒေတိ – ‘‘သင်္ဃရက္ခိတော မယာ ဒိဋ္ဌော. ပါရာဇိကံ ဓမ္မံ အဇ္ဈာပန္နောသိ၊ အဿမဏောသိ၊ အသကျပုတ္တိယောသိ’’။ပေ။ အာပတ္တိ ဝါစာယ၊ ဝါစာယ သံဃာဒိသေသဿ.

၃၉၇. ဂေါတ္တလေသော နာမ ဂေါတမော ဒိဋ္ဌော ဟောတိ။ပေ။ မောဂ္ဂလ္လာနော ဒိဋ္ဌော ဟောတိ။ပေ။ ကစ္စာယနော ဒိဋ္ဌော ဟောတိ။ပေ။ ဝါသိဋ္ဌော ဒိဋ္ဌော ဟောတိ ပါရာဇိကံ ဓမ္မံ အဇ္ဈာပဇ္ဇန္တော. အညံ ဝါသိဋ္ဌံ ပဿိတွာ စောဒေတိ – ‘‘ဝါသိဋ္ဌော မယာ ဒိဋ္ဌော. ပါရာဇိကံ ဓမ္မံ အဇ္ဈာပန္နောသိ၊ အဿမဏောသိ၊ အသကျပုတ္တိယောသိ’’။ပေ။ အာပတ္တိ ဝါစာယ၊ ဝါစာယ သံဃာဒိသေသဿ.

၃၉၈. လိင်္ဂလေသော နာမ ဒီဃော ဒိဋ္ဌော ဟောတိ။ပေ။ ရဿော ဒိဋ္ဌော ဟောတိ။ပေ။ ကဏှော ဒိဋ္ဌော ဟောတိ။ပေ။ ဩဒါတော ဒိဋ္ဌော ဟောတိ ပါရာဇိကံ ဓမ္မံ အဇ္ဈာပဇ္ဇန္တော. အညံ ဩဒါတံ ပဿိတွာ စောဒေတိ – ‘‘ဩဒါတော မယာ ဒိဋ္ဌော. ပါရာဇိကံ ဓမ္မံ အဇ္ဈာပန္နောသိ၊ အဿမဏောသိ၊ အသကျပုတ္တိယောသိ’’။ပေ။ အာပတ္တိ ဝါစာယ၊ ဝါစာယ သံဃာဒိသေသဿ.

၃၉၉. အာပတ္တိလေသော နာမ လဟုကံ အာပတ္တိံ အာပဇ္ဇန္တော ဒိဋ္ဌော ဟောတိ. တဉ္စေ ပါရာဇိကေန စောဒေတိ – ‘‘အဿမဏောသိ၊ အသကျပုတ္တိယောသိ။ပေ။ အာပတ္တိ ဝါစာယ၊ ဝါစာယ သံဃာဒိသေသဿ.

၄၀၀. ပတ္တလေသော နာမ လောဟပတ္တဓရော ဒိဋ္ဌော ဟောတိ။ပေ။ သာဋကပတ္တဓရော ဒိဋ္ဌော ဟောတိ။ပေ။ သုမ္ဘကပတ္တဓရော ဒိဋ္ဌော ဟောတိ ပါရာဇိကံ ဓမ္မံ အဇ္ဈာပဇ္ဇန္တော. အညံ သုမ္ဘကပတ္တဓရံ ပဿိတွာ စောဒေတိ – ‘‘သုမ္ဘကပတ္တဓရော မယာ ဒိဋ္ဌော. ပါရာဇိကံ ဓမ္မံ အဇ္ဈာပန္နောသိ၊ အဿမဏောသိ၊ အသကျပုတ္တိယောသိ’’။ပေ။ အာပတ္တိ ဝါစာယ၊ ဝါစာယ သံဃာဒိသေသဿ.

၄၀၁. စီဝရလေသော နာမ ပံသုကူလိကော ဒိဋ္ဌော ဟောတိ။ပေ။ ဂဟပတိစီဝရဓရော ဒိဋ္ဌော ဟောတိ ပါရာဇိကံ ဓမ္မံ အဇ္ဈာပဇ္ဇန္တော. အညံ ဂဟပတိစီဝရဓရံ ပဿိတွာ စောဒေတိ – ‘‘ဂဟပတိစီဝရဓရော မယာ ဒိဋ္ဌော. ပါရာဇိကံ ဓမ္မံ အဇ္ဈာပန္နောသိ၊ အဿမဏောသိ၊ အသကျပုတ္တိယောသိ’’။ပေ။ အာပတ္တိ ဝါစာယ၊ ဝါစာယ သံဃာဒိသေသဿ.

၄၀၂. ဥပဇ္ဈာယလေသော နာမ ဣတ္ထန္နာမဿ သဒ္ဓိဝိဟာရိကော ဒိဋ္ဌော ဟောတိ ပါရာဇိကံ ဓမ္မံ အဇ္ဈာပဇ္ဇန္တော. အညံ ဣတ္ထန္နာမဿ သဒ္ဓိဝိဟာရိကံ ပဿိတွာ စောဒေတိ – ‘‘ဣတ္ထန္နာမဿ သဒ္ဓိဝိဟာရိကော မယာ ဒိဋ္ဌော. ပါရာဇိကံ ဓမ္မံ အဇ္ဈာပန္နောသိ၊ အဿမဏောသိ၊ အသကျပုတ္တိယောသိ’’။ပေ။ အာပတ္တိ ဝါစာယ၊ ဝါစာယ သံဃာဒိသေသဿ.

၄၀၃. အာစရိယလေသော နာမ ဣတ္ထန္နာမဿ အန္တေဝါသိကော ဒိဋ္ဌော ဟောတိ ပါရာဇိကံ ဓမ္မံ အဇ္ဈာပဇ္ဇန္တော. အညံ ဣတ္ထန္နာမဿ အန္တေဝါသိကံ ပဿိတွာ စောဒေတိ – ‘‘ဣတ္ထန္နာမဿ အန္တေဝါသိကော မယာ ဒိဋ္ဌော. ပါရာဇိကံ ဓမ္မံ အဇ္ဈာပန္နောသိ၊ အဿမဏောသိ၊ အသကျပုတ္တိယောသိ’’။ပေ။ အာပတ္တိ ဝါစာယ၊ ဝါစာယ သံဃာဒိသေသဿ.

၄၀၄. သေနာသနလေသော နာမ ဣတ္ထန္နာမသေနာသနဝါသိကော ဒိဋ္ဌော ဟောတိ ပါရာဇိကံ ဓမ္မံ အဇ္ဈာပဇ္ဇန္တော. အညံ ဣတ္ထန္နာမသေနာသနဝါသိကံ ပဿိတွာ စောဒေတိ – ‘‘ဣတ္ထန္နာမသေနာသနဝါသိကော မယာ ဒိဋ္ဌော. ပါရာဇိကံ ဓမ္မံ အဇ္ဈာပန္နောသိ၊ အဿမဏောသိ၊ အသကျပုတ္တိယောသိ၊ နတ္ထိ တယာ သဒ္ဓိံ ဥပေါသထော ဝါ ပဝါရဏာ ဝါ သံဃကမ္မံ ဝါ’’တိ၊ အာပတ္တိ ဝါစာယ၊ ဝါစာယ သံဃာဒိသေသဿ.

၄၀၅. ပါရာဇိကေန ဓမ္မေနာတိ စတုန္နံ အညတရေန.

အနုဒ္ဓံသေယျာတိ စောဒေတိ ဝါ စောဒါပေတိ ဝါ.

အပ္ပေဝ နာမ နံ ဣမမှာ ဗြဟ္မစရိယာစာဝေယျန္တိ ဘိက္ခုဘာဝါ စာဝေယျံ၊ သမဏဓမ္မာ စာဝေယျံ၊ သီလက္ခန္ဓာ စာဝေယျံ၊ တပေါဂုဏာ စာဝေယျံ.

တတော အပရေန သမယေနာတိ ယသ္မိံ ခဏေ အနုဒ္ဓံသိတော ဟောတိ၊ တံ ခဏံ တံ လယံ တံ မုဟုတ္တံ ဝီတိဝတ္တေ.

သမနုဂ္ဂါဟီယမာနောတိ ယေန ဝတ္ထုနာ အနုဒ္ဓံသိတော ဟောတိ တသ္မိံ ဝတ္ထုသ္မိံ သမနုဂ္ဂါဟီယမာနော.

အသမနုဂ္ဂါဟီယမာနောတိ န ကေနစိ ဝုစ္စမာနော.

အဓိကရဏံ နာမ စတ္တာရိ အဓိကရဏာနိ – ဝိဝါဒါဓိကရဏံ၊ အနုဝါဒါဓိကရဏံ၊ အာပတ္တာဓိကရဏံ၊ ကိစ္စာဓိကရဏံ.

ကောစိ ဒေသော လေသမတ္တော ဥပါဒိန္နောတိ တေသံ ဒသန္နံ လေသာနံ အညတရော လေသော ဥပါဒိန္နော ဟောတိ.

ဘိက္ခု စ ဒေါသံ ပတိဋ္ဌာတီတိ တုစ္ဆကံ မယာ ဘဏိတံ၊ မုသာ မယာ ဘဏိတံ၊ အဘူတံ မယာ ဘဏိတံ၊ အဇာနန္တေန မယာ ဘဏိတံ.

သံဃာဒိသေသောတိ ။ပေ။ တေနပိ ဝုစ္စတိ သံဃာဒိသေသောတိ.

၄၀၆. ဘိက္ခု သံဃာဒိသေသံ အဇ္ဈာပဇ္ဇန္တော ဒိဋ္ဌော ဟောတိ၊ သံဃာဒိသေသေ သံဃာဒိသေသဒိဋ္ဌိ ဟောတိ. တဉ္စေ ပါရာဇိကေန စောဒေတိ – ‘‘အဿမဏောသိ၊ အသကျပုတ္တိယောသိ၊ နတ္ထိ တယာ သဒ္ဓိံ ဥပေါသထော ဝါ ပဝါရဏာ ဝါ သံဃကမ္မံ ဝါ’’တိ၊ ဧဝမ္ပိ အာပတ္တညဘာဂိယံ ဟောတိ လေသော စ ဥပါဒိန္နော၊ အာပတ္တိ ဝါစာယ၊ ဝါစာယ သံဃာဒိသေသဿ.

ဘိက္ခု သံဃာဒိသေသံ အဇ္ဈာပဇ္ဇန္တော ဒိဋ္ဌော ဟောတိ၊ သံဃာဒိသေသေ ထုလ္လစ္စယဒိဋ္ဌိ ဟောတိ။ပေ။ ပါစိတ္တိယဒိဋ္ဌိ ဟောတိ။ ပါဋိဒေသနီယဒိဋ္ဌိ ဟောတိ။ ဒုက္ကဋဒိဋ္ဌိ ဟောတိ။ ဒုဗ္ဘာသိတဒိဋ္ဌိ ဟောတိ. တဉ္စေ ပါရာဇိကေန စောဒေတိ – ‘‘အဿမဏောသိ’’။ပေ။ ဧဝမ္ပိ အာပတ္တညဘာဂိယံ ဟောတိ လေသော စ ဥပါဒိန္နော၊ အာပတ္တိ ဝါစာယ၊ ဝါစာယ သံဃာဒိသေသဿ.

ဘိက္ခု ထုလ္လစ္စယံ အဇ္ဈာပဇ္ဇန္တော ဒိဋ္ဌော ဟောတိ ထုလ္လစ္စယေ ထုလ္လစ္စယဒိဋ္ဌိ ဟောတိ။ပေ။ ထုလ္လစ္စယေ ပါစိတ္တိယဒိဋ္ဌိ ဟောတိ။ ပါဋိဒေသနီယဒိဋ္ဌိ ဟောတိ။ ဒုက္ကဋဒိဋ္ဌိ ဟောတိ။ ဒုဗ္ဘာသိတဒိဋ္ဌိ ဟောတိ။ သံဃာဒိသေသဒိဋ္ဌိ ဟောတိ. တဉ္စေ ပါရာဇိကေန စောဒေတိ – ‘‘အဿမဏောသိ’’ ။ပေ။ ဧဝမ္ပိ အာပတ္တညဘာဂိယံ ဟောတိ လေသော စ ဥပါဒိန္နော၊ အာပတ္တိ ဝါစာယ၊ ဝါစာယ သံဃာဒိသေသဿ.

ဘိက္ခု ပါစိတ္တိယံ။ပေ။ ပါဋိဒေသနီယံ။ ဒုက္ကဋံ။ ဒုဗ္ဘာသိတံ အဇ္ဈာပဇ္ဇန္တော ဒိဋ္ဌော ဟောတိ၊ ဒုဗ္ဘာသိတေ ဒုဗ္ဘာသိတဒိဋ္ဌိ ဟောတိ။ပေ။ ဒုဗ္ဘာသိတေ သံဃာဒိသေသဒိဋ္ဌိ ဟောတိ။ ထုလ္လစ္စယဒိဋ္ဌိ ဟောတိ။ ပါစိတ္တိယဒိဋ္ဌိ ဟောတိ။ ပါဋိဒေသနီယဒိဋ္ဌိ ဟောတိ။ ဒုက္ကဋဒိဋ္ဌိ ဟောတိ. တဉ္စေ ပါရာဇိကေန စောဒေတိ – ‘‘အဿမဏောသိ၊ အသကျပုတ္တိယောသိ၊ နတ္ထိ တယာ သဒ္ဓိံ ဥပေါသထော ဝါ ပဝါရဏာ ဝါ သံဃကမ္မံ ဝါ’’တိ၊ ဧဝမ္ပိ အာပတ္တညဘာဂိယံ ဟောတိ လေသော စ ဥပါဒိန္နော၊ အာပတ္တိ ဝါစာယ၊ ဝါစာယ သံဃာဒိသေသဿ.

ဧကေကံ မူလံ ကာတုန စက္ကံ ဗန္ဓိတဗ္ဗံ.

၄၀၇. ဘိက္ခု သံဃာဒိသေသံ အဇ္ဈာပဇ္ဇန္တော ဒိဋ္ဌော ဟောတိ သံဃာဒိသေသေ သံဃာဒိသေသဒိဋ္ဌိ ဟောတိ. တဉ္စေ ပါရာဇိကေန စောဒါပေတိ – ‘‘အဿမဏောသိ’’။ပေ။ ဧဝမ္ပိ အာပတ္တညဘာဂိယံ ဟောတိ လေသော စ ဥပါဒိန္နော၊ အာပတ္တိ ဝါစာယ၊ ဝါစာယ သံဃာဒိသေသဿ.

ဘိက္ခု သံဃာဒိသေသံ အဇ္ဈာပဇ္ဇန္တော ဒိဋ္ဌော ဟောတိ၊ သံဃာဒိသေသေ ထုလ္လစ္စယဒိဋ္ဌိ ဟောတိ။ပေ။ ပါစိတ္တိယဒိဋ္ဌိ ဟောတိ။ ပါဋိဒေသနီယဒိဋ္ဌိ ဟောတိ။ ဒုက္ကဋဒိဋ္ဌိ ဟောတိ။ ဒုဗ္ဘာသိတဒိဋ္ဌိ ဟောတိ. တဉ္စေ ပါရာဇိကေန စောဒါပေတိ – ‘‘အဿမဏောသိ’’။ပေ။ ဧဝမ္ပိ အာပတ္တညဘာဂိယံ ဟောတိ လေသော စ ဥပါဒိန္နော၊ အာပတ္တိ ဝါစာယ၊ ဝါစာယ သံဃာဒိသေသဿ.

ဘိက္ခု ထုလ္လစ္စယံ အဇ္ဈာပဇ္ဇန္တော ဒိဋ္ဌော ဟောတိ ထုလ္လစ္စယေ ထုလ္လစ္စယဒိဋ္ဌိ ဟောတိ။ပေ။ ထုလ္လစ္စယေ ပါစိတ္တိယဒိဋ္ဌိ ဟောတိ။ ပါဋိဒေသနီယဒိဋ္ဌိ ဟောတိ။ ဒုက္ကဋဒိဋ္ဌိ ဟောတိ။ ဒုဗ္ဘာသိတဒိဋ္ဌိ ဟောတိ။ သံဃာဒိသေသဒိဋ္ဌိ ဟောတိ. တဉ္စေ ပါရာဇိကေန စောဒါပေတိ – ‘‘အဿမဏောသိ’’။ပေ။ ဧဝမ္ပိ အာပတ္တညဘာဂိယံ ဟောတိ လေသော စ ဥပါဒိန္နော၊ အာပတ္တိ ဝါစာယ၊ ဝါစာယ သံဃာဒိသေသဿ.

ဘိက္ခု ပါစိတ္တိယံ။ပေ။ ပါဋိဒေသနီယံ။ ဒုက္ကဋံ။ ဒုဗ္ဘာသိတံ အဇ္ဈာပဇ္ဇန္တော ဒိဋ္ဌော ဟောတိ ဒုဗ္ဘာသိတေ ဒုဗ္ဘာသိတဒိဋ္ဌိ ဟောတိ။ပေ။ ဒုဗ္ဘာသိတေ သံဃာဒိသေသဒိဋ္ဌိ ဟောတိ။ ထုလ္လစ္စယဒိဋ္ဌိ ဟောတိ။ ပါစိတ္တိယဒိဋ္ဌိ ဟောတိ။ ပါဋိဒေသနီယဒိဋ္ဌိ ဟောတိ။ ဒုက္ကဋဒိဋ္ဌိ ဟောတိ. တဉ္စေ ပါရာဇိကေန စောဒါပေတိ – ‘‘အဿမဏောသိ၊ အသကျပုတ္တိယောသိ၊ နတ္ထိ တယာ သဒ္ဓိံ ဥပေါသထော ဝါ ပဝါရဏာ ဝါ သံဃကမ္မံ ဝါ’’တိ၊ ဧဝမ္ပိ အာပတ္တညဘာဂိယံ ဟောတိ လေသော စ ဥပါဒိန္နော၊ အာပတ္တိ ဝါစာယ၊ ဝါစာယ သံဃာဒိသေသဿ.

၄၀၈. အနာပတ္တိ တထာသညီ စောဒေတိ ဝါ စောဒါပေတိ ဝါ၊ ဥမ္မတ္တကဿ၊ အာဒိကမ္မိကဿာတိ.

ဒုတိယဒုဋ္ဌဒေါသသိက္ခာပဒံ နိဋ္ဌိတံ နဝမံ.