၇. ဝိဟာရကာရသိက္ခာပဒံ

၃၆၅. တေန သမယေန ဗုဒ္ဓေါ ဘဂဝါ ကောသမ္ဗိယံ ဝိဟရတိ ဃောသိတာရာမေ. တေန ခေါ ပန သမယေန အာယသ္မတော ဆန္နဿ ဥပဋ္ဌာကော ဂဟပတိ အာယသ္မန္တံ ဆန္နံ ဧတဒဝေါစ – ‘‘ဝိဟာရဝတ္ထုံ၊ ဘန္တေ၊ ဇာနာဟိ အယျဿ ဝိဟာရံ ကာရာပေဿာမီ’’တိ. အထ ခေါ အာယသ္မာ ဆန္နော ဝိဟာရဝတ္ထုံ သောဓေန္တော အညတရံ စေတိယရုက္ခံ ဆေဒါပေသိ ဂါမပူဇိတံ နိဂမပူဇိတံ နဂရပူဇိတံ ဇနပဒပူဇိတံ ရဋ္ဌပူဇိတံ. မနုဿာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ သမဏာ သကျပုတ္တိယာ စေတိယရုက္ခံ ဆေဒါပေဿန္တိ ဂါမပူဇိတံ နိဂမပူဇိတံ နဂရပူဇိတံ ဇနပဒပူဇိတံ ရဋ္ဌပူဇိတံ! ဧကိန္ဒြိယံ သမဏာ သကျပုတ္တိယာ ဇီဝံ ဝိဟေဌေန္တီ’’ [ဝိဟေဌေဿန္တိ (ကတ္ထစိ)] တိ. အဿောသုံ ခေါ ဘိက္ခူ တေသံ မနုဿာနံ ဥဇ္ဈာယန္တာနံ ခိယျန္တာနံ ဝိပါစေန္တာနံ. ယေ တေ ဘိက္ခူ အပ္ပိစ္ဆာ။ပေ။ တေ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ အာယသ္မာ ဆန္နော စေတိယရုက္ခံ ဆေဒါပေဿတိ ဂါမပူဇိတံ။ပေ။ ရဋ္ဌပူဇိတ’’န္တိ! အထ ခေါ တေ ဘိက္ခူ အာယသ္မန္တံ ဆန္နံ အနေကပရိယာယေန ဝိဂရဟိတွာ ဘဂဝတော ဧတမတ္ထံ အာရောစေသုံ။ပေ။ ‘‘သစ္စံ ကိရ တွံ၊ ဆန္န၊ စေတိယရုက္ခံ ဆေဒါပေသိ ဂါမပူဇိတံ။ပေ။ ရဋ္ဌပူဇိတ’’န္တိ? ‘‘သစ္စံ၊ ဘဂဝါ’’တိ. ဝိဂရဟိ ဗုဒ္ဓေါ ဘဂဝါ။ပေ။ ‘‘ကထဉှိ နာမ တွံ၊ မောဃပုရိသ၊ စေတိယရုက္ခံ ဆေဒါပေဿသိ ဂါမပူဇိတံ နိဂမပူဇိတံ နဂရပူဇိတံ ဇနပဒပူဇိတံ ရဋ္ဌပူဇိတံ! ဇီဝသညိနော ဟိ၊ မောဃပုရိသ၊ မနုဿာ ရုက္ခသ္မိံ. နေတံ၊ မောဃပုရိသ၊ အပ္ပသန္နာနံ ဝါ ပသာဒါယ။ပေ။ ဧဝဉ္စ ပန၊ ဘိက္ခဝေ၊ ဣမံ သိက္ခာပဒံ ဥဒ္ဒိသေယျာထ –

၃၆၆. ‘‘မဟလ္လကံ ပန ဘိက္ခုနာ ဝိဟာရံ ကာရယမာနေန သဿာမိကံ အတ္တုဒ္ဒေသံ ဘိက္ခူ အဘိနေတဗ္ဗာ ဝတ္ထုဒေသနာယ. တေဟိ ဘိက္ခူဟိ ဝတ္ထု ဒေသေတဗ္ဗံ အနာရမ္ဘံ သပရိက္ကမနံ. သာရမ္ဘေ စေ ဘိက္ခု ဝတ္ထုသ္မိံ အပရိက္ကမနေ မဟလ္လကံ ဝိဟာရံ ကာရေယျ ဘိက္ခူ ဝါ အနဘိနေယျ ဝတ္ထုဒေသနာယ၊ သံဃာဒိသေသော’’တိ.

၃၆၇. မဟလ္လကော နာမ ဝိဟာရော သဿာမိကော ဝုစ္စတိ.

ဝိဟာရော နာမ ဥလ္လိတ္တော ဝါ ဟောတိ အဝလိတ္တော ဝါ ဥလ္လိတ္တာဝလိတ္တော ဝါ.

ကာရယမာနေနာတိ ကရောန္တော ဝါ ကာရာပေန္တော ဝါ.

သဿာမိကန္တိ အညော ကောစိ သာမိကော ဟောတိ ဣတ္ထီ ဝါ ပုရိသော ဝါ ဂဟဋ္ဌော ဝါ ပဗ္ဗဇိတော ဝါ.

အတ္တုဒ္ဒေသန္တိ အတ္တနော အတ္ထာယ.

ဘိက္ခူ အဘိနေတဗ္ဗာ ဝတ္ထုဒေသနာယာတိ တေန ဝိဟာရကာရကေန ဘိက္ခုနာ ဝိဟာရဝတ္ထုံ သောဓေတွာ သံဃံ ဥပသင်္ကမိတွာ ဧကံသံ ဥတ္တရာသင်္ဂံ ကရိတွာ ဝုဍ္ဎာနံ ဘိက္ခူနံ ပါဒေ ဝန္ဒိတွာ ဥက္ကုဋိကံ နိသီဒိတွာ အဉ္ဇလိံ ပဂ္ဂဟေတွာ ဧဝမဿ ဝစနီယော – ‘‘အဟံ၊ ဘန္တေ၊ မဟလ္လကံ ဝိဟာရံ ကတ္တုကာမော သဿာမိကံ အတ္တုဒ္ဒေသံ. သောဟံ၊ ဘန္တေ၊ သံဃံ ဝိဟာရဝတ္ထုဩလောကနံ ယာစာမီ’’တိ. ဒုတိယမ္ပိ ယာစိတဗ္ဗာ. တတိယမ္ပိ ယာစိတဗ္ဗာ. သစေ သဗ္ဗော သံဃော ဥဿဟတိ ဝိဟာရဝတ္ထုံ ဩလောကေတုံ သဗ္ဗေန သံဃေန ဩလောကေတဗ္ဗံ. နော စေ သဗ္ဗော သံဃော ဥဿဟတိ ဝိဟာရဝတ္ထုံ ဩလောကေတုံ၊ ယေ တတ္ထ ဟောန္တိ ဘိက္ခူ ဗျတ္တာ ပဋိဗလာ သာရမ္ဘံ အနာရမ္ဘံ သပရိက္ကမနံ အပရိက္ကမနံ ဇာနိတုံ တေ ယာစိတွာ သမ္မန္နိတဗ္ဗာ. ဧဝဉ္စ ပန၊ ဘိက္ခဝေ၊ သမ္မန္နိတဗ္ဗာ. ဗျတ္တေန ဘိက္ခုနာ ပဋိဗလေန သံဃော ဉာပေတဗ္ဗော –

၃၆၈. ‘‘သုဏာတု မေ၊ ဘန္တေ၊ သံဃော. အယံ ဣတ္ထန္နာမော ဘိက္ခု မဟလ္လကံ ဝိဟာရံ ကတ္တုကာမော သဿာမိကံ အတ္တုဒ္ဒေသံ. သော သံဃံ ဝိဟာရဝတ္ထုဩလောကနံ ယာစတိ. ယဒိ သံဃဿ ပတ္တကလ္လံ၊ သံဃော ဣတ္ထန္နာမဉ္စ ဣတ္ထန္နာမဉ္စ ဘိက္ခု သမ္မန္နေယျ ဣတ္ထန္နာမဿ ဘိက္ခုနော ဝိဟာရဝတ္ထုံ ဩလောကေတုံ. ဧသာ ဉတ္တိ.

‘‘သုဏာတု မေ၊ ဘန္တေ၊ သံဃော. အယံ ဣတ္ထန္နာမော ဘိက္ခု မဟလ္လကံ ဝိဟာရံ ကတ္တုကာမော သဿာမိကံ အတ္တုဒ္ဒေသံ. သော သံဃံ ဝိဟာရဝတ္ထုဩလောကနံ ယာစတိ. သံဃော ဣတ္ထန္နာမဉ္စ ဣတ္ထန္နာမဉ္စ ဘိက္ခူ သမ္မန္နတိ ဣတ္ထန္နာမဿ ဘိက္ခုနော ဝိဟာရဝတ္ထုံ ဩလောကေတုံ. ယဿာယသ္မတော ခမတိ ဣတ္ထန္နာမဿ စ ဣတ္ထန္နာမဿ စ ဘိက္ခူနံ သမ္မုတိ ဣတ္ထန္နာမဿ ဘိက္ခုနော ဝိဟာရဝတ္ထုံ ဩလောကေတုံ၊ သော တုဏှဿ၊ ယဿ နက္ခမတိ၊ သော ဘာသေယျ.

‘‘သမ္မတာ သံဃေန ဣတ္ထန္နာမော စ ဣတ္ထန္နာမော စ ဘိက္ခူ ဣတ္ထန္နာမဿ ဘိက္ခုနော ဝိဟာရဝတ္ထုံ ဩလောကေတုံ. ခမတိ သံဃဿ၊ တသ္မာ တုဏှီ၊ ဧဝမေတံ ဓာရယာမီ’’တိ.

၃၆၉. တေဟိ သမ္မတေဟိ ဘိက္ခူဟိ တတ္ထ ဂန္တွာ ဝိဟာရဝတ္ထု ဩလောကေတဗ္ဗံ၊ သာရမ္ဘံ အနာရမ္ဘံ သပရိက္ကမနံ အပရိက္ကမနံ ဇာနိတဗ္ဗံ. သစေ သာရမ္ဘံ ဟောတိ အပရိက္ကမနံ၊ ‘မာယိဓ ကရီ’တိ ဝတ္တဗ္ဗော. သစေ အနာရမ္ဘံ ဟောတိ သပရိက္ကမနံ၊ သံဃဿ အာရောစေတဗ္ဗံ – ‘အနာရမ္ဘံ သပရိက္ကမန’န္တိ. တေန ဝိဟာရကာရကေန ဘိက္ခုနာ သံဃံ ဥပသင်္ကမိတွာ ဧကံသံ ဥတ္တရာသင်္ဂံ ကရိတွာ ဝုဍ္ဎာနံ ဘိက္ခူနံ ပါဒေ ဝန္ဒိတွာ ဥက္ကုဋိကံ နိသီဒိတွာ အဉ္ဇလိံ ပဂ္ဂဟေတွာ ဧဝမဿ ဝစနီယော – ‘‘အဟံ၊ ဘန္တေ၊ မဟလ္လကံ ဝိဟာရံ ကတ္တုကာမော သဿာမိကံ အတ္တုဒ္ဒေသံ. သောဟံ၊ ဘန္တေ၊ သံဃံ ဝိဟာရဝတ္ထုဒေသနံ ယာစာမီ’’တိ. ဒုတိယမ္ပိ ယာစိတဗ္ဗာ. တတိယမ္ပိ ယာစိတဗ္ဗာ. ဗျတ္တေန ဘိက္ခုနာ ပဋိဗလေန သံဃော ဉာပေတဗ္ဗော –

၃၇၀. ‘‘သုဏာတု မေ၊ ဘန္တေ၊ သံဃော. အယံ ဣတ္ထန္နာမော ဘိက္ခု မဟလ္လကံ ဝိဟာရံ ကတ္တုကာမော သဿာမိကံ အတ္တုဒ္ဒေသံ. သော သံဃံ ဝိဟာရဝတ္ထုဒေသနံ ယာစတိ. ယဒိ သံဃဿ ပတ္တကလ္လံ၊ သံဃော ဣတ္ထန္နာမဿ ဘိက္ခုနော ဝိဟာရဝတ္ထုံ ဒေသေယျ. ဧသာ ဉတ္တိ.

‘‘သုဏာတု မေ၊ ဘန္တေ၊ သံဃော. အယံ ဣတ္ထန္နာမော ဘိက္ခု မဟလ္လကံ ဝိဟာရံ ကတ္တုကာမော သဿာမိကံ အတ္တုဒ္ဒေသံ. သော သံဃံ ဝိဟာရဝတ္ထုဒေသနံ ယာစတိ. သံဃော ဣတ္ထန္နာမဿ ဘိက္ခုနော ဝိဟာရဝတ္ထုံ ဒေသေတိ. ယဿာယသ္မတော ခမတိ ဣတ္ထန္နာမဿ ဘိက္ခုနော ဝိဟာရဝတ္ထုဿ ဒေသနာ၊ သော တုဏှဿ၊ ယဿ နက္ခမတိ၊ သော ဘာသေယျ.

‘‘ဒေသိတံ သံဃေန ဣတ္ထန္နာမဿ ဘိက္ခုနော ဝိဟာရဝတ္ထုံ. ခမတိ သံဃဿ၊ တသ္မာ တုဏှီ၊ ဧဝမေတံ ဓာရယာမီ’’တိ.

၃၇၁. သာရမ္ဘံ နာမ ကိပိလ္လိကာနံ ဝါ အာသယော ဟောတိ၊ ဥပစိကာနံ ဝါ အာသယော ဟောတိ၊ ဥန္ဒူရာနံ ဝါ။ပေ။ အဟီနံ ဝါ ဝိစ္ဆိကာနံ ဝါ သတပဒီနံ ဝါ ဟတ္ထီနံ ဝါ အဿာနံ ဝါ သီဟာနံ ဝါ ဗျဂ္ဃါနံ ဝါ ဒီပီနံ ဝါ အစ္ဆာနံ ဝါ တရစ္ဆာနံ ဝါ အာသယော ဟောတိ၊ ယေသံ ကေသဉ္စိ တိရစ္ဆာနဂတာနံ ပါဏာနံ အာသယော ဟောတိ၊ ပုဗ္ဗဏ္ဏနိဿိတံ ဝါ ဟောတိ၊ အပရဏ္ဏနိဿိတံ ဝါ ဟောတိ၊ အဗ္ဘာဃာတနိဿိတံ ဝါ ဟောတိ၊ အာဃာတနနိဿိတံ ဝါ ဟောတိ၊ သုသာနနိဿိတံ ဝါ ဟောတိ၊ ဥယျာနနိဿိတံ ဝါ ဟောတိ၊ ရာဇဝတ္ထုနိဿိတံ ဝါ ဟောတိ၊ ဟတ္ထိသာလာနိဿိတံ ဝါ ဟောတိ၊ အဿသာလာနိဿိတံ ဝါ ဟောတိ၊ ဗန္ဓနာဂါရနိဿိတံ ဝါ ဟောတိ၊ ပါနာဂါရနိဿိတံ ဝါ ဟောတိ၊ သူနနိဿိတံ ဝါ ဟောတိ၊ ရစ္ဆာနိဿိတံ ဝါ ဟောတိ၊ စစ္စရနိဿိတံ ဝါ ဟောတိ၊ သဘာနိဿိတံ ဝါ ဟောတိ၊ သံသရဏနိဿိတံ ဝါ ဟောတိ. ဧတံ သာရမ္ဘံ နာမ.

အပရိက္ကမနံ နာမ န သက္ကာ ဟောတိ ယထာယုတ္တေန သကဋေန အနုပရိဂန္တုံ၊ သမန္တာ နိဿေဏိယာ အနုပရိဂန္တုံ. ဧတံ အပရိက္ကမနံ နာမ.

အနာရမ္ဘံ နာမ န ကိပိလ္လိကာနံ ဝါ အာသယော ဟောတိ။ပေ။ န သံသရဏနိဿိတံ ဝါ ဟောတိ. ဧတံ အနာရမ္ဘံ နာမ.

သပရိက္ကမနံ နာမ သက္ကာ ဟောတိ ယထာယုတ္တေန သကဋေန အနုပရိဂန္တုံ၊ သမန္တာ နိဿေဏိယာ အနုပရိဂန္တုံ. ဧတံ သပရိက္ကမနံ နာမ.

မဟလ္လကော နာမ ဝိဟာရော သဿာမိကော ဝုစ္စတိ.

ဝိဟာရော နာမ ဥလ္လိတ္တော ဝါ ဟောတိ အဝလိတ္တော ဝါ ဥလ္လိတ္တာဝလိတ္တော ဝါ.

ကာရေယျာတိ ကရောတိ ဝါ ကာရာပေတိ ဝါ.

ဘိက္ခူ ဝါ အနဘိနေယျ ဝတ္ထုဒေသနာယာတိ ဉတ္တိဒုတိယေန ကမ္မေန ဝိဟာရဝတ္ထုံ န ဒေသာပေတွာ ကရောတိ ဝါ ကာရာပေတိ ဝါ၊ ပယောဂေ ဒုက္ကဋံ. ဧကံ ပိဏ္ဍံ အနာဂတေ၊ အာပတ္တိ ထုလ္လစ္စယဿ. တသ္မိံ ပိဏ္ဍေ အာဂတေ၊ အာပတ္တိ သံဃာဒိသေသဿ.

သံဃာဒိသေသောတိ။ပေ။ တေနပိ ဝုစ္စတိ – ‘သံဃာဒိသေသော’တိ.

၃၇၂. ဘိက္ခု ဝိဟာရံ ကရောတိ အဒေသိတဝတ္ထုကံ သာရမ္ဘံ အပရိက္ကမနံ၊ အာပတ္တိ သံဃာဒိသေသေန ဒွိန္နံ ဒုက္ကဋာနံ. ဘိက္ခု ဝိဟာရံ ကရောတိ အဒေသိတဝတ္ထုကံ သာရမ္ဘံ သပရိက္ကမနံ၊ အာပတ္တိ သံဃာဒိသေသေန ဒုက္ကဋဿ. ဘိက္ခု ဝိဟာရံ ကရောတိ အဒေသိတဝတ္ထုကံ အနာရမ္ဘံ အပရိက္ကမနံ၊ အာပတ္တိ သံဃာဒိသေသေန ဒုက္ကဋဿ. ဘိက္ခု ဝိဟာရံ ကရောတိ အဒေသိတဝတ္ထုကံ အနာရမ္ဘံ သပရိက္ကမနံ၊ အာပတ္တိ သံဃာဒိသေသဿ.

ဘိက္ခု ဝိဟာရံ ကရောတိ ဒေသိတဝတ္ထုကံ သာရမ္ဘံ အပရိက္ကမနံ၊ အာပတ္တိ ဒွိန္နံ ဒုက္ကဋာနံ. ဘိက္ခု ဝိဟာရံ ကရောတိ ဒေသိတဝတ္ထုကံ သာရမ္ဘံ သပရိက္ကမနံ၊ အာပတ္တိ ဒုက္ကဋဿ. ဘိက္ခု ဝိဟာရံ ကရောတိ ဒေသိတဝတ္ထုကံ အနာရမ္ဘံ အပရိက္ကမနံ၊ အာပတ္တိ ဒုက္ကဋဿ. ဘိက္ခု ဝိဟာရံ ကရောတိ ဒေသိတဝတ္ထုကံ အနာရမ္ဘံ သပရိက္ကမနံ၊ အနာပတ္တိ.

၃၇၃. ဘိက္ခု သမာဒိသတိ – ‘‘ဝိဟာရံ မေ ကရောထာ’’တိ. တဿ ဝိဟာရံ ကရောန္တိ အဒေသိတဝတ္ထုကံ သာရမ္ဘံ အပရိက္ကမနံ၊ အာပတ္တိ သံဃာဒိသေသေန ဒွိန္နံ ဒုက္ကဋာနံ။ပေ။ သာရမ္ဘံ သပရိက္ကမနံ၊ အာပတ္တိ သံဃာဒိသေသေန ဒုက္ကဋဿ။ပေ။ အနာရမ္ဘံ အပရိက္ကမနံ၊ အာပတ္တိ သံဃာဒိသေသေန ဒုက္ကဋဿ။ပေ။ အနာရမ္ဘံ သပရိက္ကမနံ၊ အာပတ္တိ သံဃာဒိသေသဿ.

ဘိက္ခု သမာဒိသတိ – ‘‘ဝိဟာရံ မေ ကရောထာ’’တိ. တဿ ဝိဟာရံ ကရောန္တိ ဒေသိတဝတ္ထုကံ သာရမ္ဘံ အပရိက္ကမနံ၊ အာပတ္တိ ဒွိန္နံ ဒုက္ကဋာနံ။ပေ။ သာရမ္ဘံ သပရိက္ကမနံ၊ အာပတ္တိ ဒုက္ကဋဿ။ပေ။ အနာရမ္ဘံ အပရိက္ကမနံ၊ အာပတ္တိ ဒုက္ကဋဿ။ပေ။ အနာရမ္ဘံ သပရိက္ကမနံ၊ အနာပတ္တိ.

၃၇၄. ဘိက္ခု သမာဒိသိတွာ ပက္ကမတိ – ‘‘ဝိဟာရံ မေ ကရောထာ’’တိ. န စ သမာဒိသတိ – ‘‘ဒေသိတဝတ္ထုကော စ ဟောတု အနာရမ္ဘော စ သပရိက္ကမနော စာ’’တိ. တဿ ဝိဟာရံ ကရောန္တိ အဒေသိတဝတ္ထုကံ သာရမ္ဘံ အပရိက္ကမနံ၊ အာပတ္တိ သံဃာဒိသေသေန ဒွိန္နံ ဒုက္ကဋာနံ။ပေ။ သာရမ္ဘံ သပရိက္ကမနံ၊ အာပတ္တိ သံဃာဒိသေသေန ဒုက္ကဋဿ။ပေ။ အနာရမ္ဘံ အပရိက္ကမနံ၊ အာပတ္တိ သံဃာဒိသေသေန ဒုက္ကဋဿ။ပေ။ အနာရမ္ဘံ သပရိက္ကမနံ၊ အာပတ္တိ သံဃာဒိသေသဿ.

ဘိက္ခု သမာဒိသိတွာ ပက္ကမတိ – ‘‘ဝိဟာရံ မေ ကရောထာ’’တိ. န စ သမာဒိသတိ – ‘‘ဒေသိတဝတ္ထုကော စ ဟောတု အနာရမ္ဘော စ သပရိက္ကမနော စာ’’တိ. တဿ ဝိဟာရံ ကရောန္တိ ဒေသိတဝတ္ထုကံ သာရမ္ဘံ အပရိက္ကမနံ၊ အာပတ္တိ ဒွိန္နံ ဒုက္ကဋာနံ။ပေ။ သာရမ္ဘံ သပရိက္ကမနံ၊ အာပတ္တိ ဒုက္ကဋဿ။ပေ။ အနာရမ္ဘံ အပရိက္ကမနံ၊ အာပတ္တိ ဒုက္ကဋဿ။ပေ။ အနာရမ္ဘံ သပရိက္ကမနံ၊ အနာပတ္တိ.

၃၇၅. ဘိက္ခု သမာဒိသိတွာ ပက္ကမတိ – ‘‘ဝိဟာရံ မေ ကရောထာ’’တိ. သမာဒိသတိ စ – ‘‘ဒေသိတဝတ္ထုကော စ ဟောတု အနာရမ္ဘော စ သပရိက္ကမနော စာ’’တိ. တဿ ဝိဟာရံ ကရောန္တိ အဒေသိတဝတ္ထုကံ သာရမ္ဘံ အပရိက္ကမနံ. သော သုဏာတိ – ‘‘ဝိဟာရော ကိရ မေ ကယိရတိ အဒေသိတဝတ္ထုကော သာရမ္ဘော အပရိက္ကမနော’’တိ. တေန ဘိက္ခုနာ သာမံ ဝါ ဂန္တဗ္ဗံ ဒူတော ဝါ ပါဟေတဗ္ဗော – ‘‘ဒေသိတဝတ္ထုကော စ ဟောတု အနာရမ္ဘော စ သပရိက္ကမနော စာ’’တိ ။ပေ။ ‘‘ဒေသိတဝတ္ထုကော စ ဟောတု အနာရမ္ဘော စာ’’တိ။ပေ။ ‘‘ဒေသိတဝတ္ထုကော စ ဟောတု သပရိက္ကမနော စာ’’တိ ။ပေ။ ‘‘ဒေသိတဝတ္ထုကော ဟောတူ’’တိ. နော စေ သာမံ ဝါ ဂစ္ဆေယျ ဒူတံ ဝါ ပဟိဏေယျ၊ အာပတ္တိ ဒုက္ကဋဿ.

ဘိက္ခု သမာဒိသိတွာ ပက္ကမတိ – ‘‘ဝိဟာရံ မေ ကရောထာ’’တိ. သမာဒိသတိ စ – ‘‘ဒေသိတဝတ္ထုကော စ ဟောတု အနာရမ္ဘော စ သပရိက္ကမနော စာ’’တိ. တဿ ဝိဟာရံ ကရောန္တိ ဒေသိတဝတ္ထုကံ သာရမ္ဘံ အပရိက္ကမနံ. သော သုဏာတိ – ‘‘ဝိဟာရော ကိရ မေ ကယိရတိ ဒေသိတဝတ္ထုကော သာရမ္ဘော အပရိက္ကမနော’’တိ. တေန ဘိက္ခုနာ သာမံ ဝါ ဂန္တဗ္ဗံ ဒူတော ဝါ ပါဟေတဗ္ဗော – ‘‘အနာရမ္ဘော စ ဟောတု သပရိက္ကမနော စာ’’တိ။ပေ။ ‘‘အနာရမ္ဘော ဟောတူ’’တိ ‘‘သပရိက္ကမနော ဟောတူ’’တိ၊ အနာပတ္တိ.

၃၇၆. ဘိက္ခု သမာဒိသိတွာ ပက္ကမတိ – ‘‘ဝိဟာရံ မေ ကရောထာ’’တိ. သမာဒိသတိ စ – ‘‘ဒေသိတဝတ္ထုကော စ ဟောတု အနာရမ္ဘော စ သပရိက္ကမနော စာ’’တိ. တဿ ဝိဟာရံ ကရောန္တိ အဒေသိတဝတ္ထုကံ သာရမ္ဘံ အပရိက္ကမနံ၊ အာပတ္တိ ကာရုကာနံ တိဏ္ဏံ ဒုက္ကဋာနံ။ပေ။ သာရမ္ဘံ သပရိက္ကမနံ၊ အာပတ္တိ ကာရုကာနံ ဒွိန္နံ ဒုက္ကဋာနံ။ပေ။ အနာရမ္ဘံ အပရိက္ကမနံ၊ အာပတ္တိ ကာရုကာနံ ဒွိန္နံ ဒုက္ကဋာနံ။ပေ။ အနာရမ္ဘံ သပရိက္ကမနံ၊ အာပတ္တိ ကာရုကာနံ ဒုက္ကဋဿ.

ဘိက္ခု သမာဒိသိတွာ ပက္ကမတိ – ‘‘ဝိဟာရံ မေ ကရောထာ’’တိ. သမာဒိသတိ စ – ‘‘ဒေသိတဝတ္ထုကော စ ဟောတု အနာရမ္ဘော စ သပရိက္ကမနော စာ’’တိ. တဿ ဝိဟာရံ ကရောန္တိ ဒေသိတဝတ္ထုကံ သာရမ္ဘံ အပရိက္ကမနံ၊ အာပတ္တိ ကာရုကာနံ ဒွိန္နံ ဒုက္ကဋာနံ။ပေ။ သာရမ္ဘံ သပရိက္ကမနံ၊ အာပတ္တိ ကာရုကာနံ ဒုက္ကဋဿ။ပေ။ အနာရမ္ဘံ အပရိက္ကမနံ၊ အာပတ္တိ ကာရုကာနံ ဒုက္ကဋဿ။ပေ။ အနာရမ္ဘံ သပရိက္ကမနံ၊ အနာပတ္တိ.

၃၇၇. ဘိက္ခု သမာဒိသိတွာ ပက္ကမတိ – ‘‘ဝိဟာရံ မေ ကရောထာ’’တိ. တဿ ဝိဟာရံ ကရောန္တိ အဒေသိတဝတ္ထုကံ သာရမ္ဘံ အပရိက္ကမနံ. သော စေ ဝိပ္ပကတေ အာဂစ္ဆတိ၊ တေန ဘိက္ခုနာ သော ဝိဟာရော အညဿ ဝါ ဒါတဗ္ဗော ဘိန္ဒိတွာ ဝါ ပုန ကာတဗ္ဗော. နော စေ အညဿ ဝါ ဒဒေယျ ဘိန္ဒိတွာ ဝါ ပုန ကာရေယျ၊ အာပတ္တိ သံဃာဒိသေသေန ဒွိန္နံ ဒုက္ကဋာနံ။ပေ။ သာရမ္ဘံ သပရိက္ကမနံ၊ အာပတ္တိ သံဃာဒိသေသေန ဒုက္ကဋဿ။ပေ။ အနာရမ္ဘံ အပရိက္ကမနံ၊ အာပတ္တိ သံဃာဒိသေသေန ဒုက္ကဋဿ။ပေ။ အနာရမ္ဘံ သပရိက္ကမနံ၊ အာပတ္တိ သံဃာဒိသေသဿ.

ဘိက္ခု သမာဒိသိတွာ ပက္ကမတိ – ‘‘ဝိဟာရံ မေ ကရောထာ’’တိ. တဿ ဝိဟာရံ ကရောန္တိ ဒေသိတဝတ္ထုကံ သာရမ္ဘံ အပရိက္ကမနံ. သော စေ ဝိပ္ပကတေ အာဂစ္ဆတိ၊ တေန ဘိက္ခုနာ သော ဝိဟာရော အညဿ ဝါ ဒါတဗ္ဗော ဘိန္ဒိတွာ ဝါ ပုန ကာတဗ္ဗော. နော စေ အညဿ ဝါ ဒဒေယျ ဘိန္ဒိတွာ ဝါ ပုန ကာရေယျ၊ အာပတ္တိ ဒွိန္နံ ဒုက္ကဋာနံ။ပေ။ သာရမ္ဘံ သပရိက္ကမနံ၊ အာပတ္တိ ဒုက္ကဋဿ။ပေ။ အနာရမ္ဘံ အပရိက္ကမနံ၊ အာပတ္တိ ဒုက္ကဋဿ။ပေ။ အနာရမ္ဘံ သပရိက္ကမနံ၊ အနာပတ္တိ.

၃၇၈. အတ္တနာ ဝိပ္ပကတံ အတ္တနာ ပရိယောသာပေတိ၊ အာပတ္တိ သံဃာဒိသေသဿ.

အတ္တနာ ဝိပ္ပကတံ ပရေဟိ ပရိယောသာပေတိ၊ အာပတ္တိ သံဃာဒိသေသဿ.

ပရေဟိ ဝိပ္ပကတံ အတ္တနာ ပရိယောသာပေတိ၊ အာပတ္တိ သံဃာဒိသေသဿ.

ပရေဟိ ဝိပ္ပကတံ ပရေဟိ ပရိယောသာပေတိ၊ အာပတ္တိ သံဃာဒိသေသဿ.

၃၇၉. အနာပတ္တိ လေဏေ ဂုဟာယ တိဏကုဋိကာယ အညဿတ္ထာယ ဝါသာဂါရံ ဌပေတွာ သဗ္ဗတ္ထ. အနာပတ္တိ ဥမ္မတ္တကဿ၊ အာဒိကမ္မိကဿာတိ.

ဝိဟာရကာရသိက္ခာပဒံ နိဋ္ဌိတံ သတ္တမံ.