၁၃. ကုလဒူသကသိက္ခာပဒံ

၄၃၁. [ဣဒံ ဝတ္ထု စူဠဝ. ၂၁] တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ. တေန ခေါ ပန သမယေန အဿဇိပုနဗ္ဗသုကာ နာမ [နာမ ဘိက္ခူ (က.)] ကီဋာဂိရိသ္မိံ အာဝါသိကာ ဟောန္တိ အလဇ္ဇိနော ပါပဘိက္ခူ. တေ [စူဠဝ. ၂၉၃] ဧဝရူပံ အနာစာရံ အာစရန္တိ – မာလာဝစ္ဆံ ရောပေန္တိပိ ရောပါပေန္တိပိ၊ သိဉ္စန္တိပိ သိဉ္စာပေန္တိပိ၊ ဩစိနန္တိပိ ဩစိနာပေန္တိပိ၊ ဂန္ထေန္တိပိ ဂန္ထာပေန္တိပိ၊ ဧကတောဝဏ္ဋိကမာလံ ကရောန္တိပိ ကာရာပေန္တိပိ၊ ဥဘတောဝဏ္ဋိကမာလံ ကရောန္တိပိ ကာရာပေန္တိပိ၊ မဉ္ဇရိကံ ကရောန္တိပိ ကာရာပေန္တိပိ၊ ဝိဓူတိကံ ကရောန္တိပိ ကာရာပေန္တိပိ၊ ဝဋံသကံ ကရောန္တိပိ ကာရာပေန္တိပိ၊ အာဝေဠံ ကရောန္တိပိ ကာရာပေန္တိပိ၊ ဥရစ္ဆဒံ ကရောန္တိပိ ကာရာပေန္တိပိ. တေ ကုလိတ္ထီနံ ကုလဓီတာနံ ကုလကုမာရီနံ ကုလသုဏှာနံ ကုလဒါသီနံ ဧကတောဝဏ္ဋိကမာလံ ဟရန္တိပိ ဟရာပေန္တိပိ၊ ဥဘတောဝဏ္ဋိကမာလံ ဟရန္တိပိ ဟရာပေန္တိပိ၊ မဉ္ဇရိကံ ဟရန္တိပိ ဟရာပေန္တိပိ၊ ဝိဓူတိကံ ဟရန္တိပိ ဟရာပေန္တိပိ၊ ဝဋံသကံ ဟရန္တိပိ ဟရာပေန္တိပိ၊ အာဝေဠံ ဟရန္တိပိ ဟရာပေန္တိပိ၊ ဥရစ္ဆဒံ ဟရန္တိပိ ဟရာပေန္တိပိ. တေ ကုလိတ္ထီဟိ ကုလဓီတာဟိ ကုလကုမာရီဟိ ကုလသုဏှာဟိ ကုလဒါသီဟိ သဒ္ဓိံ ဧကဘာဇနေပိ ဘုဉ္ဇန္တိ၊ ဧကထာလကေပိ ပိဝန္တိ၊ ဧကာသနေပိ နိသီဒန္တိ၊ ဧကမဉ္စေပိ တုဝဋ္ဋေန္တိ၊ ဧကတ္ထရဏာပိ တုဝဋ္ဋေန္တိ၊ ဧကပါဝုရဏာပိ တုဝဋ္ဋေန္တိ၊ ဧကတ္ထရဏပါဝုရဏာပိ တုဝဋ္ဋေန္တိ၊ ဝိကာလေပိ ဘုဉ္ဇန္တိ၊ မဇ္ဇမ္ပိ ပိဝန္တိ၊ မာလာဂန္ဓဝိလေပနမ္ပိ ဓာရေန္တိ၊ နစ္စန္တိပိ ဂါယန္တိပိ ဝါဒေန္တိပိ လာသေန္တိပိ၊ နစ္စန္တိယာပိ နစ္စန္တိ၊ နစ္စန္တိယာပိ ဂါယန္တိ၊ နစ္စန္တိယာပိ ဝါဒေန္တိ၊ နစ္စန္တိယာပိ လာသေန္တိ၊ ဂါယန္တိယာပိ နစ္စန္တိ၊ ဂါယန္တိယာပိ ဂါယန္တိ၊ ဂါယန္တိယာပိ ဝါဒေန္တိ၊ ဂါယန္တိယာပိ လာသေန္တိ၊ ဝါဒေန္တိယာပိ နစ္စန္တိ၊ ဝါဒေန္တိယာပိ ဂါယန္တိ၊ ဝါဒေန္တိယာပိ ဝါဒေန္တိ၊ ဝါဒေန္တိယာပိ လာသေန္တိ၊ လာသေန္တိယာပိ နစ္စန္တိ၊ လာသေန္တိယာပိ ဂါယန္တိ၊ လာသေန္တိယာပိ ဝါဒေန္တိ၊ လာသေန္တိယာပိ လာသေန္တိ. အဋ္ဌပဒေပိ ကီဠန္တိ၊ ဒသပဒေပိ ကီဠန္တိ၊ အာကာသေပိ ကီဠန္တိ၊ ပရိဟာရပထေပိ ကီဠန္တိ၊ သန္တိကာယပိ ကီဠန္တိ၊ ခလိကာယပိ ကီဠန္တိ၊ ဃဋိကာယပိ ကီဠန္တိ၊ သလာကဟတ္ထေနပိ ကီဠန္တိ၊ အက္ခေနပိ ကီဠန္တိ၊ ပင်္ဂစီရေနပိ ကီဠန္တိ၊ ဝင်္ကကေနပိ ကီဠန္တိ၊ မောက္ခစိကာယပိ ကီဠန္တိ၊ စိင်္ဂုလကေနပိ ကီဠန္တိ၊ ပတ္တာဠှကေနပိ ကီဠန္တိ၊ ရထကေနပိ ကီဠန္တိ၊ ဓနုကေနပိ ကီဠန္တိ၊ အက္ခရိကာယပိ ကီဠန္တိ၊ မနေသိကာယပိ ကီဠန္တိ၊ ယထာဝဇ္ဇေနပိ ကီဠန္တိ. ဟတ္ထိသ္မိမ္ပိ သိက္ခန္တိ၊ အဿသ္မိမ္ပိ သိက္ခန္တိ၊ ရထသ္မိမ္ပိ သိက္ခန္တိ၊ ဓနုသ္မိမ္ပိ သိက္ခန္တိ၊ ထရုသ္မိမ္ပိ သိက္ခန္တိ၊ ဟတ္ထိဿပိ ပုရတော ဓာဝန္တိ၊ အဿဿပိ ပုရတော ဓာဝန္တိ၊ ရထဿပိ ပုရတော [ပုရတော ဓာဝန္တိ (သျာ.)] ဓာဝန္တိပိ အာဓာဝန္တိပိ၊ ဥဿေဠေန္တိပိ၊ အပ္ဖေါဋေန္တိပိ၊ နိဗ္ဗုဇ္ဈန္တိပိ၊ မုဋ္ဌီဟိပိ ယုဇ္ဈန္တိ၊ ရင်္ဂမဇ္ဈေပိ သင်္ဃာဋိံ ပတ္ထရိတွာ နစ္စကိံ [နစ္စန္တိံ (သီ. သျာ.)] ဧဝံ ဝဒန္တိ – ဣဓ၊ ဘဂိနိ၊ နစ္စဿူတိ၊ နလာဋိကမ္ပိ ဒေန္တိ၊ ဝိဝိဓမ္ပိ အနာစာရံ အာစရန္တိ.

၄၃၂. တေန ခေါ ပန သမယေန အညတရော ဘိက္ခု ကာသီသု ဝဿံဝုဋ္ဌော သာဝတ္ထိံ ဂစ္ဆန္တော ဘဂဝန္တံ ဒဿနာယ၊ ယေန ကီဋာဂိရိ တဒဝသရိ. အထ ခေါ သော ဘိက္ခု ပုဗ္ဗဏှသမယံ နိဝါသေတွာ ပတ္တစီဝရမာဒါယ ကီဋာဂိရိံ ပိဏ္ဍာယ ပါဝိသိ ပါသာဒိကေန အဘိက္ကန္တေန ပဋိက္ကန္တေန အာလောကိတေန ဝိလောကိတေန သမိဉ္ဇိတေန ပသာရိတေန ဩက္ခိတ္တစက္ခု ဣရိယာပထသမ္ပန္နော. မနုဿာ တံ ဘိက္ခုံ ပဿိတွာ ဧဝမာဟံသု – ‘‘ကွာယံ အဗလဗလော ဝိယ မန္ဒမန္ဒော ဝိယ ဘာကုဋိကဘာကုဋိကော ဝိယ? ကော ဣမဿ ဥပဂတဿ ပိဏ္ဍကံ ဒဿတိ? အမှာကံ ပန အယျာ အဿဇိပုနဗ္ဗသုကာ သဏှာ သခိလာ သုခသမ္ဘာသာ မိဟိတပုဗ္ဗင်္ဂမာ ဧဟိသွာဂတဝါဒိနော အဗ္ဘာကုဋိကာ ဥတ္တာနမုခါ ပုဗ္ဗဘာသိနော. တေသံ ခေါ နာမ ပိဏ္ဍော ဒါတဗ္ဗော’’တိ.

အဒ္ဒသာ ခေါ အညတရော ဥပါသကော တံ ဘိက္ခုံ ကီဋာဂိရိသ္မိံ ပိဏ္ဍာယ စရန္တံ. ဒိသွာန ယေန သော ဘိက္ခု တေနုပသင်္ကမိ၊ ဥပသင်္ကမိတွာ တံ ဘိက္ခုံ အဘိဝါဒေတွာ ဧတဒဝေါစ – ‘‘အပိ၊ ဘန္တေ၊ ပိဏ္ဍော လဗ္ဘတီ’’တိ? ‘‘န ခေါ၊ အာဝုသော၊ ပိဏ္ဍော လဗ္ဘတီ’’တိ. ‘‘ဧဟိ၊ ဘန္တေ၊ ဃရံ ဂမိဿာမာ’’တိ. အထ ခေါ သော ဥပါသကော တံ ဘိက္ခုံ ဃရံ နေတွာ ဘောဇေတွာ ဧတဒဝေါစ – ‘‘ကဟံ၊ ဘန္တေ၊ အယျော ဂမိဿတီ’’တိ? ‘‘သာဝတ္ထိံ ခေါ အဟံ၊ အာဝုသော၊ ဂမိဿာမိ ဘဂဝန္တံ ဒဿနာယာ’’တိ. ‘‘တေန ဟိ၊ ဘန္တေ၊ မမ ဝစနေန ဘဂဝတော ပါဒေ သိရသာ ဝန္ဒ၊ ဧဝဉ္စ ဝဒေဟိ – ‘ဒုဋ္ဌော၊ ဘန္တေ၊ ကီဋာဂိရိသ္မိံ အာဝါသော. အဿဇိပုနဗ္ဗသုကာ နာမ ကီဋာဂိရိသ္မိံ အာဝါသိကာ အလဇ္ဇိနော ပါပဘိက္ခူ. တေ ဧဝရူပံ အနာစာရံ အာစရန္တိ – မာလာဝစ္ဆံ ရောပေန္တိပိ ရောပါပေန္တိပိ၊ သိဉ္စန္တိပိ သိဉ္စာပေန္တိပိ။ပေ။ ဝိဝိဓမ္ပိ အနာစာရံ အာစရန္တိ. ယေပိ တေ၊ ဘန္တေ၊ မနုဿာ ပုဗ္ဗေ သဒ္ဓါ အဟေသုံ ပသန္နာ တေပိ ဧတရဟိ အဿဒ္ဓါ အပ္ပသန္နာ. ယာနိပိ တာနိ သံဃဿ ပုဗ္ဗေ ဒါနပထာနိ တာနိပိ ဧတရဟိ ဥပစ္ဆိန္နာနိ. ရိဉ္စန္တိ ပေသလာ ဘိက္ခူ၊ နိဝသန္တိ ပါပဘိက္ခူ. သာဓု၊ ဘန္တေ၊ ဘဂဝါ ကီဋာဂိရိံ ဘိက္ခူ ပဟိဏေယျ ယထာယံ ကီဋာဂိရိသ္မိံ အာဝါသော သဏ္ဌဟေယျာ’’’တိ.

ဧဝမာဝုသောတိ ခေါ သော ဘိက္ခု တဿ ဥပါသကဿ ပဋိဿုတွာ ယေန သာဝတ္ထိ တေန ပက္ကာမိ. အနုပုဗ္ဗေန ယေန သာဝတ္ထိ ဇေတဝနံ အနာထပိဏ္ဍိကဿ အာရာမော ယေန ဘဂဝါ တေနုပသင်္ကမိ၊ ဥပသင်္ကမိတွာ ဘဂဝန္တံ အဘိဝါဒေတွာ ဧကမန္တံ နိသီဒိ. အာစိဏ္ဏံ ခေါ ပနေတံ ဗုဒ္ဓါနံ ဘဂဝန္တာနံ အာဂန္တုကေဟိ ဘိက္ခူဟိ သဒ္ဓိံ ပဋိသမ္မောဒိတုံ. အထ ခေါ ဘဂဝါ တံ ဘိက္ခုံ ဧတဒဝေါစ – ‘‘ကစ္စိ၊ ဘိက္ခု၊ ခမနီယံ ကစ္စိ ယာပနီယံ၊ ကစ္စိသိ အပ္ပကိလမထေန အဒ္ဓါနံ အာဂတော၊ ကုတော စ တွံ ဘိက္ခု အာဂစ္ဆသီ’’တိ? ‘‘ခမနီယံ၊ ဘဂဝါ၊ ယာပနီယံ၊ ဘဂဝါ. အပ္ပကိလမထေန စာဟံ၊ ဘန္တေ၊ အဒ္ဓါနံ အာဂတော. ဣဓာဟံ၊ ဘန္တေ၊ ကာသီသု ဝဿံဝုဋ္ဌော သာဝတ္ထိံ အာဂစ္ဆန္တော ဘဂဝန္တံ ဒဿနာယ ယေန ကီဋာဂိရိ တဒဝသရိံ. အထ ခွာဟံ၊ ဘန္တေ၊ ပုဗ္ဗဏှသမယံ နိဝါသေတွာ ပတ္တစီဝရမာဒါယ ကီဋာဂိရိံ ပိဏ္ဍာယ ပါဝိသိံ. အဒ္ဒသာ ခေါ မံ၊ ဘန္တေ၊ အညတရော ဥပါသကော ကီဋာဂိရိသ္မိံ ပိဏ္ဍာယ စရန္တံ. ဒိသွာန ယေနာဟံ တေနုပသင်္ကမိ၊ ဥပသင်္ကမိတွာ မံ အဘိဝါဒေတွာ ဧတဒဝေါစ – ‘အပိ၊ ဘန္တေ၊ ပိဏ္ဍော လဗ္ဘတီ’တိ? ‘န ခေါ၊ အာဝုသော၊ ပိဏ္ဍော လဗ္ဘတီ’တိ. ‘ဧဟိ၊ ဘန္တေ၊ ဃရံ ဂမိဿာမာ’တိ. အထ ခေါ၊ ဘန္တေ၊ သော ဥပါသကော မံ ဃရံ နေတွာ ဘောဇေတွာ ဧတဒဝေါစ – ‘ကဟံ၊ ဘန္တေ၊ အယျော ဂမိဿသီ’တိ? ‘သာဝတ္ထိံ ခေါ အဟံ၊ အာဝုသော၊ ဂမိဿာမိ ဘဂဝန္တံ ဒဿနာယာ’တိ. တေန ဟိ၊ ဘန္တေ၊ မမ ဝစနေန ဘဂဝတော ပါဒေ သိရသာ ဝန္ဒ၊ ဧဝဉ္စ ဝဒေဟိ – ‘ဒုဋ္ဌော၊ ဘန္တေ၊ ကီဋာဂိရိသ္မိံ အာဝါသော၊ အဿဇိပုနဗ္ဗသုကာ နာမ ကီဋာဂိရိသ္မိံ အာဝါသိကာ အလဇ္ဇိနော ပါပဘိက္ခူ. တေ ဧဝရူပံ အနာစာရံ အာစရန္တိ – မာလာဝစ္ဆံ ရောပေန္တိပိ ရောပါပေန္တိပိ၊ သိဉ္စန္တိပိ သိဉ္စာပေန္တိပိ။ပေ။ ဝိဝိဓမ္ပိ အနာစာရံ အာစရန္တိ. ယေပိ တေ၊ ဘန္တေ၊ မနုဿာ ပုဗ္ဗေ သဒ္ဓါ အဟေသုံ ပသန္နာ တေပိ ဧတရဟိ အဿဒ္ဓါ အပ္ပသန္နာ၊ ယာနိပိ တာနိ သံဃဿ ပုဗ္ဗေ ဒါနပထာနိ တာနိပိ ဧတရဟိ ဥပစ္ဆိန္နာနိ၊ ရိဉ္စန္တိ ပေသလာ ဘိက္ခူ နိဝသန္တိ ပါပဘိက္ခူ. သာဓု၊ ဘန္တေ၊ ဘဂဝါ ကီဋာဂိရိံ ဘိက္ခူ ပဟိဏေယျ ယထာယံ ကီဋာဂိရိသ္မိံ အာဝါသော သဏ္ဌဟေယျာ’တိ. တတော အဟံ၊ ဘဂဝါ၊ အာဂစ္ဆာမီ’’တိ.

၄၃၃. အထ ခေါ ဘဂဝါ ဧတသ္မိံ နိဒါနေ ဧတသ္မိံ ပကရဏေ ဘိက္ခုသံဃံ သန္နိပါတာပေတွာ ဘိက္ခူ ပဋိပုစ္ဆိ – ‘‘သစ္စံ ကိရ၊ ဘိက္ခဝေ၊ အဿဇိပုနဗ္ဗသုကာ နာမ ကီဋာဂိရိသ္မိံ အာဝါသိကာ အလဇ္ဇိနော ပါပဘိက္ခူ တေ ဧဝရူပံ အနာစာရံ အာစရန္တိ – မာလာဝစ္ဆံ ရောပေန္တိပိ ရောပါပေန္တိပိ၊ သိဉ္စန္တိပိ သိဉ္စာပေန္တိပိ ။ပေ။ ဝိဝိဓမ္ပိ အနာစာရံ အာစရန္တိ၊ ယေပိ တေ၊ ဘိက္ခဝေ၊ မနုဿာ ပုဗ္ဗေ သဒ္ဓါ အဟေသုံ ပသန္နာ တေပိ ဧတရဟိ အဿဒ္ဓါ အပ္ပသန္နာ၊ ယာနိပိ တာနိ သံဃဿ ပုဗ္ဗေ ဒါနပထာနိ တာနိပိ ဧတရဟိ ဥပစ္ဆိန္နာနိ၊ ရိဉ္စန္တိ ပေသလာ ဘိက္ခူ နိဝသန္တိ ပါပဘိက္ခူ’’တိ? ‘‘သစ္စံ၊ ဘဂဝါ’’တိ. ဝိဂရဟိ ဗုဒ္ဓေါ ဘဂဝါ။ပေ။ ‘‘ကထဉှိ နာမ တေ၊ ဘိက္ခဝေ၊ မောဃပုရိသာ ဧဝရူပံ အနာစာရံ အာစရိဿန္တိ – မာလာဝစ္ဆံ ရောပေဿန္တိပိ ရောပါပေဿန္တိပိ၊ သဉ္စိဿန္တိပိ သိဉ္စာပေဿန္တိပိ၊ ဩစိနိဿန္တိပိ ဩစိနာပေဿန္တိပိ၊ ဂန္ထိဿန္တိပိ ဂန္ထာပေဿန္တိပိ၊ ဧကတောဝဏ္ဋိကမာလံ ကရိဿန္တိပိ ကာရာပေဿန္တိပိ၊ ဥဘတောဝဏ္ဋိကမာလံ ကရိဿန္တိပိ ကာရာပေဿန္တိပိ၊ မဉ္ဇရိကံ ကရိဿန္တိပိ ကာရာပေဿန္တိပိ၊ ဝိဓူတိကံ ကရိဿန္တိပိ ကာရာပေဿန္တိပိ၊ ဝဋံသကံ ကရိဿန္တိပိ ကာရာပေဿန္တိပိ၊ အာဝေဠံ ကရိဿန္တိပိ ကာရာပေဿန္တိပိ၊ ဥရစ္ဆဒံ ကရိဿန္တိပိ ကာရာပေဿန္တိပိ. တေ ကုလိတ္ထီနံ ကုလဓီတာနံ ကုလကုမာရီနံ ကုလသုဏှာနံ ကုလဒါသီနံ ဧကတောဝဏ္ဋိကမာလံ ဟရိဿန္တိပိ ဟာရာပေဿန္တိပိ၊ ဥဘတောဝဏ္ဋိကမာလံ ဟရိဿန္တိပိ ဟာရာပေဿန္တိပိ၊ မဉ္ဇရိကံ ဟရိဿန္တိပိ ဟာရာပေဿန္တိပိ၊ ဝိဓူတိကံ ဟရိဿန္တိပိ ဟာရာပေဿန္တိပိ၊ ဝဋံသကံ ဟရိဿန္တိပိ ဟာရာပေဿန္တိပိ၊ အာဝေဠံ ဟရိဿန္တိပိ ဟာရာပေဿန္တိပိ၊ ဥရစ္ဆဒံ ဟရိဿန္တိပိ ဟာရာပေဿန္တိပိ. တေ ကုလိတ္ထီဟိ ကုလဓီတာဟိ ကုလကုမာရီဟိ ကုလသုဏှာဟိ ကုလဒါသီဟိ သဒ္ဓိံ ဧကဘာဇနေပိ ဘုဉ္ဇိဿန္တိ၊ ဧကထာလကေပိ ပိဝိဿန္တိ၊ ဧကာသနေပိ နိသီဒိဿန္တိ၊ ဧကမဉ္စေပိ တုဝဋ္ဋိဿန္တိ၊ ဧကတ္ထရဏာပိ တုဝဋ္ဋိဿန္တိ၊ ဧကပါဝုရဏာပိ တုဝဋ္ဋိဿန္တိ၊ ဧကတ္ထရဏပါဝုရဏာပိ တုဝဋ္ဋိဿန္တိ၊ ဝိကာလေပိ ဘုဉ္ဇိဿန္တိ၊ မဇ္ဇမ္ပိ ပိဝိဿန္တိ၊ မာလာဂန္ဓဝိလေပနမ္ပိ ဓာရိဿန္တိ၊ နစ္စိဿန္တိပိ ဂါယိဿန္တိပိ ဝါဒေဿန္တိပိ လာသေဿန္တိပိ၊ နစ္စန္တိယာပိ နစ္စိဿန္တိ နစ္စန္တိယာပိ ဂါယိဿန္တိ နစ္စန္တိယာပိ ဝါဒေဿန္တိ နစ္စန္တိယာပိ လာသေဿန္တိ၊ ဂါယန္တိယာပိ နစ္စိဿန္တိ ဂါယန္တိယာပိ ဂါယိဿန္တိ ဂါယန္တိယာပိ ဝါဒေဿန္တိ ဂါယန္တိယာပိ လာသေဿန္တိ၊ ဝါဒေန္တိယာပိ နစ္စိဿန္တိ ဝါဒေန္တိယာပိ ဂါယိဿန္တိ ဝါဒေန္တိယာပိ ဝါဒေဿန္တိ ဝါဒေန္တိယာပိ လာသေဿန္တိ၊ လာသေန္တိယာပိ နစ္စိဿန္တိ လာသေန္တိယာပိ ဂါယိဿန္တိ လာသေန္တိယာပိ ဝါဒေဿန္တိ လာသေန္တိယာပိ လာသေဿန္တိ၊ အဋ္ဌပဒေပိ ကီဠိဿန္တိ ဒသပဒေပိ ကီဠိဿန္တိ၊ အကာသေပိ ကီဠိဿန္တိ၊ ပရိဟာရပထေပိ ကီဠိဿန္တိ၊ သန္တိကာယပိ ကီဠိဿန္တိ၊ ခလိကာယပိ ကီဠိဿန္တိ၊ ဃဋိကာယပိ ကီဠိဿန္တိ၊ သလာကဟတ္ထေနပိ ကီဠိဿန္တိ၊ အက္ခေနပိ ကီဠိဿန္တိ၊ ပင်္ဂစီရေနပိ ကီဠိဿန္တိ၊ ဝင်္ကကေနပိ ကီဠိဿန္တိ၊ မောက္ခစိကာယပိ ကီဠိဿန္တိ၊ စိင်္ဂုလကေနပိ ကီဠိဿန္တိ၊ ပတ္တာဠှကေနပိ ကီဠိဿန္တိ၊ ရထကေနပိ ကီဠိဿန္တိ၊ ဓနုကေနပိ ကီဠိဿန္တိ၊ အက္ခရိကာယပိ ကီဠိဿန္တိ၊ မနေသိကာယပိ ကီဠိဿန္တိ၊ ယထာဝဇ္ဇေနပိ ကီဠိဿန္တိ၊ ဟတ္ထိသ္မိမ္ပိ သိက္ခိဿန္တိ၊ အဿသ္မိမ္ပိ သိက္ခိဿန္တိ၊ ရထသ္မိမ္ပိ သိက္ခိဿန္တိ၊ ဓနုသ္မိမ္ပိ သိက္ခိဿန္တိ၊ ထရုသ္မိမ္ပိ သိက္ခိဿန္တိ၊ ဟတ္ထိဿပိ ပုရတော ဓာဝိဿန္တိ၊ အဿဿပိ ပုရတော ဓာဝိဿန္တိ၊ ရထဿပိ ပုရတော [ပုရတော ဓာဝိဿန္တိ (သျာ.)] ဓာဝိဿန္တိပိ အာဓာဝိဿန္တိပိ၊ ဥဿေဠေဿန္တိပိ၊ အပ္ဖေါဋေဿန္တိပိ၊ နိဗ္ဗုဇ္ဈိဿန္တိပိ၊ မုဋ္ဌီဟိပိ ယုဇ္ဈိဿန္တိ၊ ရင်္ဂမဇ္ဈေပိ သင်္ဃာဋိံ ပတ္ထရိတွာ နစ္စကိံ ဧဝံ ဝက္ခန္တိ ‘‘ဣဓ ဘဂိနိ နစ္စဿူ’’တိ နလာဋိကမ္ပိ ဒဿန္တိ၊ ဝိဝိဓမ္ပိ အနာစာရံ အာစရိဿန္တိ! နေတံ၊ ဘိက္ခဝေ၊ အပ္ပသန္နာနံ ဝါ ပသာဒါယ။ပေ။ ဝိဂရဟိတွာ ဓမ္မိံ ကထံ ကတွာ သာရိပုတ္တမောဂ္ဂလ္လာနေ အာမန္တေသိ – ‘‘ဂစ္ဆထ တုမှေ၊ သာရိပုတ္တာ၊ ကီဋာဂိရိံ ဂန္တွာ အဿဇိပုနဗ္ဗသုကာနံ ဘိက္ခူနံ ကီဋာဂိရိသ္မာ ပဗ္ဗာဇနီယကမ္မံ ကရောထ. တုမှာကံ ဧတေ သဒ္ဓိဝိဟာရိကာ’’တိ.

‘‘ကထံ မယံ၊ ဘန္တေ၊ အဿဇိပုနဗ္ဗသုကာနံ ဘိက္ခူနံ ကီဋာဂိရိသ္မာ ပဗ္ဗာဇနီယကမ္မံ ကရောမ? စဏ္ဍာ တေ ဘိက္ခူ ဖရုသာ’’တိ. ‘‘တေန ဟိ တုမှေ၊ သာရိပုတ္တာ၊ ဗဟုကေဟိ ဘိက္ခူဟိ သဒ္ဓိံ ဂစ္ဆထာ’’တိ. ‘‘ဧဝံ၊ ဘန္တေ’’တိ ခေါ သာရိပုတ္တမောဂ္ဂလ္လာနာ ဘဂဝတော ပစ္စဿောသုံ. ‘‘ဧဝဉ္စ ပန၊ ဘိက္ခဝေ၊ ကာတဗ္ဗံ. ပဌမံ အဿဇိပုနဗ္ဗသုကာ ဘိက္ခူ စောဒေတဗ္ဗာ. စောဒေတွာ သာရေတဗ္ဗာ. သာရေတွာ အာပတ္တိံ ရောပေတဗ္ဗာ. အာပတ္တိံ ရောပေတွာ ဗျတ္တေန ဘိက္ခုနာ ပဋိဗလေန သံဃော ဉာပေတဗ္ဗော –

၄၃၄. ‘‘သုဏာတု မေ၊ ဘန္တေ၊ သံဃော. ဣမေ အဿဇိပုနဗ္ဗသုကာ ဘိက္ခူ ကုလဒူသကာ ပါပသမာစာရာ. ဣမေသံ ပါပကာ သမာစာရာ ဒိဿန္တိ စေဝ သုယျန္တိ စ. ကုလာနိ စ ဣမေဟိ ဒုဋ္ဌာနိ ဒိဿန္တိ စေဝ သုယျန္တိ စ. ယဒိ သံဃဿ ပတ္တကလ္လံ၊ သံဃော အဿဇိပုနဗ္ဗသုကာနံ ဘိက္ခူနံ ကီဋာဂိရိသ္မာ ပဗ္ဗာဇနီယကမ္မံ ကရေယျ – ‘န အဿဇိပုနဗ္ဗသုကေဟိ ဘိက္ခူဟိ ကီဋာဂိရိသ္မိံ ဝတ္ထဗ္ဗ’န္တိ. ဧသာ ဉတ္တိ.

‘‘သုဏာတု မေ၊ ဘန္တေ၊ သံဃော. ဣမေ အဿဇိပုနဗ္ဗသုကာ ဘိက္ခူ ကုလဒူသကာ ပါပသမာစာရာ. ဣမေသံ ပါပကာ သမာစာရာ ဒိဿန္တိ စေဝ သုယျန္တိ စ. ကုလာနိ စ ဣမေဟိ ဒုဋ္ဌာနိ ဒိဿန္တိ စေဝ သုယျန္တိ စ. သံဃော အဿဇိပုနဗ္ဗသုကာနံ ဘိက္ခူနံ ကီဋာဂိရိသ္မာ ပဗ္ဗာဇနီယကမ္မံ ကရောတိ – ‘န အဿဇိပုနဗ္ဗသုကေဟိ ဘိက္ခူဟိ ကီဋာဂိရိသ္မိံ ဝတ္ထဗ္ဗ’န္တိ. ယဿာယသ္မတော ခမတိ အဿဇိပုနဗ္ဗသုကာနံ ဘိက္ခူနံ ကီဋာဂိရိသ္မာ ပဗ္ဗာဇနီယကမ္မဿ ကရဏံ – ‘န အဿဇိပုနဗ္ဗသုကေဟိ ဘိက္ခူဟိ ကီဋာဂိရိသ္မိံ ဝတ္ထဗ္ဗ’န္တိ၊ သော တုဏှဿ၊ ယဿ နက္ခမတိ၊ သော ဘာသေယျ.

‘‘ဒုတိယမ္ပိ ဧတမတ္ထံ ဝဒါမိ။ပေ။ တတိယမ္ပိ ဧတမတ္ထံ ဝဒါမိ – သုဏာတု မေ၊ ဘန္တေ၊ သံဃော။ပေ။ သော ဘာသေယျ.

‘‘ကတံ သံဃေန အဿဇိပုနဗ္ဗသုကာနံ ဘိက္ခူနံ ကီဋာဂိရိသ္မာ ပဗ္ဗာဇနီယကမ္မံ – ‘န အဿဇိပုနဗ္ဗသုကေဟိ ဘိက္ခူဟိ ကီဋာဂိရိသ္မိံ ဝတ္ထဗ္ဗ’န္တိ. ခမတိ သံဃဿ၊ တသ္မာ တုဏှီ၊ ဧဝမေတံ ဓာရယာမီ’’တိ.

၄၃၅. အထ ခေါ သာရိပုတ္တမောဂ္ဂလ္လာနပ္ပမုခေါ ဘိက္ခုသံဃော ကီဋာဂိရိံ ဂန္တွာ အဿဇိပုနဗ္ဗသုကာနံ ဘိက္ခူနံ ကီဋာဂိရိသ္မာ ပဗ္ဗာဇနီယကမ္မံ အကာသိ – ‘န အဿဇိပုနဗ္ဗသုကေဟိ ဘိက္ခူဟိ ကီဋာဂိရိသ္မိံ ဝတ္ထဗ္ဗ’န္တိ. တေ သံဃေန ပဗ္ဗာဇနီယကမ္မကတာ န သမ္မာ ဝတ္တန္တိ၊ န လောမံ ပါတေန္တိ၊ န နေတ္ထာရံ ဝတ္တန္တိ၊ န ဘိက္ခူ ခမာပေန္တိ၊ အက္ကောသန္တိ ပရိဘာသန္တိ ဆန္ဒဂါမိတာ ဒေါသဂါမိတာ မောဟဂါမိတာ ဘယဂါမိတာ ပါပေန္တိ၊ ပက္ကမန္တိပိ၊ ဝိဗ္ဘမန္တိပိ. ယေ တေ ဘိက္ခူ အပ္ပိစ္ဆာ။ပေ။ တေ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ အဿဇိပုနဗ္ဗသုကာ ဘိက္ခူ သံဃေန ပဗ္ဗာဇနီယကမ္မကတာ န သမ္မာ ဝတ္တိဿန္တိ၊ န လောမံ ပါတေဿန္တိ၊ န နေတ္ထာရံ ဝတ္တိဿန္တိ၊ န ဘိက္ခူ ခမာပေဿန္တိ၊ အက္ကောသိဿန္တိ ပရိဘာသိဿန္တိ၊ ဆန္ဒဂါမိတာ ဒေါသဂါမိတာ မောဟဂါမိတာ ဘယဂါမိတာ ပါပေဿန္တိ ပက္ကမိဿန္တိပိ ဝိဗ္ဘမိဿန္တိပီ’’တိ! အထ ခေါ တေ ဘိက္ခူ အဿဇိပုနဗ္ဗသုကေ ဘိက္ခူ အနေကပရိယာယေန ဝိဂရဟိတွာ ဘဂဝတော ဧတမတ္ထံ အာရောစေသုံ။ပေ။ ‘‘သစ္စံ ကိရ၊ ဘိက္ခဝေ၊ အဿဇိပုနဗ္ဗသုကာ ဘိက္ခူ သံဃေန ပဗ္ဗာဇနီယကမ္မကတာ န သမ္မာ ဝတ္တန္တိ။ပေ။ ဝိဗ္ဘမန္တိပီ’’တိ? ‘‘သစ္စံ၊ ဘဂဝါ’’တိ. ဝိဂရဟိ ဗုဒ္ဓေါ ဘဂဝါ။ပေ။ ဧဝဉ္စ ပန၊ ဘိက္ခဝေ၊ ဣမံ သိက္ခာပဒံ ဥဒ္ဒိသေယျာထ –

၄၃၆. ‘‘ဘိက္ခု ပနေဝ အညတရံ ဂါမံ ဝါ နိဂမံ ဝါ ဥပနိဿာယ ဝိဟရတိ ကုလဒူသကော ပါပသမာစာရော. တဿ ခေါ ပါပကာ သမာစာရာ ဒိဿန္တိ စေဝ သုယျန္တိ စ၊ ကုလာနိ စ တေန ဒုဋ္ဌာနိ ဒိဿန္တိ စေဝ သုယျန္တိ စ. သော ဘိက္ခု ဘိက္ခူဟိ ဧဝမဿ ဝစနီယော – ‘အာယသ္မာ ခေါ ကုလဒူသကော ပါပသမာစာရော၊ အာယသ္မတော ခေါ ပါပကာ သမာစာရာ ဒိဿန္တိ စေဝ သုယျန္တိ စ၊ ကုလာနိ စာယသ္မတာ ဒုဋ္ဌာနိ ဒိဿန္တိ စေဝ သုယျန္တိ စ. ပက္ကမတာယသ္မာ ဣမမှာ အာဝါသာ. အလံ တေ ဣဓ ဝါသေနာ’တိ. ဧဝဉ္စ သော ဘိက္ခု ဘိက္ခူဟိ ဝုစ္စမာနော တေ ဘိက္ခူ ဧဝံ ဝဒေယျ – ‘ဆန္ဒဂါမိနော စ ဘိက္ခူ ဒေါသဂါမိနော စ ဘိက္ခူ မောဟဂါမိနော စ ဘိက္ခူ ဘယဂါမိနော စ ဘိက္ခူ တာဒိသိကာယ အာပတ္တိယာ ဧကစ္စံ ပဗ္ဗာဇေန္တိ ဧကစ္စံ န ပဗ္ဗာဇေန္တီ’တိ၊ သော ဘိက္ခု ဘိက္ခူဟိ ဧဝမဿ ဝစနီယော – ‘မာယသ္မာ ဧဝံ အဝစ. န စ ဘိက္ခူ ဆန္ဒဂါမိနော. န စ ဘိက္ခူ ဒေါသဂါမိနော. န စ ဘိက္ခူ မောဟဂါမိနော. န စ ဘိက္ခူ ဘယဂါမိနော. အာယသ္မာ ခေါ ကုလဒူသကော ပါပသမာစာရော. အာယသ္မတော ခေါ ပါပကာ သမာစာရာ ဒိဿန္တိ စေဝ သုယျန္တိ စ. ကုလာနိ စာယသ္မတာ ဒုဋ္ဌာနိ ဒိဿန္တိ စေဝ သုယျန္တိ စ. ပက္ကမတာယသ္မာ ဣမမှာ အာဝါသာ. အလံ တေ ဣဓ ဝါသေနာ’တိ. ဧဝဉ္စ သော ဘိက္ခု ဘိက္ခူဟိ ဝုစ္စမာနော တထေဝ ပဂ္ဂဏှေယျ၊ သော ဘိက္ခု ဘိက္ခူဟိ ယာဝတတိယံ သမနုဘာသိတဗ္ဗော တဿ ပဋိနိဿဂ္ဂါယ. ယာဝတတိယဉ္စေ သမနုဘာသီယမာနော တံ ပဋိနိဿဇ္ဇေယျ၊ ဣစ္စေတံ ကုသလံ၊ နော စေ ပဋိနိဿဇ္ဇေယျ၊ သံဃာဒိသေသော’’တိ.

၄၃၇. ဘိက္ခု ပနေဝ အညတရံ ဂါမံ ဝါ နိဂမံ ဝါတိ ဂါမောပိ နိဂမောပိ နဂရမ္ပိ ဂါမော စေဝ နိဂမော စ.

ဥပနိဿာယ ဝိဟရတီတိ တတ္ထ ပဋိဗဒ္ဓါ ဟောန္တိ စီဝရပိဏ္ဍပါတသေနာသနဂိလာနပ္ပစ္စယဘေသဇ္ဇပရိက္ခာရာ.

ကုလံ နာမ စတ္တာရိ ကုလာနိ – ခတ္တိယကုလံ၊ ဗြာဟ္မဏကုလံ၊ ဝေဿကုလံ၊ သုဒ္ဒကုလံ.

ကုလဒူသကောတိ ကုလာနိ ဒူသေတိ ပုပ္ဖေန ဝါ ဖလေန ဝါ စုဏ္ဏေန ဝါ မတ္တိကာယ ဝါ ဒန္တကဋ္ဌေန ဝါ ဝေဠုယာ ဝါ [ဝေဠုနာ ဝါ (သျာ.)] ဝေဇ္ဇိကာယ ဝါ ဇင်္ဃပေသနိကေန ဝါ.

ပါပသမာစာရောတိ မာလာဝစ္ဆံ ရောပေတိပိ ရောပါပေတိပိ၊ သိဉ္စတိပိ သိဉ္စာပေတိပိ၊ ဩစိနာတိပိ ဩစိနာပေတိပိ၊ ဂန္ထေတိပိ ဂန္ထာပေတိပိ.

ဒိဿန္တိ စေဝ သုယျန္တိ စာတိ ယေ သံမုခါ တေ ပဿန္တိ၊ ယေ တိရောက္ခာ တေ သုဏန္တိ.

ကုလာနိ စ တေန ဒုဋ္ဌာနီတိ ပုဗ္ဗေ သဒ္ဓါ ဟုတွာ တံ အာဂမ္မ အဿဒ္ဓါ ဟောန္တိ၊ ပသန္နာ ဟုတွာ အပ္ပသန္နာ ဟောန္တိ.

ဒိဿန္တိ စေဝ သုယျန္တိ စာတိ ယေ သံမုခါ တေ ပဿန္တိ၊ ယေ တိရောက္ခာ တေ သုဏန္တိ.

သော ဘိက္ခူတိ ယော သော ကုလဒူသကော ဘိက္ခု.

ဘိက္ခူဟီတိ အညေဟိ ဘိက္ခူဟိ. ယေ ပဿန္တိ ယေ သုဏန္တိ. တေဟိ ဝတ္တဗ္ဗော – ‘‘အာယသ္မာ ခေါ ကုလဒူသကော ပါပသမာစာရော. အာယသ္မတော ခေါ ပါပကာ သမာစာရာ ဒိဿန္တိ စေဝ သုယျန္တိ စ. ကုလာနိ စာယသ္မတာ ဒုဋ္ဌာနိ ဒိဿန္တိ စေဝ သုယျန္တိ စ. ပက္ကမတာယသ္မာ ဣမမှာ အာဝါသာ. အလံ တေ ဣဓ ဝါသေနာ’’တိ.

ဧဝဉ္စ သော ဘိက္ခု ဘိက္ခူဟိ ဝုစ္စမာနော တေ ဘိက္ခူ ဧဝံ ဝဒေယျ – ‘‘ဆန္ဒဂါမိနော စ ဘိက္ခူ၊ ဒေါသဂါမိနော စ ဘိက္ခူ၊ မောဟဂါမိနော စ ဘိက္ခူ၊ ဘယဂါမိနော စ ဘိက္ခူ. တာဒိသိကာယ အာပတ္တိယာ ဧကစ္စံ ပဗ္ဗာဇေန္တိ ဧကစ္စံ န ပဗ္ဗာဇေန္တီ’’တိ.

သော ဘိက္ခူတိ ယော သော ကမ္မကတော ဘိက္ခု.

ဘိက္ခူဟီတိ အညေဟိ ဘိက္ခူဟိ. ယေ ပဿန္တိ ယေ သုဏန္တိ တေဟိ ဝတ္တဗ္ဗော – ‘‘မာယသ္မာ ဧဝံ အဝစ. န စ ဘိက္ခူ ဆန္ဒဂါမိနော၊ န စ ဘိက္ခူ ဒေါသဂါမိနော၊ န စ ဘိက္ခူ မောဟဂါမိနော၊ န စ ဘိက္ခူ ဘယဂါမိနော. အာယသ္မာ ခေါ ကုလဒူသကော ပါပသမာစာရော. အာယသ္မတော ခေါ ပါပကာ သမာစာရာ ဒိဿန္တိ စေဝ သုယျန္တိ စ. ကုလာနိ စာယသ္မတာ ဒုဋ္ဌာနိ ဒိဿန္တိ စေဝ သုယျန္တိ စ. ပက္ကမတာယသ္မာ ဣမမှာ အာဝါသာ. အလံ တေ ဣဓ ဝါသေနာ’’တိ. ဒုတိယမ္ပိ ဝတ္တဗ္ဗော. တတိယမ္ပိ ဝတ္တဗ္ဗော.

သစေ ပဋိနိဿဇ္ဇတိ၊ ဣစ္စေတံ ကုသလံ. နော စေ ပဋိနိဿဇ္ဇတိ၊ အာပတ္တိ ဒုက္ကဋဿ. သုတွာ န ဝဒန္တိ၊ အာပတ္တိ ဒုက္ကဋဿ. သော ဘိက္ခု သံဃမဇ္ဈမ္ပိ အာကဍ္ဎိတွာ ဝတ္တဗ္ဗော – ‘‘မာယသ္မာ ဧဝံ အဝစ. န စ ဘိက္ခူ ဆန္ဒဂါမိနော၊ န စ ဘိက္ခူ ဒေါသဂါမိနော၊ န စ ဘိက္ခူ မောဟဂါမိနော၊ န စ ဘိက္ခူ ဘယဂါမိနော. အာယသ္မာ ခေါ ကုလဒူသကော ပါပသမာစာရော. အာယသ္မတော ခေါ ပါပကာ သမာစာရာ ဒိဿန္တိ စေဝ သုယျန္တိ စ. ကုလာနိ စာယသ္မတာ ဒုဋ္ဌာနိ ဒိဿန္တိ စေဝ သုယျန္တိ စ. ပက္ကမတာယသ္မာ ဣမမှာ အာဝါသာ. အလံ တေ ဣဓ ဝါသေနာ’’တိ. ဒုတိယမ္ပိ ဝတ္တဗ္ဗော. တတိယမ္ပိ ဝတ္တဗ္ဗော. သစေ ပဋိနိဿဇ္ဇတိ၊ ဣစ္စေတံ ကုသလံ. နော စေ ပဋိနိဿဇ္ဇတိ၊ အာပတ္တိ ဒုက္ကဋဿ. သော ဘိက္ခု သမနုဘာသိတဗ္ဗော. ဧဝဉ္စ ပန၊ ဘိက္ခဝေ၊ သမနုဘာသိတဗ္ဗော. ဗျတ္တေန ဘိက္ခုနာ ပဋိဗလေန သံဃော ဉာပေတဗ္ဗော –

၄၃၈. ‘‘သုဏာတု မေ၊ ဘန္တေ၊ သံဃော. အယံ ဣတ္ထန္နာမော ဘိက္ခု သံဃေန ပဗ္ဗာဇနီယကမ္မကတော ဘိက္ခူ ဆန္ဒဂါမိတာ ဒေါသဂါမိတာ မောဟဂါမိတာ ဘယဂါမိတာ ပါပေတိ. သော တံ ဝတ္ထုံ န ပဋိနိဿဇ္ဇတိ. ယဒိ သံဃဿ ပတ္တကလ္လံ၊ သံဃော ဣတ္ထန္နာမံ ဘိက္ခုံ သမနုဘာသေယျ တဿ ဝတ္ထုဿ ပဋိနိဿဂ္ဂါယ. ဧသာ ဉတ္တိ.

‘‘သုဏာတု မေ၊ ဘန္တေ၊ သံဃော. အယံ ဣတ္ထန္နာမော ဘိက္ခု သံဃေန ပဗ္ဗာဇနီယကမ္မကတော ဘိက္ခူ ဆန္ဒဂါမိတာ ဒေါသဂါမိတာ မောဟဂါမိတာ ဘယဂါမိတာ ပါပေတိ. သော တံ ဝတ္ထုံ န ပဋိနိဿဇ္ဇတိ. သံဃော ဣတ္ထန္နာမံ ဘိက္ခုံ သမနုဘာသတိ တဿ ဝတ္ထုဿ ပဋိနိဿဂ္ဂါယ. ယဿာယသ္မတော ခမတိ ဣတ္ထန္နာမဿ ဘိက္ခုနော သမနုဘာသနာ တဿ ဝတ္ထုဿ ပဋိနိဿဂ္ဂါယ၊ သော တုဏှဿ၊ ယဿ နက္ခမတိ၊ သော ဘာသေယျ.

‘‘ဒုတိယမ္ပိ ဧတမတ္ထံ ဝဒါမိ။ပေ။ တတိယမ္ပိ ဧတမတ္ထံ ဝဒါမိ။ပေ။.

‘‘သမနုဘဋ္ဌော သံဃေန ဣတ္ထန္နာမော ဘိက္ခု တဿ ဝတ္ထုဿ ပဋိနိဿဂ္ဂါယ. ခမတိ သံဃဿ၊ တသ္မာ တုဏှီ၊ ဧဝမေတံ ဓာရယာမီ’’တိ.

၄၃၉. ဉတ္တိယာ ဒုက္ကဋံ၊ ဒွီဟိ ကမ္မဝါစာဟိ ထုလ္လစ္စယာ၊ ကမ္မဝါစာပရိယောသာနေ အာပတ္တိ သံဃာဒိသေသဿ. သံဃာဒိသေသံ အဇ္ဈာပဇ္ဇန္တဿ ဉတ္တိယာ ဒုက္ကဋံ၊ ဒွီဟိ ကမ္မဝါစာဟိ ထုလ္လစ္စယာ ပဋိပ္ပဿမ္ဘန္တိ.

သံဃာဒိသေသောတိ သံဃောဝ တဿာ အာပတ္တိယာ ပရိဝါသံ ဒေတိ၊ မူလာယ ပဋိကဿတိ၊ မာနတ္တံ ဒေတိ၊ အဗ္ဘေတိ၊ န သမ္ဗဟုလာ၊ န ဧကပုဂ္ဂလော. တေန ဝုစ္စတိ – ‘သံဃာဒိသေသော’တိ၊ တဿေဝ အာပတ္တိနိကာယဿ နာမကမ္မံ အဓိဝစနံ. တေနပိ ဝုစ္စတိ သံဃာဒိသေသောတိ.

၄၄၀. ဓမ္မကမ္မေ ဓမ္မကမ္မသညီ န ပဋိနိဿဇ္ဇတိ၊ အာပတ္တိ သံဃာဒိသေသဿ.

ဓမ္မကမ္မေ ဝေမတိကော န ပဋိနိဿဇ္ဇတိ၊ အာပတ္တိ သံဃာဒိသေသဿ.

ဓမ္မကမ္မေ အဓမ္မကမ္မသညီ န ပဋိနိဿဇ္ဇတိ၊ အာပတ္တိ သံဃာဒိသေသဿ.

အဓမ္မကမ္မေ ဓမ္မကမ္မသညီ၊ အာပတ္တိ ဒုက္ကဋဿ.

အဓမ္မကမ္မေ ဝေမတိကော၊ အာပတ္တိ ဒုက္ကဋဿ.

အဓမ္မကမ္မေ အဓမ္မကမ္မသညီ၊ အာပတ္တိ ဒုက္ကဋဿ.

၄၄၁. အနာပတ္တိ အသမနုဘာသန္တဿ၊ ပဋိနိဿဇ္ဇန္တဿ၊ ဥမ္မတ္တကဿ၊ အာဒိကမ္မိကဿာတိ.

ကုလဒူသကသိက္ခာပဒံ နိဋ္ဌိတံ တေရသမံ.

၄၄၂. ဥဒ္ဒိဋ္ဌာ ခေါ၊ အာယသ္မန္တော၊ တေရသ သံဃာဒိသေသာ ဓမ္မာ၊ နဝ ပဌမာပတ္တိကာ၊ စတ္တာရော ယာဝတတိယကာ. ယေသံ ဘိက္ခု အညတရံ ဝါ အညတရံ ဝါ အာပဇ္ဇိတွာ ယာဝတီဟံ ဇာနံ ပဋိစ္ဆာဒေတိ တာဝတီဟံ တေန ဘိက္ခုနာ အကာမာ ပရိဝတ္ထဗ္ဗံ. ပရိဝုတ္ထပရိဝါသေန ဘိက္ခုနာ ဥတ္တရိ ဆာရတ္တံ ဘိက္ခုမာနတ္တာယ ပဋိပဇ္ဇိတဗ္ဗံ. စိဏ္ဏမာနတ္တော ဘိက္ခု ယတ္ထ သိယာ ဝီသတိဂဏော ဘိက္ခုသံဃော တတ္ထ သော ဘိက္ခု အဗ္ဘေတဗ္ဗော. ဧကေနပိ စေ ဦနော ဝီသတိဂဏော ဘိက္ခုသံဃော တံ ဘိက္ခုံ အဗ္ဘေယျ၊ သော စ ဘိက္ခု အနဗ္ဘိတော၊ တေ စ ဘိက္ခူ ဂါရယှာ၊ အယံ တတ္ထ သာမီစိ. တတ္ထာယသ္မန္တေ ပုစ္ဆာမိ – ‘ကစ္စိတ္ထ ပရိသုဒ္ဓါ’? ဒုတိယမ္ပိ ပုစ္ဆာမိ – ‘ကစ္စိတ္ထ ပရိသုဒ္ဓါ’? တတိယမ္ပိ ပုစ္ဆာမိ – ‘ကစ္စိတ္ထ ပရိသုဒ္ဓါ’? ပရိသုဒ္ဓေတ္ထာယသ္မန္တော. တသ္မာ တုဏှီ၊ ဧဝမေတံ ဓာရယာမီတိ.

တေရသကံ နိဋ္ဌိတံ.

တဿုဒ္ဒါနံ –

ဝိဿဋ္ဌိ ကာယသံသဂ္ဂံ၊ ဒုဋ္ဌုလ္လံ အတ္တကာမဉ္စ၊

သဉ္စရိတ္တံ ကုဋီ စေဝ၊ ဝိဟာရော စ အမူလကံ.

ကိဉ္စိလေသဉ္စ ဘေဒေါ စ၊ တဿေဝ အနုဝတ္တကာ၊

ဒုဗ္ဗစံ ကုလဒူသဉ္စ၊ သံဃာဒိသေသာ တေရသာတိ.

သံဃာဒိသေသကဏ္ဍံ နိဋ္ဌိတံ.