၁၁. ဘေဒါနုဝတ္တကသိက္ခာပဒံ

၄၁၇. တေန သမယေန ဗုဒ္ဓေါ ဘဂဝါ ရာဇဂဟေ ဝိဟရတိ ဝေဠုဝနေ ကလန္ဒကနိဝါပေ. တေန ခေါ ပန သမယေန ဒေဝဒတ္တော သံဃဘေဒါယ ပရက္ကမတိ စက္ကဘေဒါယ. ဘိက္ခူ ဧဝမာဟံသု – ‘‘အဓမ္မဝါဒီ ဒေဝဒတ္တော၊ အဝိနယဝါဒီ ဒေဝဒတ္တော. ကထဉှိ နာမ ဒေဝဒတ္တော သံဃဘေဒါယ ပရက္ကမိဿတိ စက္ကဘေဒါယာ’’တိ! ဧဝံ ဝုတ္တေ ကောကာလိကော ကဋမောဒကတိဿကော ခဏ္ဍဒေဝိယာ ပုတ္တော သမုဒ္ဒဒတ္တော တေ ဘိက္ခူ ဧတဒဝေါစုံ – ‘‘မာယသ္မန္တော ဧဝံ အဝစုတ္ထ. ဓမ္မဝါဒီ ဒေဝဒတ္တော၊ ဝိနယဝါဒီ ဒေဝဒတ္တော. အမှာကဉ္စ ဒေဝဒတ္တော ဆန္ဒဉ္စ ရုစိဉ္စ အာဒါယ ဝေါဟရတိ ဇာနာတိ နော ဘာသတိ အမှာကံပေတံ ခမတီ’’တိ. ယေ တေ ဘိက္ခူ အပ္ပိစ္ဆာ။ပေ။ တေ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခူ ဒေဝဒတ္တဿ သံဃဘေဒါယ ပရက္ကမန္တဿ အနုဝတ္တကာ ဘဝိဿန္တိ ဝဂ္ဂဝါဒကာ’’တိ! အထ ခေါ တေ ဘိက္ခူ တေ အနုဝတ္တကေ ဘိက္ခူ အနေကပရိယာယေန ဝိဂရဟိတွာ ဘဂဝတော ဧတမတ္ထံ အာရောစေသုံ။ပေ။ ‘‘သစ္စံ ကိရ၊ ဘိက္ခဝေ၊ ဘိက္ခူ ဒေဝဒတ္တဿ သံဃဘေဒါယ ပရက္ကမန္တဿ အနုဝတ္တကာ ဟောန္တိ ဝဂ္ဂဝါဒကာ’’တိ? ‘‘သစ္စံ၊ ဘဂဝါ’’တိ. ဝိဂရဟိ ဗုဒ္ဓေါ ဘဂဝါ။ပေ။ ‘‘ကထဉှိ နာမ တေ၊ ဘိက္ခဝေ၊ မောဃပုရိသာ ဒေဝဒတ္တဿ သံဃဘေဒါယ ပရက္ကမန္တဿ အနုဝတ္တကာ ဘဝိဿန္တိ ဝဂ္ဂဝါဒကာ! နေတံ၊ ဘိက္ခဝေ၊ အပ္ပသန္နာနံ ဝါ ပသာဒါယ။ပေ။ ဧဝဉ္စ ပန၊ ဘိက္ခဝေ၊ ဣမံ သိက္ခာပဒံ ဥဒ္ဒိသေယျာထ –

၄၁၈. ‘‘တဿေဝ ခေါ ပန ဘိက္ခုဿ ဘိက္ခူ ဟောန္တိ အနုဝတ္တကာ ဝဂ္ဂဝါဒကာ ဧကော ဝါ ဒွေ ဝါ တယော ဝါ. တေ ဧဝံ ဝဒေယျုံ – ‘မာယသ္မန္တော ဧတံ ဘိက္ခုံ ကိဉ္စိ အဝစုတ္ထ. ဓမ္မဝါဒီ စေသော ဘိက္ခု၊ ဝိနယဝါဒီ စေသော ဘိက္ခု. အမှာကဉ္စေသော ဘိက္ခု ဆန္ဒဉ္စ ရုစိဉ္စ အာဒါယ ဝေါဟရတိ ဇာနာတိ နော ဘာသတိ အမှာကမ္ပေတံ ခမတီ’တိ၊ တေ ဘိက္ခူ ဘိက္ခူဟိ ဧဝမဿု ဝစနီယာ – ‘မာယသ္မန္တော ဧဝံ အဝစုတ္ထ၊ န စေသော ဘိက္ခု ဓမ္မဝါဒီ၊ န စေသော ဘိက္ခု ဝိနယဝါဒီ၊ မာယသ္မန္တာနမ္ပိ သံဃဘေဒေါ ရုစ္စိတ္ထ၊ သမေတာယသ္မန္တာနံ သံဃေန၊ သမဂ္ဂေါ ဟိ သံဃော သမ္မောဒမာနော အဝိဝဒမာနော ဧကုဒ္ဒေသော ဖာသု ဝိဟရတီ’တိ. ဧဝဉ္စ တေ ဘိက္ခူ ဘိက္ခူဟိ ဝုစ္စမာနာ တထေဝ ပဂ္ဂဏှေယျုံ၊ တေ ဘိက္ခူ ဘိက္ခူဟိ ယာဝတတိယံ သမနုဘာသိတဗ္ဗာ တဿ ပဋိနိဿဂ္ဂါယ. ယာဝတတိယဉ္စေ သမနုဘာသိယမာနာ တံ ပဋိနိဿဇ္ဇေယျုံ၊ ဣစ္စေတံ ကုသလံ၊ နော စေ ပဋိနိဿဇ္ဇေယျုံ၊ သံဃာဒိသေသော’’တိ.

၄၁၉. တဿေဝ ခေါ ပနာတိ တဿ သံဃဘေဒကဿ ဘိက္ခုနော.

ဘိက္ခူ ဟောန္တီတိ အညေ ဘိက္ခူ ဟောန္တိ.

အနုဝတ္တကာတိ ယံဒိဋ္ဌိကော သော ဟောတိ ယံခန္တိကော ယံရုစိကော တေပိ တံဒိဋ္ဌိကာ ဟောန္တိ တံခန္တိကာ တံရုစိကာ.

ဝဂ္ဂဝါဒကာတိ တဿ ဝဏ္ဏာယ ပက္ခာယ ဌိတာ ဟောန္တိ.

ဧကော ဝါ ဒွေ ဝါ တယော ဝါတိ ဧကော ဝါ ဟောတိ ဒွေ ဝါ တယော ဝါ. တေ ဧဝံ ဝဒေယျုံ – ‘‘မာယသ္မန္တော ဧတံ ဘိက္ခုံ ကိဉ္စိ အဝစုတ္ထ၊ ဓမ္မဝါဒီ စေသော ဘိက္ခု၊ ဝိနယဝါဒီ စေသော ဘိက္ခု၊ အမှာကဉ္စေသော ဘိက္ခု ဆန္ဒဉ္စ ရုစိဉ္စ အာဒါယ ဝေါဟရတိ ဇာနာတိ နော ဘာသတိ အမှာကံပေတံ ခမတီ’တိ.

တေ ဘိက္ခူတိ ယေ တေ အနုဝတ္တကာ ဘိက္ခူ.

ဘိက္ခူဟီတိ အညေဟိ ဘိက္ခူဟိ.

ယေ ပဿန္တိ ယေ သုဏန္တိ တေဟိ ဝတ္တဗ္ဗာ – ‘‘မာယသ္မန္တော ဧဝံ အဝစုတ္ထ. န စေသော ဘိက္ခု ဓမ္မဝါဒီ၊ န စေသော ဘိက္ခု ဝိနယဝါဒီ. မာယသ္မန္တာနမ္ပိ သံဃဘေဒေါ ရုစ္စိတ္ထ. သမေတာယသ္မန္တာနံ သံဃေန. သမဂ္ဂေါ ဟိ သံဃော သမ္မောဒမာနော အဝိဝဒမာနော ဧကုဒ္ဒေသော ဖာသု ဝိဟရတီ’’တိ. ဒုတိယမ္ပိ ဝတ္တဗ္ဗာ. တတိယမ္ပိ ဝတ္တဗ္ဗာ. သစေ ပဋိနိဿဇ္ဇန္တိ၊ ဣစ္စေတံ ကုသလံ၊ နော စေ ပဋိနိဿဇ္ဇန္တိ၊ အာပတ္တိ ဒုက္ကဋဿ. သုတွာ န ဝဒန္တိ၊ အာပတ္တိ ဒုက္ကဋဿ. တေ ဘိက္ခူ သံဃမဇ္ဈမ္ပိ အာကဍ္ဎိတွာ ဝတ္တဗ္ဗာ – ‘‘မာယသ္မန္တော ဧဝံ အဝစုတ္ထ. န စေသော ဘိက္ခု ဓမ္မဝါဒီ၊ န စေသော ဘိက္ခု ဝိနယဝါဒီ. မာယသ္မန္တာနမ္ပိ သံဃဘေဒေါ ရုစ္စိတ္ထ. သမေတာယသ္မန္တာနံ သံဃေန. သမဂ္ဂေါ ဟိ သံဃော သမ္မောဒမာနော အဝိဝဒမာနော ဧကုဒ္ဒေသော ဖာသု ဝိဟရတီ’’တိ. ဒုတိယမ္ပိ ဝတ္တဗ္ဗာ. တတိယမ္ပိ ဝတ္တဗ္ဗာ. သစေ ပဋိနိဿဇ္ဇန္တိ၊ ဣစ္စေတံ ကုသလံ၊ နော စေ ပဋိနိဿဇ္ဇန္တိ၊ အာပတ္တိ ဒုက္ကဋဿ. တေ ဘိက္ခူ သမနုဘာသိတဗ္ဗာ. ဧဝဉ္စ ပန၊ ဘိက္ခဝေ၊ သမနုဘာသိတဗ္ဗာ. ဗျတ္တေန ဘိက္ခုနာ ပဋိဗလေန သံဃော ဉာပေတဗ္ဗော –

၄၂၀. ‘‘သုဏာတု မေ၊ ဘန္တေ၊ သံဃော. ဣတ္ထန္နာမော စ ဣတ္ထနာမော စ ဘိက္ခူ ဣတ္ထန္နာမဿ ဘိက္ခုနော သံဃဘေဒါယ ပရက္ကမန္တဿ အနုဝတ္တကာ ဝဂ္ဂဝါဒကာ. တေ တံ ဝတ္ထုံ န ပဋိနိဿဇ္ဇန္တိ. ယဒိ သံဃဿ ပတ္တကလ္လံ၊ သံဃော ဣတ္ထန္နာမဉ္စ ဣတ္ထန္နာမဉ္စ ဘိက္ခူ သမနုဘာသေယျ တဿ ဝတ္ထုဿ ပဋိနိဿဂ္ဂါယ. ဧသာ ဉတ္တိ.

‘‘သုဏာတု မေ၊ ဘန္တေ၊ သံဃော. ဣတ္ထန္နာမော စ ဣတ္ထန္နာမော စ ဘိက္ခူ ဣတ္ထန္နာမဿ ဘိက္ခုနော သံဃဘေဒါယ ပရက္ကမန္တဿ အနုဝတ္တကာ ဝဂ္ဂဝါဒကာ. တေ တံ ဝတ္ထုံ န ပဋိနိဿဇ္ဇန္တိ. သံဃော ဣတ္ထန္နာမဉ္စ ဣတ္ထန္နာမဉ္စ ဘိက္ခူ သမနုဘာသတိ တဿ ဝတ္ထုဿ ပဋိနိဿဂ္ဂါယ. ယဿာယသ္မတော ခမတိ ဣတ္ထန္နာမဿ စ ဣတ္ထန္နာမဿ စ ဘိက္ခူနံ သမနုဘာသနာ တဿ ဝတ္ထုဿ ပဋိနိဿဂ္ဂါယ၊ သော တုဏှဿ၊ ယဿ နက္ခမတိ၊ သော ဘာသေယျ.

‘‘ဒုတိယမ္ပိ ဧတမတ္ထံ ဝဒါမိ။ပေ။ တတိယမ္ပိ ဧတမတ္ထံ ဝဒါမိ – သုဏာတု မေ၊ ဘန္တေ၊ သံဃော. ဣတ္ထန္နာမော စ ဣတ္ထန္နာမော စ ဘိက္ခူ ဣတ္ထန္နာမဿ ဘိက္ခုနော သံဃဘေဒါယ ပရက္ကမန္တဿ အနုဝတ္တကာ ဝဂ္ဂဝါဒကာ. တေ တံ ဝတ္ထုံ န ပဋိနိဿဇ္ဇန္တိ. သံဃော ဣတ္ထန္နာမဉ္စ ဣတ္ထန္နာမဉ္စ ဘိက္ခူ သမနုဘာသတိ တဿ ဝတ္ထုဿ ပဋိနိဿဂ္ဂါယ. ယဿာယသ္မတော ခမတိ ဣတ္ထန္နာမဿ စ ဣတ္ထန္နာမဿ စ ဘိက္ခူနံ သမနုဘာသနာ တဿ ဝတ္ထုဿ ပဋိနိဿဂ္ဂါယ၊ သော တုဏှဿ၊ ယဿ နက္ခမတိ၊ သော ဘာသေယျ.

‘‘သမနုဘဋ္ဌာ သံဃေန ဣတ္ထန္နာမော စ ဣတ္ထန္နာမော စ ဘိက္ခူ တဿ ဝတ္ထုဿ ပဋိနိဿဂ္ဂါယ. ခမတိ သံဃဿ၊ တသ္မာ တုဏှီ၊ ဧဝမေတံ ဓာရယာမီ’’တိ.

၄၂၁. ဉတ္တိယာ ဒုက္ကဋံ၊ ဒွီဟိ ကမ္မဝါစာဟိ ထုလ္လစ္စယာ၊ ကမ္မဝါစာပရိယောသာနေ အာပတ္တိ သံဃာဒိသေသဿ. သံဃာဒိသေသံ အဇ္ဈာပဇ္ဇန္တာနံ ဉတ္တိယာ ဒုက္ကဋံ၊ ဒွီဟိ ကမ္မဝါစာဟိ ထုလ္လစ္စယာ ပဋိပ္ပဿမ္ဘန္တိ. ဒွေ တယော ဧကတော သမနုဘာသိတဗ္ဗာ၊ တဒုတ္တရိ န သမနုဘာသိတဗ္ဗာ.

သံဃာဒိသေသောတိ။ပေ။ တေနပိ ဝုစ္စတိ ‘‘သံဃာဒိသေသော’’တိ.

၄၂၂. ဓမ္မကမ္မေ ဓမ္မကမ္မသညီ န ပဋိနိဿဇ္ဇန္တိ၊ အာပတ္တိ သံဃာဒိသေသဿ.

ဓမ္မကမ္မေ ဝေမတိကာ န ပဋိနိဿဇ္ဇန္တိ၊ အာပတ္တိ သံဃာဒိသေသဿ.

ဓမ္မကမ္မေ အဓမ္မကမ္မသညီ န ပဋိနိဿဇ္ဇန္တိ၊ အာပတ္တိ သံဃာဒိသေသဿ.

အဓမ္မကမ္မေ ဓမ္မကမ္မသညီ၊ အာပတ္တိ ဒုက္ကဋဿ.

အဓမ္မကမ္မေ ဝေမတိကာ၊ အာပတ္တိ ဒုက္ကဋဿ.

အဓမ္မကမ္မေ အဓမ္မကမ္မသညီ၊ အာပတ္တိ ဒုက္ကဋဿ.

၄၂၃. အနာပတ္တိ အသမနုဘာသန္တာနံ၊ ပဋိနိဿဇ္ဇန္တာနံ၊ ဥမ္မတ္တကာနံ၊ ခိတ္တစိတ္တာနံ၊ ဝေဒနာဋ္ဋာနံ၊ အာဒိကမ္မိကာနန္တိ.

ဘေဒါနုဝတ္တကသိက္ခာပဒံ နိဋ္ဌိတံ ဧကာဒသမံ.