ဝိနီတဝတ္ထု

၂၂၃. တေန ခေါ ပန သမယေန အညတရော ဘိက္ခု အဓိမာနေန အညံ ဗျာကာသိ. တဿ ကုက္ကုစ္စံ အဟောသိ – ‘‘ဘဂဝတာ သိက္ခာပဒံ ပညတ္တံ. ကစ္စိ နု ခေါ အဟံ ပါရာဇိကံ အာပတ္တိံ အာပန္နော’’တိ? ဘဂဝတော ဧတမတ္ထံ အာရောစေသိ. ‘‘အနာပတ္တိ၊ ဘိက္ခု၊ အဓိမာနေနာ’’တိ.

တေန ခေါ ပန သမယေန အညတရော ဘိက္ခု ပဏိဓာယ အရညေ ဝိဟရတိ – ‘‘ဧဝံ မံ ဇနော သမ္ဘာဝေဿတီ’’တိ. တံ ဇနော သမ္ဘာဝေသိ. တဿ ကုက္ကုစ္စံ အဟောသိ။ပေ။ ‘‘အနာပတ္တိ၊ ဘိက္ခု၊ ပါရာဇိကဿ. န စ၊ ဘိက္ခဝေ၊ ပဏိဓာယ အရညေ ဝတ္ထဗ္ဗံ. ယော ဝသေယျ၊ အာပတ္တိ ဒုက္ကဋဿာ’’တိ.

တေန ခေါ ပန သမယေန အညတရော ဘိက္ခု ပဏိဓာယ ပိဏ္ဍာယ စရတိ – ‘‘ဧဝံ မံ ဇနော သမ္ဘာဝေဿတီ’’တိ. တံ ဇနော သမ္ဘာဝေသိ. တဿ ကုက္ကုစ္စံ အဟောသိ။ပေ။ ‘‘အနာပတ္တိ၊ ဘိက္ခု၊ ပါရာဇိကဿ. န စ၊ ဘိက္ခဝေ၊ ပဏိဓာယ ပိဏ္ဍာယ စရိတဗ္ဗံ. ယော စရေယျ၊ အာပတ္တိ ဒုက္ကဋဿာ’’တိ.

တေန ခေါ ပန သမယေန အညတရော ဘိက္ခု အညတရံ ဘိက္ခုံ ဧတဒဝေါစ – ‘‘ယေ၊ အာဝုသော၊ အမှာကံ ဥပဇ္ဈာယဿ သဒ္ဓိဝိဟာရိကာ သဗ္ဗေဝ အရဟန္တော’’တိ. တဿ ကုက္ကုစ္စံ အဟောသိ။ပေ။ ‘‘ကိံစိတ္တော တွံ၊ ဘိက္ခူ’’တိ? ‘‘ဥလ္လပနာဓိပ္ပါယော အဟံ၊ ဘဂဝါ’’တိ. ‘‘အနာပတ္တိ၊ ဘိက္ခု၊ ပါရာဇိကဿ၊ အာပတ္တိ ထုလ္လစ္စယဿာ’’တိ.

တေန ခေါ ပန သမယေန အညတရော ဘိက္ခု အညတရံ ဘိက္ခုံ ဧတဒဝေါစ – ‘‘ယေ၊ အာဝုသော၊ အမှာကံ ဥပဇ္ဈာယဿ အန္တေဝါသိကာ သဗ္ဗေဝ မဟိဒ္ဓိကာ မဟာနုဘာဝါ’’တိ. တဿ ကုက္ကုစ္စံ အဟောသိ။ပေ။ ‘‘ကိံစိတ္တော တွံ၊ ဘိက္ခူ’’တိ? ‘‘ဥလ္လပနာဓိပ္ပါယော အဟံ၊ ဘဂဝါ’’တိ. ‘‘အနာပတ္တိ၊ ဘိက္ခု၊ ပါရာဇိကဿ၊ အာပတ္တိ ထုလ္လစ္စယဿာ’’တိ.

တေန ခေါ ပန သမယေန အညတရော ဘိက္ခု ပဏိဓာယ စင်္ကမတိ။ ပဏိဓာယ တိဋ္ဌတိ။ ပဏိဓာယ နိသီဒတိ။ ပဏိဓာယ သေယျံ ကပ္ပေတိ – ‘‘ဧဝံ မံ ဇနော သမ္ဘာဝေဿတီ’’တိ. တံ ဇနော သမ္ဘာဝေသိ. တဿ ကုက္ကုစ္စံ အဟောသိ။ပေ။ ‘‘အနာပတ္တိ၊ ဘိက္ခု၊ ပါရာဇိကဿ. န စ၊ ဘိက္ခဝေ၊ ပဏိဓာယ သေယျာ ကပ္ပေတဗ္ဗာ. ယော ကပ္ပေယျ၊ အာပတ္တိ ဒုက္ကဋဿာ’’တိ.

တေန ခေါ ပန သမယေန အညတရော ဘိက္ခု အညတရဿ ဘိက္ခုနော ဥတ္တရိမနုဿဓမ္မံ ဥလ္လပတိ. သောပိ ဧဝမာဟ – ‘‘မယှမ္ပိ၊ အာဝုသော၊ သံယောဇနာ ပဟီနာ’’တိ. တဿ ကုက္ကုစ္စံ အဟောသိ။ပေ။ ‘‘အာပတ္တိံ တွံ၊ ဘိက္ခု၊ အာပန္နော ပါရာဇိက’’န္တိ.

၂၂၄. တေန ခေါ ပန သမယေန အညတရော ဘိက္ခု ရဟောဂတော ဥတ္တရိမနုဿဓမ္မံ ဥလ္လပတိ. ပရစိတ္တဝိဒူ ဘိက္ခု တံ ဘိက္ခုံ အပသာဒေသိ – ‘‘မာ၊ အာဝုသော၊ ဧဝရူပံ အဘဏိ. နတ္ထေသော တုယှ’’န္တိ. တဿ ကုက္ကုစ္စံ အဟောသိ။ပေ။ ‘‘အနာပတ္တိ၊ ဘိက္ခု၊ ပါရာဇိကဿ၊ အာပတ္တိ ဒုက္ကဋဿာ’’တိ.

တေန ခေါ ပန သမယေန အညတရော ဘိက္ခု ရဟောဂတော ဥတ္တရိမနုဿဓမ္မံ ဥလ္လပတိ. ဒေဝတာ တံ ဘိက္ခုံ အပသာဒေသိ – ‘‘မာ၊ ဘန္တေ၊ ဧဝရူပံ အဘဏိ. နတ္ထေသော တုယှ’’န္တိ. တဿ ကုက္ကုစ္စံ အဟောသိ။ပေ။ ‘‘အနာပတ္တိ၊ ဘိက္ခု၊ ပါရာဇိကဿ၊ အာပတ္တိ ဒုက္ကဋဿာ’’တိ.

တေန ခေါ ပန သမယေန အညတရော ဘိက္ခု အညတရံ ဥပါသကံ ဧတဒဝေါစ – ‘‘ယော၊ အာဝုသော၊ တုယှံ ဝိဟာရေ ဝသတိ သော ဘိက္ခု အရဟာ’’တိ. သော စ တဿ ဝိဟာရေ ဝသတိ. တဿ ကုက္ကုစ္စံ အဟောသိ။ပေ။ ‘‘ကိံစိတ္တော တွံ၊ ဘိက္ခူ’’တိ? ‘‘ဥလ္လပနာဓိပ္ပါယော အဟံ၊ ဘဂဝါ’’တိ. ‘‘အနာပတ္တိ၊ ဘိက္ခု၊ ပါရာဇိကဿ၊ အာပတ္တိ ထုလ္လစ္စယဿာ’’တိ.

တေန ခေါ ပန သမယေန အညတရော ဘိက္ခု အညတရံ ဥပါသကံ ဧတဒဝေါစ – ‘‘ယံ တွံ၊ အာဝုသော၊ ဥပဋ္ဌေသိ စီဝရပိဏ္ဍပါတသေနာသနဂိလာနပ္ပစ္စယဘေသဇ္ဇပရိက္ခာရေန သော ဘိက္ခု အရဟာ’’တိ. သော စ တံ ဥပဋ္ဌေတိ စီဝရပိဏ္ဍပါတသေနာသနဂိလာနပ္ပစ္စယဘေသဇ္ဇပရိက္ခာရေန. တဿ ကုက္ကုစ္စံ အဟောသိ။ပေ။ ‘‘ကိံစိတ္တော တွံ၊ ဘိက္ခူ’’တိ? ‘‘ဥလ္လပနာဓိပ္ပါယော အဟံ၊ ဘဂဝါ’’တိ. ‘‘အနာပတ္တိ၊ ဘိက္ခု၊ ပါရာဇိကဿ၊ အာပတ္တိ ထုလ္လစ္စယဿာ’’တိ.

၂၂၅. တေန ခေါ ပန သမယေန အညတရော ဘိက္ခု ဂိလာနော ဟောတိ. တံ ဘိက္ခူ ဧတဒဝေါစုံ – ‘‘အတ္ထာယသ္မတော ဥတ္တရိမနုဿဓမ္မော’’တိ? ‘‘နာဝုသော၊ ဒုက္ကရံ အညံ ဗျာကာတု’’န္တိ. တဿ ကုက္ကုစ္စံ အဟောသိ – ‘‘ယေ ခေါ တေ ဘဂဝတော သာဝကာ တေ ဧဝံ ဝဒေယျုံ. အဟဉ္စမှိ န ဘဂဝတော သာဝကော. ကစ္စိ နု ခေါ အဟံ ပါရာဇိကံ အာပတ္တိံ အာပန္နော’’တိ? ဘဂဝတော ဧတမတ္ထံ အာရောစေသိ. ‘‘ကိံစိတ္တော တွံ၊ ဘိက္ခူ’’တိ? ‘‘အနုလ္လပနာဓိပ္ပါယော အဟံ၊ ဘဂဝါ’’တိ. ‘‘အနာပတ္တိ၊ ဘိက္ခု၊ အနုလ္လပနာဓိပ္ပါယဿာ’’တိ.

တေန ခေါ ပန သမယေန အညတရော ဘိက္ခု ဂိလာနော ဟောတိ. တံ ဘိက္ခူ ဧတဒဝေါစုံ – ‘‘အတ္ထာယသ္မတော ဥတ္တရိမနုဿဓမ္မော’’တိ? ‘‘အာရာဓနီယော ခေါ၊ အာဝုသော၊ ဓမ္မော အာရဒ္ဓဝီရိယေနာ’’တိ. တဿ ကုက္ကုစ္စံ အဟောသိ။ပေ။ ‘‘အနာပတ္တိ၊ ဘိက္ခု၊ အနုလ္လပနာဓိပ္ပါယဿာ’’တိ.

တေန ခေါ ပန သမယေန အညတရော ဘိက္ခု ဂိလာနော ဟောတိ. တံ ဘိက္ခူ ဧတဒဝေါစုံ – ‘‘မာ ခေါ၊ အာဝုသော၊ ဘာယီ’’တိ. နာဟံ၊ အာဝုသော၊ မစ္စုနော ဘာယာမီ’’တိ. တဿ ကုက္ကုစ္စံ အဟောသိ။ပေ။ ‘‘အနာပတ္တိ၊ ဘိက္ခု၊ အနုလ္လပနာဓိပ္ပါယဿာ’’တိ.

တေန ခေါ ပန သမယေန အညတရော ဘိက္ခု ဂိလာနော ဟောတိ. တံ ဘိက္ခူ ဧတဒဝေါစုံ – ‘‘မာ ခေါ၊ အာဝုသော၊ ဘာယီ’’တိ. ‘‘ယော နူနာဝုသော၊ ဝိပ္ပဋိသာရီ အဿ သော ဘာယေယျာ’’တိ. တဿ ကုက္ကုစ္စံ အဟောသိ။ပေ။ ‘‘အနာပတ္တိ၊ ဘိက္ခု၊ အနုလ္လပနာဓိပ္ပါယဿာ’’တိ.

တေန ခေါ ပန သမယေန အညတရော ဘိက္ခု ဂိလာနော ဟောတိ. တံ ဘိက္ခူ ဧတဒဝေါစုံ – ‘‘အတ္ထာယသ္မတော ဥတ္တရိမနုဿဓမ္မော’’တိ? ‘‘အာရာဓနီယော ခေါ၊ အာဝုသော၊ ဓမ္မော သမ္မာပယုတ္တေနာ’’တိ. တဿ ကုက္ကုစ္စံ အဟောသိ။ပေ။ ‘‘အနာပတ္တိ၊ ဘိက္ခု၊ အနုလ္လပနာဓိပ္ပါယဿာ’’တိ.

တေန ခေါ ပန သမယေန အညတရော ဘိက္ခု ဂိလာနော ဟောတိ. တံ ဘိက္ခူ ဧတဒဝေါစုံ – ‘‘အတ္ထာယသ္မတော ဥတ္တရိမနုဿဓမ္မော’’တိ? ‘‘အာရာဓနီယော ခေါ၊ အာဝုသော၊ ဓမ္မော အာရဒ္ဓဝီရိယေနာ’’တိ. တဿ ကုက္ကုစ္စံ အဟောသိ။ပေ။ ‘‘အနာပတ္တိ၊ ဘိက္ခု၊ အနုလ္လပနာဓိပ္ပါယဿာ’’တိ.

တေန ခေါ ပန သမယေန အညတရော ဘိက္ခု ဂိလာနော ဟောတိ. တံ ဘိက္ခူ ဧတဒဝေါစုံ – ‘‘အတ္ထာယသ္မတော ဥတ္တရိမနုဿဓမ္မော’’တိ? ‘‘အာရာဓနီယော ခေါ၊ အာဝုသော၊ ဓမ္မော ယုတ္တယောဂေနာ’’တိ. တဿ ကုက္ကုစ္စံ အဟောသိ။ပေ။ ‘‘အနာပတ္တိ၊ ဘိက္ခု၊ အနုလ္လပနာဓိပ္ပါယဿာ’’တိ.

တေန ခေါ ပန သမယေန အညတရော ဘိက္ခု ဂိလာနော ဟောတိ. တံ ဘိက္ခူ ဧတဒဝေါစုံ – ‘‘ကစ္စာဝုသော၊ ခမနီယံ၊ ကစ္စိ ယာပနီယ’’န္တိ? ‘‘နာဝုသော၊ သက္ကာ ယေန ဝါ တေန ဝါ အဓိဝါသေတု’’န္တိ. တဿ ကုက္ကုစ္စံ အဟောသိ။ပေ။ ‘‘အနာပတ္တိ၊ ဘိက္ခု၊ အနုလ္လပနာဓိပ္ပါယဿာ’’တိ.

တေန ခေါ ပန သမယေန အညတရော ဘိက္ခု ဂိလာနော ဟောတိ. တံ ဘိက္ခူ ဧတဒဝေါစုံ – ‘‘ကစ္စာဝုသော ခမနီယံ၊ ကစ္စိ ယာပနီယ’’န္တိ? ‘‘နာဝုသော၊ သက္ကာ ပုထုဇ္ဇနေန အဓိဝါသေတု’’န္တိ. တဿ ကုက္ကုစ္စံ အဟောသိ။ပေ။ ‘‘ကိံစိတ္တော တွံ၊ ဘိက္ခူ’’တိ? ‘‘ဥလ္လပနာဓိပ္ပါယော အဟံ၊ ဘဂဝါ’’တိ. ‘‘အနာပတ္တိ၊ ဘိက္ခု၊ ပါရာဇိကဿ၊ အာပတ္တိ ထုလ္လစ္စယဿာ’’တိ.

၂၂၆. တေန ခေါ ပန သမယေန အညတရော ဗြာဟ္မဏော ဘိက္ခူ နိမန္တေတွာ ဧတဒဝေါစ – ‘‘အာယန္တု၊ ဘောန္တော အရဟန္တော’’တိ. တေသံ ကုက္ကုစ္စံ အဟောသိ – ‘‘မယဉ္စမှ န အရဟန္တော [အနရဟန္တော (သီ.)]. အယဉ္စ ဗြာဟ္မဏော အမှေ အရဟန္တဝါဒေန သမုဒါစရတိ. ကထံ နု ခေါ အမှေဟိ ပဋိပဇ္ဇိတဗ္ဗ’’န္တိ? ဘဂဝတော ဧတမတ္ထံ အာရောစေသုံ. ‘‘အနာပတ္တိ၊ ဘိက္ခဝေ၊ ပသာဒဘညေ’’တိ.

တေန ခေါ ပန သမယေန အညတရော ဗြာဟ္မဏော ဘိက္ခူ နိမန္တေတွာ ဧတဒဝေါစ – ‘‘နိသီဒန္တု၊ ဘောန္တော အရဟန္တော’’တိ။ ‘‘ဘုဉ္ဇန္တု၊ ဘောန္တော အရဟန္တော’’တိ။ ‘‘တပ္ပေန္တု၊ ဘောန္တော အရဟန္တော’’တိ။ ‘‘ဂစ္ဆန္တု၊ ဘောန္တော အရဟန္တော’’တိ. တေသံ ကုက္ကုစ္စံ အဟောသိ – ‘‘မယဉ္စမှ န အရဟန္တော. အယဉ္စ ဗြာဟ္မဏော အမှေ အရဟန္တဝါဒေန သမုဒါစရတိ. ကထံ နု ခေါ အမှေဟိ ပဋိပဇ္ဇိတဗ္ဗ’’န္တိ? ဘဂဝတော ဧတမတ္ထံ အာရောစေသုံ. ‘‘အနာပတ္တိ၊ ဘိက္ခဝေ၊ ပသာဒဘညေ’’တိ.

တေန ခေါ ပန သမယေန အညတရော ဘိက္ခု အညတရဿ ဘိက္ခုနော ဥတ္တရိမနုဿဓမ္မံ ဥလ္လပတိ. သောပိ ဧဝမာဟ – ‘‘မယှမ္ပိ၊ အာဝုသော၊ အာသဝါ ပဟီနာ’’တိ. တဿ ကုက္ကုစ္စံ အဟောသိ။ပေ။ ‘‘အာပတ္တိံ တွံ၊ ဘိက္ခု၊ အာပန္နော ပါရာဇိက’’န္တိ.

တေန ခေါ ပန သမယေန အညတရော ဘိက္ခု အညတရဿ ဘိက္ခုနော ဥတ္တရိမနုဿဓမ္မံ ဥလ္လပတိ. သောပိ ဧဝမာဟ – ‘‘မယှမ္ပိ၊ အာဝုသော၊ ဧတေ ဓမ္မာ သံဝိဇ္ဇန္တီ’’တိ. တဿ ကုက္ကုစ္စံ အဟောသိ။ပေ။ ‘‘အာပတ္တိံ တွံ၊ ဘိက္ခု၊ အာပန္နော ပါရာဇိက’’န္တိ.

တေန ခေါ ပန သမယေန အညတရော ဘိက္ခု အညတရဿ ဘိက္ခုနော ဥတ္တရိမနုဿဓမ္မံ ဥလ္လပတိ. သောပိ ဧဝမာဟ – ‘‘အဟမ္ပာဝုသော၊ တေသု ဓမ္မေသု သန္ဒိဿာမီ’’တိ. တဿ ကုက္ကုစ္စံ အဟောသိ။ပေ။ ‘‘အာပတ္တိံ တွံ၊ ဘိက္ခု၊ အာပန္နော ပါရာဇိက’’န္တိ.

တေန ခေါ ပန သမယေန အညတရံ ဘိက္ခုံ ဉာတကာ ဧတဒဝေါစုံ – ‘‘ဧဟိ၊ ဘန္တေ၊ အဂါရံ အဇ္ဈာဝသာ’’တိ. ‘‘အဘဗ္ဗော ခေါ၊ အာဝုသော၊ မာဒိသော အဂါရံ အဇ္ဈာဝသိတု’’န္တိ. တဿ ကုက္ကုစ္စံ အဟောသိ။ပေ။ ‘‘အနာပတ္တိ၊ ဘိက္ခု၊ အနုလ္လပနာဓိပ္ပါယဿာ’’တိ.

၂၂၇. တေန ခေါ ပန သမယေန အညတရံ ဘိက္ခုံ ဉာတကာ ဧတဒဝေါစုံ – ‘‘ဧဟိ၊ ဘန္တေ၊ ကာမေ ပရိဘုဉ္ဇာ’’တိ. ‘‘အာဝဋာ မေ၊ အာဝုသော၊ ကာမာ’’တိ. တဿ ကုက္ကုစ္စံ အဟောသိ။ပေ။ ‘‘အနာပတ္တိ၊ ဘိက္ခု၊ အနုလ္လပနာဓိပ္ပါယဿာ’’တိ.

တေန ခေါ ပန သမယေန အညတရံ ဘိက္ခုံ ဉာတကာ ဧတဒဝေါစုံ – ‘‘အဘိရမသိ၊ ဘန္တေ’’တိ? ‘‘အဘိရတော အဟံ၊ အာဝုသော၊ ပရမာယ အဘိရတိယာ’’တိ. တဿ ကုက္ကုစ္စံ အဟောသိ. ‘‘ယေ ခေါ တေ ဘဂဝတော သာဝကာ တေ ဧဝံ ဝဒေယျုံ! အဟဉ္စမှိ န ဘဂဝတော သာဝကော. ကစ္စိ နု ခေါ အဟံ ပါရာဇိကံ အာပတ္တိံ အာပန္နော’’တိ? ဘဂဝတော ဧတမတ္ထံ အာရောစေသိ. ‘‘ကိံစိတ္တော တွံ၊ ဘိက္ခူ’’တိ? ‘‘အနုလ္လပနာဓိပ္ပါယော အဟံ၊ ဘဂဝါ’’တိ. ‘‘အနာပတ္တိ၊ ဘိက္ခု၊ အနုလ္လပနာဓိပ္ပါယဿာ’’တိ.

တေန ခေါ ပန သမယေန သမ္ဗဟုလာ ဘိက္ခူ ကတိကံ ကတွာ အညတရသ္မိံ အာဝါသေ ဝဿံ ဥပဂစ္ဆိံသု – ‘‘ယော ဣမမှာ အာဝါသာ ပဌမံ ပက္ကမိဿတိ တံ မယံ အရဟာတိ ဇာနိဿာမာ’’တိ. အညတရော ဘိက္ခု – ‘‘မံ အရဟာတိ ဇာနန္တူ’’တိ၊ တမှာ အာဝါသာ ပဌမံ ပက္ကာမိ. တဿ ကုက္ကုစ္စံ အဟောသိ။ပေ။ ‘‘အာပတ္တိံ တွံ၊ ဘိက္ခု၊ အာပန္နော ပါရာဇိက’’န္တိ.

၂၂၈. [ဣမာနိ ဝတ္ထုနိ သံ. နိ. ၂.၂၀၂ အာဂတာနိ] တေန သမယေန ဗုဒ္ဓေါ ဘဂဝါ ရာဇဂဟေ ဝိဟရတိ ဝေဠုဝနေ ကလန္ဒကနိဝါပေ. တေန ခေါ ပန သမယေန အာယသ္မာ စ လက္ခဏော အာယသ္မာ စ မဟာမောဂ္ဂလ္လာနော ဂိဇ္ဈကူဋေ ပဗ္ဗတေ ဝိဟရန္တိ. အထ ခေါ အာယသ္မာ မဟာမောဂ္ဂလ္လာနော ပုဗ္ဗဏှသမယံ နိဝါသေတွာ ပတ္တစီဝရံ အာဒါယ ယေနာယသ္မာ လက္ခဏော တေနုပသင်္ကမိ၊ ဥပသင်္ကမိတွာ အာယသ္မန္တံ လက္ခဏံ ဧတဒဝေါစ – ‘‘အာယာမာဝုသော လက္ခဏ၊ ရာဇဂဟံ ပိဏ္ဍာယ ပဝိသိဿာမာ’’တိ. ‘‘ဧဝမာဝုသော’’တိ ခေါ အာယသ္မာ လက္ခဏော အာယသ္မတော မဟာမောဂ္ဂလ္လာနဿ ပစ္စဿောသိ. အထ ခေါ အာယသ္မာ မဟာမောဂ္ဂလ္လာနော ဂိဇ္ဈကူဋာ ပဗ္ဗတာ ဩရောဟန္တော အညတရသ္မိံ ပဒေသေ သိတံ ပါတွာကာသိ. အထ ခေါ အာယသ္မာ လက္ခဏော အာယသ္မန္တံ မဟာမောဂ္ဂလ္လာနံ ဧတဒဝေါစ – ‘‘ကော နု ခေါ၊ အာဝုသော မောဂ္ဂလ္လာန၊ ဟေတု ကော ပစ္စယော သိတဿ ပါတုကမ္မာယာ’’တိ? ‘‘အကာလော ခေါ၊ အာဝုသော လက္ခဏ၊ ဧတဿ ပဉှဿ [ပဉှဿ ဗျာကရဏာယ (သျာ.)]. ဘဂဝတော မံ သန္တိကေ ဧတံ ပဉှံ ပုစ္ဆာတိ. အထ ခေါ အာယသ္မာ စ လက္ခဏော အာယသ္မာ စ မဟာမောဂ္ဂလ္လာနော ရာဇဂဟေ ပိဏ္ဍာယ စရိတွာ ပစ္ဆာဘတ္တံ ပိဏ္ဍပါတပဋိက္ကန္တာ ယေန ဘဂဝါ တေနုပသင်္ကမိံသု၊ ဥပသင်္ကမိတွာ ဘဂဝန္တံ အဘိဝါဒေတွာ ဧကမန္တံ နိသီဒိံသု. ဧကမန္တံ နိသိန္နော ခေါ အာယသ္မာ လက္ခဏော အာယသ္မန္တံ မဟာမောဂ္ဂလ္လာနံ ဧတဒဝေါစ – ‘‘ဣဓာယသ္မာ မဟာမောဂ္ဂလ္လာနော ဂိဇ္ဈကူဋာ ပဗ္ဗတာ ဩရောဟန္တော အညတရသ္မိံ ပဒေသေ သိတံ ပါတွာကာသိ. ကော နု ခေါ၊ အာဝုသော မောဂ္ဂလ္လာန၊ ဟေတု ကော ပစ္စယော သိတဿ ပါတုကမ္မာယာ’’တိ? ‘‘ဣဓာဟံ၊ အာဝုသော၊ ဂိဇ္ဈကူဋာ ပဗ္ဗတာ ဩရောဟန္တော အဒ္ဒသံ အဋ္ဌိကသင်္ခလိကံ ဝေဟာသံ ဂစ္ဆန္တိံ. တမေနံ ဂိဇ္ဈာပိ ကာကာပိ ကုလလာပိ အနုပတိတွာ အနုပတိတွာ ဖာသုဠန္တရိကာဟိ ဝိတုဍေန္တိ [ဝိတုဒေန္တိ ဝိတစ္ဆေန္တိ ဝိရာဇေန္တိ (သျာ.)]. သာ သုဒံ အဋ္ဋဿရံ ကရောတိ. တဿ မယှံ၊ အာဝုသော၊ ဧတဒဟောသိ – ‘အစ္ဆရိယံ ဝတ ဘော၊ အဗ္ဘုတံ ဝတ ဘော၊ ဧဝရူပေါပိ နာမ သတ္တော ဘဝိဿတိ! ဧဝရူပေါပိ နာမ ယက္ခော ဘဝိဿတိ! ဧဝရူပေါပိ နာမ အတ္တဘာဝပ္ပဋိလာဘော ဘဝိဿတီ’’’တိ! ဘိက္ခူ ဥဇ္ဈာယန္တိ ခိယျန္တိ ဝိပါစေန္တိ – ‘‘ဥတ္တရိမနုဿဓမ္မံ အာယသ္မာ မဟာမောဂ္ဂလ္လာနော ဥလ္လပတီ’’တိ. အထ ခေါ ဘဂဝါ ဘိက္ခူ အာမန္တေသိ – ‘‘စက္ခုဘူတာ ဝတ၊ ဘိက္ခဝေ၊ သာဝကာ ဝိဟရန္တိ. ဉာဏဘူတာ ဝတ၊ ဘိက္ခဝေ၊ သာဝကာ ဝိဟရန္တိ. ယတြ ဟိ နာမ သာဝကော ဧဝရူပံ ဉဿတိ ဝါ ဒက္ခတိ ဝါ သက္ခိံ ဝါ ကရိဿတိ. ပုဗ္ဗေဝ မေ သော၊ ဘိက္ခဝေ၊ သတ္တော ဒိဋ္ဌော အဟောသိ. အပိ စာဟံ န ဗျာကာသိံ. အဟဉ္စေတံ ဗျာကရေယျံ ပရေ စ မေ န သဒ္ဒဟေယျုံ. ယေ မေ န သဒ္ဒဟေယျုံ တေသံ တံ အဿ ဒီဃရတ္တံ အဟိတာယ ဒုက္ခာယ. ဧသော၊ ဘိက္ခဝေ၊ သတ္တော ဣမသ္မိံယေဝ ရာဇဂဟေ ဂေါဃာတကော အဟောသိ. သော တဿ ကမ္မဿ ဝိပါကေန ဗဟူနိ ဝဿာနိ ဗဟူနိ ဝဿသတာနိ ဗဟူနိ ဝဿသဟဿာနိ ဗဟူနိ ဝဿသတသဟဿာနိ နိရယေ ပစ္စိတွာ တဿေဝ ကမ္မဿ ဝိပါကာဝသေသေန ဧဝရူပံ အတ္တဘာဝပ္ပဋိလာဘံ ပဋိသံဝေဒေတိ. သစ္စံ၊ ဘိက္ခဝေ၊ မောဂ္ဂလ္လာနော အာဟ. အနာပတ္တိ၊ ဘိက္ခဝေ၊ မောဂ္ဂလ္လာနဿာ’’တိ.

၂၂၉. ‘‘ဣဓာဟံ၊ အာဝုသော၊ ဂိဇ္ဈကူဋာ ပဗ္ဗတာ ဩရောဟန္တော အဒ္ဒသံ မံသပေသိံ ဝေဟာသံ ဂစ္ဆန္တိံ. တမေနံ ဂိဇ္ဈာပိ ကာကာပိ ကုလလာပိ အနုပတိတွာ အနုပတိတွာ ဝိတစ္ဆေန္တိ ဝိဘဇ္ဇေန္တိ [ဝိတုဒေန္တိ ဝိတစ္ဆေန္တိ ဝိရာဇေန္တိ (သျာ.)]. သာ သုဒံ အဋ္ဋဿရံ ကရောတိ။ပေ။ ဧသော၊ ဘိက္ခဝေ၊ သတ္တော ဣမသ္မိံယေဝ ရာဇဂဟေ ဂေါဃာတကော အဟောသိ။ပေ။.

‘‘ဣဓာဟံ၊ အာဝုသော၊ ဂိဇ္ဈကူဋာ ပဗ္ဗတာ ဩရောဟန္တော အဒ္ဒသံ မံသပိဏ္ဍံ ဝေဟာသံ ဂစ္ဆန္တံ. တမေနံ ဂိဇ္ဈာပိ ကာကာပိ ကုလလာပိ အနုပတိတွာ အနုပတိတွာ ဝိတစ္ဆေန္တိ ဝိဘဇ္ဇေန္တိ. သော သုဒံ အဋ္ဋဿရံ ကရောတိ။ပေ။ ဧသော၊ ဘိက္ခဝေ၊ သတ္တော ဣမသ္မိံယေဝ ရာဇဂဟေ သာကုဏိကော အဟောသိ။ပေ။.

‘‘ဣဓာဟံ၊ အာဝုသော၊ ဂိဇ္ဈကူဋာ ပဗ္ဗတာ ဩရောဟန္တော အဒ္ဒသံ နိစ္ဆဝိံ ပုရိသံ ဝေဟာသံ ဂစ္ဆန္တံ. တမေနံ ဂိဇ္ဈာပိ ကာကာပိ ကုလလာပိ အနုပတိတွာ အနုပတိတွာ ဝိတစ္ဆေန္တိ ဝိဘဇ္ဇေန္တိ. သော သုဒံ အဋ္ဋဿရံ ကရောတိ။ပေ။ ဧသော၊ ဘိက္ခဝေ၊ သတ္တော ဣမသ္မိံယေဝ ရာဇဂဟေ ဩရဗ္ဘိကော အဟောသိ။ပေ။.

‘‘ဣဓာဟံ၊ အာဝုသော၊ ဂိဇ္ဈကူဋာ ပဗ္ဗတာ ဩရောဟန္တော အဒ္ဒသံ အသိလောမံ ပုရိသံ ဝေဟာသံ ဂစ္ဆန္တံ. တဿ တေ အသီ ဥပ္ပတိတွာ ဥပ္ပတိတွာ တဿေဝ ကာယေ နိပတန္တိ. သော သုဒံ အဋ္ဋဿရံ ကရောတိ။ပေ။ ဧသော၊ ဘိက္ခဝေ၊ သတ္တော ဣမသ္မိံယေဝ ရာဇဂဟေ သူကရိကော အဟောသိ။ပေ။.

‘‘ဣဓာဟံ၊ အာဝုသော၊ ဂိဇ္ဈကူဋာ ပဗ္ဗတာ ဩရောဟန္တော အဒ္ဒသံ သတ္တိလောမံ ပုရိသံ ဝေဟာသံ ဂစ္ဆန္တံ. တဿ တာ သတ္တိယော ဥပ္ပတိတွာ ဥပ္ပတိတွာ တဿေဝ ကာယေ နိပတန္တိ. သော သုဒံ အဋ္ဋဿရံ ကရောတိ။ပေ။ ဧသော၊ ဘိက္ခဝေ၊ သတ္တော ဣမသ္မိံယေဝ ရာဇဂဟေ မာဂဝိကော အဟောသိ။ပေ။.

‘‘ဣဓာဟံ၊ အာဝုသော၊ ဂိဇ္ဈကူဋာ ပဗ္ဗတာ ဩရောဟန္တော အဒ္ဒသံ ဥသုလောမံ ပုရိသံ ဝေဟာသံ ဂစ္ဆန္တံ. တဿ တေ ဥသူ ဥပ္ပတိတွာ ဥပ္ပတိတွာ တဿေဝ ကာယေ နိပတန္တိ. သော သုဒံ အဋ္ဋဿရံ ကရောတိ။ပေ။ ဧသော၊ ဘိက္ခဝေ၊ သတ္တော ဣမသ္မိံယေဝ ရာဇဂဟေ ကာရဏိကော အဟောသိ။ပေ။.

‘‘ဣဓာဟံ၊ အာဝုသော၊ ဂိဇ္ဈကူဋာ ပဗ္ဗတာ ဩရောဟန္တော အဒ္ဒသံ သူစိလောမံ ပုရိသံ ဝေဟာသံ ဂစ္ဆန္တံ. တဿ တာ သူစိယော ဥပ္ပတိတွာ ဥပ္ပတိတွာ တဿေဝ ကာယေ နိပတန္တိ. သော သုဒံ အဋ္ဋဿရံ ကရောတိ။ပေ။ ဧသော၊ ဘိက္ခဝေ၊ သတ္တော ဣမသ္မိံယေဝ ရာဇဂဟေ သာရထိကော အဟောသိ။ပေ။.

‘‘ဣဓာဟံ၊ အာဝုသော၊ ဂိဇ္ဈကူဋာ ပဗ္ဗတာ ဩရောဟန္တော အဒ္ဒသံ သူစိလောမံ ပုရိသံ ဝေဟာသံ ဂစ္ဆန္တံ. တဿ တာ သူစိယော သီသေ ပဝိသိတွာ မုခတော နိက္ခမန္တိ၊ မုခေ ပဝိသိတွာ ဥရတော နိက္ခမန္တိ၊ ဥရေ ပဝိသိတွာ ဥဒရတော နိက္ခမန္တိ၊ ဥဒရေ ပဝိသိတွာ ဦရူဟိ နိက္ခမန္တိ၊ ဦရူသု ပဝိသိတွာ ဇင်္ဃာဟိ နိက္ခမန္တိ၊ ဇင်္ဃာသု ပဝိသိတွာ ပါဒေဟိ နိက္ခမန္တိ. သော သုဒံ အဋ္ဋဿရံ ကရောတိ။ပေ။ ဧသော၊ ဘိက္ခဝေ၊ သတ္တော ဣမသ္မိံယေဝ ရာဇဂဟေ သူစကော အဟောသိ။ပေ။.

‘‘ဣဓာဟံ၊ အာဝုသော၊ ဂိဇ္ဈကူဋာ ပဗ္ဗတာ ဩရောဟန္တော အဒ္ဒသံ ကုမ္ဘဏ္ဍံ ပုရိသံ ဝေဟာသံ ဂစ္ဆန္တံ. သော ဂစ္ဆန္တောပိ တေဝ အဏ္ဍေ ခန္ဓေ အာရောပေတွာ ဂစ္ဆတိ၊ နိသီဒန္တောပိ တေသွေဝ အဏ္ဍေသု နိသီဒတိ. တမေနံ ဂိဇ္ဈာပိ ကာကာပိ ကုလလာပိ အနုပတိတွာ အနုပတိတွာ ဝိတစ္ဆေန္တိ ဝိဘဇ္ဇေန္တိ. သော သုဒံ အဋ္ဋဿရံ ကရောတိ။ပေ။ ဧသော၊ ဘိက္ခဝေ၊ သတ္တော ဣမသ္မိံယေဝ ရာဇဂဟေ ဂါမကူဋော အဟောသိ။ပေ။.

‘‘ဣဓာဟံ၊ အာဝုသော၊ ဂိဇ္ဈကူဋာ ပဗ္ဗတာ ဩရောဟန္တော အဒ္ဒသံ ပုရိသံ ဂူထကူပေ သသီသကံ နိမုဂ္ဂံ။ပေ။ ဧသော၊ ဘိက္ခဝေ၊ သတ္တော ဣမသ္မိံယေဝ ရာဇဂဟေ ပါရဒါရိကော အဟောသိ။ပေ။.

‘‘ဣဓာဟံ၊ အာဝုသော၊ ဂိဇ္ဈကူဋာ ပဗ္ဗတာ ဩရောဟန္တော အဒ္ဒသံ ပုရိသံ ဂူထကူပေ သသီသကံ နိမုဂ္ဂံ ဥဘောဟိ ဟတ္ထေဟိ ဂူထံ ခါဒန္တံ။ပေ။ ဧသော၊ ဘိက္ခဝေ၊ သတ္တော ဣမသ္မိံယေဝ ရာဇဂဟေ ဒုဋ္ဌဗြာဟ္မဏော အဟောသိ. သော ကဿပဿ သမ္မာသမ္ဗုဒ္ဓဿ ပါဝစနေ ဘိက္ခုသံဃံ ဘတ္တေန နိမန္တေတွာ ဒေါဏိယော [ဒေါဏိယော (ဣတိပိ)] ဂူထဿ ပူရာပေတွာ ကာလံ အာရောစာပေတွာ ဧတဒဝေါစ – ‘အတော [ဣတော (သျာ.) အဟော (ဣတိပိ)]၊ ဘောန္တော၊ ယာဝဒတ္ထံ ဘုဉ္ဇန္တု စေဝ ဟရန္တု စာ’’’တိ။ပေ။.

၂၃၀. ‘‘ဣဓာဟံ၊ အာဝုသော၊ ဂိဇ္ဈကူဋာ ပဗ္ဗတာ ဩရောဟန္တော အဒ္ဒသံ နိစ္ဆဝိံ ဣတ္ထိံ ဝေဟာသံ ဂစ္ဆန္တိံ. တမေနံ ဂိဇ္ဈာပိ ကာကာပိ ကုလလာပိ အနုပတိတွာ အနုပတိတွာ ဝိတစ္ဆေန္တိ ဝိဘဇ္ဇေန္တိ. သာ သုဒံ အဋ္ဋဿရံ ကရောတိ။ပေ။ ဧသာ၊ ဘိက္ခဝေ၊ ဣတ္ထီ ဣမသ္မိံယေဝ ရာဇဂဟေ အတိစာရိနီ အဟောသိ။ပေ။.

‘‘ဣဓာဟံ၊ အာဝုသော၊ ဂိဇ္ဈကူဋာ ပဗ္ဗတာ ဩရောဟန္တော အဒ္ဒသံ ဣတ္ထိံ ဒုဂ္ဂန္ဓံ မင်္ဂုလိံ ဝေဟာသံ ဂစ္ဆန္တိံ. တမေနံ ဂိဇ္ဈာပိ ကာကာပိ ကုလလာပိ အနုပတိတွာ အနုပတိတွာ ဝိတစ္ဆေန္တိ ဝိဘဇ္ဇေန္တိ. သာ သုဒံ အဋ္ဋဿရံ ကရောတိ။ပေ။ ဧသာ၊ ဘိက္ခဝေ၊ ဣတ္ထီ ဣမသ္မိံယေဝ ရာဇဂဟေ ဣက္ခဏိကာ အဟောသိ။ပေ။.

‘‘ဣဓာဟံ၊ အာဝုသော၊ ဂိဇ္ဈကူဋာ ပဗ္ဗတာ ဩရောဟန္တော အဒ္ဒသံ ဣတ္ထိံ ဥပ္ပက္ကံ ဩကိလိနိံ ဩကိရိနိံ ဝေဟာသံ ဂစ္ဆန္တိံ. သာ သုဒံ အဋ္ဋဿရံ ကရောတိ။ပေ။ ဧသာ၊ ဘိက္ခဝေ၊ ဣတ္ထီ ကာလိင်္ဂဿ ရညော အဂ္ဂမဟေသီ အဟောသိ. သာ ဣဿာပကတာ သပတ္တိံ အင်္ဂါရကဋာဟေန ဩကိရိ။ပေ။.

‘‘ဣဓာဟံ၊ အာဝုသော၊ ဂိဇ္ဈကူဋာ ပဗ္ဗတာ ဩရောဟန္တော အဒ္ဒသံ အသီသကံ ကဗန္ဓံ ဝေဟာသံ ဂစ္ဆန္တံ. တဿ ဥရေ အက္ခီနိ စေဝ ဟောန္တိ မုခဉ္စ. တမေနံ ဂိဇ္ဈာပိ ကာကာပိ ကုလလာပိ အနုပတိတွာ အနုပတိတွာ ဝိတစ္ဆေန္တိ ဝိဘဇ္ဇေန္တိ. သော သုဒံ အဋ္ဋဿရံ ကရောတိ။ပေ။ ဧသော၊ ဘိက္ခဝေ၊ သတ္တော ဣမသ္မိံယေဝ ရာဇဂဟေ ဟာရိကော နာမ စောရဃာတကော အဟောသိ။ပေ။.

‘‘ဣဓာဟံ၊ အာဝုသော၊ ဂိဇ္ဈကူဋာ ပဗ္ဗတာ ဩရောဟန္တော အဒ္ဒသံ ဘိက္ခုံ ဝေဟာသံ ဂစ္ဆန္တံ. တဿ သင်္ဃာဋိပိ အာဒိတ္တာ သမ္ပဇ္ဇလိတာ သဇောတိဘူတာ၊ ပတ္တောပိ အာဒိတ္တော သမ္ပဇ္ဇလိတော သဇောတိဘူတော၊ ကာယဗန္ဓနမ္ပိ အာဒိတ္တံ သမ္ပဇ္ဇလိတံ သဇောတိဘူတံ၊ ကာယောပိ အာဒိတ္တော သမ္ပဇ္ဇလိတော သဇောတိဘူတော. သော သုဒံ အဋ္ဋဿရံ ကရောတိ။ပေ။ ဧသော၊ ဘိက္ခဝေ၊ ဘိက္ခု ကဿပဿ သမ္မာသမ္ဗုဒ္ဓဿ ပါဝစနေ ပါပဘိက္ခု အဟောသိ။ပေ။.

‘‘ဣဓာဟံ၊ အာဝုသော၊ ဂိဇ္ဈကူဋာ ပဗ္ဗတာ ဩရောဟန္တော အဒ္ဒသံ ဘိက္ခုနိံ။ အဒ္ဒသံ သိက္ခမာနံ။ အဒ္ဒသံ သာမဏေရံ။ အဒ္ဒသံ သာမဏေရိံ ဝေဟာသံ ဂစ္ဆန္တိံ. တဿာ သင်္ဃာဋိပိ အာဒိတ္တာ သမ္ပဇ္ဇလိတာ သဇောတိဘူတာ၊ ပတ္တောပိ အာဒိတ္တော သမ္ပဇ္ဇလိတော သဇောတိဘူတော၊ ကာယဗန္ဓနမ္ပိ အာဒိတ္တံ သမ္ပဇ္ဇလိတံ သဇောတိဘူတံ၊ ကာယောပိ အာဒိတ္တော သမ္ပဇ္ဇလိတော သဇောတိဘူတော. သာ သုဒံ အဋ္ဋဿရံ ကရောတိ. တဿ မယှံ၊ အာဝုသော၊ ဧတဒဟောသိ – ‘အစ္ဆရိယံ ဝတ ဘော၊ အဗ္ဘုတံ ဝတ ဘော၊ ဧဝရူပေါပိ နာမ သတ္တော ဘဝိဿတိ! ဧဝရူပေါပိ နာမ ယက္ခော ဘဝိဿတိ! ဧဝရူပေါပိ နာမ အတ္တဘာဝပ္ပဋိလာဘော ဘဝိဿတီ’’’တိ! ဘိက္ခူ ဥဇ္ဈာယန္တိ ခိယျန္တိ ဝိပါစေန္တိ – ‘‘ဥတ္တရိမနုဿဓမ္မံ အာယသ္မာ မဟာမောဂ္ဂလ္လာနော ဥလ္လပတီ’’တိ.

အထ ခေါ ဘဂဝါ ဘိက္ခူ အာမန္တေသိ – ‘‘စက္ခုဘူတာ ဝတ၊ ဘိက္ခဝေ၊ သာဝကာ ဝိဟရန္တိ. ဉာဏဘူတာ ဝတ၊ ဘိက္ခဝေ၊ သာဝကာ ဝိဟရန္တိ. ယတြ ဟိ နာမ သာဝကော ဧဝရူပံ ဉဿတိ ဝါ ဒက္ခတိ ဝါ သက္ခိံ ဝါ ကရိဿတိ! ပုဗ္ဗေဝ မေ သာ၊ ဘိက္ခဝေ၊ သာမဏေရီ ဒိဋ္ဌာ အဟောသိ. အပိ စာဟံ န ဗျာကာသိံ. အဟဉ္စေတံ ဗျာကရေယျံ ပရေ စ မေ န သဒ္ဒဟေယျုံ. ယေ မေ န သဒ္ဒဟေယျုံ တေသံ တံ အဿ ဒီဃရတ္တံ အဟိတာယ ဒုက္ခာယ. ဧသာ၊ ဘိက္ခဝေ၊ သာမဏေရီ ကဿပဿ သမ္မာသမ္ဗုဒ္ဓဿ ပါဝစနေ ပါပသာမဏေရီ အဟောသိ. သာ တဿ ကမ္မဿ ဝိပါကေန ဗဟူနိ ဝဿာနိ ဗဟူနိ ဝဿသတာနိ ဗဟူနိ ဝဿသဟဿာနိ ဗဟူနိ ဝဿသတသဟဿာနိ နိရယေ ပစ္စိတွာ တဿေဝ ကမ္မဿ ဝိပါကာဝသေသေန ဧဝရူပံ အတ္တဘာဝပ္ပဋိလာဘံ ပဋိသံဝေဒေတိ. သစ္စံ၊ ဘိက္ခဝေ၊ မောဂ္ဂလ္လာနော အာဟ. အနာပတ္တိ၊ ဘိက္ခဝေ၊ မောဂ္ဂလ္လာနဿာ’’တိ.

၂၃၁. အထ ခေါ အာယသ္မာ မဟာမောဂ္ဂလ္လာနော ဘိက္ခူ အာမန္တေသိ – ‘‘ယတာယံ၊ အာဝုသော၊ တပေါဒါ သန္ဒတိ သော ဒဟော အစ္ဆောဒကော သီတောဒကော သာတောဒကော သေတကော သုပ္ပတိတ္ထော ရမဏီယော ပဟူတမစ္ဆကစ္ဆပေါ စက္ကမတ္တာနိ စ ပဒုမာနိ ပုပ္ဖန္တီ’’တိ. ဘိက္ခူ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ အာယသ္မာ မဟာမောဂ္ဂလ္လာနော ဧဝံ ဝက္ခတိ – ‘ယတာယံ၊ အာဝုသော၊ တပေါဒါ သန္ဒတိ သော ဒဟော အစ္ဆောဒကော သီတောဒကော သာတောဒကော သေတကော သုပ္ပတိတ္ထော ရမဏီယော ပဟူတမစ္ဆကစ္ဆပေါ စက္ကမတ္တာနိ စ ပဒုမာနိ ပုပ္ဖန္တီ’တိ. အထ စ ပနာယံ တပေါဒါ ကုထိတာ သန္ဒတိ. ဥတ္တရိမနုဿဓမ္မံ အာယသ္မာ မဟာမောဂ္ဂလ္လာနော ဥလ္လပတီ’’တိ. ဘဂဝတော ဧတမတ္ထံ အာရောစေသုံ. ‘‘ယတာယံ၊ ဘိက္ခဝေ၊ တပေါဒါ သန္ဒတိ သော ဒဟော အစ္ဆောဒကော သီတောဒကော သာတောဒကော သေတကော သုပ္ပတိတ္ထော ရမဏီယော ပဟူတမစ္ဆကစ္ဆပေါ စက္ကမတ္တာနိ စ ပဒုမာနိ ပုပ္ဖန္တိ. အပိ စာယံ၊ ဘိက္ခဝေ၊ တပေါဒါ ဒွိန္နံ မဟာနိရယာနံ အန္တရိကာယ အာဂစ္ဆတိ. တေနာယံ တပေါဒါ ကုထိတာ သန္ဒတိ. သစ္စံ၊ ဘိက္ခဝေ၊ မောဂ္ဂလ္လာနော အာဟ. အနာပတ္တိ၊ ဘိက္ခဝေ၊ မောဂ္ဂလ္လာနဿာ’’တိ.

တေန ခေါ ပန သမယေန ရာဇာ မာဂဓော သေနိယော ဗိမ္ဗိသာရော လိစ္ဆဝီဟိ သဒ္ဓိံ သင်္ဂါမေန္တော ပဘဂ္ဂေါ အဟောသိ. အထ ရာဇာ ပစ္ဆာ သေနံ သင်္ကဍ္ဎိတွာ လိစ္ဆဝယော ပရာဇေသိ. သင်္ဂါမေ စ နန္ဒိ စရတိ – ‘‘ရညာ လိစ္ဆဝီ ပဘဂ္ဂါ’’တိ. အထ ခေါ အာယသ္မာ မဟာမောဂ္ဂလ္လာနော ဘိက္ခူ အာမန္တေသိ – ‘‘ရာဇာ၊ အာဝုသော၊ လိစ္ဆဝီဟိ ပဘဂ္ဂေါ’’တိ. ဘိက္ခူ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ အာယသ္မာ မဟာမောဂ္ဂလ္လာနော ဧဝံ ဝက္ခတိ – ‘ရာဇာ၊ အာဝုသော၊ လိစ္ဆဝီဟိ ပဘဂ္ဂေါ’တိ! သင်္ဂါမေ စ နန္ဒိံ စရတိ – ‘ရညာ လိစ္ဆဝီ ပဘဂ္ဂါ’တိ! ဥတ္တရိမနုဿဓမ္မံ အာယသ္မာ မဟာမောဂ္ဂလ္လာနော ဥလ္လပတီ’’တိ. ဘဂဝတော ဧတမတ္ထံ အာရောစေသုံ. ‘‘ပဌမံ၊ ဘိက္ခဝေ၊ ရာဇာ လိစ္ဆဝီဟိ ပဘဂ္ဂေါ. အထ ရာဇာ ပစ္ဆာ သေနံ သင်္ကဍ္ဎိတွာ လိစ္ဆဝယော ပရာဇေသိ. သစ္စံ၊ ဘိက္ခဝေ၊ မောဂ္ဂလ္လာနော အာဟ. အနာပတ္တိ၊ ဘိက္ခဝေ၊ မောဂ္ဂလ္လာနဿာ’’တိ.

၂၃၂. အထ ခေါ အာယသ္မာ မဟာမောဂ္ဂလ္လာနော ဘိက္ခူ အာမန္တေသိ – ‘‘ဣဓာဟံ၊ အာဝုသော၊ သပ္ပိနိကာယ နဒိယာ တီရေ အာနေဉ္ဇံ သမာဓိံ သမာပန္နော နာဂါနံ ဩဂယှ ဥတ္တရန္တာနံ ကောဉ္စံ ကရောန္တာနံ သဒ္ဒံ အဿောသိ’’န္တိ. ဘိက္ခူ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ အာယသ္မာ မဟာမောဂ္ဂလ္လာနော အာနေဉ္ဇံ သမာဓိံ သမာပန္နော သဒ္ဒံ သောဿတိ! ဥတ္တရိမနုဿဓမ္မံ အာယသ္မာ မဟာမောဂ္ဂလ္လာနော ဥလ္လပတီ’’တိ. ဘဂဝတော ဧတမတ္ထံ အာရောစေသုံ. ‘‘အတ္ထေသော၊ ဘိက္ခဝေ၊ သမာဓိ သော စ ခေါ အပရိသုဒ္ဓေါ. သစ္စံ၊ ဘိက္ခဝေ၊ မောဂ္ဂလ္လာနော အာဟ. အနာပတ္တိ၊ ဘိက္ခဝေ၊ မောဂ္ဂလ္လာနဿာ’’တိ.

အထ ခေါ အာယသ္မာ သောဘိတော ဘိက္ခူ အာမန္တေသိ – ‘‘အဟံ၊ အာဝုသော၊ ပဉ္စ ကပ္ပသတာနိ အနုဿရာမီ’’တိ. ဘိက္ခူ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ အာယသ္မာ သောဘိတော ဧဝံ ဝက္ခတိ – ‘အဟံ၊ အာဝုသော၊ ပဉ္စ ကပ္ပသတာနိ အနုဿရာမီ’တိ! ဥတ္တရိမနုဿဓမ္မံ အာယသ္မာ သောဘိတော ဥလ္လပတီ’’တိ. ဘဂဝတော ဧတမတ္ထံ အာရောစေသုံ. ‘‘အတ္ထေသာ၊ ဘိက္ခဝေ၊ သောဘိတဿ. သာ စ ခေါ ဧကာယေဝ ဇာတိ. သစ္စံ၊ ဘိက္ခဝေ၊ သောဘိတော အာဟ. အနာပတ္တိ၊ ဘိက္ခဝေ၊ သောဘိတဿာတိ.

စတုတ္ထပါရာဇိကံ သမတ္တံ.

၂၃၃. ဥဒ္ဒိဋ္ဌာ ခေါ အာယသ္မန္တော စတ္တာရော ပါရာဇိကာ ဓမ္မာ၊ ယေသံ ဘိက္ခု အညတရံ ဝါ အညတရံ ဝါ အာပဇ္ဇိတွာ န လဘတိ ဘိက္ခူဟိ သဒ္ဓိံ သံဝါသံ၊ ယထာ ပုရေ တထာ ပစ္ဆာ၊ ပါရာဇိကော ဟောတိ အသံဝါသော. တတ္ထာယသ္မန္တေ ပုစ္ဆာမိ – ‘‘ကစ္စိတ္ထ ပရိသုဒ္ဓါ’’? ဒုတိယမ္ပိ ပုစ္ဆာမိ – ‘‘ကစ္စိတ္ထ ပရိသုဒ္ဓါ’’? တတိယမ္ပိ ပုစ္ဆာမိ – ‘‘ကစ္စိတ္ထ ပရိသုဒ္ဓါ’’? ပရိသုဒ္ဓေတ္ထာယသ္မန္တော၊ တသ္မာ တုဏှီ၊ ဧဝမေတံ ဓာရယာမီတိ.

ပါရာဇိကံ နိဋ္ဌိတံ.

တဿုဒ္ဒါနံ –

မေထုနာဒိန္နာဒါနဉ္စ၊ မနုဿဝိဂ္ဂဟုတ္တရိ၊

ပါရာဇိကာနိ စတ္တာရိ၊ ဆေဇ္ဇဝတ္ထူ အသံသယာတိ.

ပါရာဇိကကဏ္ဍံ နိဋ္ဌိတံ.