၂. ဒုတိယသိက္ခာပဒံ

၁၁၈၄. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ. တေန ခေါ ပန သမယေန ဆဗ္ဗဂ္ဂိယာ ဘိက္ခုနိယော ယာနေန ယာယန္တိ. မနုဿာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနိယော ယာနေန ယာယိဿန္တိ၊ သေယျထာပိ ဂိဟိနိယော ကာမဘောဂိနိယော’’တိ! အဿောသုံ ခေါ ဘိက္ခုနိယော တေသံ မနုဿာနံ ဥဇ္ဈာယန္တာနံ ခိယျန္တာနံ ဝိပါစေန္တာနံ. ယာ တာ ဘိက္ခုနိယော အပ္ပိစ္ဆာ။ပေ. ။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဆဗ္ဗဂ္ဂိယာ ဘိက္ခုနိယော ယာနေန ယာယိဿန္တီ’’တိ။ပေ။ သစ္စံ ကိရ၊ ဘိက္ခဝေ၊ ဆဗ္ဗဂ္ဂိယာ ဘိက္ခုနိယော ယာနေန ယာယန္တီတိ? ‘‘သစ္စံ၊ ဘဂဝါ’’တိ. ဝိဂရဟိ ဗုဒ္ဓေါ ဘဂဝါ။ပေ။ ကထဉှိ နာမ၊ ဘိက္ခဝေ၊ ဆဗ္ဗဂ္ဂိယာ ဘိက္ခုနိယော ယာနေန ယာယိဿန္တိ! နေတံ၊ ဘိက္ခဝေ၊ အပ္ပသန္နာနံ ဝါ ပသာဒါယ။ပေ။ ဧဝဉ္စ ပန၊ ဘိက္ခဝေ၊ ဘိက္ခုနိယော ဣမံ သိက္ခာပဒံ ဥဒ္ဒိသန္တု –

‘‘ယာ ပန ဘိက္ခုနီ ယာနေန ယာယေယျ၊ ပါစိတ္တိယ’’န္တိ.

ဧဝဉ္စိဒံ ဘဂဝတာ ဘိက္ခုနီနံ သိက္ခာပဒံ ပညတ္တံ ဟောတိ.

၁၁၈၅. တေန ခေါ ပန သမယေန အညတရာ ဘိက္ခုနီ ဂိလာနာ ဟောတိ၊ န သက္ကောတိ ပဒသာ ဂန္တုံ။ပေ။ ဘဂဝတော ဧတမတ္ထံ အာရောစေသုံ။ပေ။ အနုဇာနာမိ၊ ဘိက္ခဝေ၊ ဂိလာနာယ ဘိက္ခုနိယာ ယာနံ. ဧဝဉ္စ ပန၊ ဘိက္ခဝေ၊ ဘိက္ခုနိယော ဣမံ သိက္ခာပဒံ ဥဒ္ဒိသန္တု –

၁၁၈၆. ‘‘ယာ ပန ဘိက္ခုနီ အဂိလာနာ ယာနေန ယာယေယျ၊ ပါစိတ္တိယ’’န္တိ.

၁၁၈၇. ယာ ပနာတိ ယာ ယာဒိသာ။ပေ။ ဘိက္ခုနီတိ။ပေ။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ.

အဂိလာနာ နာမ သက္ကောတိ ပဒသာ ဂန္တုံ.

ဂိလာနာ နာမ န သက္ကောတိ ပဒသာ ဂန္တုံ.

ယာနံ နာမ ဝယှံ ရထော သကဋံ သန္ဒမာနိကာ သိဝိကာ ပါဋင်္ကီ.

ယာယေယျာတိ သကိမ္ပိ ယာနေန ယာယတိ၊ အာပတ္တိ ပါစိတ္တိယဿ.

၁၁၈၈. အဂိလာနာ အဂိလာနသညာ ယာနေန ယာယတိ၊ အာပတ္တိ ပါစိတ္တိယဿ. အဂိလာနာ ဝေမတိကာ ယာနေန ယာယတိ၊ အာပတ္တိ ပါစိတ္တိယဿ. အဂိလာနာ ဂိလာနသညာ ယာနေန ယာယတိ၊ အာပတ္တိ ပါစိတ္တိယဿ.

ဂိလာနာ အဂိလာနသညာ၊ အာပတ္တိ ဒုက္ကဋဿ. ဂိလာနာ ဝေမတိကာ၊ အာပတ္တိ ဒုက္ကဋဿ. ဂိလာနာ ဂိလာနသညာ၊ အနာပတ္တိ.

၁၁၈၉. အနာပတ္တိ ဂိလာနာယ၊ အာပဒါသု၊ ဥမ္မတ္တိကာယ၊ အာဒိကမ္မိကာယာတိ.

ဒုတိယသိက္ခာပဒံ နိဋ္ဌိတံ.