၁. ပဌမသိက္ခာပဒံ

၁၀၆၇. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ. တေန ခေါ ပန သမယေန ဘိက္ခုနိယော ဂဗ္ဘိနိံ ဝုဋ္ဌာပေန္တိ. သာ ပိဏ္ဍာယ စရတိ. မနုဿာ ဧဝမာဟံသု – ‘‘ဒေထာယျာယ ဘိက္ခံ၊ ဂရုဘာရာ [ဂရုဂဗ္ဘာ (သျာ.)] အယျာ’’တိ. မနုဿာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနိယော ဂဗ္ဘိနိံ ဝုဋ္ဌာပေဿန္တီ’’တိ! အဿောသုံ ခေါ ဘိက္ခုနိယော တေသံ မနုဿာနံ ဥဇ္ဈာယန္တာနံ ခိယျန္တာနံ ဝိပါစေန္တာနံ. ယာ တာ ဘိက္ခုနိယော အပ္ပိစ္ဆာ။ပေ။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနိယော ဂဗ္ဘိနိံ ဝုဋ္ဌာပေဿန္တီ’’တိ။ပေ။ သစ္စံ ကိရ၊ ဘိက္ခဝေ၊ ဘိက္ခုနိယော ဂဗ္ဘိနိံ ဝုဋ္ဌာပေန္တီတိ? ‘‘သစ္စံ၊ ဘဂဝါ’’တိ. ဝိဂရဟိ ဗုဒ္ဓေါ ဘဂဝါ။ပေ။ ကထဉှိ နာမ၊ ဘိက္ခဝေ၊ ဘိက္ခုနိယော ဂဗ္ဘိနိံ ဝုဋ္ဌာပေဿန္တိ! နေတံ၊ ဘိက္ခဝေ၊ အပ္ပသန္နာနံ ဝါ ပသာဒါယ။ပေ။ ဧဝဉ္စ ပန၊ ဘိက္ခဝေ၊ ဘိက္ခုနိယော ဣမံ သိက္ခာပဒံ ဥဒ္ဒိသန္တု –

၁၀၆၈. ‘‘ယာ ပန ဘိက္ခုနီ ဂဗ္ဘိနိံ ဝုဋ္ဌာပေယျ၊ ပါစိတ္တိယ’’န္တိ.

၁၀၆၉. ယာ ပနာတိ ယာ ယာဒိသာ။ပေ။ ဘိက္ခုနီတိ။ပေ။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ.

ဂဗ္ဘိနီ နာမ အာပန္နသတ္တာ ဝုစ္စတိ. ဝုဋ္ဌာပေယျာတိ ဥပသမ္ပာဒေယျ.

‘‘ဝုဋ္ဌာပေဿာမီ’’တိ ဂဏံ ဝါ အာစရိနိံ ဝါ ပတ္တံ ဝါ စီဝရံ ဝါ ပရိယေသတိ၊ သီမံ ဝါ သမ္မန္နတိ၊ အာပတ္တိ ဒုက္ကဋဿ. ဉတ္တိယာ ဒုက္ကဋံ. ဒွီဟိ ကမ္မဝါစာဟိ ဒုက္ကဋာ. ကမ္မဝါစာပရိယောသာနေ ဥပဇ္ဈာယာယ အာပတ္တိ ပါစိတ္တိယဿ. ဂဏဿ စ အာစရိနိယာ စ အာပတ္တိ ဒုက္ကဋဿ.

၁၀၇၀. ဂဗ္ဘိနိယာ ဂဗ္ဘိနိသညာ ဝုဋ္ဌာပေတိ၊ အာပတ္တိ ပါစိတ္တိယဿ. ဂဗ္ဘိနိယာ ဝေမတိကာ ဝုဋ္ဌာပေတိ၊ အာပတ္တိ ဒုက္ကဋဿ. ဂဗ္ဘိနိယာ အဂဗ္ဘိနိသညာ ဝုဋ္ဌာပေတိ၊ အနာပတ္တိ. အဂဗ္ဘိနိယာ ဂဗ္ဘိနိသညာ၊ အာပတ္တိ ဒုက္ကဋဿ. အဂဗ္ဘိနိယာ ဝေမတိကာ၊ အာပတ္တိ ဒုက္ကဋဿ. အဂဗ္ဘိနိယာ အဂဗ္ဘိနိသညာ၊ အနာပတ္တိ.

၁၀၇၁. အနာပတ္တိ ဂဗ္ဘိနိံ အဂဗ္ဘိနိသညာ ဝုဋ္ဌာပေတိ၊ အဂဗ္ဘိနိံ အဂဗ္ဘိနိသညာ ဝုဋ္ဌာပေတိ၊ ဥမ္မတ္တိကာယ၊ အာဒိကမ္မိကာယာတိ.

ပဌမသိက္ခာပဒံ နိဋ္ဌိတံ.