၅. ပဉ္စမသိက္ခာပဒံ

၉၅၀. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ. တေန ခေါ ပန သမယေန ဘဒ္ဒါ ကာပိလာနီ သာကေတေ ဝဿံ ဥပဂတာ ဟောတိ. သာ ကေနစိဒေဝ ကရဏီယေန ဥဗ္ဗာဠှာ ထုလ္လနန္ဒာယ ဘိက္ခုနိယာ သန္တိကေ ဒူတံ ပါဟေသိ – ‘‘သစေ မေ အယျာ ထုလ္လနန္ဒာ ဥပဿယံ ဒဒေယျ အာဂစ္ဆေယျာမဟံ သာဝတ္ထိ’’န္တိ. ထုလ္လနန္ဒာ ဘိက္ခုနီ ဧဝမာဟ – ‘‘အာဂစ္ဆတု၊ ဒဿာမီ’’တိ. အထ ခေါ ဘဒ္ဒါ ကာပိလာနီ သာကေတာ သာဝတ္ထိံ အဂမာသိ. ထုလ္လနန္ဒာ ဘိက္ခုနီ ဘဒ္ဒါယ ကာပိလာနိယာ ဥပဿယံ အဒါသိ. တေန ခေါ ပန သမယေန ထုလ္လနန္ဒာ ဘိက္ခုနီ ဗဟုဿုတာ ဟောတိ ဘာဏိကာ ဝိသာရဒါ ပဋ္ဋာ ဓမ္မိံ ကထံ ကာတုံ. ဘဒ္ဒါပိ ကာပိလာနီ ဗဟုဿုတာ [ဗဟုဿုတာယေဝ (က.)] ဟောတိ ဘာဏိကာ ဝိသာရဒါ ပဋ္ဋာ ဓမ္မိံ ကထံ ကာတုံ ဥဠာရသမ္ဘာဝိတာ. မနုဿာ – ‘‘အယျာ ဘဒ္ဒါ ကာပိလာနီ ဗဟုဿုတာ ဘာဏိကာ ဝိသာရဒါ ပဋ္ဋာ ဓမ္မိံ ကထံ ကာတုံ ဥဠာရသမ္ဘာဝိတာ’’တိ ဘဒ္ဒံ ကာပိလာနိံ ပဌမံ ပယိရုပါသိတွာ ပစ္ဆာ ထုလ္လနန္ဒံ ဘိက္ခုနိံ ပယိရုပါသန္တိ. ထုလ္လနန္ဒာ ဘိက္ခုနီ ဣဿာပကတာ – ‘‘ဣမာ ကိရ အပ္ပိစ္ဆာ သန္တုဋ္ဌာ ပဝိဝိတ္တာ အသံသဋ္ဌာ ယာ ဣမာ သညတ္တိဗဟုလာ ဝိညတ္တိဗဟုလာ ဝိဟရန္တီ’’တိ ကုပိတာ အနတ္တမနာ ဘဒ္ဒံ ကာပိလာနိံ ဥပဿယာ နိက္ကဍ္ဎိ. ယာ တာ ဘိက္ခုနိယော အပ္ပိစ္ဆာ။ပေ။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ အယျာ ထုလ္လနန္ဒာ အယျာယ ဘဒ္ဒါယ ကာပိလာနိယာ ဥပဿယံ ဒတွာ ကုပိတာ အနတ္တမနာ နိက္ကဍ္ဎိဿတီ’’တိ။ပေ။ သစ္စံ ကိရ၊ ဘိက္ခဝေ၊ ထုလ္လနန္ဒာ ဘိက္ခုနီ ဘဒ္ဒါယ ကာပိလာနိယာ ဥပဿယံ ဒတွာ ကုပိတာ အနတ္တမနာ နိက္ကဍ္ဎတီတိ [နိက္ကဍ္ဎီတိ (က.)]? ‘‘သစ္စံ၊ ဘဂဝါ’’တိ. ဝိဂရဟိ ဗုဒ္ဓေါ ဘဂဝါ။ပေ။ ကထဉှိ နာမ၊ ဘိက္ခဝေ၊ ထုလ္လနန္ဒာ ဘိက္ခုနီ ဘဒ္ဒါယ ကာပိလာနိယာ ဥပဿယံ ဒတွာ ကုပိတာ အနတ္တမနာ နိက္ကဍ္ဎိဿတိ! နေတံ၊ ဘိက္ခဝေ၊ အပ္ပသန္နာနံ ဝါ ပသာဒါယ။ပေ။ ဧဝဉ္စ ပန၊ ဘိက္ခဝေ၊ ဘိက္ခုနိယော ဣမံ သိက္ခာပဒံ ဥဒ္ဒိသန္တု –

၉၅၁. ‘‘ယာ ပန ဘိက္ခုနီ ဘိက္ခုနိယာ ဥပဿယံ ဒတွာ ကုပိတာ အနတ္တမနာ နိက္ကဍ္ဎေယျ ဝါ နိက္ကဍ္ဎာပေယျ ဝါ၊ ပါစိတ္တိယ’’န္တိ.

၉၅၂. ယာ ပနာတိ ယာ ယာဒိသာ။ပေ။ ဘိက္ခုနီတိ။ပေ။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ.

ဘိက္ခုနိယာတိ အညာယ ဘိက္ခုနိယာ. ဥပဿယော နာမ ကဝါဋဗဒ္ဓေါ ဝုစ္စတိ. ဒတွာတိ သယံ ဒတွာ. ကုပိတာ အနတ္တမနာတိ အနဘိရဒ္ဓါ အာဟတစိတ္တာ ခိလဇာတာ.

နိက္ကဍ္ဎေယျာတိ ဂဗ္ဘေ ဂဟေတွာ ပမုခံ နိက္ကဍ္ဎတိ၊ အာပတ္တိ ပါစိတ္တိယဿ. ပမုခေ ဂဟေတွာ ဗဟိ နိက္ကဍ္ဎတိ၊ အာပတ္တိ ပါစိတ္တိယဿ. ဧကေန ပယောဂေန ဗဟုကေပိ ဒွါရေ အတိက္ကာမေတိ၊ အာပတ္တိ ပါစိတ္တိယဿ.

နိက္ကဍ္ဎာပေယျာတိ အညံ အာဏာပေတိ၊ အာပတ္တိ ပါစိတ္တိယဿ [ဧတ္ထ ‘‘အာပတ္တိ ဒုက္ကဋဿာ’’တိ သဗ္ဗတ္ထ ဒိဿတိ၊ ဘိက္ခုဝိဘင်္ဂေ ပန ဣဒိသေသု အာဏတ္တိသဟဂတသိက္ခာပဒေသု ‘‘အညံ အာဏာပေတိ အာပတ္တိ ပါစိတ္တိယဿာ’’တိ အာဂတတ္တာ တမနုဝတ္တိတွာ ဝိသောဓိတမိဒံ]. သကိံ အာဏတ္တာ ဗဟုကေပိ ဒွါရေ အတိက္ကာမေတိ၊ အာပတ္တိ ပါစိတ္တိယဿ.

၉၅၃. ဥပသမ္ပန္နာယ ဥပသမ္ပန္နသညာ ဥပဿယံ ဒတွာ ကုပိတာ အနတ္တမနာ နိက္ကဍ္ဎတိ ဝါ နိက္ကဍ္ဎာပေတိ ဝါ၊ အာပတ္တိ ပါစိတ္တိယဿ. ဥပသမ္ပန္နာယ ဝေမတိကာ ဥပဿယံ ဒတွာ ကုပိတာ အနတ္တမနာ နိက္ကဍ္ဎတိ ဝါ နိက္ကဍ္ဎာပေတိ ဝါ၊ အာပတ္တိ ပါစိတ္တိယဿ. ဥပသမ္ပန္နာယ အနုပသမ္ပန္နသညာ ဥပဿယံ ဒတွာ ကုပိတာ အနတ္တမနာ နိက္ကဍ္ဎတိ ဝါ နိက္ကဍ္ဎာပေတိ ဝါ၊ အာပတ္တိ ပါစိတ္တိယဿ.

တဿာ ပရိက္ခာရံ နိက္ကဍ္ဎတိ ဝါ နိက္ကဍ္ဎာပေတိ ဝါ၊ အာပတ္တိ ဒုက္ကဋဿ. အကဝါဋဗဒ္ဓါ နိက္ကဍ္ဎတိ ဝါ နိက္ကဍ္ဎာပေတိ ဝါ၊ အာပတ္တိ ဒုက္ကဋဿ. တဿာ ပရိက္ခာရံ နိက္ကဍ္ဎတိ ဝါ နိက္ကဍ္ဎာပေတိ ဝါ၊ အာပတ္တိ ဒုက္ကဋဿ. အနုပသမ္ပန္နံ ကဝါဋဗဒ္ဓါ ဝါ အကဝါဋဗဒ္ဓါ ဝါ နိက္ကဍ္ဎတိ ဝါ နိက္ကဍ္ဎာပေတိ ဝါ၊ အာပတ္တိ ဒုက္ကဋဿ. တဿာ ပရိက္ခာရံ နိက္ကဍ္ဎတိ ဝါ နိက္ကဍ္ဎာပေတိ ဝါ၊ အာပတ္တိ ဒုက္ကဋဿ. အနုပသမ္ပန္နာယ ဥပသမ္ပန္နသညာ၊ အာပတ္တိ ဒုက္ကဋဿ. အနုပသမ္ပန္နာယ ဝေမတိကာ၊ အာပတ္တိ ဒုက္ကဋဿ. အနုပသမ္ပန္နာယ အနုပသမ္ပန္နသညာ၊ အာပတ္တိ ဒုက္ကဋဿ.

၉၅၄. အနာပတ္တိ အလဇ္ဇိနိံ နိက္ကဍ္ဎတိ ဝါ နိက္ကဍ္ဎာပေတိ ဝါ၊ တဿာ ပရိက္ခာရံ နိက္ကဍ္ဎတိ ဝါ နိက္ကဍ္ဎာပေတိ ဝါ၊ ဥမ္မတ္တိကံ နိက္ကဍ္ဎတိ ဝါ နိက္ကဍ္ဎာပေတိ ဝါ၊ တဿာ ပရိက္ခာရံ နိက္ကဍ္ဎတိ ဝါ နိက္ကဍ္ဎာပေတိ ဝါ၊ ဘဏ္ဍနကာရိကံ ကလဟကာရိကံ ဝိဝါဒကာရိကံ ဘဿကာရိကံ သံဃေ အဓိကရဏကာရိကံ နိက္ကဍ္ဎတိ ဝါ နိက္ကဍ္ဎာပေတိ ဝါ၊ တဿာ ပရိက္ခာရံ နိက္ကဍ္ဎတိ ဝါ နိက္ကဍ္ဎာပေတိ ဝါ၊ အန္တေဝါသိနိံ ဝါ သဒ္ဓိဝိဟာရိနိံ ဝါ န သမ္မာ ဝတ္တန္တိံ နိက္ကဍ္ဎတိ ဝါ နိက္ကဍ္ဎာပေတိ ဝါ၊ တဿာ ပရိက္ခာရံ နိက္ကဍ္ဎတိ ဝါ နိက္ကဍ္ဎာပေတိ ဝါ၊ ဥမ္မတ္တိကာယ၊ အာဒိကမ္မိကာယာတိ.

ပဉ္စမသိက္ခာပဒံ နိဋ္ဌိတံ.