၇. သတ္တမသိက္ခာပဒံ

၈၆၄. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ. တေန ခေါ ပန သမယေန သမ္ဗဟုလာ ဘိက္ခုနိယော ကောသလေသု ဇနပဒေ သာဝတ္ထိံ ဂစ္ဆန္တိယော သာယံ အညတရံ ဂါမံ ဥပဂန္တွာ အညတရံ ဗြာဟ္မဏကုလံ ဥပသင်္ကမိတွာ ဩကာသံ ယာစိံသု. အထ ခေါ သာ ဗြာဟ္မဏီ တာ ဘိက္ခုနိယော ဧတဒဝေါစ – ‘‘အာဂမေထ၊ အယျေ၊ ယာဝ ဗြာဟ္မဏော အာဂစ္ဆတီ’’တိ. ဘိက္ခုနိယော – ‘‘ယာဝ ဗြာဟ္မဏော အာဂစ္ဆတီ’’တိ သေယျံ သန္ထရိတွာ ဧကစ္စာ နိသီဒိံသု ဧကစ္စာ နိပဇ္ဇိံသု. အထ ခေါ သော ဗြာဟ္မဏော ရတ္တိံ အာဂန္တွာ တံ ဗြာဟ္မဏိံ ဧတဒဝေါစ – ‘‘ကာ ဣမာ’’တိ? ‘‘ဘိက္ခုနိယော၊ အယျာ’’တိ. ‘‘နိက္ကဍ္ဎထ ဣမာ မုဏ္ဍာ ဗန္ဓကိနိယော’’တိ၊ ဃရတော နိက္ကဍ္ဎာပေသိ. အထ ခေါ တာ ဘိက္ခုနိယော သာဝတ္ထိံ ဂန္တွာ ဘိက္ခုနီနံ ဧတမတ္ထံ အာရောစေသုံ. ယာ တာ ဘိက္ခုနိယော အပ္ပိစ္ဆာ။ပေ။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနိယော ဝိကာလေ ကုလာနိ ဥပသင်္ကမိတွာ သာမိကေ အနာပုစ္ဆာ သေယျံ သန္ထရိတွာ အဘိနိသီဒိဿန္တိပိ အဘိနိပဇ္ဇိဿန္တိပီ’’တိ။ပေ။ သစ္စံ ကိရ၊ ဘိက္ခဝေ၊ ဘိက္ခုနိယော ဝိကာလေ ကုလာနိ ဥပသင်္ကမိတွာ သာမိကေ အနာပုစ္ဆာ သေယျံ သန္ထရိတွာ အဘိနိသီဒန္တိပိ အဘိနိပဇ္ဇန္တိပီတိ? ‘‘သစ္စံ၊ ဘဂဝါ’’တိ. ဝိဂရဟိ ဗုဒ္ဓေါ ဘဂဝါ။ပေ။ ကထဉှိ နာမ၊ ဘိက္ခဝေ၊ ဘိက္ခုနိယော ဝိကာလေ ကုလာနိ ဥပသင်္ကမိတွာ သာမိကေ အနာပုစ္ဆာ သေယျံ သန္ထရိတွာ အဘိနိသီဒိဿန္တိပိ အဘိနိပဇ္ဇိဿန္တိပိ! နေတံ၊ ဘိက္ခဝေ၊ အပ္ပသန္နာနံ ဝါ ပသာဒါယ။ပေ။ ဧဝဉ္စ ပန၊ ဘိက္ခဝေ၊ ဘိက္ခုနိယော ဣမံ သိက္ခာပဒံ ဥဒ္ဒိသန္တု –

၈၆၅. ‘‘ယာ ပန ဘိက္ခုနီ ဝိကာလေ ကုလာနိ ဥပသင်္ကမိတွာ သာမိကေ အနာပုစ္ဆာ သေယျံ သန္ထရိတွာ ဝါ သန္ထရာပေတွာ ဝါ အဘိနိသီဒေယျ ဝါ အဘိနိပဇ္ဇေယျ ဝါ၊ ပါစိတ္တိယ’’န္တိ.

၈၆၆. ယာ ပနာတိ ယာ ယာဒိသာ။ပေ။ ဘိက္ခုနီတိ။ပေ။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ.

ဝိကာလော နာမ အတ္ထင်္ဂတေ သူရိယေ ယာဝ အရုဏုဂ္ဂမနာ.

ကုလံ နာမ စတ္တာရိ ကုလာနိ – ခတ္တိယကုလံ၊ ဗြာဟ္မဏကုလံ၊ ဝေဿကုလံ သုဒ္ဒကုလံ. ဥပသင်္ကမိတွာတိ တတ္ထ ဂန္တွာ.

သာမိကေ အနာပုစ္ဆာတိ ယော တသ္မိံ ကုလေ မနုဿော သာမိကော ဒါတုံ၊ တံ အနာပုစ္ဆာ.

သေယျံ နာမ အန္တမသော ပဏ္ဏသန္ထာရောပိ. သန္ထရိတွာတိ သယံ သန္ထရိတွာ. သန္ထရာပေတွာတိ အညံ သန္ထရာပေတွာ. အဘိနိသီဒေယျာတိ တသ္မိံ အဘိနိသီဒတိ၊ အာပတ္တိ ပါစိတ္တိယဿ. အဘိနိပဇ္ဇေယျာတိ တသ္မိံ အဘိနိပဇ္ဇတိ၊ အာပတ္တိ ပါစိတ္တိယဿ.

၈၆၇. အနာပုစ္ဆိတေ အနာပုစ္ဆိတသညာ သေယျံ သန္ထရိတွာ ဝါ သန္ထရာပေတွာ ဝါ အဘိနိသီဒတိ ဝါ အဘိနိပဇ္ဇတိ ဝါ၊ အာပတ္တိ ပါစိတ္တိယဿ. အနာပုစ္ဆိတေ ဝေမတိကာ သေယျံ သန္ထရိတွာ ဝါ သန္ထရာပေတွာ ဝါ အဘိနိသီဒတိ ဝါ အဘိနိပဇ္ဇတိ ဝါ၊ အာပတ္တိ ပါစိတ္တိယဿ. အနာပုစ္ဆိတေ အာပုစ္ဆိတသညာ သေယျံ သန္ထရိတွာ ဝါ သန္ထရာပေတွာ ဝါ အဘိနိသီဒတိ ဝါ အဘိနိပဇ္ဇတိ ဝါ၊ အာပတ္တိ ပါစိတ္တိယဿ.

အာပုစ္ဆိတေ အနာပုစ္ဆိတသညာ၊ အာပတ္တိ ဒုက္ကဋဿ. အာပုစ္ဆိတေ ဝေမတိကာ၊ အာပတ္တိ ဒုက္ကဋဿ. အာပုစ္ဆိတေ အာပုစ္ဆိတသညာ၊ အနာပတ္တိ.

၈၆၈. အနာပတ္တိ အာပုစ္ဆာ သေယျံ သန္ထရိတွာ ဝါ သန္ထရာပေတွာ ဝါ အဘိနိသီဒတိ ဝါ အဘိနိပဇ္ဇတိ ဝါ၊ ဂိလာနာယ၊ အာပဒါသု၊ ဥမ္မတ္တိကာယ၊ အာဒိကမ္မိကာယာတိ.

သတ္တမသိက္ခာပဒံ နိဋ္ဌိတံ.