၄. စတုတ္ထသိက္ခာပဒံ

၈၅၀. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ. တေန ခေါ ပန သမယေန ထုလ္လနန္ဒာ ဘိက္ခုနီ ရထိကာယပိ ဗျူဟေပိ သိင်္ဃာဋကေပိ ပုရိသေန သဒ္ဓိံ ဧကေနေကာ သန္တိဋ္ဌတိပိ သလ္လပတိပိ နိကဏ္ဏိကမ္ပိ ဇပ္ပေတိ ဒုတိယိကမ္ပိ ဘိက္ခုနိံ ဥယျောဇေတိ. ယာ တာ ဘိက္ခုနိယော အပ္ပိစ္ဆာ။ပေ။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ အယျာ ထုလ္လနန္ဒာ ရထိကာယပိ ဗျူဟေပိ သိင်္ဃာဋကေပိ ပုရိသေန သဒ္ဓိံ ဧကေနေကာ သန္တိဋ္ဌိဿတိပိ သလ္လပိဿတိပိ နိကဏ္ဏိကမ္ပိ ဇပ္ပိဿတိ ဒုတိယိကမ္ပိ ဘိက္ခုနိံ ဥယျောဇေဿတီ’’တိ။ပေ။ သစ္စံ ကိရ၊ ဘိက္ခဝေ၊ ထုလ္လနန္ဒာ ဘိက္ခုနီ ရထိကာယပိ ဗျူဟေပိ သိင်္ဃာဋကေပိ ပုရိသေန သဒ္ဓိံ ဧကေနေကာ သန္တိဋ္ဌတိပိ သလ္လပတိပိ နိကဏ္ဏိကမ္ပိ ဇပ္ပေတိ ဒုတိယိကမ္ပိ ဘိက္ခုနိံ ဥယျောဇေတီတိ? ‘‘သစ္စံ၊ ဘဂဝါ’’တိ. ဝိဂရဟိ ဗုဒ္ဓေါ ဘဂဝါ။ပေ။ ကထဉှိ နာမ၊ ဘိက္ခဝေ၊ ထုလ္လနန္ဒာ ဘိက္ခုနီ ရထိကာယပိ ဗျူဟေပိ သိင်္ဃာဋကေပိ ပုရိသေန သဒ္ဓိံ ဧကေနေကာ သန္တိဋ္ဌိဿတိပိ သလ္လပိဿတိပိ နိကဏ္ဏိကမ္ပိ ဇပ္ပိဿတိ ဒုတိယိကမ္ပိ ဘိက္ခုနိံ ဥယျောဇေဿတိ! နေတံ၊ ဘိက္ခဝေ၊ အပ္ပသန္နာနံ ဝါ ပသာဒါယ။ပေ။ ဧဝဉ္စ ပန၊ ဘိက္ခဝေ၊ ဘိက္ခုနိယော ဣမံ သိက္ခာပဒံ ဥဒ္ဒိသန္တု –

၈၅၁. ‘‘ယာ ပန ဘိက္ခုနီ ရထိကာယ ဝါ ဗျူဟေ ဝါ သိင်္ဃာဋကေ ဝါ ပုရိသေန သဒ္ဓိံ ဧကေနေကာ သန္တိဋ္ဌေယျ ဝါ သလ္လပေယျ ဝါ နိကဏ္ဏိကံ ဝါ ဇပ္ပေယျ ဒုတိယိကံ ဝါ ဘိက္ခုနိံ ဥယျောဇေယျ၊ ပါစိတ္တိယ’’န္တိ.

၈၅၂. ယာ ပနာတိ ယာ ယာဒိသာ။ပေ။ ဘိက္ခုနီတိ။ပေ။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ.

ရထိကာ နာမ ရစ္ဆာ ဝုစ္စတိ. ဗျူဟံ နာမ ယေနေဝ ပဝိသန္တိ တေနေဝ နိက္ခမန္တိ. သိင်္ဃာဋကော နာမ စစ္စရံ ဝုစ္စတိ.

ပုရိသော နာမ မနုဿပုရိသော န ယက္ခော န ပေတော န တိရစ္ဆာနဂတော ဝိညူ ပဋိဗလော သန္တိဋ္ဌိတုံ သလ္လပိတုံ.

သဒ္ဓိန္တိ ဧကတော. ဧကေနေကာတိ ပုရိသော စေဝ ဟောတိ ဘိက္ခုနီ စ.

သန္တိဋ္ဌေယျ ဝါတိ ပုရိသဿ ဟတ္ထပါသေ တိဋ္ဌတိ၊ အာပတ္တိ ပါစိတ္တိယဿ.

သလ္လပေယျ ဝါတိ ပုရိသဿ ဟတ္ထပါသေ ဌိတာ သလ္လပတိ၊ အာပတ္တိ ပါစိတ္တိယဿ.

နိကဏ္ဏိကံ ဝါ ဇပ္ပေယျာတိ ပုရိသဿ ဥပကဏ္ဏကေ အာရောစေတိ၊ အာပတ္တိ ပါစိတ္တိယဿ.

ဒုတိယိကံ ဝါ ဘိက္ခုနိံ ဥယျောဇေယျာတိ အနာစာရံ အာစရိတုကာမာ ဒုတိယိကမ္ပိ ဘိက္ခုနိံ ဥယျောဇေတိ၊ အာပတ္တိ ဒုက္ကဋဿ. ဒဿနူပစာရံ ဝါ သဝနူပစာရံ ဝါ ဝိဇဟန္တိယာ အာပတ္တိ ဒုက္ကဋဿ. ဝိဇဟိတေ အာပတ္တိ ပါစိတ္တိယဿ.

ဟတ္ထပါသံ ဝိဇဟိတွာ သန္တိဋ္ဌတိ ဝါ သလ္လပတိ ဝါ အာပတ္တိ ဒုက္ကဋဿ. ယက္ခေန ဝါ ပေတေန ဝါ ပဏ္ဍကေန ဝါ တိရစ္ဆာနဂတမနုဿဝိဂ္ဂဟေန ဝါ သဒ္ဓိံ သန္တိဋ္ဌတိ ဝါ သလ္လပတိ ဝါ၊ အာပတ္တိ ဒုက္ကဋဿ.

၈၅၃. အနာပတ္တိ ယော ကောစိ ဝိညူ ဒုတိယော ဟောတိ၊ အရဟောပေက္ခာ၊ အညဝိဟိတာ သန္တိဋ္ဌတိ ဝါ သလ္လပတိ ဝါ၊ န အနာစာရံ အာစရိတုကာမာ၊ သတိ ကရဏီယေ ဒုတိယိကံ ဘိက္ခုနိံ ဥယျောဇေတိ၊ ဥမ္မတ္တိကာယ၊ အာဒိကမ္မိကာယာတိ.

စတုတ္ထသိက္ခာပဒံ နိဋ္ဌိတံ.