၁. လသုဏဝဂ္ဂေါ

၁. ပဌမသိက္ခာပဒံ

ဣမေ ခေါ ပနာယျာယော ဆသဋ္ဌိသတာ ပါစိတ္တိယာ

ဓမ္မာ ဥဒ္ဒေသံ အာဂစ္ဆန္တိ.

၇၉၃. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ. တေန ခေါ ပန သမယေန အညတရေန ဥပါသကေန ဘိက္ခုနိသံဃော လသုဏေန ပဝါရိတော ဟောတိ – ‘‘ယာသံ အယျာနံ လသုဏေန အတ္ထော၊ အဟံ လသုဏေနာ’’တိ. ခေတ္တပါလော စ အာဏတ္တော ဟောတိ – ‘‘သစေ ဘိက္ခုနိယော အာဂစ္ဆန္တိ၊ ဧကမေကာယ ဘိက္ခုနိယာ ဒွေတယော ဘဏ္ဍိကေ ဒေဟီ’’တိ. တေန ခေါ ပန သမယေန သာဝတ္ထိယံ ဥဿဝေါ ဟောတိ. ယထာဘတံ လသုဏံ ပရိက္ခယံ အဂမာသိ. ဘိက္ခုနိယော တံ ဥပါသကံ ဥပသင်္ကမိတွာ ဧတဒဝေါစုံ – ‘‘လသုဏေန၊ အာဝုသော၊ အတ္ထော’’တိ. ‘‘နတ္ထာယျေ. ယထာဘတံ လသုဏံ ပရိက္ခီဏံ. ခေတ္တံ ဂစ္ဆထာ’’တိ. ထုလ္လနန္ဒာ ဘိက္ခုနီ ခေတ္တံ ဂန္တွာ န မတ္တံ ဇာနိတွာ ဗဟုံ လသုဏံ ဟရာပေသိ. ခေတ္တပါလော ဥဇ္ဈာယတိ ခိယျတိ ဝိပါစေတိ – ‘‘ကထဉှိ နာမ ဘိက္ခုနိယော န မတ္တံ ဇာနိတွာ ဗဟုံ လသုဏံ ဟရာပေဿန္တီ’’တိ! အဿောသုံ ခေါ ဘိက္ခုနိယော တဿ ခေတ္တပါလဿ ဥဇ္ဈာယန္တဿ ခိယျန္တဿ ဝိပါစေန္တဿ. ယာ တာ ဘိက္ခုနိယော အပ္ပိစ္ဆာ။ပေ။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ အယျာ ထုလ္လနန္ဒာ န မတ္တံ ဇာနိတွာ ဗဟုံ လသုဏံ ဟရာပေဿတီ’’တိ။ပေ။ သစ္စံ ကိရ၊ ဘိက္ခဝေ၊ ထုလ္လနန္ဒာ ဘိက္ခုနီ န မတ္တံ ဇာနိတွာ ဗဟုံ လသုဏံ ဟရာပေတီတိ [ဟရာပေသီတိ (က.)]? ‘‘သစ္စံ၊ ဘဂဝါ’’တိ. ဝိဂရဟိ ဗုဒ္ဓေါ ဘဂဝါ။ပေ။ ကထဉှိ နာမ၊ ဘိက္ခဝေ၊ ထုလ္လနန္ဒာ ဘိက္ခုနီ န မတ္တံ ဇာနိတွာ ဗဟုံ လသုဏံ ဟရာပေဿတိ! နေတံ၊ ဘိက္ခဝေ၊ အပ္ပသန္နာနံ ဝါ ပသာဒါယ။ပေ။ ဓမ္မိံ ကထံ ကတွာ ဘိက္ခူ အာမန္တေသိ –

‘‘ဘူတပုဗ္ဗံ၊ ဘိက္ခဝေ၊ ထုလ္လနန္ဒာ ဘိက္ခုနီ အညတရဿ ဗြာဟ္မဏဿ ပဇာပတိ အဟောသိ. တိဿော စ ဓီတရော – နန္ဒာ၊ နန္ဒဝတီ၊ သုန္ဒရီနန္ဒာ. အထ ခေါ၊ ဘိက္ခဝေ၊ သော ဗြာဟ္မဏော ကာလင်္ကတွာ အညတရံ ဟံသယောနိံ ဥပပဇ္ဇိ. တဿ သဗ္ဗသောဝဏ္ဏမယာ ပတ္တာ အဟေသုံ. သော တာသံ ဧကေကံ ပတ္တံ ဒေတိ. အထ ခေါ၊ ဘိက္ခဝေ၊ ထုလ္လနန္ဒာ ဘိက္ခုနီ ‘‘အယံ ဟံသော အမှာကံ ဧကေကံ ပတ္တံ ဒေတီ’’တိ တံ ဟံသရာဇံ ဂဟေတွာ နိပ္ပတ္တံ အကာသိ. တဿ ပုန ဇာယမာနာ ပတ္တာ သေတာ သမ္ပဇ္ဇိံသု. တဒါပိ၊ ဘိက္ခဝေ၊ ထုလ္လနန္ဒာ ဘိက္ခုနီ အတိလောဘေန သုဝဏ္ဏာ ပရိဟီနာ. ဣဒါနိ လသုဏာ ပရိဟာယိဿတီ’’တိ.

[ဇာ. ၁.၁.၁၃၆ သုဝဏ္ဏဟံသဇာတကေပိ] ‘‘ယံ လဒ္ဓံ တေန တုဋ္ဌဗ္ဗံ၊ အတိလောဘော ဟိ ပါပကော၊

ဟံသရာဇံ ဂဟေတွာန၊ သုဝဏ္ဏာ ပရိဟာယထာ’’တိ.

အထ ခေါ ဘဂဝါ ထုလ္လနန္ဒံ ဘိက္ခုနိံ အနေကပရိယာယေန ဝိဂရဟိတွာ ဒုဗ္ဘရတာယ။ပေ။ ဧဝဉ္စ ပန၊ ဘိက္ခဝေ၊ ဘိက္ခုနိယော ဣမံ သိက္ခာပဒံ ဥဒ္ဒိသန္တု –

၇၉၄. ‘‘ယာ ပန ဘိက္ခုနီ လသုဏံ ခါဒေယျ ပါစိတ္တိယ’’န္တိ.

၇၉၅. ယာ ပနာတိ ယာ ယာဒိသာ။ပေ။ ဘိက္ခုနီတိ။ပေ။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ.

လသုဏံ နာမ မာဂဓကံ ဝုစ္စတိ.

‘‘ခါဒိဿာမီတိ ပဋိဂ္ဂဏှာ’’တိ၊ အာပတ္တိ ဒုက္ကဋဿ. အဇ္ဈောဟာရေ အဇ္ဈောဟာရေ အာပတ္တိ ပါစိတ္တိယဿ.

၇၉၆. လသုဏေ လသုဏသညာ ခါဒတိ၊ အာပတ္တိ ပါစိတ္တိယဿ. လသုဏေ ဝေမတိကာ ခါဒတိ၊ အာပတ္တိ ပါစိတ္တိယဿ. လသုဏေ အလသုဏသညာ ခါဒတိ၊ အာပတ္တိ ပါစိတ္တိယဿ.

အလသုဏေ လသုဏသညာ ခါဒတိ၊ အာပတ္တိ ဒုက္ကဋဿ. အလသုဏေ ဝေမတိကာ ခါဒတိ၊ အာပတ္တိ ဒုက္ကဋဿ. အလသုဏေ အလသုဏသညာ ခါဒတိ၊ အနာပတ္တိ.

၇၉၇. အနာပတ္တိ ပလဏ္ဍုကေ၊ ဘဉ္ဇနကေ၊ ဟရီတကေ၊ စာပလသုဏေ၊ သူပသမ္ပာကေ၊ မံသသမ္ပာကေ၊ တေလသမ္ပာကေ၊ သာဠဝေ၊ ဥတ္တရိဘင်္ဂေ၊ ဥမ္မတ္တိကာယ၊ အာဒိကမ္မိကာယာတိ.

ပဌမသိက္ခာပဒံ နိဋ္ဌိတံ.

၂. ဒုတိယသိက္ခာပဒံ

၇၉၈. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ. တေန ခေါ ပန သမယေန ဆဗ္ဗဂ္ဂိယာ ဘိက္ခုနိယော သမ္ဗာဓေ လောမံ သံဟရာပေတွာ အစိရဝတိယာ နဒိယာ ဝေသိယာဟိ သဒ္ဓိံ နဂ္ဂါ ဧကတိတ္ထေ နဟာယန္တိ. ဝေသိယာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနိယော သမ္ဗာဓေ လောမံ သံဟရာပေဿန္တိ၊ သေယျထာပိ ဂိဟိနိယော ကာမဘောဂိနိယော’’တိ! အဿောသုံ ခေါ ဘိက္ခုနိယော တာသံ ဝေသိယာနံ ဥဇ္ဈာယန္တီနံ ခိယျန္တီနံ ဝိပါစေန္တီနံ. ယာ တာ ဘိက္ခုနိယော အပ္ပိစ္ဆာ။ပေ။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဆဗ္ဗဂ္ဂိယာ ဘိက္ခုနိယော သမ္ဗာဓေ လောမံ သံဟရာပေဿန္တီ’’တိ။ပေ။ သစ္စံ ကိရ၊ ဘိက္ခဝေ၊ ဆဗ္ဗဂ္ဂိယာ ဘိက္ခုနိယော သမ္ဗာဓေ လောမံ သံဟရာပေန္တီတိ? ‘‘သစ္စံ၊ ဘဂဝါ’’တိ. ဝိဂရဟိ ဗုဒ္ဓေါ ဘဂဝါ။ပေ။ ကထဉှိ နာမ၊ ဘိက္ခဝေ၊ ဆဗ္ဗဂ္ဂိယာ ဘိက္ခုနိယော သမ္ဗာဓေ လောမံ သံဟရာပေဿန္တိ! နေတံ၊ ဘိက္ခဝေ၊ အပ္ပသန္နာနံ ဝါ ပသာဒါယ။ပေ။ ဧဝဉ္စ ပန၊ ဘိက္ခဝေ၊ ဘိက္ခုနိယော ဣမံ သိက္ခာပဒံ ဥဒ္ဒိသန္တု –

၇၉၉. ‘‘ယာ ပန ဘိက္ခုနီ သမ္ဗာဓေ လောမံ သံဟရာပေယျ၊ ပါစိတ္တိယ’’န္တိ.

၈၀၀. ယာ ပနာတိ ယာ ယာဒိသာ။ပေ။ ဘိက္ခုနီတိ။ပေ။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ.

သမ္ဗာဓော နာမ ဥဘော ဥပကစ္ဆကာ၊ မုတ္တကရဏံ.

သံဟရာပေယျာတိ ဧကမ္ပိ လောမံ သံဟရာပေတိ၊ အာပတ္တိ ပါစိတ္တိယဿ. ဗဟုကေပိ လောမေ သံဟရာပေတိ၊ အာပတ္တိ ပါစိတ္တိယဿ.

၈၀၁. အနာပတ္တိ အာဗာဓပစ္စယာ၊ ဥမ္မတ္တိကာယ၊ အာဒိကမ္မိကာယာတိ.

ဒုတိယသိက္ခာပဒံ နိဋ္ဌိတံ.

၃. တတိယသိက္ခာပဒံ

၈၀၂. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ. တေန ခေါ ပန သမယေန ဒွေ ဘိက္ခုနိယော အနဘိရတိယာ ပီဠိတာ ဩဝရကံ ပဝိသိတွာ တလဃာတကံ ကရောန္တိ. ဘိက္ခုနိယော တေန သဒ္ဒေန ဥပဓာဝိတွာ တာ ဘိက္ခုနိယော ဧတဒဝေါစုံ – ‘‘ကိဿ တုမှေ၊ အယျေ၊ ပုရိသေန သဒ္ဓိံ သမ္ပဒုဿထာ’’တိ? ‘‘န မယံ၊ အယျေ၊ ပုရိသေန သဒ္ဓိံ သမ္ပဒုဿာမာ’’တိ. ဘိက္ခုနီနံ ဧတမတ္ထံ အာရောစေသုံ. ယာ တာ ဘိက္ခုနိယော အပ္ပိစ္ဆာ။ပေ။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနိယော တလဃာတကံ ကရိဿန္တီ’’တိ။ပေ။ သစ္စံ ကိရ၊ ဘိက္ခဝေ၊ ဘိက္ခုနိယော တလဃာတကံ ကရောန္တီတိ? ‘‘သစ္စံ၊ ဘဂဝါ’’တိ. ဝိဂရဟိ ဗုဒ္ဓေါ ဘဂဝါ။ပေ။ ကထဉှိ နာမ၊ ဘိက္ခဝေ၊ ဘိက္ခုနိယော တလဃာတကံ ကရိဿန္တိ! နေတံ၊ ဘိက္ခဝေ၊ အပ္ပသန္နာနံ ဝါ ပသာဒါယ။ပေ။ ဧဝဉ္စ ပန၊ ဘိက္ခဝေ၊ ဘိက္ခုနိယော ဣမံ သိက္ခာပဒံ ဥဒ္ဒိသန္တု –

၈၀၃. ‘‘တလဃာတကေ ပါစိတ္တိယ’’န္တိ.

၈၀၄. တလဃာတကံ နာမ သမ္ဖဿံ သာဒိယန္တီ အန္တမသော ဥပ္ပလပတ္တေနပိ မုတ္တကရဏေ ပဟာရံ ဒေတိ၊ အာပတ္တိ ပါစိတ္တိယဿ.

၈၀၅. အနာပတ္တိ အာဗာဓပစ္စယာ၊ ဥမ္မတ္တိကာယ၊ အာဒိကမ္မိကာယာတိ.

တတိယသိက္ခာပဒံ နိဋ္ဌိတံ.

၄. စတုတ္ထသိက္ခာပဒံ

၈၀၆. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ. တေန ခေါ ပန သမယေန အညတရာ ပုရာဏရာဇောရောဓာ ဘိက္ခုနီသု ပဗ္ဗဇိတာ [အညတရော ပုရာဏရာဇောရောဓော ဘိက္ခုနီသု ပဗ္ဗဇိတော (သျာ.)] ဟောတိ. အညတရာ ဘိက္ခုနီ အနဘိရတိယာ ပီဠိတာ ယေန သာ ဘိက္ခုနီ တေနုပသင်္ကမိ၊ ဥပသင်္ကမိတွာ တံ ဘိက္ခုနိံ ဧတဒဝေါစ – ‘‘ရာဇာ ခေါ၊ အယျေ၊ တုမှေ စိရာစိရံ ဂစ္ဆတိ. ကထံ တုမှေ ဓာရေထာ’’တိ? ‘‘ဇတုမဋ္ဌကေန၊ အယျေ’’တိ. ‘‘ကိံ ဧတံ၊ အယျေ၊ ဇတုမဋ္ဌက’’န္တိ? အထ ခေါ သာ ဘိက္ခုနီ တဿာ ဘိက္ခုနိယာ ဇတုမဋ္ဌကံ အာစိက္ခိ. အထ ခေါ သာ ဘိက္ခုနီ ဇတုမဋ္ဌကံ အာဒိယိတွာ ဓောဝိတုံ ဝိဿရိတွာ ဧကမန္တံ ဆဍ္ဍေသိ. ဘိက္ခုနိယော မက္ခိကာဟိ သမ္ပရိကိဏ္ဏံ ပဿိတွာ ဧဝမာဟံသု – ‘‘ကဿိဒံ ကမ္မ’’န္တိ? သာ ဧဝမာဟ – ‘‘မယှိဒံ ကမ္မ’’န္တိ. ယာ တာ ဘိက္ခုနိယော အပ္ပိစ္ဆာ။ပေ။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနီ ဇတုမဋ္ဌကံ အာဒိယိဿတီ’’တိ။ပေ။ သစ္စံ ကိရ၊ ဘိက္ခဝေ၊ ဘိက္ခုနီ ဇတုမဋ္ဌကံ အာဒိယတီတိ [အာဒိယီတိ (က.)]? ‘‘သစ္စံ၊ ဘဂဝါ’’တိ. ဝိဂရဟိ ဗုဒ္ဓေါ ဘဂဝါ။ပေ။ ကထဉှိ နာမ၊ ဘိက္ခဝေ၊ ဘိက္ခုနီ ဇတုမဋ္ဌကံ အာဒိယိဿတိ! နေတံ၊ ဘိက္ခဝေ၊ အပ္ပသန္နာနံ ဝါ ပသာဒါယ။ပေ။ ဧဝဉ္စ ပန၊ ဘိက္ခဝေ၊ ဘိက္ခုနိယော ဣမံ သိက္ခာပဒံ ဥဒ္ဒိသန္တု –

၈၀၇. ‘‘ဇတုမဋ္ဌကေ [ဇတုမဋ္ဋကေ (သီ.)] ပါစိတ္တိယ’’န္တိ.

၈၀၈. ဇတုမဋ္ဌကံ နာမ ဇတုမယံ ကဋ္ဌမယံ ပိဋ္ဌမယံ မတ္တိကာမယံ.

အာဒိယေယျာတိ သမ္ဖဿံ သာဒိယန္တီ အန္တမသော ဥပ္ပလပတ္တမ္ပိ မုတ္တကရဏံ ပဝေသေတိ၊ အာပတ္တိ ပါစိတ္တိယဿ.

၈၀၉. အနာပတ္တိ အာဗာဓပစ္စယာ၊ ဥမ္မတ္တိကာယ၊ အာဒိကမ္မိကာယာတိ.

စတုတ္ထသိက္ခာပဒံ နိဋ္ဌိတံ.

၅. ပဉ္စမသိက္ခာပဒံ

၈၁၀. တေန သမယေန ဗုဒ္ဓေါ ဘဂဝါ သက္ကေသု ဝိဟရတိ ကပိလဝတ္ထုသ္မိံ နိဂြောဓာရာမေ. အထ ခေါ မဟာပဇာပတိ ဂေါတမီ ယေန ဘဂဝါ တေနုပသင်္ကမိ၊ ဥပသင်္ကမိတွာ ဘဂဝန္တံ အဘိဝါဒေတွာ အဓောဝါတေ အဋ္ဌာသိ – ‘‘ဒုဂ္ဂန္ဓော၊ ဘဂဝါ၊ မာတုဂါမော’’တိ. အထ ခေါ ဘဂဝါ – ‘‘အာဒိယန္တု ခေါ ဘိက္ခုနိယော ဥဒကသုဒ္ဓိက’’န္တိ၊ မဟာပဇာပတိံ ဂေါတမိံ ဓမ္မိယာ ကထာယ သန္ဒဿေသိ သမာဒပေသိ သမုတ္တေဇေသိ သမ္ပဟံသေသိ. အထ ခေါ မဟာပဇာပတိ ဂေါတမီ ဘဂဝတာ ဓမ္မိယာ ကထာယ သန္ဒဿိတာ သမာဒပိတာ သမုတ္တေဇိတာ သမ္ပဟံသိတာ ဘဂဝန္တံ အဘိဝါဒေတွာ ပဒက္ခိဏံ ကတွာ ပက္ကာမိ. အထ ခေါ ဘဂဝါ ဧတသ္မိံ နိဒါနေ ဧတသ္မိံ ပကရဏေ ဓမ္မိံ ကထံ ကတွာ ဘိက္ခူ အာမန္တေသိ – ‘‘အနုဇာနာမိ၊ ဘိက္ခဝေ၊ ဘိက္ခုနီနံ ဥဒကသုဒ္ဓိက’’န္တိ. တေန ခေါ ပန သမယေန အညတရာ ဘိက္ခုနီ – ‘‘ဘဂဝတာ ဥဒကသုဒ္ဓိကာ အနုညာတာ’’တိ အတိဂမ္ဘီရံ ဥဒကသုဒ္ဓိကံ အာဒိယန္တီ မုတ္တကရဏေ ဝဏံ အကာသိ. အထ ခေါ သာ ဘိက္ခုနီ ဘိက္ခုနီနံ ဧတမတ္ထံ အာရောစေတိ. ယာ တာ ဘိက္ခုနိယော အပ္ပိစ္ဆာ။ပေ။ တာ ဥဇ္ဈာယန္တိ ခိယျန္တိ ဝိပါစေန္တိ – ကထဉှိ နာမ ဘိက္ခုနီ အတိဂမ္ဘီရံ ဥဒကသုဒ္ဓိကံ အာဒိယိဿတီတိ။ပေ။ သစ္စံ ကိရ၊ ဘိက္ခဝေ၊ ဘိက္ခုနီ အတိဂမ္ဘီရံ ဥဒကသုဒ္ဓိကံ အာဒိယတီ’’တိ [အာဒိယီတိ (က.)]? ‘‘သစ္စံ၊ ဘဂဝါ’’တိ. ဝိဂရဟိ ဗုဒ္ဓေါ ဘဂဝါ။ပေ။ ကထဉှိ နာမ၊ ဘိက္ခဝေ၊ ဘိက္ခုနီ အတိဂမ္ဘီရံ ဥဒကသုဒ္ဓိကံ အာဒိယိဿတိ! နေတံ၊ ဘိက္ခဝေ၊ အပ္ပသန္နာနံ ဝါ ပသာဒါယ။ပေ။ ဧဝဉ္စ ပန၊ ဘိက္ခဝေ၊ ဘိက္ခုနိယော ဣမံ သိက္ခာပဒံ ဥဒ္ဒိသန္တု –

၈၁၁. ‘‘ဥဒကသုဒ္ဓိကံ ပန ဘိက္ခုနိယာ အာဒိယမာနာယ ဒွင်္ဂုလပဗ္ဗပရမံ အာဒါတဗ္ဗံ. တံ အတိက္ကာမေန္တိယာ ပါစိတ္တိယ’’န္တိ.

၈၁၂. ဥဒကသုဒ္ဓိကံ နာမ မုတ္တကရဏဿ ဓောဝနာ ဝုစ္စတိ.

အာဒိယမာနာယာတိ ဓောဝန္တိယာ.

ဒွင်္ဂုလပဗ္ဗပရမံ အာဒါတဗ္ဗန္တိ ဒွီသု အင်္ဂုလေသု ဒွေ ပဗ္ဗပရမာ အာဒါတဗ္ဗာ.

တံ အတိက္ကာမေန္တိယာတိ သမ္ဖဿံ သာဒိယန္တီ အန္တမသော ကေသဂ္ဂမတ္တမ္ပိ အတိက္ကာမေတိ၊ အာပတ္တိ ပါစိတ္တိယဿ.

၈၁၃. အတိရေကဒွင်္ဂုလပဗ္ဗေ အတိရေကသညာ အာဒိယတိ၊ အာပတ္တိ ပါစိတ္တိယဿ. အတိရေကဒွင်္ဂုလပဗ္ဗေ ဝေမတိကာ အာဒိယတိ၊ အာပတ္တိ ပါစိတ္တိယဿ. အတိရေကဒွင်္ဂုလပဗ္ဗေ ဦနကသညာ အာဒိယတိ၊ အာပတ္တိ ပါစိတ္တိယဿ.

ဦနကဒွင်္ဂုလပဗ္ဗေ အတိရေကသညာ၊ အာပတ္တိ ဒုက္ကဋဿ. ဦနကဒွင်္ဂုလပဗ္ဗေ ဝေမတိကာ၊ အာပတ္တိ ဒုက္ကဋဿ. ဦနကဒွင်္ဂုလပဗ္ဗေ ဦနကသညာ၊ အနာပတ္တိ.

၈၁၄. အနာပတ္တိ ဒွင်္ဂုလပဗ္ဗပရမံ အာဒိယတိ၊ ဦနကဒွင်္ဂုလပဗ္ဗပရမံ အာဒိယတိ၊ အာဗာဓပစ္စယာ၊ ဥမ္မတ္တိကာယ၊ အာဒိကမ္မိကာယာတိ.

ပဉ္စမသိက္ခာပဒံ နိဋ္ဌိတံ.

၆. ဆဋ္ဌသိက္ခာပဒံ

၈၁၅. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ. တေန ခေါ ပန သမယေန အာရောဟန္တော နာမ မဟာမတ္တော ဘိက္ခူသု ပဗ္ဗဇိတော ဟောတိ. တဿ ပုရာဏဒုတိယိကာ ဘိက္ခုနီသု ပဗ္ဗဇိတာ ဟောတိ. တေန ခေါ ပန သမယေန သော ဘိက္ခု တဿာ ဘိက္ခုနိယာ သန္တိကေ ဘတ္တဝိဿဂ္ဂံ ကရောတိ. အထ ခေါ သာ ဘိက္ခုနီ တဿ ဘိက္ခုနော ဘုဉ္ဇန္တဿ ပါနီယေန စ ဝိဓူပနေန စ ဥပတိဋ္ဌိတွာ အစ္စာဝဒတိ. အထ ခေါ သော ဘိက္ခု တံ ဘိက္ခုနိံ အပသာဒေတိ – ‘‘မာ၊ ဘဂိနိ၊ ဧဝရူပံ အကာသိ. နေတံ ကပ္ပတီ’’တိ. ‘‘ပုဗ္ဗေ မံ တွံ ဧဝဉ္စ ဧဝဉ္စ ကရောသိ၊ ဣဒါနိ ဧတ္တကံ န သဟသီ’’တိ – ပါနီယထာလကံ မတ္ထကေ အာသုမ္ဘိတွာ ဝိဓူပနေန ပဟာရံ အဒါသိ. ယာ တာ ဘိက္ခုနိယော အပ္ပိစ္ဆာ။ပေ။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနီ ဘိက္ခုဿ ပဟာရံ ဒဿတီ’’တိ။ပေ။ သစ္စံ ကိရ၊ ဘိက္ခဝေ၊ ဘိက္ခုနီ ဘိက္ခုဿ ပဟာရံ အဒါသီတိ? ‘‘သစ္စံ၊ ဘဂဝါ’’တိ. ဝိဂရဟိ ဗုဒ္ဓေါ ဘဂဝါ။ပေ။ ကထဉှိ နာမ၊ ဘိက္ခဝေ၊ ဘိက္ခုနီ ဘိက္ခုဿ ပဟာရံ ဒဿတိ! နေတံ၊ ဘိက္ခဝေ၊ အပ္ပသန္နာနံ ဝါ ပသာဒါယ။ပေ။ ဧဝဉ္စ ပန၊ ဘိက္ခဝေ၊ ဘိက္ခုနိယော ဣမံ သိက္ခာပဒံ ဥဒ္ဒိသန္တု –

၈၁၆. ‘‘ယာ ပန ဘိက္ခုနီ ဘိက္ခုဿ ဘုဉ္ဇန္တဿ ပါနီယေန ဝါ ဝိဓူပနေန ဝါ ဥပတိဋ္ဌေယျ၊ ပါစိတ္တိယ’’န္တိ.

၈၁၇. ယာ ပနာတိ ယာ ယာဒိသာ။ပေ။ ဘိက္ခုနီတိ။ပေ။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ.

ဘိက္ခုဿာတိ ဥပသမ္ပန္နဿ.

ဘုဉ္ဇန္တဿာတိ ပဉ္စန္နံ ဘောဇနာနံ အညတရံ ဘောဇနံ ဘုဉ္ဇန္တဿ.

ပါနီယံ နာမ ယံ ကိဉ္စိ ပါနီယံ.

ဝိဓူပနံ နာမ ယာ ကာစိ ဗီဇနီ.

ဥပတိဋ္ဌေယျာတိ ဟတ္ထပါသေ တိဋ္ဌတိ၊ အာပတ္တိ ပါစိတ္တိယဿ.

၈၁၈. ဥပသမ္ပန္နေ ဥပသမ္ပန္နသညာ ပါနီယေန ဝါ ဝိဓူပနေန ဝါ ဥပတိဋ္ဌတိ၊ အာပတ္တိ ပါစိတ္တိယဿ. ဥပသမ္ပန္နေ ဝေမတိကာ ပါနီယေန ဝါ ဝိဓူပနေန ဝါ ဥပတိဋ္ဌတိ၊ အာပတ္တိ ပါစိတ္တိယဿ. ဥပသမ္ပန္နေ အနုပသမ္ပန္နသညာ ပါနီယေန ဝါ ဝိဓူပနေန ဝါ ဥပတိဋ္ဌတိ၊ အာပတ္တိ ပါစိတ္တိယဿ.

ဟတ္ထပါသံ ဝိဇဟိတွာ ဥပတိဋ္ဌတိ၊ အာပတ္တိ ဒုက္ကဋဿ. ခါဒနီယံ ခါဒန္တဿ ဥပတိဋ္ဌတိ၊ အာပတ္တိ ဒုက္ကဋဿ. အနုပသမ္ပန္နဿ ဥပတိဋ္ဌတိ၊ အာပတ္တိ ဒုက္ကဋဿ. အနုပသမ္ပန္နေ ဥပသမ္ပန္နသညာ၊ အာပတ္တိ ဒုက္ကဋဿ. အနုပသမ္ပန္နေ ဝေမတိကာ၊ အာပတ္တိ ဒုက္ကဋဿ. အနုပသမ္ပန္နေ အနုပသမ္ပန္နသညာ၊ အာပတ္တိ ဒုက္ကဋဿ.

၈၁၉. အနာပတ္တိ ဒေတိ၊ ဒါပေတိ၊ အနုပသမ္ပန္နံ အာဏာပေတိ၊ ဥမ္မတ္တိကာယ၊ အာဒိကမ္မိကာယာတိ.

ဆဋ္ဌသိက္ခာပဒံ နိဋ္ဌိတံ.

၇. သတ္တမသိက္ခာပဒံ

၈၂၀. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ. တေန ခေါ ပန သမယေန ဘိက္ခုနိယော သဿကာလေ အာမကဓညံ ဝိညာပေတွာ နဂရံ အတိဟရန္တိ ဒွါရဋ္ဌာနေ – ‘‘ဒေထာယျေ၊ ဘာဂ’’န္တိ. ပလိဗုန္ဓေတွာ မုဉ္စိံသု. အထ ခေါ တာ ဘိက္ခုနိယော ဥပဿယံ ဂန္တွာ ဘိက္ခုနီနံ ဧတမတ္ထံ အာရောစေသုံ. ယာ တာ ဘိက္ခုနိယော အပ္ပိစ္ဆာ။ပေ။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနိယော အာမကဓညံ ဝိညာပေဿန္တီ’’တိ။ပေ။ သစ္စံ ကိရ၊ ဘိက္ခဝေ၊ ဘိက္ခုနိယော အာမကဓညံ ဝိညာပေန္တီတိ? ‘‘သစ္စံ၊ ဘဂဝါ’’တိ. ဝိဂရဟိ ဗုဒ္ဓေါ ဘဂဝါ။ပေ။ ကထဉှိ နာမ၊ ဘိက္ခဝေ၊ ဘိက္ခုနိယော အာမကဓညံ ဝိညာပေဿန္တိ! နေတံ၊ ဘိက္ခဝေ၊ အပ္ပသန္နာနံ ဝါ ပသာဒါယ။ပေ။ ဧဝဉ္စ ပန၊ ဘိက္ခဝေ၊ ဘိက္ခုနိယော ဣမံ သိက္ခာပဒံ ဥဒ္ဒိသန္တု –

၈၂၁. ‘‘ယာ ပန ဘိက္ခုနီ အာမကဓညံ ဝိညတွာ ဝါ ဝိညာပေတွာ ဝါ ဘဇ္ဇိတွာ ဝါ ဘဇ္ဇာပေတွာ ဝါ ကောဋ္ဋေတွာ ဝါ ကောဋ္ဋာပေတွာ ဝါ ပစိတွာ ဝါ ပစာပေတွာ ဝါ ဘုဉ္ဇေယျ၊ ပါစိတ္တိယ’’န္တိ.

၈၂၂. ယာ ပနာတိ ယာ ယာဒိသာ။ပေ။ ဘိက္ခုနီတိ။ပေ။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ.

အာမကဓညံ နာမ သာလိ ဝီဟိ ယဝေါ ဂေါဓုမော ကင်္ဂု ဝရကော ကုဒြုသကော.

ဝိညတွာတိ သယံ ဝိညတွာ. ဝိညာပေတွာတိ အညံ ဝိညာပေတွာ.

ဘဇ္ဇိတွာတိ သယံ ဘဇ္ဇိတွာ. ဘဇ္ဇာပေတွာတိ အညံ ဘဇ္ဇာပေတွာ.

ကောဋ္ဋေတွာတိ သယံ ကောဋ္ဋေတွာ. ကောဋ္ဋာပေတွာတိ အညံ ကောဋ္ဋာပေတွာ.

ပစိတွာတိ သယံ ပစိတွာ. ပစာပေတွာတိ အညံ ပစာပေတွာ.

‘‘ဘုဉ္ဇိဿာမီ’’တိ ပဋိဂ္ဂဏှာတိ၊ အာပတ္တိ ဒုက္ကဋဿ. အဇ္ဈောဟာရေ အဇ္ဈောဟာရေ အာပတ္တိ ပါစိတ္တိယဿ.

၈၂၃. အနာပတ္တိ အာဗာဓပစ္စယာ၊ အပရဏ္ဏံ ဝိညာပေတိ၊ ဥမ္မတ္တိကာယ၊ အာဒိကမ္မိကာယာတိ.

သတ္တမသိက္ခာပဒံ နိဋ္ဌိတံ.

၈. အဋ္ဌမသိက္ခာပဒံ

၈၂၄. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ. တေန ခေါ ပန သမယေန အညတရော ဗြာဟ္မဏော နိဗ္ဗိဋ္ဌရာဇဘဋော ‘‘တညေဝ ဘဋပထံ ယာစိဿာမီ’’တိ သီသံ နဟာယိတွာ ဘိက္ခုနုပဿယံ နိဿာယ ရာဇကုလံ ဂစ္ဆတိ. အညတရာ ဘိက္ခုနီ ကဋာဟေ ဝစ္စံ ကတွာ တိရောကုဋ္ဋေ ဆဍ္ဍေန္တီ တဿ ဗြာဟ္မဏဿ မတ္ထကေ အာသုမ္ဘိ. အထ ခေါ သော ဗြာဟ္မဏော ဥဇ္ဈာယတိ ခိယျတိ ဝိပါစေတိ – ‘‘အဿမဏိယော ဣမာ မုဏ္ဍာ ဗန္ဓကိနိယော. ကထဉှိ နာမ ဂူထကဋာဟံ မတ္ထကေ အာသုမ္ဘိဿန္တိ! ဣမာသံ ဥပဿယံ ဈာပေဿာမီ’’တိ! ဥမ္မုကံ ဂဟေတွာ ဥပဿယံ ပဝိသတိ. အညတရော ဥပါသကော ဥပဿယာ နိက္ခမန္တော အဒ္ဒသ တံ ဗြာဟ္မဏံ ဥမ္မုကံ ဂဟေတွာ ဥပဿယံ ပဝိသန္တံ. ဒိသွာန တံ ဗြာဟ္မဏံ ဧတဒဝေါစ – ‘‘ကိဿ တွံ၊ ဘော၊ ဥမ္မုကံ ဂဟေတွာ ဥပဿယံ ပဝိသသီ’’တိ? ‘‘ဣမာ မံ၊ ဘော၊ မုဏ္ဍာ ဗန္ဓကိနိယော ဂူထကဋာဟံ မတ္ထကေ အာသုမ္ဘိံသု. ဣမာသံ ဥပဿယံ ဈာပေဿာမီ’’တိ. ‘‘ဂစ္ဆ၊ ဘော ဗြာဟ္မဏ၊ မင်္ဂလံ ဧတံ. သဟဿံ လစ္ဆသိ တဉ္စ ဘဋပထ’’န္တိ. အထ ခေါ သော ဗြာဟ္မဏော သီသံ နဟာယိတွာ ရာဇကုလံ ဂန္တွာ သဟဿံ အလတ္ထ တဉ္စ ဘဋပထံ. အထ ခေါ သော ဥပါသကော ဥပဿယံ ပဝိသိတွာ ဘိက္ခုနီနံ ဧတမတ္ထံ အာရောစေတွာ ပရိဘာသိ. ယာ တာ ဘိက္ခုနိယော အပ္ပိစ္ဆာ။ပေ။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနိယော ဥစ္စာရံ တိရောကုဋ္ဋေ ဆဍ္ဍေဿန္တီ’’တိ။ပေ။ သစ္စံ ကိရ၊ ဘိက္ခဝေ၊ ဘိက္ခုနိယော ဥစ္စာရံ တိရောကုဋ္ဋေ ဆဍ္ဍေန္တီတိ? ‘‘သစ္စံ၊ ဘဂဝါ’’တိ. ဝိဂရဟိ ဗုဒ္ဓေါ ဘဂဝါ။ပေ။ ကထဉှိ နာမ၊ ဘိက္ခဝေ၊ ဘိက္ခုနိယော ဥစ္စာရံ တိရောကုဋ္ဋေ ဆဍ္ဍေဿန္တိ! နေတံ၊ ဘိက္ခဝေ၊ အပ္ပသန္နာနံ ဝါ ပသာဒါယ။ပေ။ ဧဝဉ္စ ပန၊ ဘိက္ခဝေ၊ ဘိက္ခုနိယော ဣမံ သိက္ခာပဒံ ဥဒ္ဒိသန္တု –

၈၂၅. ‘‘ယာ ပန ဘိက္ခုနီ ဥစ္စာရံ ဝါ ပဿာဝံ ဝါ သင်္ကာရံ ဝါ ဝိဃာသံ ဝါ တိရောကုဋ္ဋေ ဝါ တိရောပါကာရေ ဝါ ဆဍ္ဍေယျ ဝါ ဆဍ္ဍာပေယျ ဝါ၊ ပါစိတ္တိယ’’န္တိ.

၈၂၆. ယာ ပနာတိ ယာ ယာဒိသာ။ပေ။ ဘိက္ခုနီတိ။ပေ။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ.

ဥစ္စာရော နာမ ဂူထော ဝုစ္စတိ. ပဿာဝေါ နာမ မုတ္တံ ဝုစ္စတိ.

သင်္ကာရံ နာမ ကစဝရံ ဝုစ္စတိ.

ဝိဃာသံ နာမ စလကာနိ ဝါ အဋ္ဌိကာနိ ဝါ ဥစ္ဆိဋ္ဌောဒကံ ဝါ.

ကုဋ္ဋော နာမ တယော ကုဋ္ဋာ – ဣဋ္ဌကာကုဋ္ဋော၊ သိလာကုဋ္ဋော၊ ဒါရုကုဋ္ဋော.

ပါကာရော နာမ တယော ပါကာရာ – ဣဋ္ဌကာပါကာရော၊ သိလာပါကာရော၊ ဒါရုပါကာရော.

တိရောကုဋ္ဋေတိ ကုဋ္ဋဿ ပရတော. တိရောပါကာရေတိ ပါကာရဿ ပရတော.

ဆဍ္ဍေယျာတိ သယံ ဆဍ္ဍေတိ၊ အာပတ္တိ ပါစိတ္တိယဿ.

ဆဍ္ဍာပေယျာတိ အညံ အာဏာပေတိ၊ အာပတ္တိ ဒုက္ကဋဿ. သကိံ အာဏတ္တာ ဗဟုကမ္ပိ ဆဍ္ဍေတိ၊ အာပတ္တိ ပါစိတ္တိယဿ.

၈၂၇. အနာပတ္တိ ဩလောကေတွာ ဆဍ္ဍေတိ၊ အဝဠဉ္ဇေ ဆဍ္ဍေတိ၊ ဥမ္မတ္တိကာယ၊ အာဒိကမ္မိကာယာတိ.

အဋ္ဌမသိက္ခာပဒံ နိဋ္ဌိတံ.

၉. နဝမသိက္ခာပဒံ

၈၂၈. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ. တေန ခေါ ပန သမယေန အညတရဿ ဗြာဟ္မဏဿ ဘိက္ခုနူပဿယံ နိဿာယ ယဝခေတ္တံ ဟောတိ. ဘိက္ခုနိယော ဥစ္စာရမ္ပိ ပဿာဝမ္ပိ သင်္ကာရမ္ပိ ဝိဃာသမ္ပိ ခေတ္တေ ဆဍ္ဍေန္တိ. အထ ခေါ သော ဗြာဟ္မဏော ဥဇ္ဈာယတိ ခိယျတိ ဝိပါစေတိ – ‘‘ကထဉှိ နာမ ဘိက္ခုနိယော အမှာကံ ယဝခေတ္တံ ဒူသေဿန္တီ’’တိ! အဿောသုံ ခေါ ဘိက္ခုနိယော တဿ ဗြာဟ္မဏဿ ဥဇ္ဈာယန္တဿ ခိယျန္တဿ ဝိပါစေန္တဿ. ယာ တာ ဘိက္ခုနိယော အပ္ပိစ္ဆာ။ပေ။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနိယော ဥစ္စာရမ္ပိ ပဿာဝမ္ပိ သင်္ကာရမ္ပိ ဝိဃာသမ္ပိ ဟရိတေ ဆဍ္ဍေဿန္တီ’’တိ။ပေ။ သစ္စံ ကိရ၊ ဘိက္ခဝေ၊ ဘိက္ခုနိယော ဥစ္စာရမ္ပိ ပဿာဝမ္ပိ သင်္ကာရမ္ပိ ဝိဃာသမ္ပိ ဟရိတေ ဆဍ္ဍေန္တီတိ? ‘‘သစ္စံ၊ ဘဂဝါ’’တိ. ဝိဂရဟိ ဗုဒ္ဓေါ ဘဂဝါ။ပေ။ ကထဉှိ နာမ၊ ဘိက္ခဝေ၊ ဘိက္ခုနိယော ဥစ္စာရမ္ပိ ပဿာဝမ္ပိ သင်္ကာရမ္ပိ ဝိဃာသမ္ပိ ဟရိတေ ဆဍ္ဍေဿန္တိ! နေတံ၊ ဘိက္ခဝေ၊ အပ္ပသန္နာနံ ဝါ ပသာဒါယ။ပေ။ ဧဝဉ္စ ပန၊ ဘိက္ခဝေ၊ ဘိက္ခုနိယော ဣမံ သိက္ခာပဒံ ဥဒ္ဒိသန္တု –

၈၂၉. ‘‘ယာ ပန ဘိက္ခုနီ ဥစ္စာရံ ဝါ ပဿာဝံ ဝါ သင်္ကာရံ ဝါ ဝိဃာသံ ဝါ ဟရိတေ ဆဍ္ဍေယျ ဝါ ဆဍ္ဍာပေယျ ဝါ၊ ပါစိတ္တိယ’’န္တိ.

၈၃၀. ယာ ပနာတိ ယာ ယာဒိသာ။ပေ။ ဘိက္ခုနီတိ။ပေ။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ.

ဥစ္စာရော နာမ ဂူထော ဝုစ္စတိ. ပဿာဝေါ နာမ မုတ္တံ ဝုစ္စတိ.

သင်္ကာရံ နာမ ကစဝရံ ဝုစ္စတိ.

ဝိဃာသံ နာမ စလကာနိ ဝါ အဋ္ဌိကာနိ ဝါ ဥစ္ဆိဋ္ဌောဒကံ ဝါ.

ဟရိတံ နာမ ပုဗ္ဗဏ္ဏံ အပရဏ္ဏံ ယံ မနုဿာနံ ဥပဘောဂပရိဘောဂံ ရောပိမံ.

ဆဍ္ဍေယျာတိ သယံ ဆဍ္ဍေတိ၊ အာပတ္တိ ပါစိတ္တိယဿ.

ဆဍ္ဍာပေယျာတိ အညံ အာဏာပေတိ၊ အာပတ္တိ ဒုက္ကဋဿ. သကိံ အာဏတ္တာ ဗဟုကမ္ပိ ဆဍ္ဍေတိ၊ အာပတ္တိ ပါစိတ္တိယဿ.

၈၃၁. ဟရိတေ ဟရိတသညာ ဆဍ္ဍေတိ ဝါ ဆဍ္ဍာပေတိ ဝါ၊ အာပတ္တိ ပါစိတ္တိယဿ. ဟရိတေ ဝေမတိကာ ဆဍ္ဍေတိ ဝါ ဆဍ္ဍာပေတိ ဝါ၊ အာပတ္တိ ပါစိတ္တိယဿ. ဟရိတေ အဟရိတသညာ ဆဍ္ဍေတိ ဝါ ဆဍ္ဍာပေတိ ဝါ၊ အာပတ္တိ ပါစိတ္တိယဿ.

အဟရိတေ ဟရိတသညာ၊ အာပတ္တိ ဒုက္ကဋဿ. အဟရိတေ ဝေမတိကာ၊ အာပတ္တိ ဒုက္ကဋဿ. အဟရိတေ အဟရိတသညာ၊ အနာပတ္တိ.

၈၃၂. အနာပတ္တိ ဩလောကေတွာ ဆဍ္ဍေတိ၊ ခေတ္တမရိယာဒေ [ဆဍ္ဍိတခေတ္တေ (?) အဋ္ဌကထာ ဩလောကေတဗ္ဗာ] ဆဍ္ဍေတိ သာမိကေ အာပုစ္ဆိတွာ အပလောကေတွာ ဆဍ္ဍေတိ၊ ဥမ္မတ္တိကာယ၊ အာဒိကမ္မိကာယာတိ.

နဝမသိက္ခာပဒံ နိဋ္ဌိတံ.

၁၀. ဒသမသိက္ခာပဒံ

၈၃၃. တေန သမယေန ဗုဒ္ဓေါ ဘဂဝါ ရာဇဂဟေ ဝိဟရတိ ဝေဠုဝနေ ကလန္ဒကနိဝါပေ. တေန ခေါ ပန သမယေန ရာဇဂဟေ ဂိရဂ္ဂသမဇ္ဇော ဟောတိ. ဆဗ္ဗဂ္ဂိယာ ဘိက္ခုနိယော ဂိရဂ္ဂသမဇ္ဇံ ဒဿနာယ အဂမံသု. မနုဿာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနိယော နစ္စမ္ပိ ဂီတမ္ပိ ဝါဒိတမ္ပိ ဒဿနာယ ဂစ္ဆိဿန္တိ၊ သေယျထာပိ ဂိဟိနိယော ကာမဘောဂိနိယော’’တိ! အဿောသုံ ခေါ ဘိက္ခုနိယော တေသံ မနုဿာနံ ဥဇ္ဈာယန္တာနံ ခိယျန္တာနံ ဝိပါစေန္တာနံ. ယာ တာ ဘိက္ခုနိယော အပ္ပိစ္ဆာ။ပေ။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဆဗ္ဗဂ္ဂိယာ ဘိက္ခုနိယော နစ္စမ္ပိ ဂီတမ္ပိ ဝါဒိတမ္ပိ ဒဿနာယ ဂစ္ဆိဿန္တီ’’တိ။ပေ။ သစ္စံ ကိရ၊ ဘိက္ခဝေ၊ ဆဗ္ဗဂ္ဂိယာ ဘိက္ခုနိယော နစ္စမ္ပိ ဂီတမ္ပိ ဝါဒိတမ္ပိ ဒဿနာယ ဂစ္ဆန္တီတိ? ‘‘သစ္စံ၊ ဘဂဝါ’’တိ. ဝိဂရဟိ ဗုဒ္ဓေါ ဘဂဝါ။ပေ။ ကထဉှိ နာမ၊ ဘိက္ခဝေ၊ ဆဗ္ဗဂ္ဂိယာ ဘိက္ခုနိယော နစ္စမ္ပိ ဂီတမ္ပိ ဝါဒိတမ္ပိ ဒဿနာယ ဂစ္ဆိဿန္တိ! နေတံ၊ ဘိက္ခဝေ၊ အပ္ပသန္နာနံ ဝါ ပသာဒါယ။ပေ။ ဧဝဉ္စ ပန၊ ဘိက္ခဝေ၊ ဘိက္ခုနိယော ဣမံ သိက္ခာပဒံ ဥဒ္ဒိသန္တု –

၈၃၄. ‘‘ယာ ပန ဘိက္ခုနီ နစ္စံ ဝါ ဂီတံ ဝါ ဝါဒိတံ ဝါ ဒဿနာယ ဂစ္ဆေယျ၊ ပါစိတ္တိယ’’န္တိ.

၈၃၅. ယာ ပနာတိ ယာ ယာဒိသာ။ပေ။ ဘိက္ခုနီတိ။ပေ။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ.

နစ္စံ နာမ ယံ ကိဉ္စိ နစ္စံ. ဂီတံ နာမ ယံ ကိဉ္စိ ဂီတံ. ဝါဒိတံ နာမ ယံ ကိဉ္စိ ဝါဒိတံ.

၈၃၆. ဒဿနာယ ဂစ္ဆတိ၊ အာပတ္တိ ဒုက္ကဋဿ. ယတ္ထ ဌိတာ ပဿတိ ဝါ သုဏာတိ ဝါ၊ အာပတ္တိ ပါစိတ္တိယဿ. ဒဿနူပစာရံ ဝိဇဟိတွာ ပုနပ္ပုနံ ပဿတိ ဝါ သုဏာတိ ဝါ၊ အာပတ္တိ ပါစိတ္တိယဿ. ဧကမေကံ ဒဿနာယ ဂစ္ဆတိ၊ အာပတ္တိ ဒုက္ကဋဿ. ယတ္ထ ဌိတာ ပဿတိ ဝါ သုဏာတိ ဝါ၊ အာပတ္တိ ပါစိတ္တိယဿ. ဒဿနူပစာရံ ဝိဇဟိတွာ ပုနပ္ပုနံ ပဿတိ ဝါ သုဏာတိ ဝါ၊ အာပတ္တိ ပါစိတ္တိယဿ.

၈၃၇. အနာပတ္တိ အာရာမေ ဌိတာ ပဿတိ ဝါ သုဏာတိ ဝါ၊ ဘိက္ခုနိယာ ဌိတောကာသံ ဝါ နိသိန္နောကာသံ ဝါ နိပန္နောကာသံ ဝါ အာဂန္တွာ နစ္စန္တိ ဝါ ဂါယန္တိ ဝါ ဝါဒေန္တိ ဝါ၊ ပဋိပထံ ဂစ္ဆန္တီ ပဿတိ ဝါ သုဏာတိ ဝါ၊ သတိ ကရဏီယေ ဂန္တွာ ပဿတိ ဝါ သုဏာတိ ဝါ၊ အာပဒါသု၊ ဥမ္မတ္တိကာယ၊ အာဒိကမ္မိကာယာတိ.

ဒသမသိက္ခာပဒံ နိဋ္ဌိတံ.

လသုဏဝဂ္ဂေါ ပဌမော.