၆. ဆဋ္ဌသိက္ခာပဒံ

၇၅၈. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ. တေန ခေါ ပန သမယေန ဥပါသကာ ဘိက္ခုနိသံဃဿ စီဝရတ္ထာယ ဆန္ဒကံ သင်္ဃရိတွာ အညတရဿ ပါဝါရိကဿ ဃရေ ပရိက္ခာရံ နိက္ခိပိတွာ ဘိက္ခုနိယော ဥပသင်္ကမိတွာ ဧတဒဝေါစုံ – ‘‘အမုကဿ၊ အယျေ၊ ပါဝါရိကဿ ဃရေ စီဝရတ္ထာယ ပရိက္ခာရော နိက္ခိတ္တော၊ တတော စီဝရံ အာဟရာပေတွာ ဘာဇေထာ’’တိ. ဘိက္ခုနိယော တေန ပရိက္ခာရေန ဘေသဇ္ဇံ စေတာပေတွာ ပရိဘုဉ္ဇိံသု. ဥပါသကာ ဇာနိတွာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနိယော အညဒတ္ထိကေန ပရိက္ခာရေန အညုဒ္ဒိသိကေန သံဃိကေန အညံ စေတာပေဿန္တီ’’တိ! အဿောသုံ ခေါ ဘိက္ခုနိယော တေသံ ဥပါသကာနံ ဥဇ္ဈာယန္တာနံ ခိယျန္တာနံ ဝိပါစေန္တာနံ. ယာ တာ ဘိက္ခုနိယော အပ္ပိစ္ဆာ ။ပေ။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခုနိယော အညဒတ္ထိကေန ပရိက္ခာရေန အညုဒ္ဒိသိကေန သံဃိကေန အညံ စေတာပေဿန္တီ’’တိ။ပေ။ သစ္စံ ကိရ၊ ဘိက္ခဝေ၊ ဘိက္ခုနိယော အညဒတ္ထိကေန ပရိက္ခာရေန အညုဒ္ဒိသိကေန သံဃိကေန အညံ စေတာပေန္တီတိ? ‘‘သစ္စံ၊ ဘဂဝါ’’တိ. ဝိဂရဟိ ဗုဒ္ဓေါ ဘဂဝါ။ပေ။ ကထဉှိ နာမ၊ ဘိက္ခဝေ၊ ဘိက္ခုနိယော အညဒတ္ထိကေန ပရိက္ခာရေန အညုဒ္ဒိသိကေန သံဃိကေန အညံ စေတာပေဿန္တိ! နေတံ၊ ဘိက္ခဝေ၊ အပ္ပသန္နာနံ ဝါ ပသာဒါယ။ပေ။ ဧဝဉ္စ ပန၊ ဘိက္ခဝေ၊ ဘိက္ခုနိယော ဣမံ သိက္ခာပဒံ ဥဒ္ဒိသန္တု –

၇၅၉. ‘‘ယာ ပန ဘိက္ခုနီ အညဒတ္ထိကေန ပရိက္ခာရေန အညုဒ္ဒိသိကေန သံဃိကေန အညံ စေတာပေယျ၊ နိဿဂ္ဂိယံ ပါစိတ္တိယ’’န္တိ.

၇၆၀. ယာ ပနာတိ ယာ ယာဒိသာ။ပေ။ ဘိက္ခုနီတိ။ပေ။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ.

အညဒတ္ထိကေန ပရိက္ခာရေန အညုဒ္ဒိသိကေနာတိ အညဿတ္ထာယ ဒိန္နေန.

သံဃိကေနာတိ သံဃဿ၊ န ဂဏဿ၊ န ဧကဘိက္ခုနိယာ.

အညံ စေတာပေယျာတိ ယံအတ္ထာယ ဒိန္နံ၊ တံ ဌပေတွာ အညံ စေတာပေတိ၊ ပယောဂေ ဒုက္ကဋံ. ပဋိလာဘေန နိဿဂ္ဂိယံ ဟောတိ. နိဿဇ္ဇိတဗ္ဗံ သံဃဿ ဝါ ဂဏဿ ဝါ ဧကဘိက္ခုနိယာ ဝါ. ဧဝဉ္စ ပန၊ ဘိက္ခဝေ၊ နိဿဇ္ဇိတဗ္ဗံ။ပေ။ ‘‘ဣဒံ မေ၊ အယျေ၊ အညဒတ္ထိကေန ပရိက္ခာရေန အညုဒ္ဒိသိကေန သံဃိကေန အညံ စေတာပိတံ နိဿဂ္ဂိယံ၊ ဣမာဟံ သံဃဿ နိဿဇ္ဇာမီ’’တိ.။ပေ။ ဒဒေယျာတိ။ပေ။ ဒဒေယျုန္တိ။ပေ။ အယျာယ ဒမ္မီတိ.

၇၆၁. အညဒတ္ထိကေ အညဒတ္ထိကသညာ အညံ စေတာပေတိ၊ နိဿဂ္ဂိယံ ပါစိတ္တိယံ. အညဒတ္ထိကေ ဝေမတိကာ အညံ စေတာပေတိ၊ နိဿဂ္ဂိယံ ပါစိတ္တိယံ. အညဒတ္ထိကေ အနညဒတ္ထိကသညာ အညံ စေတာပေတိ၊ နိဿဂ္ဂိယံ ပါစိတ္တိယံ. နိဿဋ္ဌံ ပဋိလဘိတွာ ယထာဒါနေ ဥပနေတဗ္ဗံ.

အနညဒတ္ထိကေ အညဒတ္ထိကသညာ၊ အာပတ္တိ ဒုက္ကဋဿ. အနညဒတ္ထိကေ ဝေမတိကာ၊ အာပတ္တိ ဒုက္ကဋဿ. အနညဒတ္ထိကေ အနညဒတ္ထိကသညာ၊ အနာပတ္တိ.

၇၆၂. အနာပတ္တိ သေသကံ ဥပနေတိ၊ သာမိကေ အပလောကေတွာ ဥပနေတိ၊ အာပဒါသု၊ ဥမ္မတ္တိကာယ၊ အာဒိကမ္မိကာယာတိ.

ဆဋ္ဌသိက္ခာပဒံ နိဋ္ဌိတံ.