၆. ပါဋိဒေသနီယကဏ္ဍံ

၁. ပဌမပါဋိဒေသနီယသိက္ခာပဒံ

ဣမေ ခေါ ပနာယသ္မန္တော စတ္တာရော ပါဋိဒေသနီယာ

ဓမ္မာ ဥဒ္ဒေသံ အာဂစ္ဆန္တိ.

၅၅၂. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ. တေန ခေါ ပန သမယေန အညတရာ ဘိက္ခုနီ သာဝတ္ထိယံ ပိဏ္ဍာယ စရိတွာ ပဋိက္ကမနကာလေ အညတရံ ဘိက္ခုံ ပဿိတွာ ဧတဒဝေါစ – ‘‘ဟန္ဒာယျ၊ ဘိက္ခံ ပဋိဂ္ဂဏှာ’’တိ. ‘‘သုဋ္ဌု၊ ဘဂိနီ’’တိ သဗ္ဗေဝ အဂ္ဂဟေသိ. သာ ဥပကဋ္ဌေ ကာလေ နာသက္ခိ ပိဏ္ဍာယ စရိတုံ၊ ဆိန္နဘတ္တာ အဟောသိ. အထ ခေါ သာ ဘိက္ခုနီ ဒုတိယမ္ပိ ဒိဝသံ။ပေ။ တတိယမ္ပိ ဒိဝသံ သာဝတ္ထိယံ ပိဏ္ဍာယ စရိတွာ ပဋိက္ကမနကာလေ တံ ဘိက္ခုံ ပဿိတွာ ဧတဒဝေါစ – ‘‘ဟန္ဒာယျ၊ ဘိက္ခံ ပဋိဂ္ဂဏှာ’’တိ. ‘‘သုဋ္ဌု၊ ဘဂိနီ’’တိ သဗ္ဗေဝ အဂ္ဂဟေသိ. သာ ဥပကဋ္ဌေ ကာလေ နာသက္ခိ ပိဏ္ဍာယ စရိတုံ၊ ဆိန္နဘတ္တာ အဟောသိ. အထ ခေါ သာ ဘိက္ခုနီ စတုတ္ထေ ဒိဝသေ ရထိကာယ ပဝေဓေန္တီ ဂစ္ဆတိ. သေဋ္ဌိ ဂဟပတိ ရထေန ပဋိပထံ အာဂစ္ဆန္တော တံ ဘိက္ခုနိံ ဧတဒဝေါစ – ‘‘အပေဟာယျေ’’တိ. သာ ဝေါက္ကမန္တီ တတ္ထေဝ ပရိပတိ. သေဋ္ဌိ ဂဟပတိ တံ ဘိက္ခုနိံ ခမာပေသိ – ‘‘ခမာဟာယျေ၊ မယာသိ ပါတိတာ’’တိ. ‘‘နာဟံ၊ ဂဟပတိ၊ တယာ ပါတိတာ. အပိစ၊ အဟမေဝ ဒုဗ္ဗလာ’’တိ. ‘‘ကိဿ ပန တွံ၊ အယျေ၊ ဒုဗ္ဗလာ’’တိ? အထ ခေါ သာ ဘိက္ခုနီ သေဋ္ဌိဿ ဂဟပတိဿ ဧတမတ္ထံ အာရောစေသိ. သေဋ္ဌိ ဂဟပတိ တံ ဘိက္ခုနိံ ဃရံ နေတွာ ဘောဇေတွာ ဥဇ္ဈာယတိ ခိယျတိ ဝိပါစေတိ – ‘‘ကထဉှိ နာမ ဘဒန္တာ ဘိက္ခုနိယာ ဟတ္ထတော အာမိသံ ပဋိဂ္ဂဟေဿန္တိ! ကိစ္ဆလာဘော မာတုဂါမော’’တိ!

အဿောသုံ ခေါ ဘိက္ခူ တဿ သေဋ္ဌိဿ ဂဟပတိဿ ဥဇ္ဈာယန္တဿ ခိယျန္တဿ ဝိပါစေန္တဿ. ယေ တေ ဘိက္ခူ အပ္ပိစ္ဆာ။ပေ။ တေ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခု ဘိက္ခုနိယာ ဟတ္ထတော အာမိသံ ပဋိဂ္ဂဟေဿတီ’’တိ ။ပေ။ သစ္စံ ကိရ တွံ၊ ဘိက္ခု၊ ဘိက္ခုနိယာ ဟတ္ထတော အာမိသံ ပဋိဂ္ဂဟေသီတိ? ‘‘သစ္စံ၊ ဘဂဝါ’’တိ. ‘‘ဉာတိကာ တေ၊ ဘိက္ခု၊ အညာတိကာ’’တိ? ‘‘အညာတိကာ၊ ဘဂဝါ’’တိ. ‘‘အညာတကော၊ မောဃပုရိသ၊ အညာတိကာယ န ဇာနာတိ ပတိရူပံ ဝါ အပ္ပတိရူပံ ဝါ သန္တံ ဝါ အသန္တံ ဝါ. ကထဉှိ နာမ တွံ၊ မောဃပုရိသ၊ အညာတိကာယ ဘိက္ခုနိယာ ဟတ္ထတော အာမိသံ ပဋိဂ္ဂဟေဿသိ! နေတံ၊ မောဃပုရိသ၊ အပ္ပသန္နာနံ ဝါ ပသာဒါယ။ပေ။ ဧဝဉ္စ ပန၊ ဘိက္ခဝေ၊ ဣမံ သိက္ခာပဒံ ဥဒ္ဒိသေယျာထ –

၅၅၃. ‘‘ယော ပန ဘိက္ခု အညာတိကာယ ဘိက္ခုနိယာ အန္တရဃရံ ပဝိဋ္ဌာယ ဟတ္ထတော ခါဒနီယံ ဝါ ဘောဇနီယံ ဝါ သဟတ္ထာ ပဋိဂ္ဂဟေတွာ ခါဒေယျ ဝါ ဘုဉ္ဇေယျ ဝါ၊ ပဋိဒေသေတဗ္ဗံ တေန ဘိက္ခုနာ – ‘ဂါရယှံ၊ အာဝုသော၊ ဓမ္မံ အာပဇ္ဇိံ အသပ္ပါယံ ပါဋိဒေသနီယံ၊ တံ ပဋိဒေသေမီ’’’တိ.

၅၅၄. ယော ပနာတိ ယော ယာဒိသော။ပေ။ ဘိက္ခူတိ။ပေ။ အယံ ဣမသ္မိံ အတ္ထေ အဓိပ္ပေတော ဘိက္ခူတိ.

အညာတိကာ နာမ မာတိတော ဝါ. ပိတိတော ဝါ ယာဝ သတ္တမာ ပိတာမဟယုဂါ အသမ္ဗဒ္ဓါ.

ဘိက္ခုနီ နာမ ဥဘတောသံဃေ ဥပသမ္ပန္နာ.

အန္တရဃရံ နာမ ရထိကာ ဗျူဟံ သိင်္ဃာဋကံ ဃရံ.

ခါဒနီယံ နာမ ပဉ္စ ဘောဇနာနိ – ယာမကာလိကံ သတ္တာဟကာလိကံ ယာဝဇီဝိကံ ဌပေတွာ အဝသေသံ ခါဒနီယံ နာမ.

ဘောဇနီယံ နာမ ပဉ္စ ဘောဇနာနိ – ဩဒနော၊ ကုမ္မာသော၊ သတ္တု၊ မစ္ဆော၊ မံသံ. ‘‘ခါဒိဿာမိ ဘုဉ္ဇိဿာမီ’’တိ ပဋိဂ္ဂဏှာတိ၊ အာပတ္တိ ဒုက္ကဋဿ. အဇ္ဈောဟာရေ အဇ္ဈောဟာရေ အာပတ္တိ ပါဋိဒေသနီယဿ.

၅၅၅. အညာတိကာယ အညာတိကသညီ အန္တရဃရံ ပဝိဋ္ဌာယ ဟတ္ထတော ခါဒနီယံ ဝါ ဘောဇနီယံ ဝါ သဟတ္ထာ ပဋိဂ္ဂဟေတွာ ခါဒတိ ဝါ ဘုဉ္ဇတိ ဝါ၊ အာပတ္တိ ပါဋိဒေသနီယဿ. အညာတိကာယ ဝေမတိကော အန္တရဃရံ ပဝိဋ္ဌာယ ဟတ္ထတော ခါဒနီယံ ဝါ ဘောဇနီယံ ဝါ သဟတ္ထာ ပဋိဂ္ဂဟေတွာ ခါဒတိ ဝါ ဘုဉ္ဇတိ ဝါ၊ အာပတ္တိ ပါဋိဒေသနီယဿ. အညာတိကာယ ဉာတိကသညီ အန္တရဃရံ ပဝိဋ္ဌာယ ဟတ္ထတော ခါဒနီယံ ဝါ ဘောဇနီယံ ဝါ သဟတ္ထာ ပဋိဂ္ဂဟေတွာ ခါဒတိ ဝါ ဘုဉ္ဇတိ ဝါ၊ အာပတ္တိ ပါဋိဒေသနီယဿ.

ယာမကာလိကံ သတ္တာဟကာလိကံ ယာဝဇီဝိကံ အာဟာရတ္ထာယ ပဋိဂ္ဂဏှာတိ၊ အာပတ္တိ ဒုက္ကဋဿ. အဇ္ဈောဟာရေ အဇ္ဈောဟာရေ အာပတ္တိ ဒုက္ကဋဿ. ဧကတောဥပသမ္ပန္နာယ ဟတ္ထတော ခါဒနီယံ ဝါ ဘောဇနီယံ ဝါ – ‘‘ခါဒိဿာမိ ဘုဉ္ဇိဿာမီ’’တိ ပဋိဂ္ဂဏှာတိ၊ အာပတ္တိ ဒုက္ကဋဿ. အဇ္ဈောဟာရေ အဇ္ဈောဟာရေ အာပတ္တိ ဒုက္ကဋဿ. ဉာတိကာယ အညာတိကသညီ၊ အာပတ္တိ ဒုက္ကဋဿ. ဉာတိကာယ ဝေမတိကော၊ အာပတ္တိ ဒုက္ကဋဿ. ဉာတိကာယ ဉာတိကသညီ၊ အနာပတ္တိ.

၅၅၆. အနာပတ္တိ ဉာတိကာယ၊ ဒါပေတိ န ဒေတိ၊ ဥပနိက္ခိပိတွာ ဒေတိ အန္တရာရာမေ၊ ဘိက္ခုနုပဿယေ၊ တိတ္ထိယသေယျာယ၊ ပဋိက္ကမနေ၊ ဂါမတော နီဟရိတွာ ဒေတိ၊ ယာမကာလိကံ သတ္တာဟကာလိကံ ယာဝဇီဝိကံ ‘‘သတိ ပစ္စယေ ပရိဘုဉ္ဇာ’’တိ ဒေတိ၊ သိက္ခမာနာယ၊ သာမဏေရိယာ၊ ဥမ္မတ္တကဿ၊ အာဒိကမ္မိကဿာတိ.

ပဌမပါဋိဒေသနီယသိက္ခာပဒံ နိဋ္ဌိတံ.

၂. ဒုတိယပါဋိဒေသနီယသိက္ခာပဒံ

၅၅၇. တေန သမယေန ဗုဒ္ဓေါ ဘဂဝါ ရာဇဂဟေ ဝိဟရတိ ဝေဠုဝနေ ကလန္ဒကနိဝါပေ. တေန ခေါ ပန သမယေန ဘိက္ခူ ကုလေသု နိမန္တိတာ ဘုဉ္ဇန္တိ. ဆဗ္ဗဂ္ဂိယာ ဘိက္ခုနိယော ဆဗ္ဗဂ္ဂိယာနံ ဘိက္ခူနံ ဝေါသာသန္တိယော ဌိတာ ဟောန္တိ – ‘‘ဣဓ သူပံ ဒေထ၊ ဣဓ ဩဒနံ ဒေထာ’’တိ. ဆဗ္ဗဂ္ဂိယာ ဘိက္ခူ ယာဝဒတ္ထံ ဘုဉ္ဇန္တိ. အညေ ဘိက္ခူ န စိတ္တရူပံ ဘုဉ္ဇန္တိ. ယေ တေ ဘိက္ခူ အပ္ပိစ္ဆာ။ပေ။ တေ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဆဗ္ဗဂ္ဂိယာ ဘိက္ခူ ဘိက္ခုနိယော ဝေါသာသန္တိယော န နိဝါရေဿန္တီ’’တိ။ပေ။ သစ္စံ ကိရ တုမှေ၊ ဘိက္ခဝေ၊ ဘိက္ခုနိယော ဝေါသာသန္တိယော န နိဝါရေထာတိ? ‘‘သစ္စံ၊ ဘဂဝါ’’တိ. ဝိဂရဟိ ဗုဒ္ဓေါ ဘဂဝါ ။ပေ။ ကထဉှိ နာမ တုမှေ၊ မောဃပုရိသာ၊ ဘိက္ခုနိယော ဝေါသာသန္တိယော န နိဝါရေဿထ! နေတံ၊ မောဃပုရိသာ၊ အပ္ပသန္နာနံ ဝါ ပသာဒါယ။ပေ။ ဧဝဉ္စ ပန၊ ဘိက္ခဝေ၊ ဣမံ သိက္ခာပဒံ ဥဒ္ဒိသေယျာထ –

၅၅၈. ‘‘ဘိက္ခူ ပနေဝ ကုလေသု နိမန္တိတာ ဘုဉ္ဇန္တိ၊ တတြ စေ သာ [တတြ စေ (သျာ.)] ဘိက္ခုနီ ဝေါသာသမာနရူပါ ဌိတာ ဟောတိ – ‘ဣဓ သူပံ ဒေထ၊ ဣဓ ဩဒနံ ဒေထာ’တိ၊ တေဟိ ဘိက္ခူဟိ သာ ဘိက္ခုနီ အပသာဒေတဗ္ဗာ – ‘အပသက္က တာဝ၊ ဘဂိနိ၊ ယာဝ ဘိက္ခူ ဘုဉ္ဇန္တီ’တိ. ဧကဿ စေပိ [ဧကဿပိ စေ (သီ. သျာ.)] ဘိက္ခုနော န ပဋိဘာသေယျ တံ ဘိက္ခုနိံ အပသာဒေတုံ – ‘အပသက္က တာဝ၊ ဘဂိနိ၊ ယာဝ ဘိက္ခူ ဘုဉ္ဇန္တီ’တိ ပဋိဒေသေတဗ္ဗံ တေဟိ ဘိက္ခူဟိ – ‘ဂါရယှံ၊ အာဝုသော၊ ဓမ္မံ အာပဇ္ဇိမှာ အသပ္ပါယံ ပါဋိဒေသနီယံ၊ တံ ပဋိဒေသေမာ’’’တိ.

၅၅၉. ဘိက္ခူ ပနေဝ ကုလေသု နိမန္တိတာ ဘုဉ္ဇန္တီတိ ကုလံ နာမ စတ္တာရိ ကုလာနိ – ခတ္တိယကုလံ၊ ဗြာဟ္မဏကုလံ၊ ဝေဿကုလံ၊ သုဒ္ဒကုလံ.

နိမန္တိတာ ဘုဉ္ဇန္တီတိ ပဉ္စန္နံ ဘောဇနာနံ အညတရေန ဘောဇနေန နိမန္တိတာ ဘုဉ္ဇန္တိ.

ဘိက္ခုနီ နာမ ဥဘတောသံဃေ ဥပသမ္ပန္နာ.

ဝေါသာသန္တီ နာမ ယထာမိတ္တတာ ယထာသန္ဒိဋ္ဌတာ ယထာသမ္ဘတ္တတာ ယထာသမာနုပဇ္ဈာယကတာ ယထာသမာနာစရိယကတာ – ‘‘ဣဓ သူပံ ဒေထ၊ ဣဓ ဩဒနံ ဒေထာ’’တိ. ဧသာ ဝေါသာသန္တီ နာမ.

တေဟိ ဘိက္ခူဟီတိ ဘုဉ္ဇမာနေဟိ ဘိက္ခူဟိ.

သာ ဘိက္ခုနီတိ ယာ သာ ဝေါသာသန္တီ ဘိက္ခုနီ.

တေဟိ ဘိက္ခူဟိ သာ ဘိက္ခုနီ အပသာဒေတဗ္ဗာ – ‘‘အပသက္က တာဝ၊ ဘဂိနိ၊ ယာဝ ဘိက္ခူ ဘုဉ္ဇန္တီ’’တိ. ဧကဿ စေပိ [ဧကဿပိ စေ (သီ. သျာ.)] ဘိက္ခုနော အနပသာဒိတော [အနပသာဒိတေ (သီ. သျာ.)] – ‘‘ခါဒိဿာမိ ဘုဉ္ဇိဿာမီ’’တိ ပဋိဂ္ဂဏှာတိ၊ အာပတ္တိ ဒုက္ကဋဿ. အဇ္ဈောဟာရေ အဇ္ဈောဟာရေ အာပတ္တိ ပါဋိဒေသနီယဿ.

၅၆၀. ဥပသမ္ပန္နာယ ဥပသမ္ပန္နသညီ ဝေါသာသန္တိယာ န နိဝါရေတိ၊ အာပတ္တိ ပါဋိဒေသနီယဿ. ဥပသမ္ပန္နာယ ဝေမတိကော ဝေါသာသန္တိယာ န နိဝါရေတိ၊ အာပတ္တိ ပါဋိဒေသနီယဿ. ဥပသမ္ပန္နာယ အနုပသမ္ပန္နသညီ ဝေါသာသန္တိယာ န နိဝါရေတိ၊ အာပတ္တိ ပါဋိဒေသနီယဿ.

ဧကတောဥပသမ္ပန္နာယ ဝေါသာသန္တိယာ န နိဝါရေတိ၊ အာပတ္တိ ဒုက္ကဋဿ. အနုပသမ္ပန္နာယ ဥပသမ္ပန္နသညီ၊ အာပတ္တိ ဒုက္ကဋဿ. အနုပသမ္ပန္နာယ ဝေမတိကော၊ အာပတ္တိ ဒုက္ကဋဿ. အနုပသမ္ပန္နာယ အနုပသမ္ပန္နသညီ၊ အနာပတ္တိ.

၅၆၁. အနာပတ္တိ အတ္တနော ဘတ္တံ ဒါပေတိ န ဒေတိ၊ အညေသံ ဘတ္တံ ဒေတိ န ဒါပေတိ၊ ယံ န ဒိန္နံ တံ ဒါပေတိ၊ ယတ္ထ န ဒိန္နံ တတ္ထ ဒါပေတိ၊ သဗ္ဗေသံ သမကံ ဒါပေတိ၊ သိက္ခမာနာ ဝေါသာသတိ၊ သာမဏေရီ ဝေါသာသတိ၊ ပဉ္စ ဘောဇနာနိ ဌပေတွာ သဗ္ဗတ္ထ၊ အနာပတ္တိ၊ ဥမ္မတ္တကဿ၊ အာဒိကမ္မိကဿာတိ.

ဒုတိယပါဋိဒေသနီယသိက္ခာပဒံ နိဋ္ဌိတံ.

၃. တတိယပါဋိဒေသနီယသိက္ခာပဒံ

၅၆၂. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ. တေန ခေါ ပန သမယေန သာဝတ္ထိယံ အညတရံ ကုလံ ဥဘတောပသန္နံ ဟောတိ. သဒ္ဓါယ ဝဍ္ဎတိ၊ ဘောဂေန ဟာယတိ၊ ယံ တသ္မိံ ကုလေ ဥပ္ပဇ္ဇတိ ပုရေဘတ္တံ ခါဒနီယံ ဝါ ဘောဇနီယံ ဝါ တံ သဗ္ဗံ ဘိက္ခူနံ ဝိဿဇ္ဇေတွာ အပ္ပေကဒါ အနသိတာ အစ္ဆန္တိ. မနုဿာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ သမဏာ သကျပုတ္တိယာ န မတ္တံ ဇာနိတွာ ပဋိဂ္ဂဟေဿန္တိ! ဣမေ ဣမေသံ ဒတွာ အပ္ပေကဒါ အနသိတာ အစ္ဆန္တီ’’တိ!! အဿောသုံ ခေါ ဘိက္ခူ တေသံ မနုဿာနံ ဥဇ္ဈာယန္တာနံ ခိယျန္တာနံ ဝိပါစေန္တာနံ. အထ ခေါ တေ ဘိက္ခူ ဘဂဝတော ဧတမတ္ထံ အာရောစေသုံ. အထ ခေါ ဘဂဝါ ဧတသ္မိံ နိဒါနေ ဧတသ္မိံ ပကရဏေ ဓမ္မိံ ကထံ ကတွာ ဘိက္ခူ အာမန္တေသိ – ‘‘အနုဇာနာမိ၊ ဘိက္ခဝေ၊ ယံ ကုလံ သဒ္ဓါယ ဝဍ္ဎတိ၊ ဘောဂေန ဟာယတိ ဧဝရူပဿ ကုလဿ ဉတ္တိဒုတိယေန ကမ္မေန သေက္ခသမ္မုတိံ ဒါတုံ. ဧဝဉ္စ ပန၊ ဘိက္ခဝေ၊ ဒါတဗ္ဗာ. ဗျတ္တေန ဘိက္ခုနာ ပဋိဗလေန သံဃော ဉာပေတဗ္ဗော –

၅၆၃. ‘‘သုဏာတု မေ၊ ဘန္တေ၊ သံဃော. ဣတ္ထန္နာမံ ကုလံ သဒ္ဓါယ ဝဍ္ဎတိ၊ ဘောဂေန ဟာယတိ. ယဒိ သံဃဿ ပတ္တကလ္လံ၊ သံဃော ဣတ္ထန္နာမဿ ကုလဿ သေက္ခသမ္မုတိံ ဒဒေယျ. ဧသာ ဉတ္တိ.

‘‘သုဏာတု မေ၊ ဘန္တေ၊ သံဃော. ဣတ္ထန္နာမံ ကုလံ သဒ္ဓါယ ဝဍ္ဎတိ၊ ဘောဂေန ဟာယတိ. သံဃော ဣတ္ထန္နာမဿ ကုလဿ သေက္ခသမ္မုတိံ ဒေတိ. ယဿာယသ္မတော ခမတိ ဣတ္ထန္နာမဿ ကုလဿ သေက္ခသမ္မုတိယာ ဒါနံ၊ သော တုဏှဿ၊ ယဿ နက္ခမတိ၊ သော ဘာသေယျ.

‘‘ဒိန္နာ သံဃေန ဣတ္ထန္နာမဿ ကုလဿ သေက္ခသမ္မုတိ. ခမတိ သံဃဿ၊ တသ္မာ တုဏှီ၊ ဧဝမေတံ ဓာရယာမီ’’တိ.

ဧဝဉ္စ ပန၊ ဘိက္ခဝေ၊ ဣမံ သိက္ခာပဒံ ဥဒ္ဒိသေယျာထ –

‘‘ယာနိ ခေါ ပန တာနိ သေက္ခသမ္မတာနိ ကုလာနိ၊ ယော ပန ဘိက္ခု တထာရူပေသု သေက္ခသမ္မတေသု ကုလေသု ခါဒနီယံ ဝါ ဘောဇနီယံ ဝါ သဟတ္ထာ ပဋိဂ္ဂဟေတွာ ခါဒေယျ ဝါ ဘုဉ္ဇေယျ ဝါ၊ ပဋိဒေသေတဗ္ဗံ တေန ဘိက္ခုနာ – ‘ဂါရယှံ၊ အာဝုသော၊ ဓမ္မံ အာပဇ္ဇိံ အသပ္ပါယံ ပါဋိဒေသနီယံ တံ ပဋိဒေသေမီ’’’တိ.

ဧဝဉ္စိဒံ ဘဂဝတာ ဘိက္ခူနံ သိက္ခာပဒံ ပညတ္တံ ဟောတိ.

၅၆၄. တေန ခေါ ပန သမယေန သာဝတ္ထိယံ ဥဿဝေါ ဟောတိ. မနုဿာ ဘိက္ခူ နိမန္တေတွာ ဘောဇေန္တိ. တမ္ပိ ခေါ ကုလံ ဘိက္ခူ နိမန္တေသိ. ဘိက္ခူ ကုက္ကုစ္စာယန္တာ နာဓိဝါသေန္တိ – ‘‘ပဋိက္ခိတ္တံ ဘဂဝတာ သေက္ခသမ္မတေသု ကုလေသု ခါဒနီယံ ဝါ ဘောဇနီယံ ဝါ သဟတ္ထာ ပဋိဂ္ဂဟေတွာ ခါဒိတုံ ဘုဉ္ဇိတု’’န္တိ. တေ ဥဇ္ဈာယန္တိ ခိယျန္တိ ဝိပါစေန္တိ – ‘‘ကိံ နု ခေါ နာမ အမှာကံ ဇီဝိတေန ယံ အယျာ အမှာကံ န ပဋိဂ္ဂဏှန္တီ’’တိ! အဿောသုံ ခေါ ဘိက္ခူ တေသံ မနုဿာနံ ဥဇ္ဈာယန္တာနံ ခိယျန္တာနံ ဝိပါစေန္တာနံ. အထ ခေါ တေ ဘိက္ခူ ဘဂဝတော ဧတမတ္ထံ အာရောစေသုံ. အထ ခေါ ဘဂဝါ ဧတသ္မိံ နိဒါနေ ဧတသ္မိံ ပကရဏေ ဓမ္မိံ ကထံ ကတွာ ဘိက္ခူ အာမန္တေသိ – ‘‘အနုဇာနာမိ၊ ဘိက္ခဝေ၊ နိမန္တိတေန သေက္ခသမ္မတေသု ကုလေသု ခါဒနီယံ ဝါ ဘောဇနီယံ ဝါ သဟတ္ထာ ပဋိဂ္ဂဟေတွာ ခါဒိတုံ ဘုဉ္ဇိတုံ. ဧဝဉ္စ ပန၊ ဘိက္ခဝေ၊ ဣမံ သိက္ခာပဒံ ဥဒ္ဒိသေယျာထ –

‘‘ယာနိ ခေါ ပန တာနိ သေက္ခသမ္မတာနိ ကုလာနိ၊ ယော ပန ဘိက္ခု တထာရူပေသု သေက္ခသမ္မတေသု ကုလေသု ပုဗ္ဗေ အနိမန္တိတော ခါဒနီယံ ဝါ ဘောဇနီယံ ဝါ သဟတ္ထာ ပဋိဂ္ဂဟေတွာ ခါဒေယျ ဝါ ဘုဉ္ဇေယျ ဝါ၊ ပဋိဒေသေတဗ္ဗံ တေန ဘိက္ခုနာ – ‘ဂါရယှံ၊ အာဝုသော၊ ဓမ္မံ အာပဇ္ဇိံ အသပ္ပါယံ ပါဋိဒေသနီယံ၊ တံ ပဋိဒေသေမီ’’’တိ.

ဧဝဉ္စိဒံ ဘဂဝတာ ဘိက္ခူနံ သိက္ခာပဒံ ပညတ္တံ ဟောတိ.

၅၆၅. တေန ခေါ ပန သမယေန အညတရော ဘိက္ခု တဿ ကုလဿ ကုလူပကော ဟောတိ. အထ ခေါ သော ဘိက္ခု ပုဗ္ဗဏှသမယံ နိဝါသေတွာ ပတ္တစီဝရမာဒါယ ယေန တံ ကုလံ တေနုပသင်္ကမိ၊ ဥပသင်္ကမိတွာ ပညတ္တေ အာသနေ နိသီဒိ. တေန ခေါ ပန သမယေန သော ဘိက္ခု ဂိလာနော ဟောတိ. အထ ခေါ တေ မနုဿာ တံ ဘိက္ခုံ ဧတဒဝေါစုံ – ‘‘ဘုဉ္ဇထ၊ ဘန္တေ’’တိ. အထ ခေါ သော ဘိက္ခု – ‘‘ဘဂဝတာ ပဋိက္ခိတ္တံ အနိမန္တိတေန သေက္ခသမ္မတေသု ကုလေသု ခါဒနီယံ ဝါ ဘောဇနီယံ ဝါ သဟတ္ထာ ပဋိဂ္ဂဟေတွာ ခါဒိတုံ ဘုဉ္ဇိတု’’န္တိ ကုက္ကုစ္စာယန္တော န ပဋိဂ္ဂဟေသိ၊ နာသက္ခိ ပိဏ္ဍာယ စရိတုံ၊ ဆိန္နဘတ္တော အဟောသိ. အထ ခေါ သော ဘိက္ခု အာရာမံ ဂန္တွာ ဘိက္ခူနံ ဧတမတ္ထံ အာရောစေသိ. ဘိက္ခူ ဘဂဝတော ဧတမတ္ထံ အာရောစေသုံ. အထ ခေါ ဘဂဝါ ဧတသ္မိံ နိဒါနေ ဧတသ္မိံ ပကရဏေ ဓမ္မိံ ကထံ ကတွာ ဘိက္ခူ အာမန္တေသိ – ‘‘အနုဇာနာမိ၊ ဘိက္ခဝေ၊ ဂိလာနေန ဘိက္ခုနာ သေက္ခသမ္မတေသု ကုလေသု ခါဒနီယံ ဝါ ဘောဇနီယံ ဝါ သဟတ္ထာ ပဋိဂ္ဂဟေတွာ ခါဒိတုံ ဘုဉ္ဇိတုံ. ဧဝဉ္စ ပန၊ ဘိက္ခဝေ၊ ဣမံ သိက္ခာပဒံ ဥဒ္ဒိသေယျာထ –

၅၆၆. ‘‘ယာနိ ခေါ ပန တာနိ သေက္ခသမ္မတာနိ ကုလာနိ၊ ယော ပန ဘိက္ခု တထာရူပေသု သေက္ခသမ္မတေသု ကုလေသု ပုဗ္ဗေ အနိမန္တိတော အဂိလာနော ခါဒနီယံ ဝါ ဘောဇနီယံ ဝါ သဟတ္ထာ ပဋိဂ္ဂဟေတွာ ခါဒေယျ ဝါ ဘုဉ္ဇေယျ ဝါ၊ ပဋိဒေသေတဗ္ဗံ တေန ဘိက္ခုနာ – ‘ဂါရယှံ၊ အာဝုသော၊ ဓမ္မံ အာပဇ္ဇိံ အသပ္ပါယံ ပါဋိဒေသနီယံ၊ တံ ပဋိဒေသေမီ’’တိ.

၅၆၇. ယာနိ ခေါ ပန တာနိ သေက္ခသမ္မတာနိ ကုလာနီတိ သေက္ခသမ္မတံ နာမ ကုလံ ယံ ကုလံ သဒ္ဓါယ ဝဍ္ဎတိ၊ ဘောဂေန ဟာယတိ. ဧဝရူပဿ ကုလဿ ဉတ္တိဒုတိယေန ကမ္မေန သေက္ခသမ္မုတိ ဒိန္နာ ဟောတိ.

ယော ပနာတိ ယော ယာဒိသော။ပေ။ ဘိက္ခူတိ။ပေ။ အယံ ဣမသ္မိံ အတ္ထေ အဓိပ္ပေတော ဘိက္ခူတိ.

တထာရူပေသု သေက္ခသမ္မတေသု ကုလေသူတိ ဧဝရူပေသု သေက္ခသမ္မတေသု ကုလေသု.

အနိမန္တိတော နာမ အဇ္ဇတနာယ ဝါ သွာတနာယ ဝါ အနိမန္တိတော၊ ဃရူပစာရံ ဩက္ကမန္တေ နိမန္တေတိ၊ ဧသော အနိမန္တိတော နာမ.

နိမန္တိတော နာမ အဇ္ဇတနာယ ဝါ သွာတနာယ ဝါ နိမန္တိတော၊ ဃရူပစာရံ အနောက္ကမန္တေ နိမန္တေတိ၊ ဧသော နိမန္တိတော နာမ.

အဂိလာနော နာမ သက္ကောတိ ပိဏ္ဍာယ စရိတုံ.

ဂိလာနော နာမ န သက္ကောတိ ပိဏ္ဍာယ စရိတုံ.

ဘောဇနီယံ နာမ ပဉ္စ ဘောဇနာနိ – ဩဒနော၊ ကုမ္မာသော၊ သတ္တု၊ မစ္ဆော၊ မံသံ.

အနိမန္တိတော အဂိလာနော ‘‘ခါဒိဿာမိ ဘုဉ္ဇိဿာမီ’’တိ ပဋိဂ္ဂဏှာတိ၊ အာပတ္တိ ဒုက္ကဋဿ. အဇ္ဈောဟာရေ အဇ္ဈောဟာရေ အာပတ္တိ ပါဋိဒေသနီယဿ.

၅၆၈. သေက္ခသမ္မတေ သေက္ခသမ္မတသညီ အနိမန္တိတော အဂိလာနော ခါဒနီယံ ဝါ ဘောဇနီယံဝ သဟတ္ထာ ပဋိဂ္ဂဟေတွာ ခါဒတိ ဝါ ဘုဉ္ဇတိ ဝါ၊ အာပတ္တိ ပါဋိဒေသနီယဿ. သေက္ခသမ္မတေ ဝေမတိကော။ပေ။ သေက္ခသမ္မတေ အသေက္ခသမ္မတသညီ အနိမန္တိတော အဂိလာနော ခါဒနီယံ ဝါ ဘောဇနီယံ ဝါ သဟတ္ထာ ပဋိဂ္ဂဟေတွာ ခါဒတိ ဝါ ဘုဉ္ဇတိ ဝါ၊ အာပတ္တိ ပါဋိဒေသနီယဿ.

ယာမကာလိကံ သတ္တာဟကာလိကံ ယာဝဇီဝိကံ အာဟာရတ္ထာယ ပဋိဂ္ဂဏှာတိ၊ အာပတ္တိ ဒုက္ကဋဿ. အဇ္ဈောဟာရေ အဇ္ဈောဟာရေ အာပတ္တိ ဒုက္ကဋဿ. အသေက္ခသမ္မတေ သေက္ခသမ္မတသညီ၊ အာပတ္တိ ဒုက္ကဋဿ. အသေက္ခသမ္မတေ ဝေမတိကော၊ အာပတ္တိ ဒုက္ကဋဿ. အသေက္ခသမ္မတေ အသေက္ခသမ္မတသညီ၊ အနာပတ္တိ.

၅၆၉. အနာပတ္တိ နိမန္တိတဿ၊ ဂိလာနဿ၊ နိမန္တိတဿ ဝါ ဂိလာနဿ ဝါ သေသကံ ဘုဉ္ဇတိ၊ အညေသံ ဘိက္ခာ တတ္ထ ပညတ္တာ ဟောတိ၊ ဃရတော နီဟရိတွာ ဒေန္တိ၊ နိစ္စဘတ္တေ၊ သလာကဘတ္တေ၊ ပက္ခိကေ၊ ဥပေါသထိကေ၊ ပါဋိပဒိကေ၊ ယာမကာလိကံ သတ္တာဟကာလိကံ ယာဝဇီဝိကံ – ‘‘သတိ ပစ္စယေ ပရိဘုဉ္ဇာ’’တိ ဒေတိ၊ ဥမ္မတ္တကဿ၊ အာဒိကမ္မိကဿာတိ.

တတိယပါဋိဒေသနီယသိက္ခာပဒံ နိဋ္ဌိတံ.

၄. စတုတ္ထပါဋိဒေသနီယသိက္ခာပဒံ

၅၇၀. တေန သမယေန ဗုဒ္ဓေါ ဘဂဝါ သက္ကေသု ဝိဟရတိ ကပိလဝတ္ထုသ္မိံ နိဂြောဓာရာမေ. တေန ခေါ ပန သမယေန သာကိယဒါသကာ အဝရုဒ္ဓါ ဟောန္တိ. သာကိယာနိယော ဣစ္ဆန္တိ အာရညကေသု သေနာသနေသု ဘတ္တံ ကာတုံ. အဿောသုံ ခေါ သာကိယဒါသကာ – ‘‘သာကိယာနိယော ကိရ အာရညကေသု သေနာသနေသု ဘတ္တံ ကတ္တုကာမာ’’တိ. တေ မဂ္ဂေ ပရိယုဋ္ဌိံသု. သာကိယာနိယော ပဏီတံ ခါဒနီယံ ဘောဇနီယံ အာဒါယ အာရညကံ သေနာသနံ အဂမံသု. သာကိယဒါသကာ နိက္ခမိတွာ သာကိယာနိယော အစ္ဆိန္ဒိံသု စ ဒူသေသုဉ္စ. သာကိယာ နိက္ခမိတွာ တေ စောရေ သဘဏ္ဍေ [သဟ ဘဏ္ဍေန (က.)] ဂဟေတွာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘဒန္တာ အာရာမေ စောရေ ပဋိဝသန္တေ နာရောစေဿန္တီ’’တိ! အဿောသုံ ခေါ ဘိက္ခူ သာကိယာနံ ဥဇ္ဈာယန္တာနံ ခိယျန္တာနံ ဝိပါစေန္တာနံ. အထ ခေါ တေ ဘိက္ခူ ဘဂဝတော ဧတမတ္ထံ အာရောစေသုံ. အထ ခေါ ဘဂဝါ ဧတသ္မိံ နိဒါနေ ဧတသ္မိံ ပကရဏေ ဓမ္မိံ ကထံ ကတွာ ဘိက္ခူ အာမန္တေသိ – ‘‘တေန ဟိ၊ ဘိက္ခဝေ၊ ဘိက္ခူနံ သိက္ခာပဒံ ပညပေဿာမိ ဒသ အတ္ထဝသေ ပဋိစ္စ – သံဃသုဋ္ဌုတာယ။ပေ။ ဧဝဉ္စ ပန၊ ဘိက္ခဝေ၊ ဣမံ သိက္ခာပဒံ ဥဒ္ဒိသေယျာထ –

‘‘ယာနိ ခေါ ပန တာနိ အာရညကာနိ သေနာသနာနိ သာသင်္ကသမ္မတာနိ သပ္ပဋိဘယာနိ၊ ယော ပန ဘိက္ခု တထာရူပေသု သေနာသနေသု [သေနာသနေသု ဝိဟရန္တော (သီ. သျာ.)] ပုဗ္ဗေ အပ္ပဋိသံဝိဒိတံ ခါဒနီယံ ဝါ ဘောဇနီယံ ဝါ အဇ္ဈာရာမေ သဟတ္ထာ ပဋိဂ္ဂဟေတွာ ခါဒေယျ ဝါ ဘုဉ္ဇေယျ ဝါ၊ ပဋိဒေသေတဗ္ဗံ တေန ဘိက္ခုနာ – ‘ဂါရယှံ၊ အာဝုသော၊ ဓမ္မံ အာပဇ္ဇိံ အသပ္ပါယံ ပါဋိဒေသနီယံ တံ ပဋိဒေသေမီ’’’တိ.

ဧဝဉ္စိဒံ ဘဂဝတာ ဘိက္ခူနံ သိက္ခာပဒံ ပညတ္တံ ဟောတိ.

၅၇၁. တေန ခေါ ပန သမယေန အညတရော ဘိက္ခု အာရညကေသု သေနာသနေသု ဂိလာနော ဟောတိ. မနုဿာ ခါဒနီယံ ဝါ ဘောဇနီယံ ဝါ အာဒါယ အာရညကံ သေနာသနံ အဂမံသု. အထ ခေါ တေ မနုဿာ တံ ဘိက္ခုံ ဧတဒဝေါစုံ – ‘‘ဘုဉ္ဇထ၊ ဘန္တေ’’တိ. အထ ခေါ သော ဘိက္ခု – ‘‘ဘဂဝတာ ပဋိက္ခိတ္တံ အာရညကေသု သေနာသနေသု ခါဒနီယံ ဝါ ဘောဇနီယံ ဝါ သဟတ္ထာ ပဋိဂ္ဂဟေတွာ ခါဒိတုံ ဘုဉ္ဇိတု’’န္တိ ကုက္ကုစ္စာယန္တော န ပဋိဂ္ဂဟေသိ၊ နာသက္ခိ ပိဏ္ဍာယ စရိတုံ [ပဝိသိတုံ (က.)]၊ ဆိန္နဘတ္တော အဟောသိ. အထ ခေါ သော ဘိက္ခု ဘိက္ခူနံ ဧတမတ္ထံ အာရောစေသိ. ဘိက္ခူ ဘဂဝတော ဧတမတ္ထံ အာရောစေသုံ. အထ ခေါ ဘဂဝါ ဧတသ္မိံ နိဒါနေ ဧတသ္မိံ ပကရဏေ ဓမ္မိံ ကထံ ကတွာ ဘိက္ခူ အာမန္တေသိ – ‘‘အနုဇာနာမိ၊ ဘိက္ခဝေ၊ ဂိလာနေန ဘိက္ခုနာ အာရညကေသု သေနာသနေသု ပုဗ္ဗေ အပ္ပဋိသံဝိဒိတံ ခါဒနီယံ ဝါ ဘောဇနီယံ ဝါ သဟတ္ထာ ပဋိဂ္ဂဟေတွာ ခါဒိတုံ ဘုဉ္ဇိတုံ. ဧဝဉ္စ ပန၊ ဘိက္ခဝေ၊ ဣမံ သိက္ခာပဒံ ဥဒ္ဒိသေယျာထ –

၅၇၂. ‘‘ယာနိ ခေါ ပန တာနိ အာရညကာနိ သေနာသနာနိ သာသင်္ကသမ္မတာနိ သပ္ပဋိဘယာနိ၊ ယော ပန ဘိက္ခု တထာရူပေသု သေနာသနေသု ပုဗ္ဗေ အပ္ပဋိသံဝိဒိတံ ခါဒနီယံ ဝါ ဘောဇနီယံ ဝါ အဇ္ဈာရာမေ သဟတ္ထာ ပဋိဂ္ဂဟေတွာ အဂိလာနော ခါဒေယျ ဝါ ဘုဉ္ဇေယျ ဝါ၊ ပဋိဒေသေတဗ္ဗံ တေန ဘိက္ခုနာ – ‘ဂါရယှံ၊ အာဝုသော၊ ဓမ္မံ အာပဇ္ဇိံ အသပ္ပါယံ ပါဋိဒေသနီယံ၊ တံ ပဋိဒေသေမီ’’’တိ.

၅၇၃. ယာနိ ခေါ ပန တာနိ အာရညကာနိ သေနာသနာနီတိ အာရညကံ နာမ သေနာသနံ ပဉ္စဓနုသတိကံ ပစ္ဆိမံ.

သာသင်္ကံ နာမ အာရာမေ အာရာမူပစာရေ စောရာနံ နိဝိဋ္ဌောကာသော ဒိဿတိ၊ ဘုတ္တောကာသော ဒိဿတိ၊ ဌိတောကာသော ဒိဿတိ၊ နိသိန္နောကာသော ဒိဿတိ၊ နိပန္နောကာသော ဒိဿတိ.

သပ္ပဋိဘယံ နာမ အာရာမေ အာရာမူပစာရေ စောရေဟိ မနုဿာ ဟတာ ဒိဿန္တိ၊ ဝိလုတ္တာ ဒိဿန္တိ၊ အာကောဋိတာ ဒိဿန္တိ.

တထာရူပေသု သေနာသနေသူတိ ဧဝရူပေသု သေနာသနေသု.

အပ္ပဋိသံဝိဒိတံ နာမ ပဉ္စန္နံ ပဋိသံဝိဒိတံ၊ ဧတံ အပ္ပဋိသံဝိဒိတံ နာမ. အာရာမံ အာရာမူပစာရံ ဌပေတွာ ပဋိသံဝိဒိတံ၊ ဧတံ [ဧတမ္ပိ (သီ.)] အပ္ပဋိသံဝိဒိတံ နာမ.

ပဋိသံဝိဒိတံ နာမ ယော ကောစိ ဣတ္ထီ ဝါ ပုရိသော ဝါ အာရာမံ အာရာမူပစာရံ အာဂန္တွာ အာရောစေတိ – ‘‘ဣတ္ထန္နာမဿ၊ ဘန္တေ၊ ခါဒနီယံ ဝါ ဘောဇနီယံ ဝါ အာဟရိဿန္တီ’’တိ. သစေ သာသင်္ကံ ဟောတိ၊ သာသင်္ကန္တိ အာစိက္ခိတဗ္ဗံ၊ သစေ သပ္ပဋိဘယံ ဟောတိ၊ သပ္ပဋိဘယန္တိ အာစိက္ခိတဗ္ဗံ၊ သစေ – ‘‘ဟောတု၊ ဘန္တေ၊ အာဟရိယိဿတီ’’တိ ဘဏတိ၊ စောရာ ဝတ္တဗ္ဗာ – ‘‘မနုဿာ ဣဓူပစရန္တိ အပသက္ကထာ’’တိ. ယာဂုယာ ပဋိသံဝိဒိတေ တဿာ ပရိဝါရော အာဟရိယျတိ၊ ဧတံ ပဋိသံဝိဒိတံ နာမ. ဘတ္တေန ပဋိသံဝိဒိတေ တဿ ပရိဝါရော အာဟရိယျတိ၊ ဧတံ ပဋိသံဝိဒိတံ နာမ. ခါဒနီယေန ပဋိသံဝိဒိတေ တဿ ပရိဝါရော အာဟရိယျတိ၊ ဧတံ ပဋိသံဝိဒိတံ နာမ. ကုလေန ပဋိသံဝိဒိတေ ယော တသ္မိံ ကုလေ မနုဿော ခါဒနီယံ ဝါ ဘောဇနီယံ ဝါ အာဟရတိ၊ ဧတံ ပဋိသံဝိဒိတံ နာမ. ဂါမေန ပဋိသံဝိဒိတေ ယော တသ္မိံ ဂါမေ မနုဿော ခါဒနီယံ ဝါ ဘောဇနီယံ ဝါ အာဟရတိ၊ ဧတံ ပဋိသံဝိဒိတံ နာမ. ပူဂေန ပဋိသံဝိဒိတေ ယော တသ္မိံ ပူဂေ မနုဿော ခါဒနီယံ ဝါ ဘောဇနီယံ ဝါ အာဟရတိ၊ ဧတံ ပဋိသံဝိဒိတံ နာမ.

ဘောဇနီယံ နာမ ပဉ္စ ဘောဇနာနိ – ဩဒနော၊ ကုမ္မာသော၊ သတ္တု၊ မစ္ဆော၊ မံသံ.

အဇ္ဈာရာမော နာမ ပရိက္ခိတ္တဿ အာရာမဿ အန္တောအာရာမော. အပရိက္ခိတ္တဿ ဥပစာရော.

အဂိလာနော နာမ သက္ကောတိ ပိဏ္ဍာယ စရိတုံ [ဂန္တုံ (က.)].

ဂိလာနော နာမ န သက္ကောတိ ပိဏ္ဍာယ စရိတုံ [ဂန္တုံ (က.)].

အပ္ပဋိသံဝိဒိတံ အဂိလာနော ‘‘ခါဒိဿာမိ ဘုဉ္ဇိဿာမီ’’တိ ပဋိဂ္ဂဏှာတိ၊ အာပတ္တိ ဒုက္ကဋဿ. အဇ္ဈောဟာရေ အဇ္ဈောဟာရေ အာပတ္တိ ပါဋိဒေသနီယဿ.

၅၇၄. အပ္ပဋိသံဝိဒိတေ အပ္ပဋိသံဝိဒိတသညီ ခါဒနီယံ ဝါ ဘောဇနီယံ ဝါ အဇ္ဈာရာမေ သဟတ္ထာ ပဋိဂ္ဂဟေတွာ အဂိလာနော ခါဒတိ ဝါ ဘုဉ္ဇတိ ဝါ၊ အာပတ္တိ ပါဋိဒေသနီယဿ. အပ္ပဋိသံဝိဒိတေ ဝေမတိကော ခါဒနီယံ ဝါ ဘောဇနီယံ ဝါ အဇ္ဈာရာမေ သဟတ္ထာ ပဋိဂ္ဂဟေတွာ အဂိလာနော ခါဒတိ ဝါ ဘုဉ္ဇတိ ဝါ၊ အာပတ္တိ ပါဋိဒေသနီယဿ. အပ္ပဋိသံဝိဒိတေ ပဋိသံဝိဒိတသညီ ခါဒနီယံ ဝါ ဘောဇနီယံ ဝါ အဇ္ဈာရာမေ သဟတ္ထာ ပဋိဂ္ဂဟေတွာ အဂိလာနော ခါဒတိ ဝါ ဘုဉ္ဇတိ ဝါ၊ အာပတ္တိ ပါဋိဒေသနီယဿ.

ယာမကာလိကံ သတ္တာဟကာလိကံ ယာဝဇီဝိကံ အာဟာရတ္ထာယ ပဋိဂ္ဂဏှာတိ၊ အာပတ္တိ ဒုက္ကဋဿ. အဇ္ဈောဟာရေ အဇ္ဈောဟာရေ အာပတ္တိ ဒုက္ကဋဿ. ပဋိသံဝိဒိတေ အပ္ပဋိသံဝိဒိတသညီ၊ အာပတ္တိ ဒုက္ကဋဿ. ပဋိသံဝိဒိတေ ဝေမတိကော၊ အာပတ္တိ ဒုက္ကဋဿ. ပဋိသံဝိဒိတေ ပဋိသံဝိဒိတသညီ၊ အနာပတ္တိ.

၅၇၅. အနာပတ္တိ ပဋိသံဝိဒိတေ၊ ဂိလာနဿ၊ ပဋိသံဝိဒိတေ ဝါ ဂိလာနဿ ဝါ သေသကံ ဘုဉ္ဇတိ၊ ဗဟာရာမေ ပဋိဂ္ဂဟေတွာ အန္တောအာရာမေ ဘုဉ္ဇတိ၊ တတ္ထ ဇာတကံ မူလံ ဝါ တစံ ဝါ ပတ္တံ ဝါ ပုပ္ဖံ ဝါ ဖလံ ဝါ ဘုဉ္ဇတိ၊ ယာမကာလိကံ သတ္တာဟကာလိကံ ယာဝဇီဝိကံ သတိ ပစ္စယေ ပရိဘုဉ္ဇတိ၊ ဥမ္မတ္တကဿ၊ အာဒိကမ္မိကဿာတိ.

စတုတ္ထပါဋိဒေသနီယသိက္ခာပဒံ နိဋ္ဌိတံ.

ဥဒ္ဒိဋ္ဌာ ခေါ၊ အာယသ္မန္တော၊ စတ္တာရော ပါဋိဒေသနီယာ ဓမ္မာ. တတ္ထာယသ္မန္တေ ပုစ္ဆာမိ – ‘‘ကစ္စိတ္ထ ပရိသုဒ္ဓါ’’? ဒုတိယမ္ပိ ပုစ္ဆာမိ – ‘‘ကစ္စိတ္ထ ပရိသုဒ္ဓါ’’? တတိယမ္ပိ ပုစ္ဆာမိ – ‘‘ကစ္စိတ္ထ ပရိသုဒ္ဓါ’’? ပရိသုဒ္ဓေတ္ထာယသ္မန္တော၊ တသ္မာ တုဏှီ၊ ဧဝမေတံ ဓာရယာမီတိ.

ပါဋိဒေသနီယကဏ္ဍံ နိဋ္ဌိတံ.