၆. ဇောတိကသိက္ခာပဒံ

၃၅၀. တေန သမယေန ဗုဒ္ဓေါ ဘဂဝါ ဘဂ္ဂေသု ဝိဟရတိ သုံသုမာရဂိရေ [သုံသုမာရဂိရေ (သီ. သျာ.) သံသုမာရဂိရေ (က.)] ဘေသကဠာဝနေ မိဂဒါယေ. တေန ခေါ ပန သမယေန ဘိက္ခူ ဟေမန္တိကေ ကာလေ အညတရံ မဟန္တံ သုသိရကဋ္ဌံ ဇောတိံ သမာဒဟိတွာ ဝိသိဗ္ဗေသုံ. တသ္မိဉ္စ သုသိရေ ကဏှသပ္ပေါ အဂ္ဂိနာ သန္တတ္တော နိက္ခမိတွာ ဘိက္ခူ ပရိပါတေသိ. ဘိက္ခူ တဟံ တဟံ ဥပဓာဝိံသု. ယေ တေ ဘိက္ခူ အပ္ပိစ္ဆာ။ပေ။ တေ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခူ ဇောတိံ သမာဒဟိတွာ ဝိသိဗ္ဗေဿန္တီ’’တိ။ပေ။ သစ္စံ ကိရ၊ ဘိက္ခဝေ၊ ဘိက္ခူ ဇောတိံ သမာဒဟိတွာ ဝိသိဗ္ဗေန္တီတိ? ‘‘သစ္စံ၊ ဘဂဝါ’’တိ. ဝိဂရဟိ ဗုဒ္ဓေါ ဘဂဝါ။ပေ။ ကထဉှိ နာမ တေ၊ ဘိက္ခဝေ၊ မောဃပုရိသာ ဇောတိံ သမာဒဟိတွာ ဝိသိဗ္ဗေဿန္တိ! နေတံ၊ ဘိက္ခဝေ၊ အပ္ပသန္နာနံ ဝါ ပသာဒါယ။ပေ။ ဧဝဉ္စ ပန၊ ဘိက္ခဝေ၊ ဣမံ သိက္ခာပဒံ ဥဒ္ဒိသေယျာထ –

‘‘ယော ပန ဘိက္ခု ဝိသိဗ္ဗနာပေက္ခော ဇောတိံ သမာဒဟေယျ ဝါ သမာဒဟာပေယျ ဝါ၊ ပါစိတ္တိယ’’န္တိ.

ဧဝဉ္စိဒံ ဘဂဝတာ ဘိက္ခူနံ သိက္ခာပဒံ ပညတ္တံ ဟောတိ.

၃၅၁. တေန ခေါ ပန သမယေန ဘိက္ခူ ဂိလာနာ ဟောန္တိ. ဂိလာနပုစ္ဆကာ ဘိက္ခူ ဂိလာနေ ဘိက္ခူ ဧတဒဝေါစုံ – ‘‘ကစ္စာဝုသော၊ ခမနီယံ၊ ကစ္စိ ယာပနီယ’’န္တိ? ‘‘ပုဗ္ဗေ မယံ၊ အာဝုသော၊ ဇောတိံ သမာဒဟိတွာ ဝိသိဗ္ဗေမ၊ တေန နော ဖာသု ဟောတိ. ဣဒါနိ ပန ‘‘ဘဂဝတာ ပဋိက္ခိတ္တ’’န္တိ ကုက္ကုစ္စာယန္တာ န ဝိသိဗ္ဗေမ၊ တေန နော န ဖာသု ဟောတီ’’တိ. ဘဂဝတော ဧတမတ္ထံ အာရောစေသုံ။ပေ။ အနုဇာနာမိ၊ ဘိက္ခဝေ၊ ဂိလာနေန ဘိက္ခုနာ ဇောတိံ သမာဒဟိတွာ ဝါ သမာဒဟာပေတွာ ဝါ ဝိသိဗ္ဗေတုံ. ဧဝဉ္စ ပန၊ ဘိက္ခဝေ၊ ဣမံ သိက္ခာပဒံ ဥဒ္ဒိသေယျာထ –

‘‘ယော ပန ဘိက္ခု အဂိလာနော ဝိသိဗ္ဗနာပေက္ခော ဇောတိံ သမာဒဟေယျ ဝါ သမာဒဟာပေယျ ဝါ၊ ပါစိတ္တိယ’’န္တိ.

ဧဝဉ္စိဒံ ဘဂဝတာ ဘိက္ခူနံ သိက္ခာပဒံ ပညတ္တံ ဟောတိ.

၃၅၂. တေန ခေါ ပန သမယေန ဘိက္ခူ ပဒီပေပိ ဇောတိကေပိ ဇန္တာဃရေပိ ကုက္ကုစ္စာယန္တိ. ဘဂဝတော ဧတမတ္ထံ အာရောစေသုံ။ပေ။ အနုဇာနာမိ၊ ဘိက္ခဝေ၊ တထာရူပပ္ပစ္စယာ ဇောတိံ သမာဒဟိတုံ သမာဒဟာပေတုံ. ဧဝဉ္စ ပန၊ ဘိက္ခဝေ၊ ဣမံ သိက္ခာပဒံ ဥဒ္ဒိသေယျာထ –

၃၅၃. ‘‘ယော ပန ဘိက္ခု အဂိလာနော ဝိသိဗ္ဗနာပေက္ခော ဇောတိံ သမာဒဟေယျ ဝါ သမာဒဟာပေယျ ဝါ၊ အညတြ တထာရူပပ္ပစ္စယာ၊ ပါစိတ္တိယ’’န္တိ.

၃၅၄. ယော ပနာတိ ယော ယာဒိသော။ပေ။ ဘိက္ခူတိ။ပေ။ အယံ ဣမသ္မိံ အတ္ထေ အဓိပ္ပေတော ဘိက္ခူတိ.

အဂိလာနော နာမ ယဿ ဝိနာ အဂ္ဂိနာ ဖာသု ဟောတိ.

ဂိလာနော နာမ ယဿ ဝိနာ အဂ္ဂိနာ န ဖာသု ဟောတိ.

ဝိသိဗ္ဗနာပေက္ခောတိ တပ္ပိတုကာမော.

ဇောတိ နာမ အဂ္ဂိ ဝုစ္စတိ.

သမာဒဟေယျာတိ သယံ သမာဒဟတိ၊ အာပတ္တိ ပါစိတ္တိယဿ.

သမာဒဟာပေယျာတိ အညံ အာဏာပေတိ၊ အာပတ္တိ ပါစိတ္တိယဿ. သကိံ အာဏတ္တော ဗဟုကမ္ပိ သမာဒဟတိ၊ အာပတ္တိ ပါစိတ္တိယဿ.

အညတြ တထာ ရူပပ္ပစ္စယာတိ ဌပေတွာ တထာရူပပ္ပစ္စယံ.

၃၅၅. အဂိလာနော အဂိလာနသညီ ဝိသိဗ္ဗနာပေက္ခော ဇောတိံ သမာဒဟတိ ဝါ သမာဒဟာပေတိ ဝါ၊ အညတြ တထာရူပပ္ပစ္စယာ၊ အာပတ္တိ ပါစိတ္တိယဿ. အဂိလာနော ဝေမတိကော ဝိသိဗ္ဗနာပေက္ခော ဇောတိံ သမာဒဟတိ ဝါ သမာဒဟာပေတိ ဝါ၊ အညတြ တထာရူပပ္ပစ္စယာ၊ အာပတ္တိ ပါစိတ္တိယဿ. အဂိလာနော ဂိလာနသညီ ဝိသိဗ္ဗနာပေက္ခော ဇောတိံ သမာဒဟတိ ဝါ သမာဒဟာပေတိ ဝါ၊ အညတြ တထာရူပပ္ပစ္စယာ၊ အာပတ္တိ ပါစိတ္တိယဿ.

ပဋိလာတံ ဥက္ခိပတိ၊ အာပတ္တိ ဒုက္ကဋဿ. ဂိလာနော အဂိလာနသညီ၊ အာပတ္တိ ဒုက္ကဋဿ. ဂိလာနော ဝေမတိကော၊ အာပတ္တိ ဒုက္ကဋဿ. ဂိလာနော ဂိလာနသညီ၊ အနာပတ္တိ.

၃၅၆. အနာပတ္တိ ဂိလာနဿ၊ အညေန ကတံ ဝိသိဗ္ဗေတိ၊ ဝီတစ္စိတင်္ဂါရံ ဝိသိဗ္ဗေတိ၊ ပဒီပေ ဇောတိကေ ဇန္တာဃရေ တထာရူပပ္ပစ္စယာ၊ အာပဒါသု၊ ဥမ္မတ္တကဿ၊ အာဒိကမ္မိကဿာတိ.

ဇောတိကသိက္ခာပဒံ နိဋ္ဌိတံ ဆဋ္ဌံ.