၃. ဟသဓမ္မသိက္ခာပဒံ

၃၃၅. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ. တေန ခေါ ပန သမယေန သတ္တရသဝဂ္ဂိယာ ဘိက္ခူ အစိရဝတိယာ နဒိယာ ဥဒကေ ကီဠန္တိ. တေန ခေါ ပန သမယေန ရာဇာ ပသေနဒိ ကောသလော မလ္လိကာယ ဒေဝိယာ သဒ္ဓိံ ဥပရိပါသာဒဝရဂတော ဟောတိ. အဒ္ဒသာ ခေါ ရာဇာ ပသေနဒိ ကောသလော သတ္တရသဝဂ္ဂိယေ ဘိက္ခူ အစိရဝတိယာ နဒိယာ ဥဒကေ ကီဠန္တေ. ဒိသွာန မလ္လိကံ ဒေဝိံ ဧတဒဝေါစ – ‘‘ဧတေ တေ၊ မလ္လိကေ၊ အရဟန္တော ဥဒကေ ကီဠန္တီ’’တိ. ‘‘နိဿံသယံ ခေါ၊ မဟာရာဇ၊ ဘဂဝတာ သိက္ခာပဒံ အပညတ္တံ. တေ ဝါ ဘိက္ခူ အပ္ပကတညုနော’’တိ. အထ ခေါ ရညော ပသေနဒိဿ ကောသလဿ ဧတဒဟောသိ – ‘‘ကေန နု ခေါ အဟံ ဥပါယေန ဘဂဝတော စ န အာရောစေယျံ၊ ဘဂဝါ စ ဇာနေယျ ဣမေ ဘိက္ခူ ဥဒကေ ကီဠိတာ’’တိ? အထ ခေါ ရာဇာ ပသေနဒိ ကောသလော သတ္တရသဝဂ္ဂိယေ ဘိက္ခူ ပက္ကောသာပေတွာ မဟန္တံ ဂုဠပိဏ္ဍံ အဒါသိ – ‘‘ဣမံ၊ ဘန္တေ၊ ဂုဠပိဏ္ဍံ ဘဂဝတော ဒေထာ’’တိ. သတ္တရသဝဂ္ဂိယာ ဘိက္ခူ တံ ဂုဠပိဏ္ဍံ အာဒါယ ယေန ဘဂဝါ တေနုပသင်္ကမိံသု၊ ဥပသင်္ကမိတွာ ဘဂဝန္တံ ဧတဒဝေါစုံ – ‘‘ဣမံ၊ ဘန္တေ၊ ဂုဠပိဏ္ဍံ ရာဇာ ပသေနဒိ ကောသလော ဘဂဝတော ဒေတီ’’တိ. ‘‘ကဟံ ပန တုမှေ၊ ဘိက္ခဝေ၊ ရာဇာ အဒ္ဒသာ’’တိ. ‘‘အစိရဝတိယာ နဒိယာ၊ ဘဂဝါ၊ ဥဒကေ ကီဠန္တေ’’တိ. ဝိဂရဟိ ဗုဒ္ဓေါ ဘဂဝါ။ပေ။ ကထဉှိ နာမ တုမှေ၊ မောဃပုရိသာ၊ ဥဒကေ ကီဠိဿထ! နေတံ၊ မောဃပုရိသာ၊ အပ္ပသန္နာနံ ဝါ ပသာဒါယ။ပေ။ ဧဝဉ္စ ပန၊ ဘိက္ခဝေ၊ ဣမံ သိက္ခာပဒံ ဥဒ္ဒိသေယျာထ –

၃၃၆. ‘‘ဥဒကေ ဟသဓမ္မေ [ဟဿဓမ္မေ (သီ. သျာ.)] ပါစိတ္တိယ’’န္တိ.

၃၃၇. ဥဒကေ ဟသဓမ္မော နာမ ဥပရိဂေါပ္ဖကေ ဥဒကေ ဟသာဓိပ္ပါယော နိမုဇ္ဇတိ ဝါ ဥမ္မုဇ္ဇတိ ဝါ ပလဝတိ ဝါ၊ အာပတ္တိ ပါစိတ္တိယဿ.

၃၃၈. ဥဒကေ ဟသဓမ္မေ ဟသဓမ္မသညီ၊ အာပတ္တိ ပါစိတ္တိယဿ. ဥဒကေ ဟသဓမ္မေ ဝေမတိကော၊ အာပတ္တိ ပါစိတ္တိယဿ. ဥဒကေ ဟသဓမ္မေ အဟသဓမ္မသညီ၊ အာပတ္တိ ပါစိတ္တိယဿ.

ဟေဋ္ဌာဂေါပ္ဖကေ ဥဒကေ ကီဠတိ၊ အာပတ္တိ ဒုက္ကဋဿ. ဥဒကေ နာဝါယ ကီဠတိ၊ အာပတ္တိ ဒုက္ကဋဿ. ဟတ္ထေန ဝါ ပါဒေန ဝါ ကဋ္ဌေန ဝါ ကဌလာယ ဝါ ဥဒကံ ပဟရတိ၊ အာပတ္တိ ဒုက္ကဋဿ. ဘာဇနဂတံ ဥဒကံ ဝါ ကဉ္ဇိကံ ဝါ ခီရံ ဝါ တက္ကံ ဝါ ရဇနံ ဝါ ပဿာဝံ ဝါ စိက္ခလ္လံ ဝါ ကီဠတိ၊ အာပတ္တိ ဒုက္ကဋဿ.

ဥဒကေ အဟသဓမ္မေ ဟသဓမ္မသညီ၊ အာပတ္တိ ဒုက္ကဋဿ. ဥဒကေ အဟသဓမ္မေ ဝေမတိကော၊ အာပတ္တိ ဒုက္ကဋဿ. ဥဒကေ အဟသဓမ္မေ အဟသဓမ္မသညီ၊ အနာပတ္တိ.

၃၃၉. အနာပတ္တိ န ဟသာဓိပ္ပါယော၊ သတိ ကရဏီယေ ဥဒကံ ဩတရိတွာ နိမုဇ္ဇတိ ဝါ ဥမ္မုဇ္ဇတိ ဝါ ပလဝတိ ဝါ၊ ပါရံ ဂစ္ဆန္တော နိမုဇ္ဇတိ ဝါ ဥမ္မုဇ္ဇတိ ဝါ ပလဝတိ ဝါ၊ အာပဒါသု၊ ဥမ္မတ္တကဿ၊ အာဒိကမ္မိကဿာတိ.

ဟသဓမ္မသိက္ခာပဒံ နိဋ္ဌိတံ တတိယံ.