၁. သုရာပါနသိက္ခာပဒံ

၃၂၆. တေန သမယေန ဗုဒ္ဓေါ ဘဂဝါ စေတိယေသု စာရိကံ စရမာနော ယေန ဘဒ္ဒဝတိကာ တေန ပါယာသိ. အဒ္ဒသံသု ခေါ ဂေါပါလကာ ပသုပါလကာ ကဿကာ ပထာဝိနော ဘဂဝန္တံ ဒူရတောဝ အာဂစ္ဆန္တံ. ဒိသွာန ဘဂဝန္တံ ဧတဒဝေါစုံ – ‘‘မာ ခေါ၊ ဘန္တေ၊ ဘဂဝါ အမ္ဗတိတ္ထံ အဂမာသိ. အမ္ဗတိတ္ထေ၊ ဘန္တေ၊ ဇဋိလဿ အဿမေ နာဂေါ ပဋိဝသတိ ဣဒ္ဓိမာ အာသိဝိသော [အာသီဝိသော (သီ. သျာ.)] ဃောရဝိသော. သော ဘဂဝန္တံ မာ ဝိဟေဌေသီ’’တိ. ဧဝံ ဝုတ္တေ ဘဂဝါ တုဏှီ အဟောသိ. ဒုတိယမ္ပိ ခေါ။ပေ။ တတိယမ္ပိ ခေါ ဂေါပါလကာ ပသုပါလကာ ကဿကာ ပထာဝိနော ဘဂဝန္တံ ဧတဒဝေါစုံ – ‘‘မာ ခေါ၊ ဘန္တေ၊ ဘဂဝါ အမ္ဗတိတ္ထံ အဂမာသိ. အမ္ဗတိတ္ထေ၊ ဘန္တေ၊ ဇဋိလဿ အဿမေ နာဂေါ ပဋိဝသတိ ဣဒ္ဓိမာ အာသိဝိသော ဃောရဝိသော. သော ဘဂဝန္တံ မာ ဝိဟေဌေသီ’’တိ. တတိယမ္ပိ ခေါ ဘဂဝါ တုဏှီ အဟောသိ.

အထ ခေါ ဘဂဝါ အနုပုဗ္ဗေန စာရိကံ စရမာနော ယေန ဘဒ္ဒဝတိကာ တဒဝသရိ. တတြ သုဒံ ဘဂဝါ ဘဒ္ဒဝတိကာယံ ဝိဟရတိ. အထ ခေါ အာယသ္မာ သာဂတော ယေန အမ္ဗတိတ္ထဿ [အမ္ဗတိတ္ထကဿ (သီ.)၊ အမ္ဗတိတ္ထံ (သျာ.)] ဇဋိလဿ အဿမော တေနုပသင်္ကမိ၊ ဥပသင်္ကမိတွာ အဂျာဂါရံ ပဝိသိတွာ တိဏသန္ထာရကံ ပညပေတွာ နိသီဒိ ပလ္လင်္ကံ အာဘုဇိတွာ ဥဇုံ ကာယံ ပဏိဓာယ ပရိမုခံ သတိံ ဥပဋ္ဌပေတွာ. အဒ္ဒသာ ခေါ သော နာဂေါ အာယသ္မန္တံ သာဂတံ ပဝိဋ္ဌံ. ဒိသွာန ဒုမ္မနော [ဒုက္ခီ ဒုမ္မနော (သီ. သျာ.)] ပဓူပါယိ [ပဓူပါသိ (သျာ. က.)]. အာယသ္မာပိ သာဂတော ပဓူပါယိ [ပဓူပါသိ (သျာ. က.)]. အထ ခေါ သော နာဂေါ မက္ခံ အသဟမာနော ပဇ္ဇလိ. အာယသ္မာပိ သာဂတော တေဇောဓာတုံ သမာပဇ္ဇိတွာ ပဇ္ဇလိ. အထ ခေါ အာယသ္မာ သာဂတော တဿ နာဂဿ တေဇသာ တေဇံ ပရိယာဒိယိတွာ ယေန ဘဒ္ဒဝတိကာ တေနုပသင်္ကမိ. အထ ခေါ ဘဂဝါ ဘဒ္ဒဝတိကာယံ ယထာဘိရန္တံ ဝိဟရိတွာ ယေန ကောသမ္ဗီ တေန စာရိကံ ပက္ကာမိ. အဿောသုံ ခေါ ကောသမ္ဗိကာ ဥပါသကာ – ‘‘အယျော ကိရ သာဂတော အမ္ဗတိတ္ထိကေန နာဂေန သဒ္ဓိံ သင်္ဂါမေသီ’’တိ.

အထ ခေါ ဘဂဝါ အနုပုဗ္ဗေန စာရိကံ စရမာနော ယေန ကောသမ္ဗီ တဒဝသရိ. အထ ခေါ ကောသမ္ဗိကာ ဥပါသကာ ဘဂဝတော ပစ္စုဂ္ဂမနံ ကရိတွာ ယေနာယသ္မာ သာဂတော တေနုပသင်္ကမိံသု၊ ဥပသင်္ကမိတွာ အာယသ္မန္တံ သာဂတံ အဘိဝါဒေတွာ ဧကမန္တံ အဋ္ဌံသု. ဧကမန္တံ ဌိတာ ခေါ ကောသမ္ဗိကာ ဥပါသကာ အာယသ္မန္တံ သာဂတံ ဧတဒဝေါစုံ – ‘‘ကိံ၊ ဘန္တေ၊ အယျာနံ ဒုလ္လဘဉ္စ မနာပဉ္စ၊ ကိံ ပဋိယာဒေမာ’’တိ? ဧဝံ ဝုတ္တေ ဆဗ္ဗဂ္ဂိယာ ဘိက္ခူ ကောသမ္ဗိကေ ဥပါသကေ ဧတဒဝေါစုံ – ‘‘အတ္ထာဝုသော၊ ကာပေါတိကာ နာမ ပသန္နာ ဘိက္ခူနံ ဒုလ္လဘာ စ မနာပါ စ၊ တံ ပဋိယာဒေထာ’’တိ. အထ ခေါ ကောသမ္ဗိကာ ဥပါသကာ ဃရေ ဃရေ ကာပေါတိကံ ပသန္နံ ပဋိယာဒေတွာ အာယသ္မန္တံ သာဂတံ ပိဏ္ဍာယ ပဝိဋ္ဌံ ဒိသွာန အာယသ္မန္တံ သာဂတံ ဧတဒဝေါစုံ – ‘‘ပိဝတု၊ ဘန္တေ၊ အယျော သာဂတော ကာပေါတိကံ ပသန္နံ၊ ပိဝတု၊ ဘန္တေ၊ အယျော သာဂတော ကာပေါတိကံ ပသန္န’’န္တိ. အထ ခေါ အာယသ္မာ သာဂတော ဃရေ ဃရေ ကာပေါတိကံ ပသန္နံ ပိဝိတွာ နဂရမှာ နိက္ခမန္တော နဂရဒွါရေ ပရိပတိ.

အထ ခေါ ဘဂဝါ သမ္ဗဟုလေဟိ ဘိက္ခူဟိ သဒ္ဓိံ နဂရမှာ နိက္ခမန္တော အဒ္ဒသ အာယသ္မန္တံ သာဂတံ နဂရဒွါရေ ပရိပတန္တံ. ဒိသွာန ဘိက္ခူ အာမန္တေသိ – ‘‘ဂဏှထ၊ ဘိက္ခဝေ၊ သာဂတ’’န္တိ. ‘‘ဧဝံ၊ ဘန္တေ’’တိ ခေါ တေ ဘိက္ခူ ဘဂဝတော ပဋိဿုဏိတွာ အာယသ္မန္တံ သာဂတံ အာရာမံ နေတွာ ယေန ဘဂဝါ တေန သီသံ ကတွာ နိပါတေသုံ. အထ ခေါ အာယသ္မာ သာဂတော ပရိဝတ္တိတွာ ယေန ဘဂဝါ တေန ပါဒေ ကရိတွာ သေယျံ ကပ္ပေသိ. အထ ခေါ ဘဂဝါ ဘိက္ခူ အာမန္တေသိ – ‘‘နနု၊ ဘိက္ခဝေ၊ ပုဗ္ဗေ သာဂတော တထာဂတေ သဂါရဝေါ အဟောသိ သပ္ပတိဿော’’တိ? ‘‘ဧဝံ၊ ဘန္တေ’’. ‘‘အပိ နု ခေါ၊ ဘိက္ခဝေ၊ သာဂတော ဧတရဟိ တထာဂတေ သဂါရဝေါ သပ္ပတိဿော’’တိ? ‘‘နော ဟေတံ၊ ဘန္တေ’’. ‘‘နနု၊ ဘိက္ခဝေ၊ သာဂတော အမ္ဗတိတ္ထိကေန နာဂေန [ဍေဍ္ဍုဘေနာပိ (သီ. သျာ.)] သဒ္ဓိံ သင်္ဂါမေသီ’’တိ? ‘‘ဧဝံ၊ ဘန္တေ’’. ‘‘အပိ နု ခေါ၊ ဘိက္ခဝေ၊ သာဂတော ဧတရဟိ ပဟောတိ နာဂေန သဒ္ဓိံ သင်္ဂါမေတု’’န္တိ? ‘‘နော ဟေတံ၊ ဘန္တေ’’. ‘‘အပိ နု ခေါ၊ ဘိက္ခဝေ၊ တံ ပါတဗ္ဗံ ယံ ပိဝိတွာ ဝိသညီ အဿာ’’တိ? ‘‘နော ဟေတံ၊ ဘန္တေ’’. ‘‘အနနုစ္ဆဝိကံ၊ ဘိက္ခဝေ၊ သာဂတဿ အနနုလောမိကံ အပ္ပတိရူပံ အဿာမဏကံ အကပ္ပိယံ အကရဏီယံ. ကထဉှိ နာမ၊ ဘိက္ခဝေ၊ သာဂတော မဇ္ဇံ ပိဝိဿတိ! နေတံ၊ ဘိက္ခဝေ၊ အပ္ပသန္နာနံ ဝါ ပသာဒါယ။ပေ။ ဧဝဉ္စ ပန၊ ဘိက္ခဝေ၊ ဣမံ သိက္ခာပဒံ ဥဒ္ဒိသေယျာထ –

၃၂၇. ‘‘သုရာမေရယပါနေ ပါစိတ္တိယ’’န္တိ.

၃၂၈. သုရာ နာမ ပိဋ္ဌသုရာ ပူဝသုရာ ဩဒနသုရာ ကိဏ္ဏပက္ခိတ္တာ သမ္ဘာရသံယုတ္တာ.

မေရယော နာမ ပုပ္ဖါသဝေါ ဖလာသဝေါ မဓွာသဝေါ ဂုဠာသဝေါ သမ္ဘာရသံယုတ္တော.

ပိဝေယျာတိ အန္တမသော ကုသဂ္ဂေနပိ ပိဝတိ၊ အာပတ္တိ ပါစိတ္တိယဿ.

မဇ္ဇေ မဇ္ဇသညီ ပိဝတိ၊ အာပတ္တိ ပါစိတ္တိယဿ. မဇ္ဇေ ဝေမတိကော ပိဝတိ၊ အာပတ္တိ ပါစိတ္တိယဿ. မဇ္ဇေ အမဇ္ဇသညီ ပိဝတိ၊ အာပတ္တိ ပါစိတ္တိယဿ.

အမဇ္ဇေ မဇ္ဇသညီ၊ အာပတ္တိ ဒုက္ကဋဿ. အမဇ္ဇေ ဝေမတိကော၊ အာပတ္တိ ဒုက္ကဋဿ. အမဇ္ဇေ အမဇ္ဇသညီ၊ အနာပတ္တိ.

၃၂၉. အနာပတ္တိ အမဇ္ဇဉ္စ ဟောတိ မဇ္ဇဝဏ္ဏံ မဇ္ဇဂန္ဓံ မဇ္ဇရသံ တံ ပိဝတိ၊ သူပသမ္ပာကေ၊ မံသသမ္ပာကေ၊ တေလသမ္ပာကေ၊ အာမလကဖာဏိတေ၊ အမဇ္ဇံ အရိဋ္ဌံ ပိဝတိ၊ ဥမ္မတ္တကဿ၊ အာဒိကမ္မိကဿာတိ.

သုရာပါနသိက္ခာပဒံ နိဋ္ဌိတံ ပဌမံ.