၉. ဒုဋ္ဌုလ္လာရောစနသိက္ခာပဒံ

၇၈. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ. တေန ခေါ ပန သမယေန အာယသ္မာ ဥပနန္ဒော သကျပုတ္တော ဆဗ္ဗဂ္ဂိယေဟိ ဘိက္ခူဟိ သဒ္ဓိံ ဘဏ္ဍနကတော ဟောတိ. သော သဉ္စေတနိကံ သုက္ကဝိဿဋ္ဌိံ အာပတ္တိံ အာပဇ္ဇိတွာ သံဃံ တဿာ အာပတ္တိယာ ပရိဝါသံ ယာစိ. တဿ သံဃော တဿာ အာပတ္တိယာ ပရိဝါသံ အဒါသိ. တေန ခေါ ပန သမယေန သာဝတ္ထိယံ အညတရဿ ပူဂဿ သံဃဘတ္တံ ဟောတိ. သော ပရိဝသန္တော ဘတ္တဂ္ဂေ အာသနပရိယန္တေ နိသီဒိ. ဆဗ္ဗဂ္ဂိယာ ဘိက္ခူ တေ ဥပါသကေ ဧတဒဝေါစုံ – ‘‘ဧသော၊ အာဝုသော၊ အာယသ္မာ ဥပနန္ဒော သကျပုတ္တော တုမှာကံ သမ္ဘာဝိတော ကုလူပကော၊ ယေနေဝ ဟတ္ထေန သဒ္ဓါဒေယျံ ဘုဉ္ဇတိ တေနေဝ ဟတ္ထေန ဥပက္ကမိတွာ အသုစိံ မောစေသိ. သော သဉ္စေတနိကံ သုက္ကဝိဿဋ္ဌိံ အာပတ္တိံ အာပဇ္ဇိတွာ သံဃံ တဿာ အာပတ္တိယာ ပရိဝါသံ ယာစိ. တဿ သံဃော တဿာ အာပတ္တိယာ ပရိဝါသံ အဒါသိ. သော ပရိဝသန္တော အာသနပရိယန္တေ နိသိန္နော’’တိ. ယေ တေ ဘိက္ခူ အပ္ပိစ္ဆာ။ပေ။ တေ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဆဗ္ဗဂ္ဂိယာ ဘိက္ခူ ဘိက္ခုဿ ဒုဋ္ဌုလ္လံ အာပတ္တိံ အနုပသမ္ပန္နဿ အာရောစေဿန္တီ’’တိ။ပေ။ ‘‘သစ္စံ ကိရ တုမှေ၊ ဘိက္ခဝေ၊ ဘိက္ခုဿ ဒုဋ္ဌုလ္လံ အာပတ္တိံ အနုပသမ္ပန္နဿ အာရောစေထာ’’တိ? ‘‘သစ္စံ၊ ဘဂဝါ’’တိ. ဝိဂရဟိ ဗုဒ္ဓေါ ဘဂဝါ။ပေ။ ကထဉှိ နာမ တုမှေ၊ မောဃပုရိသာ၊ ဘိက္ခုဿ ဒုဋ္ဌုလ္လံ အာပတ္တိံ အနုပသမ္ပန္နဿ အာရောစေဿထ! နေတံ၊ မောဃပုရိသာ၊ အပ္ပသန္နာနံ ဝါ ပသာဒါယ။ပေ။ ဧဝဉ္စ ပန၊ ဘိက္ခဝေ၊ ဣမံ သိက္ခာပဒံ ဥဒ္ဒိသေယျာထ –

၇၉. ‘‘ယော ပန ဘိက္ခု ဘိက္ခုဿ ဒုဋ္ဌုလ္လံ အာပတ္တိံ အနုပသမ္ပန္နဿ အာရောစေယျ၊ အညတြ ဘိက္ခုသမ္မုတိယာ [ဘိက္ခုသမ္မတိယာ (သျာ.)]၊ ပါစိတ္တိယ’’န္တိ.

၈၀. ယော ပနာတိ ယော ယာဒိသော။ပေ။ ဘိက္ခူတိ။ပေ။ အယံ ဣမသ္မိံ အတ္ထေ အဓိပ္ပေတော ဘိက္ခူတိ.

ဘိက္ခုဿာတိ အညဿ ဘိက္ခုဿ.

ဒုဋ္ဌုလ္လာ နာမ အာပတ္တိ – စတ္တာရိ စ ပါရာဇိကာနိ၊ တေရသ စ သံဃာဒိသေသာ.

အနုပသမ္ပန္နော နာမ ဘိက္ခုဉ္စ ဘိက္ခုနိဉ္စ ဌပေတွာ အဝသေသော အနုပသမ္ပန္နော နာမ.

အာရောစေယျာတိ အာရောစေယျ ဣတ္ထိယာ ဝါ ပုရိသဿ ဝါ ဂဟဋ္ဌဿ ဝါ ပဗ္ဗဇိတဿ ဝါ.

အညတြ ဘိက္ခုသမ္မုတိယာတိ ဌပေတွာ ဘိက္ခုသမ္မုတိံ.

အတ္ထိ ဘိက္ခုသမ္မုတိ အာပတ္တိပရိယန္တာ၊ န ကုလပရိယန္တာ. အတ္ထိ ဘိက္ခုသမ္မုတိ ကုလပရိယန္တာ၊ န အာပတ္တိပရိယန္တာ၊ အတ္ထိ ဘိက္ခုသမ္မုတိ အာပတ္တိပရိယန္တာ စ ကုလပရိယန္တာ စ၊ အတ္ထိ ဘိက္ခုသမ္မုတိ နေဝ အာပတ္တိပရိယန္တာ န ကုလပရိယန္တာ.

အာပတ္တိပရိယန္တာ နာမ အာပတ္တိယော ပရိဂ္ဂဟိတာယော ဟောန္တိ – ‘‘ဧတ္တကာဟိ အာပတ္တီဟိ အာရောစေတဗ္ဗော’’တိ.

ကုလပရိယန္တာ နာမ ကုလာနိ ပရိဂ္ဂဟိတာနိ ဟောန္တိ – ‘‘ဧတ္တကေသု ကုလေသု အာရောစေတဗ္ဗော’’တိ. အာပတ္တိပရိယန္တာ စ ကုလပရိယန္တာ စ နာမ အာပတ္တိယော စ ပရိဂ္ဂဟိတာယော ဟောန္တိ၊ ကုလာနိ စ ပရိဂ္ဂဟိတာနိ ဟောန္တိ – ‘‘ဧတ္တကာဟိ အာပတ္တီဟိ ဧတ္တကေသု ကုလေသု အာရောစေတဗ္ဗော’’တိ. နေဝ အာပတ္တိပရိယန္တာ န ကုလပရိယန္တာ နာမ အာပတ္တိယော စ အပရိဂ္ဂဟိတာယော ဟောန္တိ၊ ကုလာနိ စ အပရိဂ္ဂဟိတာနိ ဟောန္တိ – ‘‘ဧတ္တကာဟိ အာပတ္တီဟိ ဧတ္တကေသု ကုလေသု အာရောစေတဗ္ဗော’’တိ.

၈၁. အာပတ္တိပရိယန္တေ ယာ အာပတ္တိယော ပရိဂ္ဂဟိတာယော ဟောန္တိ၊ တာ အာပတ္တိယော ဌပေတွာ အညာဟိ အာပတ္တီဟိ အာရောစေတိ၊ အာပတ္တိ ပါစိတ္တိယဿ.

ကုလပရိယန္တေ ယာနိ ကုလာနိ ပရိဂ္ဂဟိတာနိ ဟောန္တိ၊ တာနိ ကုလာနိ ဌပေတွာ အညေသု ကုလေသု အာရောစေတိ၊ အာပတ္တိ ပါစိတ္တိယဿ.

အာပတ္တိပရိယန္တေ စ ကုလပရိယန္တေ စ ယာ အာပတ္တိယော ပရိဂ္ဂဟိတာယော ဟောန္တိ၊ တာ အာပတ္တိယော ဌပေတွာ ယာနိ ကုလာနိ ပရိဂ္ဂဟိတာနိ ဟောန္တိ၊ တာနိ ကုလာနိ ဌပေတွာ အညာဟိ အာပတ္တီဟိ အညေသု ကုလေသု အာရောစေတိ၊ အာပတ္တိ ပါစိတ္တိယဿ.

နေဝ အာပတ္တိပရိယန္တေ န ကုလပရိယန္တေ၊ အနာပတ္တိ.

၈၂. ဒုဋ္ဌုလ္လာယ အာပတ္တိယာ ဒုဋ္ဌုလ္လာပတ္တိသညီ အနုပသမ္ပန္နဿ အာရောစေတိ၊ အညတြ ဘိက္ခုသမ္မုတိယာ၊ အာပတ္တိ ပါစိတ္တိယဿ.

ဒုဋ္ဌုလ္လာယ အာပတ္တိယာ ဝေမတိကော အနုပသမ္ပန္နဿ အာရောစေတိ၊ အညတြ ဘိက္ခုသမ္မုတိယာ၊ အာပတ္တိ ပါစိတ္တိယဿ.

ဒုဋ္ဌုလ္လာယ အာပတ္တိယာ အဒုဋ္ဌုလ္လာပတ္တိသညီ အနုပသမ္ပန္နဿ အာရောစေတိ၊ အညတြ ဘိက္ခုသမ္မုတိယာ၊ အာပတ္တိ ပါစိတ္တိယဿ.

အဒုဋ္ဌုလ္လံ အာပတ္တိံ အာရောစေတိ၊ အာပတ္တိ ဒုက္ကဋဿ.

အနုပသမ္ပန္နဿ ဒုဋ္ဌုလ္လံ ဝါ အဒုဋ္ဌုလ္လံ ဝါ အဇ္ဈာစာရံ အာရောစေတိ၊ အာပတ္တိ ဒုက္ကဋဿ.

အဒုဋ္ဌုလ္လာယ အာပတ္တိယာ ဒုဋ္ဌုလ္လာပတ္တိသညီ၊ အာပတ္တိ ဒုက္ကဋဿ.

အဒုဋ္ဌုလ္လာယ အာပတ္တိယာ ဝေမတိကော၊ အာပတ္တိ ဒုက္ကဋဿ.

အဒုဋ္ဌုလ္လာယ အာပတ္တိယာ အဒုဋ္ဌုလ္လာပတ္တိသညီ၊ အာပတ္တိ ဒုက္ကဋဿ.

၈၃. အနာပတ္တိ ဝတ္ထုံ အာရောစေတိ နော အာပတ္တိံ၊ အာပတ္တိံ အာရောစေတိ နော ဝတ္ထုံ၊ ဘိက္ခုသမ္မုတိယာ၊ ဥမ္မတ္တကဿ၊ အာဒိကမ္မိကဿာတိ.

ဒုဋ္ဌုလ္လာရောစနသိက္ခာပဒံ နိဋ္ဌိတံ နဝမံ.