၇. ဓမ္မဒေသနာသိက္ခာပဒံ

၆၀. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ. တေန ခေါ ပန သမယေန အာယသ္မာ ဥဒါယီ သာဝတ္ထိယံ ကုလူပကော ဟောတိ၊ ဗဟုကာနိ ကုလာနိ ဥပသင်္ကမတိ. အထ ခေါ အာယသ္မာ ဥဒါယီ ပုဗ္ဗဏှသမယံ နိဝါသေတွာ ပတ္တစီဝရမာဒါယ ယေန အညတရံ ကုလံ တေနုပသင်္ကမိ. တေန ခေါ ပန သမယေန ဃရဏီ နိဝေသနဒွါရေ နိသိန္နာ ဟောတိ၊ ဃရသုဏှာ အာဝသထဒွါရေ နိသိန္နာ ဟောတိ. အထ ခေါ အာယသ္မာ ဥဒါယီ ယေန ဃရဏီ တေနုပသင်္ကမိ၊ ဥပသင်္ကမိတွာ ဃရဏိယာ ဥပကဏ္ဏကေ ဓမ္မံ ဒေသေသိ. အထ ခေါ ဃရသုဏှာယ ဧတဒဟောသိ – ‘‘ကိ နု ခေါ သော သမဏော သဿုယာ ဇာရော ဥဒါဟု ဩဘာသတီ’’တိ?

အထ ခေါ အာယသ္မာ ဥဒါယီ ဃရဏိယာ ဥပကဏ္ဏကေ ဓမ္မံ ဒေသေတွာ ယေန ဃရသုဏှာ တေနုပသင်္ကမိ၊ ဥပသင်္ကမိတွာ ဃရသုဏှာယ ဥပကဏ္ဏကေ ဓမ္မံ ဒေသေသိ. အထ ခေါ ဃရဏိယာ ဧတဒဟောသိ – ‘‘ကိံ နု ခေါ သော သမဏော ဃရသုဏှာယ ဇာရော ဥဒါဟု ဩဘာသတီ’’တိ? အထ ခေါ အာယသ္မာ ဥဒါယီ ဃရသုဏှာယ ဥပကဏ္ဏကေ ဓမ္မံ ဒေသေတွာ ပက္ကာမိ. အထ ခေါ ဃရဏီ ဃရသုဏှံ ဧတဒဝေါစ – ‘‘ဟေ ဇေ၊ ကိံ တေ ဧသော သမဏော အဝေါစာ’’တိ? ‘‘ဓမ္မံ မေ၊ အယျေ၊ ဒေသေသိ’’. ‘‘အယျာယ ပန ကိံ အဝေါစာ’’တိ? ‘‘မယှမ္ပိ ဓမ္မံ ဒေသေသီ’’တိ. တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ အယျော ဥဒါယီ မာတုဂါမဿ ဥပကဏ္ဏကေ ဓမ္မံ ဒေသေဿတိ! နနု နာမ ဝိဿဋ္ဌေန ဝိဝဋေန ဓမ္မော ဒေသေတဗ္ဗော’’တိ?

အဿောသုံ ခေါ ဘိက္ခူ တာသံ ဣတ္ထီနံ ဥဇ္ဈာယန္တီနံ ခိယျန္တီနံ ဝိပါစေန္တီနံ. ယေ တေ ဘိက္ခူ အပ္ပိစ္ဆာ။ပေ။ တေ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ အာယသ္မာ ဥဒါယီ မာတုဂါမဿ ဓမ္မံ ဒေသေဿတီ’’တိ! အထ ခေါ တေ ဘိက္ခူ အာယသ္မန္တံ ဥဒါယိံ အနေကပရိယာယေန ဝိဂရဟိတွာ ဘဂဝတော ဧတမတ္ထံ အာရောစေသုံ။ပေ။ ‘‘သစ္စံ ကိရ တွံ၊ ဥဒါယိ၊ မာတုဂါမဿ ဓမ္မံ ဒေသေသီ’’တိ? ‘‘သစ္စံ၊ ဘဂဝါ’’တိ. ဝိဂရဟိ ဗုဒ္ဓေါ ဘဂဝါ။ပေ။ ကထဉှိ နာမ တွံ၊ မောဃပုရိသ၊ မာတုဂါမဿ ဓမ္မံ ဒေသေဿသိ. နေတံ မောဃပုရိသ၊ အပ္ပသန္နာနံ ဝါ ပသာဒါယ။ပေ။ ဧဝဉ္စ ပန၊ ဘိက္ခဝေ၊ ဣမံ သိက္ခာပဒံ ဥဒ္ဒိသေယျာထ –

‘‘ယော ပန ဘိက္ခု မာတုဂါမဿ ဓမ္မံ ဒေသေယျ ပါစိတ္တိယ’’န္တိ.

ဧဝဉ္စိဒံ ဘဂဝတာ ဘိက္ခူနံ သိက္ခာပဒံ ပညတ္တံ ဟောတိ.

၆၁. တေန ခေါ ပန သမယေန ဥပါသိကာ ဘိက္ခူ ပဿိတွာ ဧတဒဝေါစုံ – ‘‘ဣင်္ဃာယျာ ဓမ္မံ ဒေသေထာ’’တိ. ‘‘န၊ ဘဂိနီ၊ ကပ္ပတိ မာတုဂါမဿ ဓမ္မံ ဒေသေတု’’န္တိ. ‘‘ဣင်္ဃာယျာ ဆပ္ပဉ္စဝါစာဟိ ဓမ္မံ ဒေသေထ၊ သက္ကာ ဧတ္တကေနပိ ဓမ္မော အညာတု’’န္တိ. ‘‘န၊ ဘဂိနီ၊ ကပ္ပတိ မာတုဂါမဿ ဓမ္မံ ဒေသေတု’’န္တိ. ကုက္ကုစ္စာယန္တာ န ဒေသေသုံ. ဥပါသိကာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ အယျာ အမှေဟိ ယာစိယမာနာ ဓမ္မံ န ဒေသေဿန္တီ’’တိ! အဿောသုံ ခေါ ဘိက္ခူ တာသံ ဥပါသိကာနံ ဥဇ္ဈာယန္တီနံ ခိယျန္တီနံ ဝိပါစေန္တီနံ. အထ ခေါ တေ ဘိက္ခူ ဘဂဝတော ဧတမတ္ထံ အာရောစေသုံ. အထ ခေါ ဘဂဝါ ဧတသ္မိံ နိဒါနေ ဧတသ္မိံ ပကရဏေ ဓမ္မိံ ကထံ ကတွာ ဘိက္ခူ အာမန္တေသိ – ‘‘အနုဇာနာမိ၊ ဘိက္ခဝေ၊ မာတုဂါမဿ ဆပ္ပဉ္စဝါစာဟိ ဓမ္မံ ဒေသေတုံ. ဧဝဉ္စ ပန၊ ဘိက္ခဝေ၊ ဣမံ သိက္ခာပဒံ ဥဒ္ဒိသေယျာထ –

‘‘ယော ပန ဘိက္ခူ မာတုဂါမဿ ဥတ္တရိဆပ္ပဉ္စဝါစာဟိ ဓမ္မံ ဒေသေယျ၊ ပါစိတ္တိယ’’န္တိ.

ဧဝဉ္စိဒံ ဘဂဝတာ ဘိက္ခူနံ သိက္ခာပဒံ ပညတ္တံ ဟောတိ.

၆၂. တေန ခေါ ပန သမယေန ဆဗ္ဗဂ္ဂိယာ ဘိက္ခူ – ‘‘ဘဂဝတာ အနုညာတံ မာတုဂါမဿ ဆပ္ပဉ္စဝါစာဟိ ဓမ္မံ ဒေသေတု’’န္တိ တေ အဝိညုံ ပုရိသဝိဂ္ဂဟံ ဥပနိသီဒါပေတွာ မာတုဂါမဿ ဥတ္တရိဆပ္ပဉ္စဝါစာဟိ ဓမ္မံ ဒေသေန္တိ. ယေ တေ ဘိက္ခူ အပ္ပိစ္ဆာ။ပေ။ တေ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဆဗ္ဗဂ္ဂိယာ ဘိက္ခူ အဝိညုံ ပုရိသဝိဂ္ဂဟံ ဥပနိသီဒါပေတွာ မာတုဂါမဿ ဥတ္တရိဆပ္ပဉ္စဝါစာဟိ ဓမ္မံ ဒေသေဿန္တီ’’တိ!

အထ ခေါ တေ ဘိက္ခူ ဆဗ္ဗဂ္ဂိယေ ဘိက္ခူ အနေကပရိယာယေန ဝိဂရဟိတွာ ဘဂဝတော ဧတမတ္ထံ အာရောစေသုံ။ပေ။ ‘‘သစ္စံ ကိရ တုမှေ၊ ဘိက္ခဝေ၊ အဝိညုံ ပုရိသဝိဂ္ဂဟံ ဥပနိသီဒါပေတွာ မာတုဂါမဿ ဥတ္တရိဆပ္ပဉ္စဝါစာဟိ ဓမ္မံ ဒေသေထာ’’တိ? ‘‘သစ္စံ၊ ဘဂဝါ’’တိ. ဝိဂရဟိ ဗုဒ္ဓေါ ဘဂဝါ။ပေ။ ကထဉှိ နာမ တုမှေ၊ မောဃပုရိသာ၊ အဝိညုံ ပုရိသဝိဂ္ဂဟံ ဥပနိသီဒါပေတွာ မာတုဂါမဿ ဥတ္တရိဆပ္ပဉ္စဝါစာဟိ ဓမ္မံ ဒေသေဿထ! နေတံ၊ မောဃပုရိသာ၊ အပ္ပသန္နာနံ ဝါ ပသာဒါယ။ပေ။ ဧဝဉ္စ ပန၊ ဘိက္ခဝေ၊ ဣမံ သိက္ခာပဒံ ဥဒ္ဒိသေယျာထ –

၆၃. ‘‘ယော ပန ဘိက္ခု မာတုဂါမဿ ဥတ္တရိဆပ္ပဉ္စဝါစာဟိ ဓမ္မံ ဒေသေယျ၊ အညတြ ဝိညုနာ ပုရိသဝိဂ္ဂဟေန၊ ပါစိတ္တိယ’’န္တိ.

၆၄. ယော ပနာတိ ယော ယာဒိသော။ပေ။ ဘိက္ခူတိ။ပေ။ အယံ ဣမသ္မိံ အတ္ထေ အဓိပ္ပေတော ဘိက္ခူတိ.

မာတုဂါမော နာမ မနုဿိတ္ထီ၊ န ယက္ခီ န ပေတီ န တိရစ္ဆာနဂတာ၊ ဝိညူ၊ ပဋိဗလာ သုဘာသိတဒုဗ္ဘာသိတံ ဒုဋ္ဌုလ္လာဒုဋ္ဌုလ္လံ အာဇာနိတုံ.

ဥတ္တရိဆပ္ပဉ္စဝါစာဟီတိ အတိရေကဆပ္ပဉ္စဝါစာဟိ.

ဓမ္မော နာမ ဗုဒ္ဓဘာသိတော၊ သာဝကဘာသိတော၊ ဣသိဘာသိတော၊ ဒေဝတာဘာသိတော၊ အတ္ထူပသဉှိတော၊ ဓမ္မူပသဉှိတော.

ဒေသေယျာတိ ပဒေန ဒေသေတိ၊ ပဒေ ပဒေ အာပတ္တိ ပါစိတ္တိယဿ. အက္ခရာယ ဒေသေတိ၊ အက္ခရက္ခရာယ အာပတ္တိ ပါစိတ္တိယဿ.

အညတြ ဝိညုနာ ပုရိသဝိဂ္ဂဟေနာတိ ဌပေတွာ ဝိညုံ ပုရိသဝိဂ္ဂဟံ. ဝိညူ နာမ ပုရိသဝိဂ္ဂဟော၊ ပဋိဗလော ဟောတိ သုဘာသိတဒုဗ္ဘာသိတံ ဒုဋ္ဌုလ္လာဒုဋ္ဌုလ္လံ အာဇာနိတုံ.

၆၅. မာတုဂါမေ မာတုဂါမသညီ ဥတ္တရိဆပ္ပဉ္စဝါစာဟိ ဓမ္မံ ဒေသေတိ၊ အညတြ ဝိညုနာ ပုရိသဝိဂ္ဂဟေန၊ အာပတ္တိ ပါစိတ္တိယဿ. မာတုဂါမေ ဝေမတိကော ဥတ္တရိဆပ္ပဉ္စဝါစာဟိ ဓမ္မံ ဒေသေတိ၊ အညတြ ဝိညုနာ ပုရိသဝိဂ္ဂဟေန၊ အာပတ္တိ ပါစိတ္တိယဿ. မာတုဂါမေ အမာတုဂါမသညီ ဥတ္တရိဆပ္ပဉ္စဝါစာဟိ ဓမ္မံ ဒေသေတိ၊ အညတြ ဝိညုနာ ပုရိသဝိဂ္ဂဟေန၊ အာပတ္တိ ပါစိတ္တိယဿ.

ယက္ခိယာ ဝါ ပေတိယာ ဝါ ပဏ္ဍကဿ ဝါ တိရစ္ဆာနဂတမနုဿဝိဂ္ဂဟိတ္ထိယာ ဝါ ဥတ္တရိဆပ္ပဉ္စဝါစာဟိ ဓမ္မံ ဒေသေတိ၊ အညတြ ဝိညုနာ ပုရိသဝိဂ္ဂဟေန၊ အာပတ္တိ ဒုက္ကဋဿ. အမာတုဂါမေ မာတုဂါမသညီ၊ အာပတ္တိ ဒုက္ကဋဿ. အမာတုဂါမေ ဝေမတိကော၊ အာပတ္တိ ဒုက္ကဋဿ. အမာတုဂါမေ အမာတုဂါမသညီ၊ အနာပတ္တိ.

၆၆. အနာပတ္တိ ဝိညုနာ ပုရိသဝိဂ္ဂဟေန၊ ဆပ္ပဉ္စဝါစာဟိ ဓမ္မံ ဒေသေတိ၊ ဦနကဆပ္ပဉ္စဝါစာဟိ ဓမ္မံ ဒေသေတိ၊ ဥဋ္ဌဟိတွာ ပုန နိသီဒိတွာ ဒေသေတိ၊ မာတုဂါမော ဥဋ္ဌဟိတွာ ပုန နိသီဒတိ တသ္မိံ ဒေသေတိ၊ အညဿ မာတုဂါမဿ ဒေသေတိ၊ ပဉှံ ပုစ္ဆတိ၊ ပဉှံ ပုဋ္ဌော ကထေတိ၊ အညဿတ္ထာယ ဘဏန္တံ မာတုဂါမော သုဏာတိ၊ ဥမ္မတ္တကဿ၊ အာဒိကမ္မိကဿာတိ.

ဓမ္မဒေသနာသိက္ခာပဒံ နိဋ္ဌိတံ သတ္တမံ.