၂၆၇. အဒဿနေ ဥက္ခေပနီယကမ္မပဋိပ္ပဿဒ္ဓိကထာ

၄၄၈. ဣဓ ပန၊ ဘိက္ခဝေ၊ ဘိက္ခု သံဃေန အာပတ္တိယာ အဒဿနေ ဥက္ခေပနီယကမ္မကတော သမ္မာ ဝတ္တတိ၊ လောမံ ပါတေတိ၊ နေတ္ထာရံ ဝတ္တတိ၊ အာပတ္တိယာ အဒဿနေ ဥက္ခေပနီယဿ ကမ္မဿ ပဋိပ္ပဿဒ္ဓိံ ယာစတိ. တတြ စေ ဘိက္ခူနံ ဧဝံ ဟောတိ – ‘‘အယံ ခေါ၊ အာဝုသော၊ ဘိက္ခု သံဃေန အာပတ္တိယာ အဒဿနေ ဥက္ခေပနီယကမ္မကတော သမ္မာ ဝတ္တတိ၊ လောမံ ပါတေတိ၊ နေတ္ထာရံ ဝတ္တတိ၊ အာပတ္တိယာ အဒဿနေ ဥက္ခေပနီယဿ ကမ္မဿ ပဋိပ္ပဿဒ္ဓိံ ယာစတိ. ဟန္ဒဿ မယံ အာပတ္တိယာ အဒဿနေ ဥက္ခေပနီယကမ္မံ ပဋိပ္ပဿမ္ဘေမာ’’တိ. တေ တဿ အာပတ္တိယာ အဒဿနေ ဥက္ခေပနီယကမ္မံ ပဋိပ္ပဿမ္ဘေန္တိ – အဓမ္မေန ဝဂ္ဂါ။ပေ။ အဓမ္မေန သမဂ္ဂါ။ ဓမ္မေန ဝဂ္ဂါ။ ဓမ္မပတိရူပကေန ဝဂ္ဂါ။ ဓမ္မပတိရူပကေန သမဂ္ဂါ. တတြဋ္ဌော သံဃော ဝိဝဒတိ – ‘‘အဓမ္မေန ဝဂ္ဂကမ္မံ၊ အဓမ္မေန သမဂ္ဂကမ္မံ၊ ဓမ္မေန ဝဂ္ဂကမ္မံ၊ ဓမ္မပတိရူပကေန ဝဂ္ဂကမ္မံ၊ ဓမ္မပတိရူပကေန သမဂ္ဂကမ္မံ၊ အကတံ ကမ္မံ ဒုက္ကဋံ ကမ္မံ ပုန ကာတဗ္ဗံ ကမ္မ’’န္တိ. တတြ၊ ဘိက္ခဝေ၊ ယေ တေ ဘိက္ခူ ဧဝမာဟံသု – ‘‘ဓမ္မပတိရူပကေန သမဂ္ဂကမ္မ’’န္တိ၊ ယေ စ တေ ဘိက္ခူ ဧဝမာဟံသု – ‘‘အကတံ ကမ္မံ ဒုက္ကဋံ ကမ္မံ ပုန ကာတဗ္ဗံ ကမ္မ’’န္တိ၊ ဣမေ တတ္ထ ဘိက္ခူ ဓမ္မဝါဒိနော. ဣမေပိ ပဉ္စ ဝါရာ သံခိတ္တာ.

အဒဿနေ ဥက္ခေပနီယကမ္မပဋိပ္ပဿဒ္ဓိကထာ နိဋ္ဌိတာ.